6 ತಿಂಗಳು ಇಟ್ಟರೂ ಹಾಳಾಗಲ್ಲ ಈ ಬೆಳ್ಳುಳ್ಳಿ ಚಟ್ನಿ..! ಏನೆಲ್ಲಾ ಹಾಕಬೇಕು ಗೊತ್ತಾ?

ಬೆಳಗ್ಗೆ ತಿಂಡಿಯ ಸಮಯಕ್ಕೂ ಯಾವುದಾದರು ಚಟ್ನಿ ಇದ್ದರೆ ಅದರ ರುಚಿ ಅದ್ಭುತವಾಗಿರುತ್ತೆ. ಹಾಗೆ ಊಟದ ಸಮಯದಲ್ಲೂ ಒಂದೊಂದು ಚಟ್ನಿ ಇರಬೇಕು. ಖಾರ ಖಾರವಾಗಿ ಬಾಯಿ ರುಚಿ ಹೆಚ್ಚಿಸುವ ಚಟ್ನಿ ಇದ್ದರೆ ತಿಂಡಿಗೆ ಮತ್ತೊಂದಿಷ್ಟು ರುಚಿ ಬರಲಿದೆ. ಹಾಗೆ ಕೆಲವೊಂದು ಚಟ್ನಿಯನ್ನು ನೀವು ಹಲವು ದಿನಗಳ ಕಾಲ ಇಟ್ಟು ಸವಿಯಬಹುದು ಅನ್ನೋದು ಕೂಡ ನೀವು ತಿಳಿದಿದ್ದೀರಿ. ಒಣ ಮೆಣಸು, ಹುಣಸೆ ಹುಳಿ ಹಾಕಿ ಚಟ್ನಿ ಪುಡಿ ಮಾಡಿ ಇಟ್ಟರೆ ಹಲವು ದಿನಗಳ ಕಾಲ ಹಾಳಾಗುವುದಿಲ್ಲ. ಇದನ್ನು ಎಲ್ಲಾ ತಿಂಡಿಯ ಜೊತೆಗೆ ಸವಿಯುವುದು ನೋಡಬಹುದು.

ಹಾಗೆ ನಾವಿಂದು ಬರೋಬ್ಬರಿ 6 ತಿಂಗಳಿಗೂ ಹೆಚ್ಚು ಕಾಲ ಇಟ್ಟರೂ ಹಾಳಾಗದೆ ಇರುವ ಚಟ್ನಿಯ ಕುರಿತಾಗಿ ತಿಳಿದುಕೊಳ್ಳೋಣ. ಹೌದು ಬೆಳ್ಳುಳ್ಳಿಯಿಂದ ಮಾಡುವ ಈ ಚಟ್ನಿಯನ್ನು ನೀವು 6 ತಿಂಗಳಿಗೂ ಹೆಚ್ಚು ಕಾಲ ಇಟ್ಟು ಸವಿಯಬಹುದು. ನೀವು ಯಾವುದೇ ತಿಂಡಿ ಮಾಡಿದ್ದರೂ ಈ ಚಟ್ನಿ ಸವಿಯಬಹುದು. ಹಾಗೆ ಊಟದ ಜೊತೆಗೂ ಕೂಡ ಇದು ಅದ್ಭುತ ರುಚಿ ನೀಡಲಿದೆ.

ನಾವು ಸಹ ಇಂದು ಈ ಬೆಳ್ಳುಳ್ಳಿ ಚಟ್ನಿ ಮಾಡುವ ಕುರಿತು ತಿಳಿಯೋಣ. ನಿತ್ಯ ಒಂದೊಂದು ಬಗೆಯ ಚಟ್ನಿ ಮಾಡಿ ಸವಿಯಲು ಸಮಯ ಹಿಡಿಯಲಿದೆ. ಆದ್ರೆ ಈ ಚಟ್ನಿ ಮಾಡಿದರೆ ಬಹಳ ರುಚಿಕರವಾಗಿ ತಿಂಗಳಕಾಲ ಸವಿಯಬಹುದು. ಹಾಗಾದ್ರೆ ಈ ಬೆಳ್ಳುಳ್ಳಿ ಚಟ್ನಿ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು?, ಮಾಡುವ ವಿಧಾನವೇನು? ಮಾಡಲು ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ತಿಳಿದುಕೊಳ್ಳೋಣ.

ಬೆಳ್ಳುಳ್ಳಿ ಚಟ್ನಿ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು?

• ಬೆಳ್ಳುಳ್ಳಿ
• ಲವಂಗ
• ಚಕ್ಕೆ
• ಎಣ್ಣೆ
• ಜೀರಿಗೆ
• ಜೀರಿಗೆ ಪುಡಿ
• ಧನಿಯಾ ಪುಡಿ
• ಖಾರದ ಪುಡಿ
• ಇಂಗು
• ಅರಶಿಣ
• ಉಪ್ಪು
• ಕೊತ್ತಂಬರಿ ಸೊಪ್ಪು

ಬೆಳ್ಳುಳ್ಳಿ ಚಟ್ನಿ ಮಾಡುವ ವಿಧಾನವೇನು?

