ದೇಸಿ ಸ್ಟೈಲ್ 'ಮಿಕ್ಸ್ ಉಪ್ಪಿನಕಾಯಿ': 10 ನಿಮಿಷದಲ್ಲಿ ಮನೆಯಲ್ಲೇ ಮಾಡಿ.. ವರ್ಷವಿಡೀ ಕೆಡಲ್ಲ!

10 ನಿಮಿಷದಲ್ಲಿ ರುಚಿ ರುಚಿಯಾದ 'ಮಿಕ್ಸ್ ಉಪ್ಪಿನಕಾಯಿ'.. ವರ್ಷವಿಡೀ ಕೆಡಲ್ಲ! ಚಳಿಗಾಲದಲ್ಲಿ ಅನ್ನ ಅಥವಾ ರೊಟ್ಟಿಯೊಂದಿಗೆ ಚಪ್ಪರಿಸಲು ಏನಾದರೂ ವಿಶೇಷ ಖಾರವಾದ ತಿಂಡಿ ಬೇಕು ಅನಿಸುತ್ತೆ. ನಿಮಗೂ ಈ ರೀತಿ ಅನಿಸಿದ್ರೆ, ಕ್ಯಾರೆಟ್, ಮೂಲಂಗಿ, ಹಸಿ ಮೆಣಸಿನಕಾಯಿ ಬಳಸಿ ಮಾಡಿದ ಮಿಕ್ಸ್ ಉಪ್ಪಿನಕಾಯಿ ಸೂಕ್ತ ಆಯ್ಕೆ. ಈ ಉಪ್ಪಿನಕಾಯಿ ಯಾವುದೇ ಊಟದ ರುಚಿಯನ್ನು ಹೆಚ್ಚಿಸುತ್ತದೆ. ಅದು ಕೂಡ ಮನೆಯಲ್ಲೇ ತಯಾರಿಸಿದಾಗ ಮತ್ತಷ್ಟು ಆನಂದ ನೀಡುತ್ತದೆ.

ಚಳಿಗಾಲ ಬಂದರೆ ಸಾಕು, ಮಾರುಕಟ್ಟೆಯಲ್ಲಿ ತಾಜಾ ತರಕಾರಿಗಳು ಮತ್ತು ಹಣ್ಣುಗಳು ಹೇರಳವಾಗಿ ಲಭ್ಯವಿರುತ್ತವೆ. ಸಾಮಾನ್ಯವಾಗಿ, ಈ ಸಮಯದಲ್ಲಿ ಕ್ಯಾರೆಟ್ ಹಲ್ವಾ ಜನಪ್ರಿಯ ತಿನಿಸು. ಆದರೆ, ನೀವು ಸ್ವಲ್ಪ ವಿಭಿನ್ನವಾದದ್ದನ್ನು ಪ್ರಯತ್ನಿಸಲು ಬಯಸಿದರೆ, ಕ್ಯಾರೆಟ್ (Carrot), ಮೂಲಂಗಿ (Radish) ಮತ್ತು ಹಸಿ ಮೆಣಸಿನಕಾಯಿಗಳ (Green Chilli) ಮಿಕ್ಸ್ ಉಪ್ಪಿನಕಾಯಿ ಅತ್ಯುತ್ತಮ ಆಯ್ಕೆ. ಇದರ ರುಚಿ ಎಲ್ಲರಿಗೂ ಇಷ್ಟವಾಗುತ್ತದೆ.

ಒಂದಕ್ಕಿಂತ ಹೆಚ್ಚು ಜಾಡಿಗಳಲ್ಲಿ ಮಾಡಿಟ್ಟುಕೊಳ್ಳುವಷ್ಟು ರುಚಿಕರವಾದ ಈ ಉಪ್ಪಿನಕಾಯಿಯನ್ನು ಸುಲಭವಾಗಿ ತಯಾರಿಸಬಹುದು. ಕ್ಯಾರೆಟ್, ಮೂಲಂಗಿ, ಹಸಿ ಮೆಣಸಿನಕಾಯಿ ಮಿಶ್ರ ಉಪ್ಪಿನಕಾಯಿಗೆ (Carrot Radish Green Chilli Mix Pickle) ಅಗತ್ಯವಿರುವ ಸಾಮಗ್ರಿಗಳು ಮತ್ತು ತಯಾರಿಸುವ ಸರಳ ವಿಧಾನ ಇಲ್ಲಿದೆ.

ದೇಸಿ ಮಿಕ್ಸ್ ಉಪ್ಪಿನಕಾಯಿಗೆ ಬೇಕಾಗುವ ಸಾಮಗ್ರಿಗಳು

* ಕ್ಯಾರೆಟ್ (ಗಜ್ಜರಿ) - 500 ಗ್ರಾಂ
* ಮೂಲಂಗಿ - 250 ಗ್ರಾಂ
* ಹಸಿ ಮೆಣಸಿನಕಾಯಿ - 100 ಗ್ರಾಂ
* ಶುಂಠಿ - 50 ಗ್ರಾಂ (ಕತ್ತರಿಸಿದ್ದು)
* ನಿಂಬೆಹಣ್ಣು - 3 ರಿಂದ 4 (ರಸ ತೆಗೆಯಿರಿ)
* ಸಾಸಿವೆ ಎಣ್ಣೆ - 1 ಕಪ್
* ಸಾಸಿವೆ - 2 ಚಮಚ (ದಪ್ಪಗೆ ಪುಡಿ ಮಾಡಿದ್ದು)
* ಮೆಂತ್ಯ ಕಾಳು - 1 ಚಮಚ (ಸ್ವಲ್ಪ ಹುರಿದದ್ದು)
* ಅರಿಶಿನ ಪುಡಿ - 1 ಚಮಚ
* ಖಾರದ ಪುಡಿ - ರುಚಿಗೆ ತಕ್ಕಷ್ಟು
* ಉಪ್ಪು - ರುಚಿಗೆ ತಕ್ಕಷ್ಟು

