ಮನೆಯಲ್ಲೇ ಪಂಜಾಬಿ ರುಚಿ! ಡಾಬಾ ಸ್ಟೈಲ್ ಕಡಾಯಿ ಪನೀರ್.. 10 ನಿಮಿಷಗಳಲ್ಲಿ ಮಾಡುವುದು ಹೇಗೆ?

ರೊಟ್ಟಿ ಜೊತೆಗೆ ಸೂಪರ್ ಕಿಕ್! ಡಾಬಾ ಸ್ಟೈಲ್ ಕಡಾಯಿ ಪನೀರ್ ರೆಸಿಪಿ ಇಲ್ಲಿದೆ. ರಸ್ತೆಯ ಬದಿಯಲ್ಲಿರುವ ಡಾಬಾಗಳಲ್ಲಿ ದೊರೆಯುವಂತಹ ಕಡಾಯಿ ಪನೀರ್ (Kadai Paneer) ಖಾದ್ಯ ಭಾರತೀಯರ ಅಚ್ಚುಮೆಚ್ಚಿನ ತಿನಿಸುಗಳಲ್ಲಿ ಒಂದು. ಮೃದುವಾದ ಪನೀರ್, ಗರಿಗರಿಯಾದ ಕ್ಯಾಪ್ಸಿಕಂ ಮತ್ತು ತಾಜಾ ಮಸಾಲೆಗಳಿಂದ ಕೂಡಿದ ಈ ಅಡುಗೆಯು ಮನೆಯಲ್ಲಿ ಸುಲಭವಾಗಿ ತಯಾರಿಸಬಹುದಾದ ರೆಸಿಪಿಯೂ ಆಗಿದೆ. ರೆಸ್ಟೋರೆಂಟ್‌ಗಳಲ್ಲಿ ದೊರೆಯುವ ಸಿಹಿ ಕ್ರೀಮಿಯಾದ ಪನೀರ್ ಖಾದ್ಯಗಳಿಗೆ ಹೋಲಿಸಿದರೆ, ಡಾಬಾ ಶೈಲಿಯ ಕಡಾಯಿ ಪನೀರ್ ತನ್ನ ವಿಶಿಷ್ಟ ಮತ್ತು ಮಸಾಲೆಯುಕ್ತ ರುಚಿಗೆ ಹೆಸರುವಾಸಿ.

ರಾಷ್ಟ್ರೀಯ ಹೆದ್ದಾರಿಗಳ ಅಂಚಿನಲ್ಲಿರುವ ಡಾಬಾಗಳು ತಮ್ಮ ವಿಶಿಷ್ಟ ಖಾದ್ಯಗಳಿಗೆ ಪ್ರಸಿದ್ಧವಾಗಿವೆ. ಡಾಬಾಗಳ ಖಾದ್ಯಗಳು ಮಸಾಲೆಯುಕ್ತ ಸುವಾಸನೆ ಮತ್ತು ಪರಿಮಳವನ್ನು ಹೊಂದಿರುತ್ತವೆ. ಇದು ಜನರ ಮನಸ್ಸಿನಲ್ಲಿ ಅಚ್ಚಳಿಯದೆ ಉಳಿಯುತ್ತದೆ. ಡಾಬಾ ಶೈಲಿಯ ಕಡಾಯಿ ಪನೀರ್ ಕೂಡ ಇದೇ ವರ್ಗಕ್ಕೆ ಸೇರಿದೆ. ಇದು ತ್ವರಿತವಾಗಿ ತಯಾರಿಸಬಹುದಾದ ಮತ್ತು ರೊಟ್ಟಿ, ನಾನ್ ಅಥವಾ ಜೀರಾ ರೈಸ್ ಜೊತೆ ಉತ್ತಮವಾಗಿ ಹೊಂದಿಕೊಳ್ಳುವ ಖಾದ್ಯವಾಗಿದೆ. ಬನ್ನಿ, ಮನೆಯಲ್ಲಿಯೇ ಡಾಬಾ ಶೈಲಿಯ ಕಡಾಯಿ ಪನೀರ್ (Dhaba Style Kadai Paneer) ತಯಾರಿಸುವುದು ಹೇಗೆ ಅನ್ನೋದನ್ನು ತಿಳಿಯೋಣ.

ಕಡಾಯಿ ಪನೀರ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

ಕಡಾಯಿ ಮಸಾಲೆಗೆ

• ಕೊತ್ತಂಬರಿ ಬೀಜ
• ಜೀರಿಗೆ
• ಒಣ ಕೆಂಪು ಮೆಣಸು
• ಕರಿಮೆಣಸು

ಈ ಎಲ್ಲ ಪದಾರ್ಥಗಳನ್ನು ಹುರಿದು, ತರಿತರಿಯಾಗಿ ಪುಡಿಮಾಡಿ ಪಕ್ಕಕ್ಕೆ ಇಡಿ.

