ಊಟದ ರುಚಿ ದುಪ್ಪಟ್ಟಾಗಿಸುವ ಟೊಮೆಟೋ-ಸಬ್ಬಸ್ಸಿಗೆ ಹಪ್ಪಳ ಮಾಡಿ: ಎಷ್ಟು ಸುಲಭ ಮಾಡೋದು

ನೀವು ಊಟದ ಜೊತೆಗೆ ಪಲ್ಯ, ಉಪ್ಪಿನಕಾಯಿ, ಹಪ್ಪಳ ಸವಿಯಲು ಇಷ್ಟಪಡುತ್ತೀರಿ, ಇದರಲ್ಲಿ ಯಾವುದಾದರೊಂದು ವಸ್ತು ಇದ್ದರೆ ಊಟದ ರುಚಿ ಕೂಡ ಅದ್ಭುತವಾಗಿರಲಿದೆ. ಹಾಗೆ ಊಟಕ್ಕೆ ಹಪ್ಪಳ ಹುರಿದು ಸವಿಯುವುದು ಮಕ್ಕಳಿಂದ ಹಿಡಿದು ಹಿರಿಯರ ವರೆಗೂ ಬಹಳ ಇಷ್ಟಪಡುತ್ತಾರೆ. ಹಾಗೆ ಹಪ್ಪಳದಲ್ಲೂ ಬಗೆ ಬಗೆಯ ಖಾದ್ಯವಿದೆ. ಅಕ್ಕಿ ಹಪ್ಪಳ, ಉದ್ದಿನ ಹಪ್ಪಳ, ಜೀರಿಗೆ ಹಪ್ಪಳ ಹೀಗೆ ಹಲವು ರೀತಿಯ ಬಗೆಯ ಹಪ್ಪಳಗಳ ನೋಡಬಹುದು.

ಆದ್ರೆ ನಾವಿಂದು ಸುಲಭವಾಗಿ ಊಟದ ರುಚಿ ಹೆಚ್ಚಿಸುವಂತಹ ರುಚಿ ರುಚಿಯ ಈ ಟೊಮೆಟೋ ಸಬ್ಬಕ್ಕಿ ಹಪ್ಪಳ ಮಾಡುವುದು ಹೇಗೆ ಅನ್ನೋದನ್ನು ತಿಳಿದುಕೊಳ್ಳೋಣ. ಊಟದ ಜೊತೆಗೆ ಈ ರೀತಿಯ ಹಪ್ಪಳ ಸವಿಯಲು ಸಿಕ್ಕರೆ ರುಚಿ ಕೂಡ ಅದ್ಭುತವಾಗಿರಲಿದೆ. ಹಾಗಾದ್ರೆ ನಿಮ್ಮ ಊಟದ ರುಚಿ ಹೆಚ್ಚಿಸುವ ರುಚಿ ರುಚಿ ಟೊಮೆಟೋ ಹಪ್ಪಳ ಮಾಡುವುದು ಹೇಗೆ ನೋಡೋಣ.

ಟೊಮೆಟೋ ಸಬ್ಬಕ್ಕಿ ಹಪ್ಪಳ ಸವಿಯಲು ಬಹಳ ರುಚಿಕರ ಹಾಗೆ ಮಾಡೋದು ಕೂಡ ಬಹಳ ಸುಲಭವಾಗಿದೆ. ಮನೆಯಲ್ಲಿ ಕಡಿಮೆ ವಸ್ತುಗಳ ಬಳಸಿಕೊಂಡು ಇದನ್ನು ಮಾಡಬಹುದು. ಹಾಗಾದ್ರೆ ಈ ಹಪ್ಪಳ ಮಾಡುವುದು ಹೇಗೆ? ಮಾಡಲು ಯಾವೆಲ್ಲಾ ಪದಾರ್ಥಗಳಿ ಬೇಕು? ಮಾಡುವ ವಿಧಾನವೇನು ತಿಳಿದುಕೊಳ್ಳೋಣ.

ಟೊಮೆಟೋ ಸಬ್ಬಕ್ಕಿ ಹಪ್ಪಳ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು?

• ಟೊಮೆಟೋ- 4
• ಸಬ್ಬಕ್ಕಿ
• ರುಚಿಗೆ ತಕ್ಕಷ್ಟು ಉಪ್ಪು
• ಖಾರದ ಪುಡಿ
• ಜೀರಿಗೆ
• ಕೊತ್ತಂಬರಿ ಸೊಪ್ಪು
• ಕರಿಬೇವು
• ಎಣ್ಣೆ

ಟೊಮೆಟೋ ಸಬ್ಬಕ್ಕಿ ಹಪ್ಪಳ ಮಾಡುವ ವಿಧಾನವೇನು?

