ಘಮ ಘಮ ಎನ್ನುವ ಬೇಳೆ ರಸಂ ಮಾಡಿ ನೋಡಿ..! ಇಲ್ಲಿದೆ ರೆಸಿಪಿ

ನೀವು ಮಧ್ಯಾಹ್ನ ಹಾಗೆ ರಾತ್ರಿಯ ಊಟಕ್ಕೆ ವಿಶೇಷವಾದ ಸಾಂಬಾರ್ ಸವಿಯಲು ಇಷ್ಟಪಡುತ್ತೀರಿ. ಅದ್ರಲ್ಲೂ ಅನ್ನದ ಜೊತೆಗೆ ಬಹಳ ರುಚಿ ನೀಡುವ ರಸಂ, ಬೇಳೆ ಸಾರು, ಹೀಗೆ ಯಾವುದಾದರು ಒಂದು ರುಚಿ ರುಚಿಯ ಖಾದ್ಯ ನೀವು ಸವಿಯಲು ಮುಂದಾಗಬಹುದು. ಇನ್ನು ಬಹಳಷ್ಟು ಸಮಯದಲ್ಲಿ ಸುಲಭವಾಗಿ ಮಾಡಿ ಮುಗಿಸಬಹುದಾದ ಸಾಂಬಾರ್ ಅಥವಾ ಸಾರನ್ನು ನೀವು ಮಾಡಲು ಮುಂದಾಗಿರುತ್ತೀರಿ.

ಹಾಗೆ ಬೇಳೆಯಿಂದ ಮಾಡುವಂತಹ ಎಲ್ಲಾ ಖಾದ್ಯಗಳು ನಿಮಗೆ ಬಹಳ ರುಚಿ ನೀಡಬಹುದು. ಹಾಗೆ ಬೇಳೆ ಸಾರು ಅಂದರೆ ಬಹುತೇಕರಿಗೆ ಇಷ್ಟವಾಗುತ್ತದೆ. ಆದ್ರೆ ನಾವಿಂದು ಬೇಳೆ ಸಾರಿನ ಬದಲಾಗಿ ಅನ್ನದ ಜೊತೆ ಸವಿಯಲು ಬಹಳ ರುಚಿಕರವಾಗಿರುವ ಬೇಳೆ ರಸಂ ಮಾಡುವ ಕುರಿತಾಗಿ ತಿಳಿದುಕೊಳ್ಳೋಣ. ಬೇಳೆ ರಸಂ ಅನ್ನದ ಜೊತೆಗೆ ಸವಿಯಲು ಬಹಳ ರುಚಿಯಾಗಿರುತ್ತೆ.

ಅನ್ನದ ಜೊತೆಗೆ ಬಹಳ ರುಚಿ ನೀಡುವಂತಹ ಈ ಬೇಳೆ ರಸಂ ಮಾಡುವ ಕುರಿತಾಗಿ ನಾವಿಂದು ತಿಳಿದುಕೊಳ್ಳೋಣ. ಅದರಲ್ಲೂ ರಾತ್ರಿ ಊಟದ ರುಚಿ ಹೆಚ್ಚಿಸಬೇಕಾದರೆ ಈ ರಸಂ ಇರಬೇಕು. ಊಟದ ಕೊನೆಯಲ್ಲಿ ಈ ರಸಂ ಸವಿದರೆ ಊಟ ಪೂರ್ಣವಾಗುತ್ತದೆ. ಹಾಗಾದ್ರೆ ನಾವಿಂದು ಈ ಬೇಳೆ ರಸಂ ಮಾಡುವ ಕುರಿತು ತಿಳಿಯೋಣ, ಬೇಳೆ ರಸಂ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು?, ಮಾಡುವ ವಿಧಾನವೇನು?, ಮಾಡಲು ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಬೇಳೆ ರಸಂ ಮಾಡಲು ಬೇಕಾಗುವ ಪದಾರ್ಥಗಳು

• ತೊಗರಿ ಬೇಳೆ
• ಹೆಸರುಬೇಳೆ
• ಟೊಮೊಟೊ
• ಅರಿಶಿನದ ಪುಡಿ
• ಸಾಸಿವೆ
• ಇಂಗು
• ಬ್ಯಾಡಗಿ ಮೆಣಸಿನಕಾಯಿ
• ಒಣ ಮೆಣಸು
• ಕರಿಬೇವಿನ ಸೊಪ್ಪು
• ಕೊತ್ತಂಬರಿ ಸೊಪ್ಪು
• ಹುಣಸೆ ಹಣ್ಣು
• ಜೀರಿಗೆ
• ಬೆಳ್ಳುಳ್ಳಿ
• ಬೆಲ್ಲ
• ಸಾಂಬಾರ್ ಪುಡಿ
• ಉಪ್ಪು
• ಎಣ್ಣೆ

ಬೇಳೆ ರಸಂ ಮಾಡುವ ವಿಧಾನವೇನು?

