ಯುಗಾದಿ ಹಬ್ಬದಲ್ಲಿ ಮಾಡಿ ಬದನೆಕಾಯಿ ಗೊಜ್ಜು! ಅದ್ಭುತ ರುಚಿ ರೆಸಿಪಿ

ಹಬ್ಬವಿದ್ದಾಗ ಮನೆಯಲ್ಲಿ ವಿಶೇಷ ಊಟ, ತಿಂಡಿ ಮಾಡುವುದು ಕಾಮನ್. ಅದ್ರಲ್ಲೂ ಹಲವರು ವಿಶೇಷ ರೀತಿಯ ಖಾದ್ಯಗಳ ಮಾಡಿ ಸವಿಯೋದು ನೋಡಬಹುದು. ಹಬ್ಬದ ಊಟ ಅಂದ್ರೆ ಎಲ್ಲರೂ ಇಷ್ಟಪಟ್ಟು ಸವಿಯುತ್ತಾರೆ. ಅದ್ರಲ್ಲೂ ಊಟದೊಂದಿಗೆ ಸಿಹಿ ಇರುವಂತೆ, ಪಲ್ಯ, ಗ್ರೇವಿ, ಸಾಂಬಾರ್ ವಿಶೇಷವಾಗಿ ಮಾಡುತ್ತಾರೆ. ತರಕಾರಿಗಳ ಬಳಸಿ ವಿಭಿನ್ನ ಅಡುಗೆ ಅಂದು ಸಿದ್ದವಾಗುತ್ತೆ.

ಈಗ ಯುಗಾದಿಯ ದಿನದಂದು ನಾವು ವಿಭಿನ್ನ ಹಾಗೂ ವಿಶೇಷ ಎನಿಸುವ ಪಲ್ಯ, ಖಾದ್ಯಗಳ ಮಾಡುವ ಕುರಿತು ತಿಳಿಯೋಣ. ಹಬ್ಬದಂದು ಊಟದೊಂದಿಗೆ ಸವಿಯಲು ಬದನೆಕಾಯಿ ಗೊಜ್ಜು ಮಾಡಿ ಸವಿಯೋದು ಬಹಳ ರುಚಿ ನೀಡಲಿದೆ. ಇದು ಹಬ್ಬದ ಊಟಕ್ಕೆ ಮತ್ತಷ್ಟು ರುಚಿ ತರಲಿದೆ. ಹಾಗಾದ್ರೆ ನಾವಿಂದು ಸುಲಭವಾಗಿ ಈ ಬದನೆಕಾಯಿ ಗೊಜ್ಜು ಮಾಡುವ ಕುರಿತು ತಿಳಿದುಕೊಳ್ಳೋಣ.

Photo Credit: Youtube@RekhaAduge

ಊಟದೊಂದಿಗೆ ಮಾತ್ರವಲ್ಲದೆ ಚಪಾತಿ, ದೋಸೆ, ಇಡ್ಲಿ ಹೀಗೆ ಯಾವುದೇ ತಿಂಡಿಯೊಂದಿಗೂ ಕೂಡ ಈ ಬದನೆಕಾಯಿ ಗೊಜ್ಜು ಬಹಳ ರುಚಿ ನೀಡಲಿದೆ. ನಾವಿಂದು ಹಬ್ಬಕ್ಕಾಗಿ ವಿಶೇಷ ಮಸಾಲೆ ಹಾಕಿ ಮಾಡುವ ಈ ಗೊಜ್ಜು ಮಾಡುವ ಕುರಿತಾಗಿ ತಿಳಿದುಕೊಳ್ಳೋಣ. ಬದನೆಕಾಯಿ ಗೊಜ್ಜು ಮಾಡುವುದು ಹೇಗೆ?, ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು? ಮಾಡು ವಿಧಾನವೇನು? ಎಂಬುದನ್ನು ಇಲ್ಲಿ ತಿಳಿದುಕೊಳ್ಳೋಣ.

ಬದನೆಕಾಯಿ ಗೊಜ್ಜು ಮಾಡಲು ಬೇಕಾಗುವ ಪದಾರ್ಥಗಳು

• ಬದನೆಕಾಯಿ
• ಶುಂಠಿ
• ಬೆಳ್ಳುಳ್ಳಿ
• ಈರುಳ್ಳಿ
• ಹಸಿ ಮೆಣಸು
• ಸಾಸಿವೆ
• ಜೀರಿಗೆ
• ಕರಿಬೇವು
• ಟೊಮೆಟೋ
• ಉಪ್ಪು
• ಎಣ್ಣೆ
• ಗರಂ ಮಸಾಲೆ
• ಅರಶಿಣ
• ಖಾರ ಪುಡಿ
• ಧನಿಯಾ ಪುಡಿ
• ಕೊತ್ತಂಬರಿ ಸೊಪ್ಪು

ಬದನೆಕಾಯಿ ಗೊಜ್ಜು ಮಾಡುವ ಸುಲಭದ ವಿಧಾನವೇನು?

