ಗ್ರೀನ್ ಮಸಾಲ ಚಕ್ಕುಲಿ ಮಾಡೋದು ಹೇಗೆ ಗೊತ್ತಾ? 15 ನಿಮಿಷದಲ್ಲಿ ಮಾಡಬಹುದು!!

ನೀವು ಮನೆಯಲ್ಲಿ ಫ್ರೀ ಆಗಿದ್ದಾಗ ಸಂಜೆ ಸಮಯದಲ್ಲಿ ಸವಿಯಲು ಒಂದಿಷ್ಟು ತಿಂಡಿ ಮಾಡುವ ಅಭ್ಯಾಸ ಇಟ್ಟುಕೊಂಡಿರುತ್ತೀರಿ. ಹಾಗೆ ಕರಿದು ಸವಿಯುವ ಎಲ್ಲರಿಗೂ ಇಷ್ಟವಾಗುವಂತಹ ಚಕ್ಕುಲಿಯನ್ನು ಯಾವಾಗಲು ಮಾಡುತ್ತಿದ್ದರೆ ಸಂಜೆ ಸಮಯದಲ್ಲಿ ಸವಿಯಲು ಇಷ್ಟವಾಗುತ್ತೆ. ಚಕ್ಕುಲಿಗಳಲ್ಲಿಯೂ ಈಗ ಹತ್ತು ಹಲವು ಬಗೆಯನ್ನು ನಾವಿಂಗ ನೋಡಬಹುದು, ಮಾರುಕಟ್ಟೆಯಲ್ಲಿ ರುಚಿ ರುಚಿಯ ಚಕ್ಕುಲಿಗಳು ಗಮನ ಸೆಳೆಯುತ್ತವೆ.

ಮನೆಯಲ್ಲಿ ಶುಭ ಕಾರ್ಯಕ್ಕೆ, ಹಬ್ಬದ ಸಮಯದಲ್ಲಿ ಚಕ್ಕುಲಿ ಮಾಡುವುದು ಸಾಮಾನ್ಯ. ಹಬ್ಬದ ಊಟ ಅಂದ್ರೆ ಅದರಲ್ಲಿ ಚಕ್ಕುಲಿ ಇದ್ದರೆ ಬಹಳ ರುಚಿಯಾಗುತ್ತೆ. ಹಾಗೆ ಸಂಜೆ ಸಮಯದಲ್ಲಿ ಸವಿಯಲು ಕೂಡ ಚಕ್ಕುಲಿ ಇದ್ದರೆ ಟೈಮ್ ಪಾಸ್‌ಗೆ ಒಳ್ಳೆಯ ತಿಂಡಿ. ಮಕ್ಕಳು ಕೂಡ ಚಕ್ಕುಲಿಯನ್ನ ಇಷ್ಟಪಟ್ಟು ಸವಿಯುತ್ತಾರೆ. ಹಾಗೆ ತಿಂಗಳಗಳ ಕಾಲ ಇಟ್ಟು ಸವಿಯಬಹುದು.

ಅದರಲ್ಲೂ ಚಕ್ಕುಲಿಯನ್ನು ಸುಲಭವಾಗಿ ಮಾಡಬಹುದು. ಕೆಲವೇ ವಸ್ತುಗಳ ಬಳಸಿಕೊಂಡು ಈ ತಿಂಡಿ ಮಾಡಬಹುದು. ಹಾಗಾದ್ರೆ ಈ ಚಕ್ಕುಲಿ ಮಾಡುವುದು ಹೇಗೆ? ಮಾಡುವ ವಿಧಾನವೇನು? ಚಕ್ಕುಲಿ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ. ಅದರಲ್ಲೂ ಕಲರ್‌ಫುಲ್ ಚಕ್ಕುಲಿ ಮಾಡುವುದು ಹೇಗೆ ಅನ್ನೋದನ್ನು ನೋಡೋಣ.

ಚಕ್ಕುಲಿ ಮಾಡಲು ಬೇಕಾಗುವ ವಸ್ತುಗಳು

• ಅಕ್ಕಿ ಹಿಟ್ಟು - 1 ಕಪ್
• ಕಡಲೆ ಹಿಟ್ಟು- ಅರ್ಧ ಕಪ್
• ಮೈದಾ ಹಿಟ್ಟು - 1 ಚಮಚ
• ಜೀರಿಗೆ
• ಕಪ್ಪು ಎಳ್ಳು
• ಓಂಕಾಳು
• ಬೆಣ್ಣೆ
• ಕೊತ್ತಂಬರಿ ಸೊಪ್ಪು
• ಹಸಿ ಮೆಣಸಿನಕಾಯಿ
• ಕರಿಬೇವು
• ರುಚಿಗೆ ತಕ್ಕಷ್ಟು ಉಪ್ಪು
• ಅಡುಗೆ ಎಣ್ಣೆ

ಚಕ್ಕುಲಿ ಮಾಡುವುದು ಹೇಗೆ?