ಗ್ರೇವಿಗೆ ಬೇಕಾಗುವ ಸಾಮಗ್ರಿಗಳು

• ಪನೀರ್
• ಈರುಳ್ಳಿ (ಕತ್ತರಿಸಿದ್ದು)
• ಕ್ಯಾಪ್ಸಿಕಂ
• ಟೊಮೆಟೊ
• ಶುಂಠಿ ಬೆಳ್ಳುಳ್ಳಿ ಪೇಸ್ಟ್
• ಹಸಿ ಮೆಣಸು
• ಎಣ್ಣೆ ಅಥವಾ ತುಪ್ಪ
• ಅರಿಶಿನ ಪುಡಿ
• ಕೆಂಪು ಮೆಣಸಿನ ಪುಡಿ (ರುಚಿಗೆ ತಕ್ಕಂತೆ)
• ಗರಂ ಮಸಾಲಾ
• ರುಚಿಗೆ ತಕ್ಕಷ್ಟು ಉಪ್ಪು
• ಕೊತ್ತಂಬರಿ ಸೊಪ್ಪು
• ಕ್ರೀಮ್ ಅಥವಾ ಬೆಣ್ಣೆ
• ಕಸೂರಿ ಮೇಥಿ (ಒಣಗಿದ ಮೆಂತ್ಯೆ ಸೊಪ್ಪು)

ಡಾಬಾ ಶೈಲಿಯ ಕಡಾಯಿ ಪನೀರ್ ತಯಾರಿಸುವ ವಿಧಾನ

ಮೊದಲಿಗೆ ಕಡಾಯಿ ಮಸಾಲಾ ತಯಾರಿಸಿ. ಇದಕ್ಕಾಗಿ ಕೊತ್ತಂಬರಿ, ಜೀರಿಗೆ, ಕೆಂಪು ಮೆಣಸು ಮತ್ತು ಕರಿಮೆಣಸನ್ನು ಸುಮಾರು 2 ನಿಮಿಷಗಳ ಕಾಲ ಪರಿಮಳ ಬರುವವರೆಗೆ ಹುರಿಯಿರಿ. ಬಳಿಕ ತರಿತರಿಯಾಗಿ ಪುಡಿಮಾಡಿ ಪಕ್ಕದಲ್ಲಿ ಇಡಿ. ಈಗ ಪನೀರ್ ಬೇಯಿಸಿ. ಪನೀರ್ ತುಂಡುಗಳನ್ನು ಸ್ವಲ್ಪ ಎಣ್ಣೆಯಲ್ಲಿ ಚಿನ್ನದ ಬಣ್ಣ ಬರುವವರೆಗೆ ಲಘುವಾಗಿ ಬೇಯಿಸಿ. ಮೃದುವಾಗಿಡಲು, ಅವುಗಳನ್ನು ಬೆಚ್ಚಗಿನ ನೀರಿನಲ್ಲಿ ನೆನೆಸಿಡಿ.

ಈಗ ಗ್ರೇವಿ ತಯಾರಿಸಿ. ಕಡಾಯಿಯಲ್ಲಿ ಎಣ್ಣೆ ಅಥವಾ ತುಪ್ಪ ಹಾಕಿ ಬಿಸಿ ಮಾಡಿ. ಬಳಿಕ ಕತ್ತರಿಸಿದ ಈರುಳ್ಳಿ ಹಾಕಿ ಚಿನ್ನದ ಬಣ್ಣ ಬರುವವರೆಗೆ ಹುರಿಯಿರಿ. ಇದಕ್ಕೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಒಂದು ನಿಮಿಷ ಬೇಯಿಸಿ. ಈಗ ಟೊಮೆಟೊ ಪ್ಯೂರಿ ಅಥವಾ ಕತ್ತರಿಸಿದ ಟೊಮೆಟೊ ಹಾಕಿ, ಎಣ್ಣೆ ಬಿಡುವವರೆಗೆ ಬೇಯಿಸಿ. ಬಳಿಕ ಅರಿಶಿನ, ಕೆಂಪು ಮೆಣಸಿನ ಪುಡಿ ಮತ್ತು ಉಪ್ಪು ಹಾಕಿ. ನಂತರ ಪುಡಿಮಾಡಿದ ಕಡಾಯಿ ಮಸಾಲಾ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

ಇದಾದ ಬಳಿಕ ತರಕಾರಿಗಳು ಹಾಕಬೇಕು. ಕತ್ತರಿಸಿದ ಕ್ಯಾಪ್ಸಿಕಂ ಮತ್ತು ಹಸಿ ಮೆಣಸು ಹಾಕಿ ಸುಮಾರು 3 ನಿಮಿಷ ಬೇಯಿಸಿ. ಅವು ಸ್ವಲ್ಪ ಗರಿಗರಿಯಾಗಿರಬೇಕು. ಈಗ ಪನೀರ್ ಹಾಕಬೇಕು. ಪನೀರ್ ತುಂಡುಗಳನ್ನು ಸೇರಿಸಿ ನಿಧಾನವಾಗಿ ಮಿಕ್ಸ್ ಮಾಡಿ. ಅಗತ್ಯವಿದ್ದರೆ ಗ್ರೇವಿಗೆ ಸ್ವಲ್ಪ ನೀರು ಸೇರಿಸಿ. ಡಾಬಾ ಶೈಲಿಯ ಗ್ರೇವಿ ಸ್ವಲ್ಪ ಒಣಗಿರಬೇಕು. ಹೀಗಾಗಿ, ಸಣ್ಣ ಉರಿಯಲ್ಲಿ ಸುಮಾರು 4 ನಿಮಿಷ ಬೇಯಿಸಿ. ಅಂತಿಮವಾಗಿ ಗರಂ ಮಸಾಲಾ, ಕಸೂರಿ ಮೇಥಿ ಮತ್ತು ಕ್ರೀಮ್ ಅಥವಾ ಬೆಣ್ಣೆ ಹಾಕಿ. ಕತ್ತರಿಸಿದ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ. ಇಷ್ಟು ಮಾಡಿದರೆ ಸಾಕು, ಡಾಬಾ ಶೈಲಿಯ ಕಡಾಯಿ ಪನೀರ್ ಸವಿಯಲು ಸಿದ್ಧ.