ಮೊದಲು ಬದನೆಕಾಯಿಯನ್ನು ಉದ್ದವಾಗಿ ಹೆಚ್ಚಿ ನೀರಿನಲ್ಲಿ ಹಾಕಿಟ್ಟುಕೊಳ್ಳಿ. ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು ಅದಕ್ಕೆ ಶುಂಠಿ, ಬೆಳ್ಳುಳ್ಳಿ, ಈರುಳ್ಳಿ, ಹಸಿ ಮೆಣಸು ಹಾಕಿ ಸ್ವಲ್ಪ ನೀರು ಸಹ ಹಾಕಿ ರುಬ್ಬಬೇಕು. ಈಗ ಒಲೆ ಮೇಲೆ ಬಾಣಲೆ ಇಟ್ಟು ಎಣ್ಣೆ ಹಾಕಿಕೊಂಡು ಬಳಿಕ ಸಾಸಿವೆ, ಜೀರಿಗೆ ಹಾಕಿ ನಂತರ ಈ ರುಬ್ಬಿದ ಮಸಾಲೆಗಳನ್ನು ಇದಕ್ಕೆ ಹಾಕಿ ಮಿಕ್ಸ್ ಮಾಡುತ್ತಾ ಇರಿ.

1 ನಿಮಿಷದ ಬಳಿಕ ಇದಕ್ಕೆ ಕರಿಬೇವು ಸಹ ಹಾಕಿಕೊಂಡು ಫ್ರೈ ಮಾಡಿ. ಈಗ ಮಿಕ್ಸಿ ಜಾರ್‌ಗೆ 4 ಟೊಮೆಟೋ ಹೆಚ್ಚಿಕೊಂಡು ಹಾಕಿ ಪೇಸ್ಟ್ ಮಾಡಿಕೊಂಡು, ಅದರ ಮಿಶ್ರಣ ಸಹ ಈ ಬಾಣಲೆಗೆ ಹಾಕಿಕೊಂಡು ಮಿಕ್ಸ್ ಮಾಡುತ್ತಾ ಇರಿ.

5 ನಿಮಿಷ ಫ್ರೈ ಮಾಡಿಕೊಂಡ ಬಳಿಕ ಈಗ ಹೆಚ್ಚಿಕೊಂಡಿರುವ ಬದನೆಕಾಯಿಯನ್ನು ಇದಕ್ಕೆ ಹಾಕಿ ಮಿಕ್ಸ್ ಮಾಡಿ. ಬಳಿಕ ಖಾರದ ಪುಡಿ, ಧನಿಯಾ ಪುಡಿ, ಅರಶಿಣ, ಗರಂ ಮಸಾಲೆ, ಉಪ್ಪು ಸಹ ಹಾಕಿಕೊಂಡು ಮಿಶ್ರಣ ಮಾಡಿ. ಇದು ಗಟ್ಟಿಯಾಗಿದ್ದರೆ ನೀರು ಸಹ ಹಾಕಿಕೊಳ್ಳಿ. ಇಲ್ಲವೆ ಗಟ್ಟಿಯಾಗಿಯೂ ಮಾಡಿಕೊಳ್ಳಬಹುದು. ಚೆನ್ನಾಗಿ ಕುದಿಬರಲು ಬಿಡಬೇಕು. ಆಗಾಗ ಮಿಕ್ಸ್ ಮಾಡುತ್ತಾ ತಳ ಹಿಡಿಯದಂತೆ ನೋಡಿಕೊಳ್ಳಿ. ಹಾಗೆ ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪು ಸಹ ಹಾಕಿಕೊಂಡು ಮಿಕ್ಸ್ ಮಾಡಿಕೊಂಡು ಇಳಿಸಿಕೊಂಡರೆ ನಿಮ್ಮ ಮುಂದೆ ರುಚಿ ರುಚಿಯಾದ ಈ ಬದನೆಕಾಯಿ ಗೊಜ್ಜು ಸಿದ್ದವಾಗುತ್ತೆ.