ಈ ರೀತಿ ದ್ರಾಕ್ಷಿ ಹಣ್ಣಿನ ಸ್ಪೆಷಲ್ ಹಲ್ವಾ ಮಾಡಿದ್ದೀರಾ? ಯಾರೂ ಸಹ ಈ ರೆಸಿಪಿ ಮಾಡಿರಲ್ಲ!

ಸಿಹಿ ತಿಂಡಿ ಸವಿಯುವ ಆಸೆ ಹೊಂದಿರುವ ಮಂದಿಗೆ ಹಲವು ರೀತಿ ತಿಂಡಿಯನ್ನು ಮನೆಯಲ್ಲಿ ಮಾಡಿ ಸವಿಯುವುದು ಇಷ್ಟವಾಗುತ್ತೆ. ಅದ್ರಲ್ಲೂ ವಿಶೇಷ ರೀತಿಯಾದ ಸಿಹಿ ತಿಂಡಿಗಳು ಹಾಗೆ ಮೊದಲ ಬಾರಿಗೆ ನೀವೇ ಖುದ್ದು ಮಾಡಿ ಸವಿಯುವ ತಿಂಡಿಗಳೆಂದರೆ ಎಲ್ಲರೂ ಮಾಡಿ ಸವಿಯೋದು ನೋಡುತ್ತೇವೆ. ಇಂತಹ ವಿಶೇಷ ಖಾದ್ಯಗಳ ಪೈಕಿ ನಾವಿಂದು ದ್ರಾಕ್ಷಿ ಬಳಸಿ ಮಾಡುವ ಹಲ್ವಾ ಕುರಿತಾಗಿ ತಿಳಿಯೋಣ.

ಸಿಹಿ ತಿಂಡಿಗಳಲ್ಲಿ ಹಲ್ವಾ ಇಷ್ಟಪಡುವ ಮಂದಿ ಬಹಳಷ್ಟಿದ್ದಾರೆ. ಬಗೆ ಬಗೆಯ ಹಲ್ವಾಗಳು ಬಾಯಲ್ಲಿ ನೀರು ತರಿಸುತ್ತವೆ. ನೀವು ಕೂಡ ಒಂದಿಷ್ಟು ಬಗೆಯ ಹಲ್ವಾದ ರುಚಿ ನೋಡಿರುತ್ತೀರಿ. ನಾವಿಂದು ಸುಲಭವಾಗಿ ಮಾಡುವಂತಹ ಹಾಗೆ ಎಲ್ಲರಿಗೂ ಇಷ್ಟವಾಗು ಹೊಸ ಬಗೆಯ ದ್ರಾಕ್ಷಿ ಹಲ್ವಾ ಮಾಡುವ ಕುರಿತಾಗಿ ತಿಳಿದುಕೊಳ್ಳೋಣ.

ಈ ದ್ರಾಕ್ಷಿ ಹಲ್ವಾ ಮಾಡುವುದು ಹೇಗೆ? ಮಾಡುವ ವಿಧಾನವೇನು? ಎಷ್ಟು ಸಮಯ ಹಿಡಿಯಲಿದೆ? ಯಾವೆಲ್ಲಾ ತಯಾರಿ ಬೇಕು ಎಂಬುದನ್ನು ತಿಳಿದುಕೊಳ್ಳೋಣ.

ದ್ರಾಕ್ಷಿ ಹಲ್ವಾ ಮಾಡಲು ಬೇಕಾಗುವ ಪದಾರ್ಥವೇನು?

• ದ್ರಾಕ್ಷಿ ಹಣ್ಣು- ಅರ್ಧ ಕೆಜಿ
• ತುಪ್ಪ
• ಕಾರ್ನ್ ಫ್ಲೋರ್
• ಹಸಿರು ಬಣ್ಣ

ದ್ರಾಕ್ಷಿ ಹಲ್ವಾ ಮಾಡುವ ವಿಧಾನವೇನು?

ಮೊದಲಿಗೆ ದ್ರಾಕ್ಷಿ ಹಣ್ಣುಗಳನ್ನು ತೊಳೆದು ಇಟ್ಟುಕೊಳ್ಳಿ. ಸಿಹಿ ದ್ರಾಕ್ಷಿ ತೆಗೆದುಕೊಂಡು ಅದನ್ನು ಬಿಡಿಸಿಕೊಂಡು ಇಟ್ಟುಕೊಳ್ಳಿ. ಈಗ ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು ಅದಕ್ಕೆ ಈ ಎಲ್ಲಾ ದ್ರಾಕ್ಷಿ ಹಣ್ಣುಗಳನ್ನು ಹಾಕಿಕೊಂಡು ಅರ್ಧ ಕಪ್ ನೀರು ಸಹ ಸೇರಿಸಿ ರುಬ್ಬಿಕೊಳ್ಳಬೇಕು. ನುಣ್ಣಗೆ ರುಬ್ಬಿದ ಬಳಿಕ ಇದನ್ನು ಜರಡಿ ಹಿಡಿದುಕೊಂಡು ಕೇವಲ ದ್ರಾಕ್ಷಿ ರಸ ತೆಗೆದಿಟ್ಟುಕೊಳ್ಳಿ.

