ಸಖತ್ ರುಚಿಯ ಜೋಳದ ಕಟ್ಲೆಟ್ ಟ್ರೈ ಮಾಡಿ..! 5 ನಿಮಿಷ ಸಾಕು

ಸಂಜೆ ಸಮಯದ ಸ್ನ್ಯಾಕ್ಸ್‌ಗೆ ನೀವು ಏನೆಲ್ಲಾ ಉಪಹಾರ ಸವಿದಿರುತ್ತೀರಿ. ಚಿಕನ್ ಕಟ್ಲೆಟ್, ತರಕಾರಿ ಕಟ್ಲೆಟ್ ಸಹ ಸವಿದಿರುತ್ತೀರಿ, ಆರೋಗ್ಯ ಹಾಗೂ ಬಾಯಿ ರುಚಿಯ ಹೆಚ್ಚಿಸುವ ಈ ಕಟ್ಲೆಟ್‌ಗಳೆಂದರೆ ಯಾರಿಗೆ ಇಷ್ಟವಿಲ್ಲ ಹೇಳಿ. ಗರಿ ಗರಿಯಾದ ಈ ಕಟ್ಲೆಟ್‌ಗಳನ್ನು ಒಂದೊಂದಾಗಿ ತಿನ್ನುತ್ತಿದ್ದರೆ ಆ ದಿನ ಊಟವೇ ಮರೆತು ಹೋಗಿರುತ್ತೆ. ಮಾಂಸಹಾರಿಗಳಿಗೆ ಚಿಕನ್ ಕಟ್ಲೆಟ್ ರುಚಿ ನೀಡಿದರೆ ಸಸ್ಯಹಾರಿಗಳಿಗೆ ತರಕಾರಿ ಕಟ್ಲೆಟ್, ಜೋಳದ ಕಟ್ಲೆಟ್ ಅತ್ಯುತ್ತಮ ರುಚಿ ನೀಡಲಿದೆ.

ಒಮ್ಮೆ ನೀವು ಕಟ್ಲೆಟ್ ಮಾಡಿ ಇಟ್ಟು ಊಟ ಸಮಯದಲ್ಲೋ ಅಥವಾ ಏನಾದರು ಸ್ನ್ಯಾಕ್ಸ್ ಸವಿಯಬೇಕು ಎಂಬ ಮನಸಾದಾಗ ಬಿಸಿ ಮಾಡಿಕೊಂಡು ಸವಿಯಬಹುದು. ವಿಭಿನ್ನವಾಗಿ ಬಾಯಿಗೆ ರುಚಿ ಎನಿಸುವ ಕಟ್ಲೆಟ್‌ ಮಾಡಿ ಸೇವಿಸಿದರೆ ನಿತ್ಯ ಸೇವಿಸುವ ತರಕಾರಿಯ ಪ್ರಮಾಣಕ್ಕಿಂತ ಸ್ವಲ್ಪ ಹೆಚ್ಚೇ ಸೇವಿಸುವುದು ಖಂಡಿತಾ.

ಅದ್ರಲ್ಲೂ ನಾವಿಂದು ಈ ಜೋಳದಿಂದ ಮಾಡುವ ರುಚಿಕರ ಕಟ್ಲೆಟ್ ಕುರಿತು ತಿಳಿದುಕೊಳ್ಳೋಣ. ಜೋಳದಿಂದ ಮಾಡಿದ ಈ ಕಟ್ಲೆಟ್‌ಗಳು ಎಷ್ಟೊಂದು ರುಚಿಕರ ಆಗಿರುತ್ತೆ ಅಂದ್ರೆ ಒಮ್ಮೆ ಸವಿದರೆ ನೀವು ಮತ್ತೆ ಮತ್ತೆ ಸವಿಯಲು ಮುಂದಾಗೋದು ಪಕ್ಕ. ಹಾಗಾದ್ರೆ ನಾವಿಂದು ಈ ಜೋಳದ ಕಟ್ಲೆಟ್ ಮಾಡೋದು ಹೇಗೆ ಎಂಬುದನ್ನು ತಿಳಿಯೋಣ.

ಜೋಳದ ಕಟ್ಲೆಟ್ ಮಾಡಲು ಬೇಕಾಗುವ ಪದಾರ್ಥಗಳೇನು? ಯಾವ ರೀತಿ ಮಾಡಬೇಕು? ಹಿಟ್ಟು ಹೇಗೆ ರೆಡಿ ಮಾಡಬೇಕು? ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಜೋಳದ ಕಟ್ಲೆಟ್ ಮಾಡಲು ಬೇಕಾಗುವ ವಸ್ತುಗಳು

• ಜೋಳ- 1 ಕಪ್
• ಆಲೂಗಡ್ಡೆ -1
• ಶುಂಠಿ
• ಅವಲಕ್ಕಿ-1 ಕಪ್
• ಕರಿಬೇವು
• ಕೊತ್ತಂಬರಿ ಸೊಪ್ಪು
• ಉಪ್ಪು
• ಚಾಟ್ ಮಸಾಲ
• ಖಾರದ ಪುಡಿ
• ಒಂಕಾಳು
• ಗರಂ ಮಸಾಲ