ಮೊದಲಿಗೆ ಒಂದು ಕಪ್ ತೊಗರಿ ಬೇಳೆಯನ್ನು ಚೆನ್ನಾಗಿ ತೊಳೆದು ಕುಕ್ಕರ್‌ಗೆ ಹಾಕಿಕೊಳ್ಳಿ. ಹಾಗೆ ಕಾಲು ಕಪ್ ಹೆಸರು ಬೇಳೆಯನ್ನು ಕೂಡ ತೊಳೆದು ಇದಕ್ಕೆ ಹಾಕಿಕೊಂಡು, 2 ಟೊಮೆಟೋ ಹೆಚ್ಚಿ ಇದಕ್ಕೆ ಹಾಕಿ, ಅರಶಿಣ ಹಾಕಿ 2 ಕಪ್ ಅಷ್ಟು ನೀರು ಹಾಕಿ, ಎಣ್ಣೆ ಹಾಕಿ ಮಿಕ್ಸ್ ಮಾಡಿಕೊಂಡು ಮುಚ್ಚಳ ಮುಚ್ಚಿ 3 ಸೀಟಿ ಹೊಡೆಯಲು ಬಿಡಿ.

3 ಸೀಟಿ ಹೊಡೆಸಿಕೊಂಡು ಈ ಕುಕ್ಕರ್ ತಣ್ಣಗಾಗಲು ಬಿಡಿ. ಈಗ ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು ಕಾಳು ಮೆಣಸು, ಜೀರಿಗೆ, ಬೆಳ್ಳುಳ್ಳಿ, ಸಾಂಬಾರ್ ಪುಡಿ, ಕರಿಬೇವು ಹಾಕಿ ತರಿತರಿಯಾಗಿ ರುಬ್ಬಿ ಪುಡಿ ಮಾಡಿಕೊಳ್ಳಿ. ಈಗ ಈ ಪುಡಿಯನ್ನು ಬೌಲ್‌ಗೆ ಹಾಕಿಟ್ಟುಕೊಳ್ಳಿ. ಈಗ ಕುಕ್ಕರ್ ಮುಚ್ಚಳ ತೆಗೆದು ಸ್ವಲ್ವ ನೀರನ್ನು ಬೇರ್ಪಡಿಸಿ ಇಟ್ಟು ಬೇಳೆಯನ್ನು ಮಸೆದುಕೊಳ್ಳಬೇಕು. ಸ್ವಲ್ಪ ಪುಡಿಯಾದ ಬಳಿಕ ಮತ್ತೆ ಆ ಬೇರ್ಪಡಿಸಿದ ನೀರನ್ನು ಮತ್ತೆ ಹಾಕಿಕೊಂಡು ಮಿಕ್ಸ್ ಮಾಡಿಕೊಳ್ಳಿ.

ಒಲೆ ಮೇಲೆ ಒಂದು ಬಾಣಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿಕೊಂಡು ಬಳಿಕ ಸಾಸಿವೆ, ಜೀರಿಗೆ, ಇಂಗು, ಒಣ ಮೆಣಸುಗಳು ಹಾಕಿ ಈಗ ಮಿಕ್ಸಿಯಲ್ಲಿ ಪುಡಿ ಮಾಡಿಟ್ಟುಕೊಂಡಿದ್ದ ಮಸಾಲೆ ಪುಡಿಗಳನ್ನು ಕೂಡ ಇದಕ್ಕೆ ಹಾಕಿಕೊಳ್ಳಬೇಕು. ಹಾಗೆ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳುತ್ತಾ ಇರಿ. ಈಗ ಕುಕ್ಕರ್‌ನಲ್ಲಿರುವ ಬೇಳೆಯನ್ನು ಈ ಬಾಣಲೆಗೆ ಹಾಕಿಕೊಳ್ಳಿ.

ಮತ್ತೆ ಒಂದು ನಿಂಬೆ ಹಣ್ಣಿನ ಗಾತ್ರದ ಹುಣಸೆ ಹುಳಿಯನ್ನು ನೀರಿನಲ್ಲಿ ನೆನೆಸಿ, ಕಿವುಚಿಕೊಂಡು ಇದಕ್ಕೆ ಹಾಕಿ ನಂತರ ಬೆಲ್ಲದ ಪುಡಿ, ಉಪ್ಪು, ಸ್ವಲ್ಪ ನೀರು ಹಾಕಿ ಮಿಕ್ಸ್ ಮಾಡಿಕೊಂಡು ಕುದಿಬರಲು ಇಡಿ. 15 ನಿಮಿಷ ಸಣ್ಣಗೆ ಕುದಿಬಂದ ಬಳಿಕ ಕೊತ್ತಂಬರಿ ಸೊಪ್ಪು ಹಾಕಿಕೊಂಡು ಮಿಕ್ಸ್ ಮಾಡಿ ಒಲೆ ಆಫ್ ಮಾಡಿಕೊಳ್ಳಿ. ಇಷ್ಟಾದರೆ ನಿಮ್ಮ ಮುಂದೆ ಬೇಳೆ ರಸಂ ರೆಡಿಯಾಗುತ್ತದೆ. ಅದರ ಘಮಲು ಇಡೀ ಮನೆ ಹರಡಲಿದೆ. ನೀವು ಕೂಡ ಇದನ್ನು ಮನೆಯಲ್ಲಿ ಒಮ್ಮೆ ಟ್ರೈ ಮಾಡಿ ನೋಡಿ.