ತಿಂಡಿ, ಊಟ ಎರಡಕ್ಕೂ ಈ ಚಪ್ಪರದ ಅವರೆಕಾಳು ಪಲ್ಯ ಬೆಸ್ಟ್‌..! ಮಾಡೋದು ಹೇಗೆ?

ನೀವು ಊಟಕ್ಕೆ ಹಾಗೆ ತಿಂಡಿಗೆ ಹಲವು ರೀತಿಯ ಪಲ್ಯ ಮಾಡಿ ಸವಿದಿರುತ್ತೀರಿ. ತರಕಾರಿಗಳ ಪಲ್ಯ ಆರೋಗ್ಯಕ್ಕೆ ಬಹಳ ಉತ್ತಮ. ಅದರಲ್ಲೂ ವಿಶಿಷ್ಟ ಬಗೆಯ ತರಕಾರಿ ಪಲ್ಯ ಬಹಳ ರುಚಿಕರವಾಗಿರುತ್ತೆ. ಹಾಗೆ ನಾವು ಬೆಳಗ್ಗೆ ತಿಂಡಿ ಹಾಗೂ ಮಧ್ಯಾಹ್ನದ ಊಟಕ್ಕೂ ಸೇರಿ ಒಂದೇ ಬಾರಿಗೆ ರುಚಿ ರುಚಿಯ ಪಲ್ಯ ಮಾಡುವುದು ಹೆಚ್ಚು. ಏಕೆಂದರೆ ಸಮಯವು ಉಳಿತಾಯವಾಗುತ್ತೆ.

ಹಾಗಾದ್ರೆ ನಾವಿಂದು ಎರಡು ಹೊತ್ತಿಗೂ ಸರಿಹೊಂದುವಂತಹ ವಿಭಿನ್ನ ರುಚಿಯ ಚಪ್ಪರದ ಅವರೆಕಾಯಿ ಪಲ್ಯ ಮಾಡುವ ಕುರಿತು ತಿಳಿದುಕೊಳ್ಳೋಣ. ನೀವು ಅವರೆಕಾಯಿಯನ್ನು ಸಾಂಬಾರ್‌, ಚಟ್ನಿ, ಪಲ್ಯ ಮಾಡಿ ಸವಿದು ರುಚಿ ನೋಡಿರುತ್ತೀರಿ. ಹಾಗೆ ಚಪ್ಪರದ ಅವರೆಕಾಯಿ ಕೂಡ ಅದ್ಭುತ ರುಚಿ ನೀಡಲಿದೆ. ನೀವು ಕೂಡ ಈ ಚಪ್ಪರದ ಅವರೆಕಾಯಿಯ ಪಲ್ಯ ಒಮ್ಮೆ ಸವಿದರೆ ಯಾವಾಗಲು ಸವಿಯಲು ನೀವು ಇಷ್ಟಪಡುತ್ತೀರಿ.

ಹಾಗಾದ್ರೆ ಅವರೆಕಾಳಿನ ಈ ರುಚಿ ರುಚಿಯ ಪಲ್ಯ ಮಾಡುವುದು ಹೇಗೆ? ಚಪ್ಪರದ ಅವರೆಕಾಲಿನ ಪಲ್ಯ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು? ಮಾಡುವ ವಿಧಾನವೇನು ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಚಪ್ಪರದ ಅವರೆಕಾಳಿನ ಪಲ್ಯ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು?

• ಚಪ್ಪರದ ಅವರೇಕಾಯಿ
• ಈರುಳ್ಳಿ
• ತೆಂಗಿನಕಾಯಿ ತುರಿ
• ಒಣ ಮೆಣಸು
• ಹಸಿ ಮೆಣಸಿನಕಾಯಿ 4
• ಕೊತ್ತಂಬರಿ ಸೊಪ್ಪು
• ಕರಿಬೇವಿನ ಸೊಪ್ಪು
• ಎಣ್ಣೆ
• ಸಾಸಿವೆ
• ಜೀರಿಗೆ
• ಹಸಿ ಶುಂಠಿ
• ಅರಿಶಿಣ ಪುಡಿ
• ಉಪ್ಪು

ಚಪ್ಪರದ ಅವರೆಕಾಳಿನ ಪಲ್ಯ ಮಾಡುವುದು ಹೇಗೆ?

