ಯಾವುದೇ ತಿಂಡಿ ಇದ್ರೂ ಈ ಆಲೂ ಕುರ್ಮ ಮಾಡಿ: ಬಹಳ ಸುಲಭದ ರೆಸಿಪಿ ಇಲ್ಲಿದೆ!

Add as a preferred source on Google

ಮನೆಯಲ್ಲಿ ಚಪಾತಿ, ರೊಟ್ಟಿ, ದೋಸೆ, ಪೂರಿ, ಪರೋಟ ಸೇರಿದಂತೆ ವಿಶೇಷ ರುಚಿಯ ಖಾದ್ಯಗಳ ಮಾಡಿದಾಗ ಅದರ ಜೊತೆಗೆ ಯಾವುದಾದರು ರುಚಿ ರುಚಿಯ ಖಾದ್ಯವಂತು ಇರಲೇ ಬೇಕು. ಆದ್ರೆ ಇದಕ್ಕೆ ಸೂಕ್ತವಾಗಿ ಹೊಂದಿಕೊಳ್ಳುವಂತೆ ಚಟ್ನಿ, ಸಾಂಬಾರ್ ಮಾಡಿ ಸವಿಯೋದು ಸಾಮಾನ್ಯ. ಆದ್ರೆ ಈ ಎಲ್ಲಾ ಖಾದ್ಯದ ರುಚಿ ಹೆಚ್ಚಿಸೋದು ಆಲೂ ಕುರ್ಮ. ನೀವು ಹೋಟೆಲ್, ರೆಸ್ಟೋರೆಂಟ್‌ನಲ್ಲಿ ರುಚಿ ರುಚಿಯಾದ ಆಲೂ ಕುರ್ಮ ಸವಿದಿರುವುದು ನೆನಪಾಗಬಹುದು.

ಹೀಗಾಗಿ ನಾವಿಂದು ಬೆಳಗ್ಗೆ ತಿಂಡಿ ಸಮಯದಲ್ಲಿ ಬ್ರೇಕ್‌ ಫಾಸ್ಟ್‌ಗೆ ಸವಿಯಲು ಈ ಆಲೂ ಕುರ್ಮವನ್ನು ಮಾಡುವ ಕುರಿತಾಗಿ ಹೇಳಲಿದ್ದೇವೆ. ನಿಮ್ಮಲ್ಲಿ ಹಲವರಿಗೆ ಆಲೂ ಕುರ್ಮದ ರುಚಿ ಬಹಳ ಇಷ್ಟವಾಗುತ್ತೆ. ಎಲ್ಲಾ ಖಾದ್ಯದೊಂದಿಗೂ ಇದರ ರುಚಿ ದುಪ್ಪಟ್ಟಾಗಲಿದೆ. ಹೀಗಾಗಿ ಮನೆಯಲ್ಲಿ ಬೆಳಗ್ಗೆ ತಿಂಡಿಯೊಂದಿಗೆ ಸವಿಯಲು ಈ ಆಲೂ ಕುರ್ಮಾ ಮಾಡಿ ಸವಿಯುವುದು ನೋಡಬಹುದು.

ಆಲೂಗಡ್ಡೆಯಿಂದ ಮಾಡುವ ಹಲವು ರೆಸಿಪಿಗಳಲ್ಲಿ ಆಲೂ ಕುರ್ಮ ಬಹಳಷ್ಟು ಖಾದ್ಯದೊಂದಿಗೆ ಸವಿಯಬಹುದು. ನಾವಿಂದು ಮನೆಯಲ್ಲೇ ಈ ಹೋಟೆಲ್ ಶೈಲಿಯ ಆಲೂ ಕುರ್ಮ ಮಾಡಿ ಸವಿಯುವ ಕುರಿತಾಗಿ ತಿಳಿದುಕೊಳ್ಳೋಣ. ಆಲೂ ಕುರ್ಮ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು? ಮಾಡುವ ವಿಧಾನವೇನು? ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ಇಲ್ಲಿ ತಿಳಿದುಕೊಳ್ಳೋಣ.