ಮೊದಲು ಒಂದು ಬಾಣಲೆ ಒಲೆ ಮೇಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿಕೊಳ್ಳಿ. ಈ ಚಟ್ನಿಗೆ ಎಣ್ಣೆ ಹೆಚ್ಚಾಗಿ ಬಳಸಿ. ಬಳಿಕ ಇದಕ್ಕೆ ಸಿಪ್ಪೆ ಬಿಡಿಸಿರುವ ಬೆಳ್ಳುಳ್ಳಿ ಹಾಕಿ. ಸುಮಾರು 200 ಗ್ರಾಮ್ ಬೆಳ್ಳುಳ್ಳಿ ಬಳಸಿಕೊಳ್ಳಿ. ಎಣ್ಣೆಯಲ್ಲಿ ಬೆಳ್ಳುಳ್ಳಿ ಚೆನ್ನಾಗಿ ಫ್ರೈ ಆಗುವಂತೆ ನೋಡಿಕೊಳ್ಳಿ. ನಂತರ ಇದಕ್ಕೆ ಲವಂಗ, ಚಕ್ಕೆ ಹಾಕಿ ಮತ್ತೆ ಬಿಸಿ ಮಾಡಿಕೊಳ್ಳಿ.

ಹಾಗೆ ಕಾಲು ಚಮಚ ಜೀರಿಗೆ, ಕರಿಬೇವು ಕೂಡ ಹಾಕಿಕೊಂಡು ಬೆಳ್ಳುಳ್ಳಿ ಸ್ವಲ್ಪ ಕೆಂಪಾಗುವವರೆಗೂ ಮಿಕ್ಸ್ ಮಾಡಿ. ಈಗ ಇಂಗು, ಅರಶಿಣ ಪುಡಿ ಸಹ ಹಾಕಿಕೊಳ್ಳಿ. ನಂತರ ಖಾರದ ಪುಡಿ (ನಿಮಗೆ ಎಷ್ಟು ಖಾರ ಬೇಕೋ ಅಷ್ಟು) ಹಾಗೆ ಗರಂ ಮಸಾಲೆ, ಧನಿಯಾ ಪುಡಿ, ಜೀರಿಗೆ ಪುಡಿ, ಉಪ್ಪು ಹಾಕಿಕೊಂಡು ಮತ್ತೆ ಮಿಕ್ಸ್ ಮಾಡಿ.

ಈಗ 2 ಚಮಚದಷ್ಟು ಹುಣಸೆ ಹುಳಿಯ ನೀರು ಹಾಕಿಕೊಳ್ಳಿ. ಹಾಗೆ ಬೆಲ್ಲ ಅಥವಾ ಬೆಲ್ಲದ ಪುಡಿ ಇದ್ದರೆ ಸ್ವಲ್ಪ ಹಾಕಿಕೊಂಡು ಮಿಕ್ಸ್ ಮಾಡಿ ಕರಗಲು ಬಿಡಿ. ನಂತರ ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿ ಒಲೆ ಆಫ್ ಮಾಡಿಕೊಂಡು ಇದು ತಣ್ಣಗಾಗಲು ಬಿಡಿ. ಸಂಪೂರ್ಣ ತಣ್ಣಗಾದ ಬಳಿಕ ಒಂದು ಮಿಕ್ಸಿ ಜಾರ್‌ಗೆ ಈ ಬೆಳ್ಳುಳ್ಳಿಗಳ ಹಾಕಿಕೊಳ್ಳಿ.

ನೀರು ಹಾಕಿಕೊಳ್ಳದೆಯೇ ತರಿತರಿಯಾಗಿ ರುಬ್ಬಿಕೊಳ್ಳಬೇಕು. ಕ್ಯಾರೆಟ್ ಹಲ್ವದ ರೀತಿಯಲ್ಲಿ ಇದು ಅಂಟು ಅಂಟಾಗಿ ಬರಬೇಕು. ಇಷ್ಟು ರುಬ್ಬಿಕೊಂಡು ಒಂದು ಬಾಕ್ಸ್‌ಗೆ ಹಾಕಿಡಿ. ಇದನ್ನು 6 ತಿಂಗಳಿಗೂ ಹೆಚ್ಚು ಸಮಯ ಫ್ರಿಡ್ಜ್‌ನಲ್ಲಿಟ್ಟು ಸವಿಯಬಹುದು. ನೀವು ಕೂಡ ಮನೆಯಲ್ಲಿ ಇದನ್ನೊಮ್ಮೆ ಟ್ರೈ ಮಾಡಿ ನೋಡಿ.