ಹಿಟ್ಟು ರುಬ್ಬದೆ ದಿಢೀರ್ ಮಾಡಿ ಜೋಳದ ದೋಸೆ..! 5 ನಿಮಿಷವೂ ಹಿಡಿಯಲ್ಲ..!

ನೀವು ಬ್ರೇಕ್‌ಫಾಸ್ಟ್ ಸ್ವಲ್ಪ ಅದ್ಭುತ ರುಚಿ ನೀಡಲಿ ಎಂಬ ಕಾರಣಕ್ಕೆ ಹೊಸದಾಗಿ ಪ್ರಯತ್ನಿಸುವ ಅಭ್ಯಾಸ ಇಟ್ಟುಕೊಂಡಿರಬಹುದು. ಹಾಗೆ ಹೊಸದಾಗಿ ಅಲ್ಲದಿದ್ದರೂ ದೋಸೆಯನ್ನೇ ವಿಶೇಷ ರೀತಿಯಲ್ಲಿ ಮಾಡಿ ಸವಿಯಲು ಮುಂದಾಗಿರಬಹುದು. ಸಾಮಾನ್ಯವಾಗಿ ನಾವು ಉದ್ದು, ಅಕ್ಕಿ ನೆನೆಸಿಟ್ಟು ಬಹುತೇಕ ಎಲ್ಲಾ ವಿಧವಾದ ದೋಸೆ ಸವಿಯುತ್ತೇವೆ. ಆದ್ರೆ ಅದರಲ್ಲೂ ಒಂದಿಷ್ಟು ವಿಶೇಷ ಹಾಗೂ ವಿಭಿನ್ನ ರುಚಿಯಲ್ಲಿ ಮಾಡಬಹುದು.

ಇನ್ನು ದೋಸೆ ಅಂದರೆ ಎಲ್ಲರಿಗೂ ಇಷ್ಟವಾಗುವ ಖಾದ್ಯ. ಮನೆ ಮಂದಿ ಎಲ್ಲಾ ಕುಳಿತು ದೋಸೆ ಸವಿಯಲು ಇಷ್ಟಪಡುತ್ತಾರೆ. ಒಂದು ಚಟ್ನಿ ಅಥವಾ ಸಾಂಬಾರ್ ಇದ್ದರೆ ಸಾಕು, ದೋಸೆ ಸವಿಯಲು ಅದ್ಭುತ ರುಚಿ ನೀಡುತ್ತೆ. ಅದರಲ್ಲು ಮಸಾಲೆ ದೋಸೆ, ಬೆಣ್ಣೆ ದೋಸೆ, ಈರುಳ್ಳಿ ದೋಸೆ, ರವೆ ದೋಸೆ ಎಲ್ಲರು ಇಷ್ಟಪಡುವ ಬಗೆಯಾಗಿದೆ. ಆದ್ರೆ ನಾವಿಂದು ವಿಶೇಷ ಎನಿಸುವಂತಹ ವಿಭಿನ್ನ ದೋಸೆ ಮಾಡಿ ಸವಿಯಲು ಮುಂದಾಗೋಣ.

ನಾವಿಂದು ಜೋಳದ ಹಿಟ್ಟಿನಲ್ಲಿ ದೋಸೆ ಕುರಿತು ತಿಳಿಯೋಣ. ಸಾಮಾನ್ಯವಾಗಿ ಜೋಳದ ಹಿಟ್ಟಿನಿಂದ ರೊಟ್ಟಿ ಮಾಡಿ ಸವಿಯುವುದು ನೀವು ನೋಡಿರಬಹುದು. ಹಾಗೆ ಖಡಕ್ ರೊಟ್ಟಿಯನ್ನು ನೀವು ಕೂಡ ಸವಿದಿರಬಹುದು. ಆದ್ರೆ ಜೋಳದ ಹಿಟ್ಟಿನ ನೀರ್ ದೋಸೆ ಎಂದಾದ್ರು ಸವಿದಿದ್ದೀರಾ? ನಾವಿಂದು ಈ ವಿಶೇಷ ರುಚಿಯ ದೋಸೆ ಮಾಡುವುದು ಹೇಗೆ ಅನ್ನೋದನ್ನು ತಿಳಿದುಕೊಳ್ಳೋಣ.

ಈ ಜೋಳದ ದೋಸೆ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು? ಮಾಡುವ ವಿಧಾನವೇನು? ಮಾಡಲು ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ಇಲ್ಲಿ ತಿಳಿದುಕೊಳ್ಳೋಣ.

ಜೋಳದ ದೋಸೆ ಮಾಡಲು ಬೇಕಾಗುವ ಪದಾರ್ಥಗಳು?