ಮೊದಲು ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು ಅದಕ್ಕೆ ಹಸಿ ಮೆಣಸು, ಕರಿಬೇವು, ಜೀರಿಗೆ, ಶುಂಠಿ, ಅರಶಿಣ, ತೆಂಗಿನ ಕಾಯಿ ತುರಿ ಹಾಕಿಕೊಂಡು ಹಾಗೆ ತರಿತರಿಯಾಗಿ ಪುಡಿ ರುಬ್ಬಿಕೊಳ್ಳಬೇಕು. ಹುಡಿ ಹುಡಿಯಾಗಿದ್ದರೆ ಸಾಕು. ಇದನ್ನು ತೆಗೆದು ಒಂದು ಬೌಲ್‌ಗೆ ಹಾಕಿಟ್ಟುಕೊಳ್ಳಿ.

ಈಗ ಬಾಣಲೆ ಒಲೆ ಮೇಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿ ಎಣ್ಣೆ ಬಿಸಿಯಾದಾಗ ಸಾಸಿವೆ, ಒಣ ಮೆಣಸು, ಈರುಳ್ಳಿ ಹಾಕಿಕೊಂಡು 2 ನಿಮಿಷ ಫ್ರೈ ಮಾಡಿಕೊಳ್ಳಿ. ಅನಂತರ ಈ ಚಪ್ಪರದ ಅವರೆಕಾಳನ್ನು ಇಕ್ಕದಾಗಿ ಕತ್ತರಿಸಿಕೊಂಡು ಇದನ್ನು ಪಾತ್ರೆಗೆ ಹಾಕಿ, ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. 2 ನಿಮಿಷಗಳ ಕಾಲ ಮಿಕ್ಸ್ ಮಾಡಿಕೊಳ್ಳುತ್ತಾ ಬೇಯಿಸಿಕೊಳ್ಳಿ.

ಈಗ ಮಿಕ್ಸಿ ಜಾರ್‌ನಲ್ಲಿ ರುಬ್ಬಿಕೊಂಡಿರುವ ಪುಡಿ ಪುಡಿ ಮಸಾಲೆಯನ್ನು ಈ ಬಾಣಲೆಗೆ ಹಾಕಿ ಮಿಕ್ಸ್ ಮಾಡಿಕೊಳ್ಳಿ. 2 ನಿಮಿಷ ಮಿಕ್ಸ್ ಮಾಡಿಕೊಂಡು ಬಳಿಕ 2 ಸ್ಪೂನ್ ನೀರು ಹಾಕಿ ಮಿಕ್ಸ್ ಮಾಡಿ 5 ನಿಮಿಷ ಬೇಯಲು ಬಿಡಬೇಕು. ಮುಚ್ಚಳ ಮುಚ್ಚಿ ಸಣ್ಣ ಉರಿಯಲ್ಲಿ 5 ನಿಮಿಷ ಬೇಯಲು ಬಿಡಿ. ಆಗಾಗ ಮಿಕ್ಸ್ ಮಾಡಿಕೊಳ್ಳಿ.

ಒಟ್ಟು 5ರಿಂದ 6 ನಿಮಿಷ ಬೇಯಿಸಿಕೊಂಡ ಬಳಿಕ ಮುಚ್ಚಳ ತೆಗೆದು ರುಚಿ ನೋಡಿಕೊಳ್ಳಿ. ಉಪ್ಪು, ಖಾರ ಕಡಿಮೆಯಾಗಿದ್ದರೆ ಮತ್ತೆ ಹಾಕಿಕೊಂಡು ಮಿಕ್ಸ್ ಮಾಡಿಕೊಳ್ಳಿ, ಅಂತಿಮವಾಗಿ ಸಣ್ಣದಾಗಿ ಹೆಚ್ಚಿರುವ ಕೊತ್ತಂಬರಿ ಸೊಪ್ಪು ಹಾಕಿಕೊಂಡು ಮಿಕ್ಸ್ ಮಾಡಿ ಒಲೆ ಆಫ್ ಮಾಡಿಕೊಳ್ಳಿ. ಇಷ್ಟಾದರೆ ತಿಂಡಿ, ಊಟ ಎಲ್ಲದಕ್ಕೂ ಚಪ್ಪರದ ಅವರೆಕಾಳಿನ ಪಲ್ಯ ಸಿದ್ದವಾಗುತ್ತೆ. ನೀವು ಕೂಡ ಮನೆಯಲ್ಲಿ ಟ್ರೈ ಮಾಡಿ ನೋಡಿ. ಈ ಪಲ್ಯ ಮಾಡೋದು ಕೂಡ ತುಂಬಾನೆ ಸುಲಭ, ಹಾಗೆ ಕಡಿಮೆ ಸಮಯದಲ್ಲಿ ಇದನ್ನು ಮಾಡಿ ಮುಗಿಸಬಹುದು.