ಪಲಾವ್‌ಗಿಂತ ರುಚಿಯಾಗಿ ಮಾಡಿ ಈ ಬೀನ್ಸ್ ರೈಸ್: 10 ನಿಮಿಷ ಸಾಕಾಗುತ್ತೆ!

ನೀವು ಬೆಳಗ್ಗೆ ತಿಂಡಿಗಾಗಿ ವಿವಿಧ ರೀತಿಯ ಖಾದ್ಯಗಳ ಸವಿಯಬೇಕು ಎಂದು ಬಯಸುತ್ತೀರಿ, ಅದ್ರಲ್ಲೂ ಸುಲಭವಾಗಿ ಮಾಡುವಂತಹ ಹಾಗೆ ಎಲ್ಲರಿಗೂ ಇಷ್ಟವಾಗುವಂತಹ ಖಾದ್ಯಗಳ ಸವಿಯುವುದು ಅಂದ್ರೆ ಎಲ್ಲರಿಗೂ ಇಷ್ಟವಾಗುತ್ತೆ. ಇನ್ನು ಬೆಳಗ್ಗೆ ತಂಡಿಗೆ ರೈಸ್‌ನಿಂದ ಮಾಡುವಂತಹ ವಿವಿಧ ಬಗೆಯ ಖಾದ್ಯಗಳಂತು ನಿಮಗೆ ಎಲ್ಲರಿಗೂ ಇಷ್ಟವಾಗುತ್ತೆ.

ಸಾಮಾನ್ಯವಾಗಿ ರೈಸ್ ರೆಸಿಪಿಗಳು ಅಂದ್ರೆ ಎಲ್ಲರೂ ಪಲಾವ್, ರೈಸ್ ಬಾತ್, ಪುಳಿಯೋಗರೆ, ಚಿತ್ರಾನ್ನ, ಬಿಸಿ ಬೇಳೆ ಬಾತ್‌ನಂತಹ ವಿಶೇಷ ರುಚಿಯ ಖಾದ್ಯಗಳನ್ನೇ ಇಷ್ಟಪಡುತ್ತಾರೆ. ಅದ್ರಲ್ಲೂ ತರಕಾರಿಗಳ ಹಾಕಿ ಮಾಡುವ ರೈಸ್ ರುಚಿಯ ಜೊತೆಗೆ ಆರೋಗ್ಯಕ್ಕೂ ಬಹಳ ಉತ್ತಮ ಎನ್ನಬಹುದು. ಇನ್ನು ಇಂತಹ ಖಾದ್ಯಗಳು ಮಧ್ಯಾಹ್ನದ ಬಾಕ್ಸ್‌ಗೂ ಕೂಡ ಹಾಕಿಕೊಂಡು ಸವಿಯಬಹುದು.

ಹಾಗಾದ್ರೆ ನಾವಿಂದು ಸುಲಭವಾಗಿ ಮಾಡಬಹುದಾದ ಹಾಗೆ ರುಚಿಕರವಾದ ಬೀನ್ಸ್ ರೈಸ್ ಮಾಡುವುದು ಹೇಗೆ ಅನ್ನೋದನ್ನು ತಿಳಿದುಕೊಳ್ಳೋಣ. ಅದ್ರಲ್ಲೂ ನೀವು ಸುಲಭವಾಗಿ, ಕಡಿಮೆ ಸಮಯದಲ್ಲಿ ಕಡಿಮೆ ವಸ್ತುಗಳ ಬಳಸಿಕೊಂಡು ಮಾಡುವಂತಹ ಖಾದ್ಯ ಇದು. ಹಾಗಾದ್ರೆ ಈ ಬೀನ್ಸ್ ರೈಸ್ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು?, ಮಾಡುವ ವಿಧಾನವೇನು? ಮಾಡಲು ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಬೀನ್ಸ್ ರೈಸ್ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು?

• ಅಕ್ಕಿ
• ಕ್ಯಾರೆಟ್
• ಹಸಿರು ಬೀನ್ಸ್
• ಈರುಳ್ಳಿ
• ಒಣ ಮೆಣಸಿನಕಾಯಿ
• ಬೆಳ್ಳುಳ್ಳಿ
• ಜೀರಿಗೆ
• ಸಾಸಿವೆ
• ಇಂಗು
• ಅರಿಶಿನ ಪುಡಿ
• ಕೆಂಪು ಮೆಣಸಿನ ಪುಡಿ
• ಸಾಂಬಾರ್ ಪುಡಿ
• ಹುಣಸೆ ಹುಳಿ
• ಕೊತ್ತಂಬರಿ ಸೊಪ್ಪು
• ಕರಿಬೇವು
• ಅಡುಗೆ ಎಣ್ಣೆ
• ರುಚಿಗೆ ತಕ್ಕಷ್ಟು ಉಪ್ಪು

ಬೀನ್ಸ್ ರೈಸ್ ಮಾಡುವ ವಿಧಾನವೇನು?

