ಸಾಫ್ಟ್ & ಟೇಸ್ಟಿ ಬನಾನಾ ಕೇಕ್! ಮನೆಯಲ್ಲೇ ಟ್ರೈ ಮಾಡಿ ನೋಡಿ.. ಈ ಸಿಂಪಲ್ ಟ್ರಿಕ್ ಸಾಕು

ಬಾಳೆಹಣ್ಣಿನಿಂದ ಕೇಕ್ ಮಾಡೋದು ತುಂಬಾನೇ ಸುಲಭ. ಈ 6 ಸ್ಟೆಪ್‌ಗಳಲ್ಲಿ ರೆಡಿ. ಹೌದು, ಮನೆಯಲ್ಲೇ ತಯಾರಿಸಿದ ಸಿಹಿ ಮತ್ತು ಸ್ಪಂಜಿನ ಬಾಳೆಹಣ್ಣಿನ ಕೇಕ್ (banana cake) ತಿನ್ನಲು ಬಲು ರುಚಿಯಾಗಿರುತ್ತದೆ. ಅದರಲ್ಲೂ, ಹೊಸದಾಗಿ ಅಡುಗೆ ಮಾಡುವವರಿಗೆ ಇದು ಸುಲಭವಾಗಿ ತಯಾರಿಸಬಹುದಾದ ಕೇಕ್ ಆಗಿದೆ. ಹಣ್ಣಾದ ಬಾಳೆಹಣ್ಣುಗಳನ್ನು ಬಳಸಿಕೊಂಡು ಮಾಡುವ ಈ ಕೇಕ್, ಸಿಹಿ ಮತ್ತು ನೈಸರ್ಗಿಕ ಸುವಾಸನೆಯಿಂದ ಕೂಡಿದೆ. ಇದು ಕಾಫಿ ಅಥವಾ ಚಹಾದ ಜೊತೆ ಸವಿಯಲು ಅತ್ಯುತ್ತಮವಾದ ಆಯ್ಕೆ.

ಮನೆಯಲ್ಲಿ ತಯಾರಿಸುವ ಕೇಕ್‌ಗಳು ಯಾವಾಗಲೂ ವಿಶೇಷ. ಅವುಗಳಲ್ಲಿ ಬಾಳೆಹಣ್ಣಿನ ಕೇಕ್‌ಗೆ ಒಂದು ವಿಭಿನ್ನ ಮೃದುವಾದ ತುದಿ ಹಾಗೂ ಸಿಹಿಯಾದ ರುಚಿಯಿದೆ. ಮಾರುಕಟ್ಟೆಯಲ್ಲಿ ಸಿಗುವ ಕೇಕ್‌ಗಳಿಗಿಂತ ಮನೆಯಲ್ಲೇ ಮಾಡಿದ ಕೇಕ್ ಹೆಚ್ಚು ಆರೋಗ್ಯಕರ ಮತ್ತು ಕಡಿಮೆ ವೆಚ್ಚದಾಗಿರುತ್ತದೆ. ಕೇವಲ 6 ಹಂತಗಳಲ್ಲಿ ಈ ಬಾಳೆಹಣ್ಣಿನ ಕೇಕ್ ಸಿದ್ಧವಾಗುತ್ತದೆ. ಬನ್ನಿ, ಬನಾನಾ ಕೇಕ್ (banana cake recipe) ಮಾಡುವ ವಿಧಾನ ತಿಳಿಯೋಣ.