• ಜೋಳದ ಹಿಟ್ಟು - 250 ಗ್ರಾಂ
• ಈರುಳ್ಳಿ
• ಹಸಿರು ಮೆಣಸಿನಕಾಯಿ
• ಜೀರಿಗೆ
• ಶುಂಠಿ
• ಕೊತ್ತಂಬರಿ ಸೊಪ್ಪು
• ಖಾರದ ಪುಡಿ
• ಉಪ್ಪು
• ಕರಿಬೇವು
• ಅಕ್ಕಿ ಹಿಟ್ಟು
• ಎಣ್ಣೆ

ಜೋಳದ ದೋಸೆ ಮಾಡುವ ವಿಧಾನವೇನು?

ಒಂದು ಬೌಲ್‌ನಲ್ಲಿ ಜೋಳದ ಹಿಟ್ಟು ತೆಗೆದುಕೊಂಡು ಅದಕ್ಕೆ ಸಣ್ಣದಾಗಿ ಹೆಚ್ಚಿಕೊಂಡಿರುವ ಈರುಳ್ಳಿ, ಹಸಿಮೆಣಸು ಹಾಕಿ, ಹಾಗೆ ಇದಕ್ಕೆ ಜೀರಿಗೆ, ತುರಿದ ಶುಂಠಿ, ಖಾರದ ಪುಡಿ, ಉಪ್ಪು, ಕೊತ್ತಂಬರಿ ಸೊಪ್ಪು, ಕತ್ತರಿಸಿದ ಕರಿಬೇವು, 2 ಸ್ಪೂನ್ ಅಕ್ಕಿ ಹಿಟ್ಟು, ಹಾಕಿ ಡ್ರೈ ಮಿಕ್ಸ್ ಮಾಡಿಕೊಳ್ಳಿ. ಈಗ ಹಿಟ್ಟು ತೆಗೆದುಕೊಂಡ ಅಳತೆಯಷ್ಟೇ ನೀರು ಹಾಕಿಕೊಂಡು ಮಿಕ್ಸ್ ಮಾಡಿ.

ಈ ಹಿಟ್ಟು ಗಂಟು ಗಂಟಾಗದಂತೆ ನೋಡಿಕೊಳ್ಳಿ. ಚೆನ್ನಾಗಿ ನೀರಾಗಿ ಬರುವಂತೆ ಮಿಕ್ಸ್ ಮಾಡಿಕೊಳ್ಳಿ. ಹಿಟ್ಟು ಗಟ್ಟಿಯಾಗಬಾರದು, ಇದು ನೀರ್ ದೋಸೆಯಂತೆ ಬರಬೇಕಾದರೆ ನೀರು ಹೆಚ್ಚಾಗಿ ಬಳಸಿ, ಮತ್ತೆ ಬೇಕಾದರೆ ನೀರು ಹಾಕಿಕೊಂಡು ಮಿಕ್ಸ್ ಮಾಡಿ. ನಂತರ ಮುಚ್ಚಳ ಮುಚ್ಚಿ 10 ನಿಮಿಷ ಹಿಟ್ಟನ್ನು ಇಡಿ.

10 ನಿಮಿಷದ ಬಳಿಕ ಒಲೆ ಮೇಲೆ ಕಾವಲಿ ಇಟ್ಟು ಕಾವಲಿ ಕಾದ ಬಳಿಕ ಬೇಕಾದರೆ ಎಣ್ಣೆ ಹಚ್ಚಿಕೊಳ್ಳಬಹುದು. ಈಗ ನೀರು ದೋಸೆ ಹಾಕಿಕೊಳ್ಳುವಂತೆ ಹಿಟ್ಟನ್ನು ಹಾಕಿ. ಹಾಗೆ ಮೇಲೆ ಎಣ್ಣೆ ಹಾಕಿಕೊಂಡು 2 ನಿಮಿಷ ಬಿಟ್ಟು ತಿರುಗಿಸಿ ಹಾಕಿಕೊಳ್ಳಿ. ಡೀಪ್ ಫ್ರೈ ಮಾಡಿದಷ್ಟು ಇದರ ರುಚಿ ಅದ್ಭುತವಾಗಿ ಬರಲಿದೆ. ಇಷ್ಟಾದರೆ ನಿಮ್ಮ ಮುಂದೆ ಜೋಳದ ಹಿಟ್ಟಿನ ದೋಸೆ ರೆಡಿಯಾಗುತ್ತೆ. ದಿಢೀರ್ ಎಂದು ಮಾಡಿಕೊಳ್ಳಬಹುದಾದ ದೋಸೆ ಇದಾಗಿದೆ. ಈ ರೀತಿಯ ದೋಸೆ ನೀವು ಕೂಡ ಮನೆಯಲ್ಲಿ ಒಮ್ಮೆ ಟ್ರೈ ಮಾಡಿ.

ಇದಕ್ಕೆ ಹಿಂದಿನ ದಿನ ನೆನೆಸಿಡುವುದು ಬೇಡ, ರುಬ್ಬಿಕೊಳ್ಳುವುದು ಕೂಡ ಬೇಡ. ಹಾಗೆ ದಿಢೀರ್ ಎಂದು ರೆಡಿ ಮಾಡಿಕೊಳ್ಳಬಹುದು.