ಮೊದಲು ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು ಕೊತ್ತಂಬರಿ, ಹಸಿ ಮೆಣಸು, ಕರಿಬೇವು, ಉಪ್ಪು ಸ್ವಲ್ಪ ನೀರು ಹಾಕಿಕೊಂಡು ನುಣ್ಣಗೆ ರುಬ್ಬಿಕೊಳ್ಳಿ. ರುಬ್ಬಿದ ಮಸಾಲೆಯನ್ನು ಹಾಗೆ ಇಟ್ಟುಕೊಳ್ಳಿ. ಈಗ ಒಂದು ಬೌಲ್‌ಗೆ ಅಕ್ಕಿ ಹಿಟ್ಟು, ಮೈದಾ ಹಿಟ್ಟು, ಸ್ವಲ್ಪ ಬೆಣ್ಣೆ, ಕಪ್ಪು ಎಳ್ಳು, ಜೀರಿಗೆ ಉಪ್ಪು ಹಾಕಿಕೊಂಡು ಮಿಕ್ಸ್ ಮಾಡಿ.

ಮೊದಲು ಡ್ರೈ ಮಿಕ್ಸ್ ಮಾಡಿಕೊಂಡು ನಂತರ ಮಿಕ್ಸಿಯಲ್ಲಿ ರುಬ್ಬಿಕೊಂಡ ಮಿಶ್ರಣವನ್ನು ಇದಕ್ಕೆ ಹಾಕಿಕೊಂಡು ಚೆನ್ನಾಗಿ ಕೈಯಿಂದಲೇ ಮಿಕ್ಸ್ ಮಾಡಿಕೊಳ್ಳಿ. ಸ್ವಲ್ಪ ಸ್ವಲ್ಪ ನೀರು ಹಾಕಿಕೊಳ್ಳುತ್ತಾ ಹಿಟ್ಟು ಹದ ಮಾಡಿಕೊಳ್ಳಿ. ಹಿಟ್ಟು ತೆಳುವಾಗದಂತೆ ನೋಡಿಕೊಳ್ಳಿ. ತೆಳುವಾದರೆ ಅಕ್ಕಿ ಹಿಟ್ಟು ಹಾಕಿಕೊಳ್ಳಿ. ಈಗ ರೆಡಿಯಾದ ಹಿಟ್ಟನ್ನು ಹದವಾಗಿಡಿ.

ನಂತರ ಚಕ್ಕುಲಿ ಅಚ್ಚನ್ನು ತೆಗೆದುಕೊಂಡು ಅದಕ್ಕೆ ತುಪ್ಪ ಅಥವಾ ಎಣ್ಣೆಯನ್ನು ಸವರಿಕೊಳ್ಳಿ. ನಂತರ ಹಿಟ್ಟನ್ನು ಒಳಗೆ ತುಂಬಿಕೊಂಡು ನಿಧಾನವಾಗಿ ಒತ್ತಿಕೊಂಡು ಚಕ್ಕುಲಿ ಹಾಕಿಕೊಳ್ಳಿ. ಒಂದು ತಟ್ಟೆಯ ಮೇಲೆ, ಪ್ಲಾಸ್ಟಿಕ್ ಮೇಲೆ ಮೊದಲು ಅಚ್ಚಿನಿಂದ ಚಕ್ಕುಲಿ ಹಾಕಿಕೊಂಡು, ಬಾಣಲೆಯಲ್ಲಿ ಎಣ್ಣೆ ಕಾದ ಬಳಿಕ ಎಣ್ಣೆಗ ಬಿಡಿ. ಸಣ್ಣ ಉರಿಯಲ್ಲಿ ಚಕ್ಕುಲಿಯನ್ನು ಕರಿಯಬೇಕು. ಇದು ಹಸಿರು ಬಣ್ಣದಲ್ಲಿ ಬರುವ ಅದ್ಭುತ ರುಚಿ ನೀಡುವ ಚಕ್ಕುಲಿಯಾಗಲಿದೆ. ನೀವು ಕೂಡ ಮನೆಯಲ್ಲಿ ಟ್ರೈ ಮಾಡಿ ನೋಡಿ.