ಆಲೂ ಕುರ್ಮ ಮಾಡಲು ಅಗತ್ಯ ವಸ್ತುಗಳು

• ಆಲೂಗಡ್ಡೆ
• ಬಟಾಣಿ
• ಅರಶಿನ
• ಉಪ್ಪು
• ಎಣ್ಣೆ
• ಗೋಡಂಬಿ
• ಗಸೆಗಸೆ
• ತಂಗಿನ ಕಾಯಿತುರಿ
• ಲವಂಗ
• ಚಕ್ಕೆ
• ಬೆಳ್ಳುಳ್ಳಿ
• ಶುಂಠಿ
• ಖಾರದ ಪುಡಿ
• ಧನಿಯಾ
• ಈರುಳ್ಳಿ
• ಟೊಮೆಟೋ
• ಜೀರಿಗೆ

ಆಲೂ ಕುರ್ಮ ಮಾಡುವ ಸುಲಭದ ವಿಧಾನವೇನು?

ಮೊದಲಿಗೆ ಒಲೆ ಮೇಲೆ ಬಾಣಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿಕೊಂಡು ಬಿಸಿ ಮಾಡಿ. ಅನಂತರ ಜೀರಿಗೆ, ಸಣ್ಣದಾಗಿ ಹೆಚ್ಚಿರುವ 2 ಈರುಳ್ಳಿ ಹಾಕಿ 4 ನಿಮಿಷ ಚೆನ್ನಾಗಿ ಹುರಿದುಕೊಳ್ಳಿ. ಈಗ ಒಂದು ಟೊಮೆಟೋ ಸಣ್ಣದಾಗಿ ಹೆಚ್ಚಿ ಹಾಕಿ. 2 ನಿಮಿಷ ಬೇಯಿಸಿಕೊಂಡ ಬಳಿಕ ಇದಕ್ಕೆ ಹಸಿ ಆಲೂಗಡ್ಡೆಯನ್ನು ಸಹ ಹಾಕಿಕೊಳ್ಳಿ. ಸಾಂಬಾರ್‌ಗಿಂತ ಸಣ್ಣದಾಗಿ ಹೆಚ್ಚಿಕೊಂಡು ಇದಕ್ಕೆ ಹಾಕಿ.

ಅನಂತರ ಉಪ್ಪು, ಅರಶಿಣ ಹಾಕಿ ಮಿಕ್ಸ್ ಮಾಡಿಕೊಂಡು ಮುಚ್ಚಳ ಮುಚ್ಚಿ 10 ನಿಮಿಷ ಬೇಯಲು ಬಿಡಿ. ಆಗಾಗ ಮಿಕ್ಸ್ ಮಾಡುತ್ತಾ ಇರಿ ಇಲ್ಲದಿದ್ದರೆ ತಳ ಹಿಡಿಯಲಿದೆ. ಈಗ ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು ಅದಕ್ಕೆ ಗೋಡಂಬಿ, ಗಸೆಗಸೆ, ಹಸಿ ತೆಂಗಿನ ತುರಿ, ಲವಂಗ, ಚಕ್ಕೆ, ಬೆಳ್ಳುಳ್ಳಿ, ಶುಂಠಿ, ಸ್ವಲ್ಪ ನೀರು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಬೇಕು.

ಈಗ ರುಬ್ಬಿದ ಈ ಮಸಾಲೆಗಳನ್ನು ಒಲೆ ಮೇಲಿನ ಆಲೂ ಪ್ರೈಯೊಂದಿಗೆ ಹಾಕಿಕೊಂಡು ದಪ್ಪವಾಗಿದ್ದರೆ ಸ್ವಲ್ಪ ನೀರು ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ಹಾಗೆ ಇದಕ್ಕೆ ಅರಶಿಣ, ಖಾರದ ಪುಡಿ, ಗರಂ ಮಸಾಲ, ಧನಿಯಾ ಪುಡಿ, ಉಪ್ಪು ಸಹ ಹಾಕಿಕೊಳ್ಳಿ. ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. ಹಗೆ ಕುದಿಬರಲು ಬಿಡಬೇಕು. 10ರಿಂದ 12 ನಿಮಿಷ ಕುದಿಯಲು ಬಿಡಿ.

ಇಷ್ಟಾದರೆ ನಿಮ್ಮ ಮುಂದೆ ರುಚಿ ರುಚಿಯ ಆಲೂ ಕುರ್ಮ ಸಿದ್ದವಾಗುತ್ತೆ. ನೀವು ಸಹ ಮನೆಯಲ್ಲಿ ತಿಂಡಿಗೆ ಈ ಖಾದ್ಯ ಮಾಡಿ ಸವಿದು ನೋಡಿ. ಎಲ್ಲಾ ರೀತಿ ತಿಂಡಿಗೂ ಇದು ಬಹಳ ರುಚಿ ನೀಡಲಿದೆ.