ಬಾಳೆಹಣ್ಣಿನ ಕೇಕ್ ಮಾಡಲು ಬೇಕಾಗುವ ಸಾಮಗ್ರಿಗಳು

• ಹಣ್ಣಾದ ಬಾಳೆಹಣ್ಣು - 1 ಕಪ್
• ಮೈದಾ ಹಿಟ್ಟು - 2 ಕಪ್
• ಬೇಕಿಂಗ್ ಪೌಡರ್ - 2 ಚಮಚ
• ಸಕ್ಕರೆ - 1 ಕಪ್
• ಹಾಲು - 160 ಮಿ.ಲೀ
• ಬೆಣ್ಣೆ - 100 ಗ್ರಾಂ
• ವೆನಿಲ್ಲಾ ಸಾರ - 2 ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ಮೊಟ್ಟೆ - 2

ಬಾಳೆಹಣ್ಣಿನ ಕೇಕ್ ಮಾಡುವ ವಿಧಾನ

ಹಂತ 1: ಮೊದಲಿಗೆ, ಕೇಕ್ ತಯಾರಿಸಲು ಬೇಕಾಗುವ ಎಲ್ಲಾ ಸಾಮಗ್ರಿಗಳನ್ನು ಕೋಣೆಯ ತಾಪಮಾನಕ್ಕೆ (ರೂಮ್ ಟೆಂಪರೇಚರ್) ತಂದುಕೊಳ್ಳಿ. ಮೊಟ್ಟೆ, ಬೆಣ್ಣೆ ಮತ್ತು ಹಾಲು ತಾಪಮಾನದಲ್ಲಿದ್ದರೆ, ಅವುಗಳನ್ನು ಮಿಕ್ಸ್ ಮಾಡುವುದು ಸುಲಭ. ಕೇಕ್ ಉತ್ತಮವಾಗಿ ಸ್ಪಂಜಿಯಾಗಿ ಬರುತ್ತದೆ. ನಂತರ, ಬೇಕಿಂಗ್ ಪ್ಯಾನ್ ಅನ್ನು ಬೆಣ್ಣೆ ಅಥವಾ ಎಣ್ಣೆಯಿಂದ ಗ್ರೀಸ್ ಮಾಡಿ ಮತ್ತು ಅದರ ಮೇಲೆ ಸ್ವಲ್ಪ ಮೈದಾ ಹಿಟ್ಟನ್ನು ಹರಡಿ. ನಂತರ ಓವನ್ ಅನ್ನು 170°C ನಲ್ಲಿ 15 ನಿಮಿಷಗಳ ಕಾಲ ಪೂರ್ವಭಾವಿಯಾಗಿ ಕಾಯಿಸಿಕೊಳ್ಳಿ.

ಹಂತ 2: ಒಣ ಮತ್ತು ಹಸಿ ಪದಾರ್ಥಗಳನ್ನು ಪ್ರತ್ಯೇಕಿಸಿ. ಒಂದು ದೊಡ್ಡ ಬೌಲ್‌ನಲ್ಲಿ ಮೈದಾ ಹಿಟ್ಟು, ಬೇಕಿಂಗ್ ಪೌಡರ್ ಮತ್ತು ಉಪ್ಪನ್ನು ಜರಡಿ ಹಿಡಿದು ಚೆನ್ನಾಗಿ ಮಿಕ್ಸ್ ಮಾಡಿ. ಮತ್ತೊಂದು ಬೌಲ್‌ನಲ್ಲಿ, ಬೆಣ್ಣೆ ಮತ್ತು ಸಕ್ಕರೆಯನ್ನು ನುಣುಪಾಗುವವರೆಗೆ ಬೀಟ್ ಮಾಡಿ. ನಂತರ ಮೊಟ್ಟೆಗಳನ್ನು ಒಂದೊಂದಾಗಿ ಒಡೆದು ಹಾಕಿ ಮತ್ತು ವೆನಿಲ್ಲಾ ಸಾರವನ್ನು ಸೇರಿಸಿ ಮಿಶ್ರಣ ಮಾಡಿ. ನಂತರ ಚೆನ್ನಾಗಿ ಮೆತ್ತಗಾದ ಬಾಳೆಹಣ್ಣನ್ನು ಇದಕ್ಕೆ ಸೇರಿಸಿ.