ಮೊದಲು ಹಣ್ಣಾಗಿರುವ ಟೊಮೆಟೋವನ್ನು ತೊಳೆದು ಕತ್ತರಿಸಿಕೊಂಡು ಇಟ್ಟುಕೊಳ್ಳಿ. ಬಳಿಕ ಮಿಕ್ಸಿ ಜಾರ್‌ಗೆ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಬೇಕು. ನೀರು ಹಾಕದೆ ರುಬ್ಬಿಕೊಳ್ಳಿ. ನಂತರ ಈ ಪೇಸ್ಟ್ ಅನ್ನು ಜರಡಿ ಹಿಡಿದು ನುಣ್ಣಗಿರುವ ಪೇಸ್ಟ್ ಮಾಡಿ, ಸಿಪ್ಪೆ, ಬೀಜ ಬೇರೆ ಮಾಡಿಕೊಳ್ಳಿ. ಈಗ ಒಂದು ಗ್ಲಾಸ್ ಸಬ್ಬಕ್ಕಿ ಅಥವಾ ಸಾಬುಧಾನಿಯನ್ನು ಮಿಕ್ಸರ್‌ಗೆ ಹಾಕಿ ಪುಡಿ ಮಾಡಿಕೊಳ್ಳಿ.

ಸಬ್ಬಕ್ಕಿಯನ್ನು ನುಣ್ಣಗೆ ಮಾಡಿಕೊಳ್ಳಬೇಡಿ, ತರಿ ತರಿಯಾಗಿ ಇರಲಿ. ಈಗ ಸಬ್ಬಕ್ಕಿ ತೆಗೆದುಕೊಂಡ ಕಪ್‌ನಲ್ಲಿ ಸುಮಾರು 7 ಕಪ್ ನೀರನ್ನು ಒಂದು ಪಾತ್ರೆಗೆ ಹಾಕಿಕೊಳ್ಳಿ. ಈಗ ಈ ನೀರಿಗೆ ಟೊಮೆಟೋ ಪೇಸ್ಟ್ ಅನ್ನು ಇದಕ್ಕೆ ಹಾಕಿಕೊಂಡು ಮಿಕ್ಸ್ ಮಾಡಿ ಗ್ಯಾಸ್ ಮೇಲೆ ಕುದಿಬರಲು ಬಿಡಿ. ನೀರು ಬಿಸಿಯಾಗಲು ಬಿಟ್ಟು ಆಗಾಗ ಮಿಕ್ಸ್ ಮಾಡುತ್ತಾ ಇರಿ.

ಕುದಿ ಬರುವ ಹಂತದಲ್ಲಿ ಈಗ ರುಬ್ಬಿಕೊಂಡಿರುವ ಸಬ್ಬಕ್ಕಿಯನ್ನು ಹಾಕಿಕೊಂಡು ಮತ್ತೆ ಮಿಕ್ಸ್ ಮಾಡಿಕೊಳ್ಳಿ. ಹಾಗೆ 10 ನಿಮಷಗಳ ಕಾಲ ಕುದಿಬರಲು ಬಿಡಿ. ಬಳಿಕ ಈಗ ಸಾಬೂದಾನಿ ಪುಡಿ ಬೆಂದು ನೀರು ಸ್ವಲ್ಪ ಗಟ್ಟಿಯಾಗಬೇಕು. ಈಗ ಇದಕ್ಕೆ ಖಾರದ ಪುಡಿ, ಉಪ್ಪು ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ಹಾಗೆ ಗಟ್ಟಿಯಾಗಲು ಬಿಡಬೇಕು. ಸಬ್ಬಕ್ಕಿ ಚೆನ್ನಾಗಿ ಬೇಯಬೇಕು. ಖಾರದ ಪುಡಿ ಹಾಕಿ 5 ನಿಮಿಷ ಬೇಯಿಸಿಕೊಳ್ಳಿ. ನಂತರ ಜೀರಿಗೆ, ಕೊತ್ತಂಬರಿ ಸೊಪ್ಪು, ಕರಿಬೇವು ಕೂಡ ಹಾಕಿಕೊಂಡು ಚೆನ್ನಾಗಿ ಮಿಕ್ಸ್ ಮಾಡಿ 2 ನಿಮಿಷ ಬಿಟ್ಟು ಗ್ಯಾಸ್ ಆಫ್ ಮಾಡಿಕೊಳ್ಳಿ. ಒಟ್ಟು 20 ನಿಮಿಷ ಕುದಿ ಬಂದಿರಬೇಕು.

ನಂತರ ಈ ಮಿಶ್ರಣ ತಣ್ಣಗಾಗಲು ಬಿಡಿ, ಆದ್ರೆ ಆಗಾಗ ಕೈ ಆಡಿಸುತ್ತಾ ಇರಿ. ಇದು ಉಗುರು ಬೆಚ್ಚಗೆ ಇದ್ದಾಗಲೇ ನಿಮಗೆ ಯಾವ ಗಾತ್ರಕ್ಕೆ ಬೇಕೋ ಆ ಗಾತ್ರಕ್ಕೆ ದಪ್ಪವಾಗಿಯೇ ಬಟ್ಟೆಯ ಮೇಲೆ ಹಾಕಿಕೊಳ್ಳಿ. ನಂತರ ಇದನ್ನು ಬಿಸಿಲಿನಲ್ಲಿ ಇಟ್ಟು ಒಣಗಿಸಿಕೊಳ್ಳಿ. ಇಷ್ಟಾದರೆ ನಿಮ್ಮ ಮುಂದೆ ರುಚಿ ರುಚಿಯ ಟೊಮೆಟೋ ಹಪ್ಪಳ ರೆಡಿಯಾಗುತ್ತದೆ. ಊಟದ ಜೊತೆಗೆ ಸವಿಯಲು ಇವು ಅದ್ಭುತ ರುಚಿ ನೀಡಲಿವೆ. ನೀವು ಸಹ ಮಾಡಿ ನೋಡಿ.