1 ಕಪ್ ಗೋಧಿ ಸಾಕು! ಮನೆಯಲ್ಲೇ ಈ ಪೌಷ್ಟಿಕ ಪಾಯಸ ಮಾಡಿ.. ಈ ರೀತಿ ನೀವೆಂದು ಮಾಡಿರಲ್ಲ

ಸ್ವೀಟ್ ಎಂದರೆ ಯಾರಿಗೆ ತಾನೇ ಇಷ್ಟವಿಲ್ಲ ಹೇಳಿ. ಆದರೆ, ಆರೋಗ್ಯದ ಬಗ್ಗೆ ಕಾಳಜಿ ಇರುವವರಿಗೆ ಸಿಹಿ ಪದಾರ್ಥಗಳು ಎಂದಿಗೂ ಸಮಸ್ಯೆಯೇ. ಹಾಗೆಂದು ಸಿಹಿಯಿಂದ ದೂರ ಇರಬೇಕೆಂದಿಲ್ಲ. ಸಕ್ಕರೆ ಮತ್ತು ಎಣ್ಣೆಯಿರುವ ಸಿಹಿತಿಂಡಿಗಳ ಬದಲಿಗೆ, ಪೌಷ್ಟಿಕಾಂಶ ಭರಿತ ಮತ್ತು ರುಚಿಕರವಾದ ತಿನಿಸುಗಳನ್ನು ಮನೆಯಲ್ಲೇ ತಯಾರಿಸಬಹುದು. ಅಂತಹ ಒಂದು ಉತ್ತಮ ಆಯ್ಕೆ ಗೋಧಿ ಪಾಯಸ (hot wheat payasa). ಇದು ಸಾಂಪ್ರದಾಯಿಕ ಸಿಹಿ ಖಾದ್ಯವಾಗಿದ್ದು, ಮಕ್ಕಳು-ದೊಡ್ಡವರೆಲ್ಲರೂ ಇಷ್ಟಪಡುತ್ತಾರೆ.

ಗೋಧಿಯ (wheat) ನೈಸರ್ಗಿಕ ರುಚಿ, ಬೆಲ್ಲದ ಸಿಹಿ ಮತ್ತು ತುಪ್ಪದ ಪರಿಮಳವು ಸೇರಿ ಈ ಪಾಯಸವನ್ನು ಅತ್ಯಂತ ವಿಶೇಷವಾಗಿಸುತ್ತದೆ. ಬಿಸಿ ಬಿಸಿಯಾದ ಮತ್ತು ಪೌಷ್ಟಿಕ ಗೋಧಿ ಪಾಯಸವನ್ನು ಸುಲಭವಾಗಿ ಮನೆಯಲ್ಲಿ ಹೇಗೆ ತಯಾರಿಸುವುದು ಎಂಬ ಬಗ್ಗೆ ಇಲ್ಲಿದೆ ಸಂಪೂರ್ಣ ಮಾಹಿತಿ.

ಗೋಧಿ ಪಾಯಸದ ಪ್ರಯೋಜನಗಳು

• ಗೋಧಿ ಪಾಯಸ ಕೇವಲ ರುಚಿಕರ ಮಾತ್ರವಲ್ಲ, ಇದು ಹಲವು ಆರೋಗ್ಯಕರ ಪ್ರಯೋಜನಗಳನ್ನೂ ಹೊಂದಿದೆ.

• ಗೋಧಿಯಲ್ಲಿ ನಾರಿನಾಂಶ ಸಮೃದ್ಧವಾಗಿದೆ. ಇದು ಜೀರ್ಣಕ್ರಿಯೆಗೆ ಸಹಕಾರಿಯಾಗಿದ್ದು, ಕರುಳಿನ ಆರೋಗ್ಯವನ್ನು ಸುಧಾರಿಸುತ್ತದೆ ಹಾಗೂ ಮಲಬದ್ಧತೆಯನ್ನು ತಡೆಯುತ್ತದೆ.

