ಕಡಿಮೆ ಎಣ್ಣೆ, ಹೆಚ್ಚು ಟೇಸ್ಟಿ! ಮೈಸೂರು ಸ್ಟೈಲ್‌ ಕ್ರಿಸ್ಪಿ ಬೋಂಡಾ.. ಟೀ ಜೊತೆ ಬೆಸ್ಟ್ ಕಂಬಿನೇಶನ್

ಕಡಿಮೆ ಎಣ್ಣೆ, ಹೆಚ್ಚು ರುಚಿ! ಚಹಾ ಜೊತೆ ಈ ಬೋಂಡಾ ಕಂಬಿನೇಶನ್ ಅದ್ಭುತ. ಇಲ್ಲಿದೆ ಮೈಸೂರು ಸ್ಟೈಲ್‌ನ ಕ್ರಿಸ್ಪಿ ಬೋಂಡಾ (Mysore Bonda) ರೆಸಿಪಿ. ಹೌದು, ನಾವಿಂದು ಈ ಲೇಖನದಲ್ಲಿ ಕಡಿಮೆ ಎಣ್ಣೆಯಲ್ಲಿ ರುಚಿಕರವಾದ ಮೈಸೂರು ಬೋಂಡಾವನ್ನು ಹೇಗೆ ತಯಾರಿಸುವುದು (Mysore Bonda Recipe) ಎಂಬುದನ್ನು ತಿಳಿಸಲಿದ್ದೇವೆ. ಮೊಸರು, ಮೈದಾ ಹಿಟ್ಟು ಮತ್ತು ಇತರ ಪದಾರ್ಥಗಳನ್ನು ಬಳಸಿ, ಎಣ್ಣೆ ಹೀರಿಕೊಳ್ಳುವುದನ್ನು ಕಡಿಮೆ ಮಾಡುವ ಸೀಕ್ರೆಟ್ ಇದು. ಈ ಮೂಲಕ ಹೆಲ್ದಿ ಮತ್ತು ಟೇಸ್ಟಿ ಮೈಸೂರು ಬೋಂಡಾವನ್ನು ಮನೆಯಲ್ಲಿಯೇ ಸುಲಭವಾಗಿ ತಯಾರಿಸಬಹುದು. ಕಡಿಮೆ ಸಮಯದಲ್ಲಿಯೂ ಇದು ಸೂಕ್ತವಾದ, ತ್ವರಿತ ಮತ್ತು ಸುಲಭ ವಿಧಾನವಾಗಿದೆ. ಈ ಹೆಲ್ದಿ ಬೋಂಡಾ ಮಿಸ್ ಮಾಡ್ಬೇಡಿ.

ಮಳೆಗಾಲದಲ್ಲಿ ಸಂಜೆ ಏನಾದರೂ ಬಿಸಿಬಿಸಿಯಾಗಿ ತಿನ್ನಬೇಕು ಎನಿಸುತ್ತದೆ. ಆದರೆ, ಪ್ರತಿದಿನ ಎಣ್ಣೆ ಪದಾರ್ಥಗಳನ್ನು ತಿನ್ನುವುದು ಒಳ್ಳೆಯದಲ್ಲ. ಸಾಮಾನ್ಯವಾಗಿ ನಮಗೆ ಇಷ್ಟವಾದ ಆಹಾರವನ್ನು ಅಂಗಡಿಗಳಲ್ಲಿ ಅಥವಾ ಬೀದಿ ಬದಿಯಲ್ಲಿ ಖರೀದಿಸಿ ತಿನ್ನುತ್ತೇವೆ. ಕೆಲವೊಮ್ಮೆ ಮನೆಯಲ್ಲಿಯೇ ತಯಾರಿಸಿ ತಿನ್ನುತ್ತೇವೆ. ಸಮಯದ ಅಭಾವದಿಂದಾಗಿ ಅಂಗಡಿಗಳಲ್ಲಿ ತಯಾರಿಸಿದ ಆಹಾರವನ್ನು ಹೆಚ್ಚಾಗಿ ತಿನ್ನುವುದು ಆರೋಗ್ಯಕ್ಕೆ ಹಾನಿಕಾರಕ. ಮೈಸೂರು ಬೋಂಡಾ ಅಂತಹ ರುಚಿಕರವಾದ ಎಣ್ಣೆಭರಿತ ತಿಂಡಿಗಳಲ್ಲಿ ಒಂದಾಗಿದೆ. ಹಾಗಾದ್ರೆ, ಹೆಚ್ಚು ಎಣ್ಣೆ ಹೀರಿಕೊಳ್ಳದಂತೆ ಮನೆಯಲ್ಲಿಯೇ ಸುಲಭವಾಗಿ ಮೈಸೂರು ಬೋಂಡಾ ಮಾಡುವುದು ಹೇಗೆ? ಎಂದು ತಿಳಿಯೋಣ ಬನ್ನಿ.