ಮೊದಲು ಒಲೆ ಮೇಲೆ ಒಂದು ಬಾಣಲೆ ಒಲೆ ಮೇಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿಕೊಂಡು ಬಳಿಕ ಸಾಸಿವೆ, ಜೀರಿಗೆ ಹಾಕಿಕೊಳ್ಳಿ, ನಂತರ ಇದಕ್ಕೆ ಒಣ ಮೆಣಸು, ಬೆಳ್ಳುಳ್ಳಿ, ಜಜ್ಜಿಕೊಂಡು ಹಾಕಿಕೊಳ್ಳಿ. ಹಾಗೆ ಇಂಗು, ಚಿಕ್ಕದಾಗಿ ಕತ್ತರಿಸಿದ ಈರುಳ್ಳಿ ಹಾಕಿ ಫ್ರೈ ಮಾಡಿಕೊಳ್ಳಿ.

ಈಗ ತುರಿದ ಕ್ಯಾರೆಟ್ ಹಾಗೂ ಸಣ್ಣದಾಗಿ ಪಲ್ಯಕ್ಕೆ ಕತ್ತರಿಸಿಕೊಂಡಂತೆ ಬೀನ್ಸ್ ಅನ್ನು ಹಾಕಿಕೊಳ್ಳಬೇಕು. ಹಾಗೆ ಕರಿಬೇವು ಹಾಗು ಉಪ್ಪು ಹಾಕಿ 3 ನಿಮಿಷಗಳ ಕಾಲ ಫ್ರೈ ಮಾಡಿಕೊಳ್ಳಿ. ಚೆನ್ನಾಗಿ ಫ್ರೈ ಆದ ಬಳಿ ಈಗ ಅರಶಿಣ ಪುಡಿ, ಖಾರದ ಪುಡಿ, ಸಾಂಬಾರ್ ಪುಡಿ ಹಾಕಿಕೊಂಡು ಮಿಕ್ಸ್ ಮಾಡಿಕೊಳ್ಳಿ. ಈಗ ನೀರಿನಲ್ಲಿ ನೆನಸಿಟ್ಟ ಹುಣಸೆ ಹುಳಿಯನ್ನು ಕಿವುಚಿ ಅದರ ರಸ ಮಾತ್ರ ಹಾಕಿಕೊಂಡು ಮಿಕ್ಸ್ ಮಾಡಿ 3 ನಿಮಿಷ ಬೇಯಲು ಬಿಡಿ.

ಇದು ಗೊಜ್ಜು ರೀತಿ ರೆಡಿಯಾಗಬೇಕು. ಈ ಗೊಜ್ಜು ರೆಡಿಯಾದ ಬಳಿಕ ಈಗ ಅನ್ನವನ್ನು ಹಾಕಿಕೊಳ್ಳಬೇಕು. ಹುಡಿ ಹುಡಿಯಾದ ಅನ್ನವನ್ನು ನಿಮಗೆ ಎಷ್ಟು ಬೇಕೋ ಅಷ್ಟು ಹಾಕಿಕೊಂಡು ಮಿಕ್ಸ್ ಮಾಡಿಕೊಳ್ಳಿ. ಒಲೆ ಸಣ್ಣ ಉರಿಯಲ್ಲಿ ಇಟ್ಟು ಅನ್ನವನ್ನು 3ರಿಂದ 4 ನಿಮಿಷ ಬಿಸಿ ಮಾಡಿಕೊಳ್ಳಬೇಕು. ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪು ಸಹ ಹಾಕಿಕೊಂಡು ಮಿಕ್ಸ್ ಮಾಡಿಕೊಳ್ಳಬೇಕು.

ಹೀಗೆ ಈ ರೈಸ್ ಅನ್ನು ಬಿಸಿ ಇದ್ದಾಗಲೇ ಸವಿಯಲು ನೀಡಬಹುದು. ಇದರಲ್ಲಿ ತರಕಾರಿಗಳು ಇರುವುದರಿಂದ ರುಚಿ ಅದ್ಭುತವಾಗಿರಲಿದೆ, ಪಲಾವ್‌ಗಿಂತಲೂ ರುಚಿ ರುಚಿಯಾದ ರೈಸ್ ಇದು. ಬೆಳಗ್ಗೆ ತಿಂಡಿಗೆ ಕಡಿಮೆ ಸಮಯದಲ್ಲಿ ಮಾಡಿ ಮುಗಿಸಬಹುದು ಹಾಗೆ ಇದರ ರುಚಿ ಒಮ್ಮೆ ಸವಿದರೆ ನೀವು ಪದೇ ಪದೇ ಮಾಡಲು ಮುಂದಾಗುತ್ತೀರಿ. ಹಾಗೆ ಮಧ್ಯಾಹ್ನದ ಬಾಕ್ಸ್‌ಗೂ ಕುಡ ಇದು ಅದ್ಭುತ ರುಚಿ ನೀಡಲಿದೆ.