ಈಗ ಒಂದು ಬಾಣಲೆ ತೆಗೆದುಕೊಂಡು ಅಳತೆ ಕಪ್‌ನಲ್ಲಿ 2 ಕಪ್ ದ್ರಾಕ್ಷಿ ರಸವನ್ನು ಇದಕ್ಕೆ ಹಾಕಿಕೊಳ್ಳಿ. ಹಾಗೆ ಇದಕ್ಕೆ ಒಂದು ಕಪ್ ನೀರು ಸಹ ಹಾಕಿಕೊಳ್ಳಿ. ಅನಂತರ ಇದಕ್ಕೆ ಅರ್ಧ ಕಪ್ ಸಕ್ಕರೆ ಕೂಡ ಹಾಕಿಕೊಂಡು, ಮುಕ್ಕಾಲು ಕಪ್ ಕಾರ್ನ್ ಫ್ಲೋರ್ ಸಹ ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ಇಗ ಈ ಬಾಣಲೆಯನ್ನು ಒಲೆ ಮೇಲೆ ಇಟ್ಟು ಸಣ್ಣ ಉರಿಯಲ್ಲಿ ಇಡಿ.

ಹಾಗೆ ಒಂದು ಅಚ್ಚು ಪಾತ್ರೆ ಅಥವಾ ಟ್ರೇಗೆ ತುಪ್ಪ ಸವರಿಕೊಂಡು ರೆಡಿ ಇಟ್ಟುಕೊಳ್ಳಿ. ಒಲೆ ಮೇಲಿರುವ ಎಲ್ಲಾ ಪದಾರ್ಥಗಳು ಗಂಟು ಆಗದಂತೆ ತಿರುಗಿಸುತ್ತಾ ಇರಿ. ಕೈ ಬಿಡದೆ ಚೆನ್ನಾಗಿ ಮಿಕ್ಸ್ ಮಾಡಿ. 5 ನಿಮಿಷಕ್ಕೆ ಇದು ಗಟ್ಟಿಯಾಗಲು ಆರಂಭಿಸುತ್ತದೆ. ತಳ ಹಿಡಿಯಲು ಬಿಡದೆ ಮಿಕ್ಸ್ ಮಾಡುತ್ತಾ ಇರಬೇಕು. ಒಟ್ಟು 7ರಿಂದ 8 ನಿಮಷದಲ್ಲಿ ಇದು ಗಟ್ಟಿಯಾಗುವಾಗ 1 ಸ್ಪೂನ್ ತುಪ್ಪ ಹಾಕಿಕೊಳ್ಳಿ.

ಹಾಗೆ ಇದಕ್ಕೆ ಸಣ್ಣದಾಗಿ ಹೆಚ್ಚಿಕೊಂಡಿರುವ ಡ್ರೈ ಫ್ರೂಟ್ಸ್ ಹಾಕಿಕೊಳ್ಳಿ. ಅನಂತರ ಹಸಿರು ಬಣ್ಣದ ಪುಡಿ ಅಥವಾ ಲಿಕ್ವಿಡ್ ಸಹ ಹಾಕಿ ಮಿಶ್ರಣ ಮಾಡಿ. ಕೊನೆಯಲ್ಲಿ 1 ಸ್ಪೂನ್ ತುಪ್ಪ ಹಾಕಿಕೊಂಡು ಮಿಶ್ರಣ ಮಾಡಿ, ಇದು ಬಾಣಲೆಯ ತಳ ಬಿಡುವ ಹಂತಕ್ಕೆ ಬರಬೇಕು. ಒಟ್ಟಾರೆ 13 ನಿಮಿಷ ಕಾಯಿಸಿ.

ಈಗ ಇದನ್ನು ತುಪ್ಪ ಸವರಿದ ತಟ್ಟೆಗೆ ಅಥವಾ ಟ್ರೇಗೆ ಹಾಕಿ ಸವರಿಕೊಂಡು ಸುಮಾರು 2 ಗಂಟೆ ತಣ್ಣಗಾಗಲು ಬಿಡಿ. ನಂತರ ನಿಮಗೆ ಯಾವ ಗಾತ್ರಕ್ಕೆ ಬೇಕೋ ಆ ಗಾತ್ರಕ್ಕೆ ಕತ್ತರಿಸಿಕೊಂಡರೆ ನಿಮ್ಮ ಮುಂದೆ ದ್ರಾಕ್ಷಿ ಹಣ್ಣಿನ ಹಲ್ವಾ ಸಿದ್ದವಾಗುತ್ತೆ. ನೀವು ಸಹ ಮನೆಯಲ್ಲಿ ಈ ಹಲ್ವಾ ಮಾಡಿ ಸವಿದು ನೋಡಿ.