ಮೈಸೂರು ಬೋಂಡಾ ಮಾಡಲು ಬೇಕಾಗುವ ಪದಾರ್ಥಗಳು

• ಮೊಸರು - 1 ಕಪ್
• ಮೈದಾ ಹಿಟ್ಟು - 1 ಕಪ್
• ಅಡುಗೆ ಸೋಡಾ - ½ ಸ್ಪೂನ್
• ಜೀರಿಗೆ - 1 ಟೀಸ್ಪೂನ್
• ಕರಿಬೇವಿನ ಸೊಪ್ಪು - 1 ಕಟ್ಟು
• ಶುಂಠಿ - 1 ಸ್ಪೂನ್
• ಹಸಿ ಮೆಣಸಿನಕಾಯಿ - 3
• ಉಪ್ಪು - ರುಚಿಗೆ ತಕ್ಕಷ್ಟು
• ಬಿಸಿ ನೀರು - ಅಗತ್ಯಕ್ಕೆ ತಕ್ಕಷ್ಟು
• ಎಣ್ಣೆ - 1 ಸ್ಪೂನ್ ಅಥವಾ ಕರಿಯಲು ಅಗತ್ಯವಿರುವಷ್ಟು

ಮೈಸೂರು ಬೋಂಡಾ ಮಾಡುವ ವಿಧಾನ

ಮೊದಲಿಗೆ ಒಂದು ಪಾತ್ರೆಯನ್ನು ತೆಗೆದುಕೊಂಡು ಅದರಲ್ಲಿ ಮೊಸರು ಹಾಕಿ, ಸುಮಾರು 5 ನಿಮಿಷಗಳ ಕಾಲ ಚೆನ್ನಾಗಿ ಕಲಸಿ. ಹೀಗೆ ಮಾಡುವುದರಿಂದ ಮೊಸರು ಗಟ್ಟಿಯಾಗಿರುವುದಿಲ್ಲ. ಇದು ಮೃದು ಮತ್ತು ಕೆನೆಯಂತೆ ಆಗುತ್ತದೆ. ಹೀಗೆ ಮಾಡುವುದರಿಂದ ಮೊಸರು ಹಿಟ್ಟಿನೊಂದಿಗೆ ಚೆನ್ನಾಗಿ ಬೆರೆಯುತ್ತದೆ. ಈಗ ರುಚಿಗೆ ತಕ್ಕಷ್ಟು ಉಪ್ಪು, ಅಡುಗೆ ಸೋಡಾ ಮತ್ತು ಒಂದು ಸ್ಪೂನ್ ಎಣ್ಣೆ ಹಾಕಿ. ಇವು ಮೊಸರಿನೊಂದಿಗೆ ಚೆನ್ನಾಗಿ ಬೆರೆಯುವವರೆಗೆ ಚೆನ್ನಾಗಿ ಮಿಕ್ಸ್ ಮಾಡಿ.

ಈಗ ಮೊಸರಿನಲ್ಲಿ ಕೆಲವು ಗುಳ್ಳೆಗಳು ಕಾಣಿಸಿಕೊಳ್ಳುತ್ತವೆ. ಅದು ಹತ್ತಿಯಂತಾಗುತ್ತದೆ. ಬಳಿಕ, ಅದಕ್ಕೆ ಮೈದಾ ಹಿಟ್ಟನ್ನು ಬೆರೆಸಿ. ಮೈದಾ ಹಿಟ್ಟನ್ನು ಸೇರಿಸಿದ ನಂತರ, ಸ್ವಲ್ಪ ಬಿಸಿ ನೀರನ್ನು ಹಾಕಿ ಹಿಟ್ಟನ್ನು ಕಲಸಿ. ಹಿಟ್ಟನ್ನು ಬಿಸಿ ನೀರಿನಲ್ಲಿ ಕಲಸಿದರೆ, ಅದು ಬೇಗನೆ ಹುಳಿಯುತ್ತದೆ. ನಂತರ, ಗಂಟಿಲ್ಲದಂತೆ ಹಿಟ್ಟು ಗಟ್ಟಿಯಾಗುವವರೆಗೆ ಕಲಸಿ. ಸ್ವಲ್ಪ ಸ್ವಲ್ಪ ನೀರು ಸೇರಿಸುವುದರಿಂದ, ಹೆಚ್ಚು ನೀರು ಬೇಕಾಗುವುದಿಲ್ಲ. ಹೆಚ್ಚು ನೀರು ಬಳಸಿದರೆ, ಎಣ್ಣೆ ಹೆಚ್ಚಾಗಿ ಹೀರಿಕೊಳ್ಳುತ್ತದೆ. ಆದ್ದರಿಂದ, ಇವುಗಳನ್ನು ಸರಿಯಾಗಿ ಮಿಕ್ಸ್ ಮಾಡುವುದು ಮುಖ್ಯ.