ದೇಸಿ ಮಿಕ್ಸ್ ಉಪ್ಪಿನಕಾಯಿ ತಯಾರಿಸುವ ವಿಧಾನ

- ಮೊದಲಿಗೆ, ಕ್ಯಾರೆಟ್ ಮತ್ತು ಮೂಲಂಗಿಯನ್ನು ಚೆನ್ನಾಗಿ ತೊಳೆದು ಸಿಪ್ಪೆ ತೆಗೆಯಿರಿ. ನಂತರ ಅವುಗಳನ್ನು ತೆಳುವಾದ ಉದ್ದವಾದ ತುಂಡುಗಳಾಗಿ ಕತ್ತರಿಸಿ. ಹಸಿ ಮೆಣಸಿನಕಾಯಿಗಳ ಕಾಂಡ ತೆಗೆದು ಉದ್ದವಾಗಿ ಸೀಳಿಕೊಳ್ಳಿ.

- ಈಗ ಕತ್ತರಿಸಿದ ಎಲ್ಲಾ ತರಕಾರಿಗಳನ್ನು ಸ್ವಚ್ಚವಾದ ಬಟ್ಟೆಯ ಮೇಲೆ ಹರಡಿ. ಸುಮಾರು 2 ರಿಂದ 3 ಗಂಟೆಗಳ ಕಾಲ ಬಿಸಿಲಿನಲ್ಲಿ ಒಣಗಿಸಿ. ಇದರಿಂದ ತರಕಾರಿಗಳಲ್ಲಿನ ತೇವಾಂಶ ಕಡಿಮೆಯಾಗುತ್ತದೆ. ನೀವು ತಯಾರಿಸುವ ಉಪ್ಪಿನಕಾಯಿ ಹೆಚ್ಚು ದಿನ ಬಾಳಿಕೆ ಬರುತ್ತದೆ.

- ಇದಾದ ಬಳಿಕ ಉಪ್ಪಿನಕಾಯಿ ಮಸಾಲೆ ತಯಾರಿಸಬೇಕು. ಅದಕ್ಕಾಗಿ, ಒಂದು ಬಾಣಲೆಯಲ್ಲಿ ಮೆಂತ್ಯ ಕಾಳುಗಳನ್ನು ಸ್ವಲ್ಪ ಹುರಿಯಿರಿ. ಅದು ತಣ್ಣಗಾದ ನಂತರ ದಪ್ಪಗೆ ಪುಡಿ ಮಾಡಿಕೊಳ್ಳಿ.

ಒಂದು ಬಟ್ಟಲಿನಲ್ಲಿ ಸಾಸಿವೆ ಪುಡಿ, ಅರಿಶಿನ, ಖಾರದ ಪುಡಿ, ಉಪ್ಪು ಮತ್ತು ಹುರಿದ ಮೆಂತ್ಯ ಪುಡಿಯನ್ನು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ ಮಸಾಲೆ ತಯಾರಿಸಿಕೊಳ್ಳಿ.

- ಈಗ ಸಾಸಿವೆ ಎಣ್ಣೆಯನ್ನು ಚೆನ್ನಾಗಿ ಕಾಯಿಸಿ. ನಂತರ ಅದನ್ನು ಸಂಪೂರ್ಣವಾಗಿ ತಣ್ಣಗಾಗಲು ಬಿಡಿ. ಎಣ್ಣೆ ಸಂಪೂರ್ಣವಾಗಿ ತಣ್ಣಗಾದ ನಂತರವೇ ಬಳಸಬೇಕು.

- ಬಳಿಕ ದೊಡ್ಡ ಪಾತ್ರೆಯಲ್ಲಿ ಕತ್ತರಿಸಿದ ಕ್ಯಾರೆಟ್, ಮೂಲಂಗಿ, ಹಸಿ ಮೆಣಸಿನಕಾಯಿ, ಶುಂಠಿ ಮತ್ತು ತಯಾರಿಸಿದ ಮಸಾಲೆಯನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ನಂತರ ಅದಕ್ಕೆ ನಿಂಬೆ ರಸ ಸೇರಿಸಿ. ಕೊನೆಯಲ್ಲಿ ತಣ್ಣಗಾದ ಸಾಸಿವೆ ಎಣ್ಣೆಯನ್ನು ಸೇರಿಸಿ ಎಲ್ಲವನ್ನೂ ಚೆನ್ನಾಗಿ ಬೆರೆಸಿ.

- ಈಗ ಸಿದ್ಧಪಡಿಸಿದ ಉಪ್ಪಿನಕಾಯಿಯನ್ನು ಸ್ವಚ್ಛ ಮತ್ತು ಒಣ ಗಾಜಿನ ಜಾರಿಗೆ ತುಂಬಿ. ಇದನ್ನು 2 ರಿಂದ 3 ದಿನಗಳ ಕಾಲ ಪ್ರತಿದಿನವೂ ಸ್ವಲ್ಪ ಸಮಯ ಬಿಸಿಲಿನಲ್ಲಿಡಿ.

- ಹಾಗೆಯೇ ಪ್ರತಿ ದಿನ ಜಾರನ್ನು ಅಲುಗಾಡಿಸುತ್ತಿರಿ. ಸುಮಾರು 4 ರಿಂದ 5 ದಿನಗಳ ನಂತರ ಉಪ್ಪಿನಕಾಯಿ ಸವಿಯಲು ಸಿದ್ಧವಾಗುತ್ತದೆ.