ಹಂತ 3: ಎರಡನ್ನೂ ಮಿಕ್ಸ್ ಮಾಡುವುದು. ಈಗ, ಒಣ ಪದಾರ್ಥಗಳನ್ನು ಸ್ವಲ್ಪ ಸ್ವಲ್ಪವಾಗಿ ಹಸಿ ಪದಾರ್ಥಗಳ ಮಿಶ್ರಣಕ್ಕೆ ಸೇರಿಸಿ. ಹಾಲನ್ನು ಕೂಡ ಸ್ವಲ್ಪ ಸ್ವಲ್ಪವಾಗಿ ಸೇರಿಸುತ್ತಾ ನಿಧಾನವಾಗಿ ಮಿಕ್ಸ್ ಮಾಡಿ. ಕೇಕ್ ಮಿಶ್ರಣವು ನಯವಾದ ಮತ್ತು ಸಮನಾದ ವಿನ್ಯಾಸಕ್ಕೆ ಬರುವವರೆಗೆ ಕಲಸಿ. ಹೆಚ್ಚು ಕಲಸಬೇಡಿ. ಅದು ಕೇಕ್ ಗಟ್ಟಿಯಾಗಲು ಕಾರಣವಾಗುತ್ತದೆ.

ಹಂತ 4: ಸಿದ್ಧಪಡಿಸಿದ ಕೇಕ್ ಮಿಶ್ರಣವನ್ನು ಗ್ರೀಸ್ ಮಾಡಿದ ಬೇಕಿಂಗ್ ಪ್ಯಾನ್‌ಗೆ ಸುರಿಯಿರಿ. ಸಮನಾಗಿ ಹರಡಲು ಪ್ಯಾನ್ ಅನ್ನು ನಿಧಾನವಾಗಿ ಅಲುಗಾಡಿಸಿ. ನಂತರ ಈ ಪ್ಯಾನ್ ಅನ್ನು ಪೂರ್ವಭಾವಿಯಾಗಿ ಕಾಯಿಸಿದ ಓವನ್‌ನ ಮಧ್ಯದ ರಾಕ್‌ನಲ್ಲಿ ಇಡಿ.

ಹಂತ 5: ಕೇಕ್ ಅನ್ನು 25 ರಿಂದ 30 ನಿಮಿಷಗಳ ಕಾಲ ಬೇಕ್ ಮಾಡಿ. ಕೇಕ್ ಚೆನ್ನಾಗಿ ಬೆಂದಿದೆಯೇ ಎಂದು ಪರಿಶೀಲಿಸಲು, ಒಂದು ಟೂತ್‌ಪಿಕ್ ಅನ್ನು ಕೇಕ್‌ನ ಮಧ್ಯಭಾಗಕ್ಕೆ ಹಾಕಿ ಹೊರತೆಗೆಯಿರಿ. ಟೂತ್‌ಪಿಕ್ ಸ್ವಚ್ಛವಾಗಿ ಹೊರಬಂದರೆ, ಕೇಕ್ ಬೆಂದಿದೆ ಎಂದು ಅರ್ಥ. ಇಲ್ಲದಿದ್ದರೆ, ಇನ್ನೊಂದು 5 ರಿಂದ 10 ನಿಮಿಷಗಳ ಕಾಲ ಬೇಕ್ ಮಾಡಿ.

ಹಂತ 6: ಕೇಕ್ ಬೆಂದ ನಂತರ, ಓವನ್‌ನಿಂದ ಹೊರತೆಗೆದು ತಂಪಾಗಲು ಬಿಡಿ. ಬಿಸಿ ಇರುವಾಗ ಕತ್ತರಿಸಬೇಡಿ. ಸಂಪೂರ್ಣವಾಗಿ ತಣ್ಣಗಾದ ನಂತರ, ನಿಮ್ಮ ಇಷ್ಟದ ಆಕಾರದಲ್ಲಿ ಕತ್ತರಿಸಿ. ಇಷ್ಟು ಮಾಡಿದರೆ, ಸಿಹಿಯಾದ ಬಾಳೆಹಣ್ಣಿನ ಕೇಕ್ ಸವಿಯಲು ಸಿದ್ಧ.