• ಗೋಧಿಯು ಪ್ರೋಟೀನ್, ವಿಟಮಿನ್‌ಗಳು ಮತ್ತು ಕಬ್ಬಿಣದಂತಹ ಖನಿಜಗಳ ಉತ್ತಮ ಮೂಲವಾಗಿದೆ. ಇದು ದೇಹಕ್ಕೆ ಅಗತ್ಯವಾದ ಶಕ್ತಿ ಮತ್ತು ಪೋಷಣೆಯನ್ನು ಒದಗಿಸುತ್ತದೆ.

• ಈ ಪಾಯಸಕ್ಕೆ ಸಕ್ಕರೆಯ ಬದಲಾಗಿ ಬೆಲ್ಲವನ್ನು ಬಳಸುವುದರಿಂದ, ಸಕ್ಕರೆಯಿಂದಾಗುವ ಹಾನಿಯನ್ನು ಕಡಿಮೆ ಮಾಡಬಹುದು. ಬೆಲ್ಲದಲ್ಲಿ ಕಬ್ಬಿಣಾಂಶ ಮತ್ತು ಖನಿಜಗಳಿವೆ. ಇದು ಪಾಯಸಕ್ಕೆ ವಿಶಿಷ್ಟವಾದ ಕಂದು ಬಣ್ಣ ಮತ್ತು ಆಳವಾದ ಸಿಹಿ ರುಚಿಯನ್ನು ನೀಡುತ್ತದೆ.

ಗೋಧಿ ಪಾಯಸ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಗೋಧಿ
• ಹಾಲು
• ಬೆಲ್ಲ ಅಥವಾ ಸಕ್ಕರೆ
• ತುಪ್ಪ
• ಗೋಡಂಬಿ
• ಬಾದಾಮಿ
• ಒಣ ದ್ರಾಕ್ಷಿ
• ಏಲಕ್ಕಿ ಪುಡಿ

ಗೋಧಿ ಪಾಯಸ ಮಾಡುವ ವಿಧಾನ

ಮೊದಲಿಗೆ, ಅರ್ಧ ಕಪ್ ಗೋಧಿಯನ್ನು ಚೆನ್ನಾಗಿ ತೊಳೆಯಿರಿ. ಇದನ್ನು ರಾತ್ರಿಯಿಡೀ ಅಥವಾ ಕನಿಷ್ಠ 6 ರಿಂದ 8 ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ. ಹೀಗೆ ಮಾಡುವುದರಿಂದ ಗೋಧಿ ಬೇಗನೆ ಬೇಯುತ್ತದೆ. ಪಾಯಸ ಮೃದುವಾಗಿರುತ್ತದೆ. ಮರುದಿನ ಬೆಳಗ್ಗೆ, ನೀರನ್ನು ಬಸಿದು ಸ್ವಚ್ಛವಾದ ಗೋಧಿಯನ್ನು ಪ್ರತ್ಯೇಕವಾಗಿ ಇಟ್ಟುಕೊಳ್ಳಿ.

ನೆನೆಸಿದ ಗೋಧಿಯನ್ನು ಪ್ರೆಶರ್ ಕುಕ್ಕರ್‌ಗೆ ಹಾಕಿ, ಅದಕ್ಕೆ ಸುಮಾರು 1.5 ಕಪ್ ನೀರು ಸೇರಿಸಿ. ಸುಮಾರು 5 ಸೀಟಿಗಳವರೆಗೆ ಅಥವಾ ಗೋಧಿ ಸಂಪೂರ್ಣವಾಗಿ ಮೃದುವಾಗುವವರೆಗೆ ಬೇಯಿಸಿ. ಗೋಧಿ ತಣ್ಣಗಾದ ನಂತರ, ಅದನ್ನು ಸ್ವಲ್ಪ ಮಸೆದು ಮುದ್ದೆಯಾಗುವಂತೆ ಮಾಡಿ.