ಹಿಟ್ಟಿನ ಮಧ್ಯದಲ್ಲಿ ಗಾಳಿ ಆಡುವುದರಿಂದ, ಹಿಟ್ಟು ಚೆನ್ನಾಗಿ ಬೇಯುತ್ತದೆ. ಹೀಗೆ ಕಲಸಿದ ಹಿಟ್ಟಿಗೆ ಜೀರಿಗೆ, ಕರಿಬೇವಿನ ಸೊಪ್ಪು, ಹಸಿ ಮೆಣಸಿನಕಾಯಿ, ಶುಂಠಿ ಹಾಕಿ. ಮತ್ತೊಮ್ಮೆ ಹಿಟ್ಟನ್ನು ಚೆನ್ನಾಗಿ ಕಲಸಿ. ಹೀಗೆ ಕಲಸಿದ ಹಿಟ್ಟನ್ನು ಅರ್ಧ ಗಂಟೆಯಿಂದ ಒಂದು ಗಂಟೆಯವರೆಗೆ ಹಾಗೆಯೇ ಇಡಿ. ಈಗ ಒಲೆ ಹಚ್ಚಿ, ಅದರ ಮೇಲೆ ಒಂದು ಬಾಣಲೆಯನ್ನು ಇಡಿ. ಬಾಣಲೆ ಬಿಸಿಯಾದ ನಂತರ ಬೋಂಡಾವನ್ನು ಕರಿಯಲು ಅಗತ್ಯವಿರುವಷ್ಟು ಎಣ್ಣೆಯನ್ನು ಹಾಕಿ.

ಎಣ್ಣೆ ಬಿಸಿಯಾದ ನಂತರ, ಉರಿ ಮಧ್ಯಮವಾಗಿರಲಿ. ಮಿಕ್ಸಿಂಗ್ ಬೌಲ್ ತೆಗೆದುಕೊಂಡು ಹಿಟ್ಟನ್ನು ಕಲಕದೆಯೇ ನಿಮ್ಮ ಕೈಗಳಿಗೆ ಸ್ವಲ್ಪ ನೀರು ಸವರಿಕೊಳ್ಳಿ. ಹಿಟ್ಟನ್ನು ತುದಿಯಿಂದ ತೆಗೆದು ಉಂಡೆಗಳನ್ನು ತಯಾರಿಸಿ. ಮೊದಲು ಸ್ವಲ್ಪ ಸ್ವಲ್ಪ ಬೋಂಡಾವನ್ನು ಹಾಕಿದ ನಂತರ ಉರಿಯನ್ನು ಹೆಚ್ಚಿಸಿ. ಉಂಡೆಗಳನ್ನು ಎಲ್ಲಾ ಕಡೆಗಳಲ್ಲಿ ಚೆನ್ನಾಗಿ ಕರಿಯಿರಿ. ಇಷ್ಟು ಮಾಡಿದರೆ ಸಾಕು, ರುಚಿಕರವಾದ ಮೈಸೂರು ಬೋಂಡಾ ಸವಿಯಲು ಸಿದ್ಧ. ಇವುಗಳನ್ನು ನಿಮಗೆ ಇಷ್ಟವಾದ ಚಟ್ನಿಯೊಂದಿಗೆ ತಿನ್ನಬಹುದು. ಈ ಬೋಂಡಾವನ್ನು ಮಳೆಗಾಲದಲ್ಲಿ ಸಂಜೆ ಟೀ ಜೊತೆಗೆ ಸವಿದರೆ ಅದರ ಮಜವೇ ಬೇರೆ.