ಜೋಳದ ಕಟ್ಲೆಟ್ ಮಾಡುವುದು ಹೇಗೆ

ಮೊದಲು ಒಂದು ಬೌಲ್‌ನಲ್ಲಿ ಕಾಲು ಕಪ್ ಗಟ್ಟಿ ಅವಲಕ್ಕಿ ತೆಗೆದುಕೊಂಡು ಅದನ್ನು ಒಂದು ಮಿಕ್ಸಿ ಜಾರ್‌ಗೆ ಹಾಕಿ ಪುಡಿ ಮಾಡಿಕೊಳ್ಳಿ. ಬಳಿಕ ಒಂದು ಕಪ್ ಬೇಯಿಸಿದ ಜೋಳ ತೆಗೆದುಕೊಂಡು ತರಿ ತರಿಯಾಗುವಂತೆ ಪುಡಿ ಮಾಡಿಕೊಂಡು ಬದಿಗೆ ಇಟ್ಟುಕೊಳ್ಳಿ. ಈಗ ಒಂದು ಆಲೂಗಡ್ಡೆಯನ್ನು ಬೇಯಿಸಿ ಅದರ ಸಿಪ್ಪೆ ತೆಗೆದು ಪುಡಿ ಪುಡಿ ಮಾಡಿ ಒಂದು ಬೌಲ್‌ಗೆ ಹಾಕಿ.

ಒಂದು ದೊಡ್ಡ ಬೌಲ್ ತೆಗೆದುಕೊಂಡು ಆಲೂಗಡ್ಡೆ, ಜೋಳದ ಹಿಟ್ಟು, ಶುಂಠಿ, ಕರಿಬೇವು, ಕೊತ್ತಂಬರಿ ಸೊಪ್ಪು, ಉಪ್ಪು, ಚಾಟ್ ಮಸಾಲ, ಖಾರದ ಪುಡಿ, ಓಂಕಾಳು, ಗರಂ ಮಸಾಲ ಹಾಕಿಕೊಂಡು ಚೆನ್ನಾಗಿ ಕೈಯಿಂದ ಮಿಕ್ಸ್ ಮಾಡಿ. ಈಗ ಅವಲಕ್ಕಿ ಪುಡಿಯನ್ನು ಸಹ ಹಾಕಿಕೊಂಡು ಮಿಕ್ಸ್ ಮಾಡಿಕೊಳ್ಳಿ.

ಇದನ್ನು ಮಿಕ್ಸ್ ಮಾಡುವಾಗ ನೀರು ಹಾಕಿಕೊಳ್ಳಬೇಡಿ. ಹಾಗೆಯೇ ಮಿಕ್ಸ್ ಮಾಡಿಕೊಳ್ಳಿ. ಬಳಿಕ ಹಿಟ್ಟು ತೆಗೆದುಕೊಂಡು ನಿಮಗೆ ಎಷ್ಟು ದೊಡ್ಡದಾಗಿ ಬೇಕೋ ಅಷ್ಟು ದೊಡ್ಡದಾಗಿ ತಟ್ಟಿಕೊಂಡು ಇಡಿ. ಈಗ ಒಲೆ ಮೇಲೆ ಒಂದು ಕಾವಲಿ ಇಟ್ಟು ಎಣ್ಣೆ ಹಚ್ಚಿಕೊಳ್ಳಿ. ಕಾವಲಿ ಬಿಸಿಯಾದಾಗ ತಟ್ಟಿಕೊಂಡಿರುವ ಕಟ್ಲೆಟ್‌ಗಳನ್ನ ಅದರ ಮೇಲೆ ಹಾಕಿ ಕಾಯಿಸಿಕೊಳ್ಳಿ.

ಒಮ್ಮೆ ಮೂರರಿಂದ ನಾಲ್ಕು ಕಟ್ಲೆಟ್ ಕಾಯಿಸಿಕೊಳ್ಳಿ. ಕಟ್ಲೆಟ್ ಅನ್ನು ತಿರುವಿಹಾಕಿಕೊಳ್ಳುತ್ತಾ ಫ್ರೈ ಮಾಡಿ. ಸುಮಾರು 15ರಿಂದ 20 ನಿಮಿಷ ಫ್ರೈ ಮಾಡಿದರೆ ಸಾಕಾಗುತ್ತದೆ. ಇಷ್ಟಾದರೆ ನಿಮ್ಮ ಮುಂದೆ ಜೋಳದ ಕಟ್ಲೆಟ್ ರೆಡಿಯಾಗಿರುತ್ತದೆ, ಇದನ್ನು ನೀವು ಚಟ್ನಿ, ಸಾಸ್ ಜೊತೆಗೂ ಸವಿಯಬಹುದು. ನೀವು ಸಹ ಒಮ್ಮೆ ಮನೆಯಲ್ಲಿ ಈ ರೆಸಿಪಿ ಟ್ರೈ ಮಾಡಿ ನೋಡಿ.