ಈಗ ಹಾಲು ಮತ್ತು ಬೆಲ್ಲದ ಮಿಶ್ರಣ ತಯಾರಿಸಿ. ಒಂದು ಪಾತ್ರೆಯಲ್ಲಿ 2 ಕಪ್ ಹಾಲನ್ನು ಕುದಿಯಲು ಇಡಿ. ಹಾಲು ಕುದಿಯಲು ಪ್ರಾರಂಭಿಸಿದಾಗ, ಅದಕ್ಕೆ ಬೇಯಿಸಿದ ಗೋಧಿ ಮಿಶ್ರಣವನ್ನು ಸೇರಿಸಿ. ಯಾವುದೇ ಗಂಟುಗಳಾಗದಂತೆ ಸೌಟಿನಿಂದ ಚೆನ್ನಾಗಿ ಕಲಸಿ. ಈ ಮಿಶ್ರಣವನ್ನು ಮಧ್ಯಮ ಉರಿಯಲ್ಲಿ ಸುಮಾರು 5 ನಿಮಿಷಗಳ ಕಾಲ ಕುದಿಸಿ.

ಇನ್ನೊಂದು ಪಾತ್ರೆಯಲ್ಲಿ ಅರ್ಧ ಕಪ್ ಬೆಲ್ಲಕ್ಕೆ ಸ್ವಲ್ಪ ನೀರು ಸೇರಿಸಿ ಬಿಸಿ ಮಾಡಿ. ಬೆಲ್ಲ ಸಂಪೂರ್ಣವಾಗಿ ಕರಗಿದ ನಂತರ ಅದನ್ನು ಸೋಸಿ, ಹಾಲು ಮತ್ತು ಗೋಧಿಯ ಮಿಶ್ರಣಕ್ಕೆ ಸೇರಿಸಿ. ಬೆಲ್ಲವನ್ನು ನೇರವಾಗಿ ಹಾಲಿಗೆ ಸೇರಿಸಿದರೆ ಹಾಲು ಒಡೆಯುವ ಸಾಧ್ಯತೆ ಇರುತ್ತದೆ. ಮಿಶ್ರಣವು ನಿಮಗೆ ಬೇಕಾದಷ್ಟು ದಪ್ಪವಾಗುವವರೆಗೆ ಬೇಯಿಸಿ.

ಈಗ ಒಂದು ಸಣ್ಣ ಬಾಣಲೆಯಲ್ಲಿ ಒಂದು ಚಮಚ ತುಪ್ಪ ಬಿಸಿ ಮಾಡಿ. ತುಪ್ಪ ಕಾದ ನಂತರ, ಗೋಡಂಬಿ ಮತ್ತು ಬಾದಾಮಿ ಹಾಕಿ ತಿಳಿ ಕಂದು ಬಣ್ಣ ಬರುವವರೆಗೆ ಹುರಿಯಿರಿ. ನಂತರ ಒಣ ದ್ರಾಕ್ಷಿಗಳನ್ನು ಹಾಕಿ ಹುರಿಯಿರಿ. ಹುರಿದ ಈ ಪದಾರ್ಥಗಳನ್ನು ತಯಾರಾದ ಪಾಯಸಕ್ಕೆ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಕೊನೆಯಲ್ಲಿ ಏಲಕ್ಕಿ ಪುಡಿ ಸೇರಿಸಿ. ಇಷ್ಟು ಮಾಡಿದರೆ ಬಿಸಿ ಬಿಸಿಯಾದ ಸಿಹಿ ಗೋಧಿ ಪಾಯಸ ಸಿದ್ಧ. ಇದನ್ನು ಹಬ್ಬ ಹರಿದಿನಗಳಲ್ಲಿ ಅಥವಾ ಸಂಜೆಯ ತಿಂಡಿಯಾಗಿ ತಯಾರಿಸಬಹುದು.