Oats Idli: ರುಚಿಗೂ ಸೈ, ಆರೋಗ್ಯಕ್ಕೂ ಸೈ! ಮನೆಯಲ್ಲೇ ಮಾಡಿ ಸೂಪರ್ ಇಡ್ಲಿ

ಅತೀ ಆರೋಗ್ಯಕರ ಇಡ್ಲಿ ನೀವು ಕೇಳಿರಲಿಲ್ಲ! ಓಟ್ಸ್‌ನಿಂದ ಹೀಗೆ ಮಾಡಿ, ರುಚಿಯೂ ಜಾಸ್ತಿ. ಓಟ್ಸ್‌ನಿಂದ ಮನೆಯಲ್ಲೇ ರುಚಿಕರವಾದ ಇಡ್ಲಿ (Oats Idli) ತಯಾರಿಸಬಹುದು. ಇತ್ತೀಚಿನ ದಿನಗಳಲ್ಲಿ ಜನರ ಆರೋಗ್ಯದ ಬಗ್ಗೆ ಕಾಳಜಿ ಹೆಚ್ಚಾಗಿದೆ. ತಿನ್ನುವ ಆಹಾರದ ಬಗ್ಗೆ ಹೆಚ್ಚಿನ ಗಮನ ಕೊಡುತ್ತಿದ್ದಾರೆ. ದೇಹಕ್ಕೆ ಕೊಬ್ಬು ಸೇರದ ಆಹಾರ ಪದಾರ್ಥಗಳಿಗೆ ಪ್ರಾಮುಖ್ಯತೆ ನೀಡುತ್ತಿದ್ದಾರೆ. ಕಳೆದ ಕೆಲವು ವರ್ಷಗಳಿಂದ ಓಟ್ಸ್ ಹೆಚ್ಚಿನ ಮನ್ನಣೆ ಗಳಿಸಿದೆ. ನಾವಿಂದು ಓಟ್ಸ್ ಇಡ್ಲಿ ತಯಾರಿಸುವುದು ಹೇಗೆ ಎಂಬುವುದನ್ನು ತಿಳಿಸಿಕೊಡಲಿದ್ದೇವೆ.

ಓಟ್ಸ್ ನಮ್ಮ ದೇಶದ ಬೆಳೆಯಲ್ಲದಿದ್ದರೂ, ಇದಕ್ಕೆ ಉತ್ತಮ ಬೇಡಿಕೆಯಿದೆ. ಏಕೆಂದರೆ, ಇದರಲ್ಲಿರುವ ಪೋಷಕಾಂಶಗಳು. ಓಟ್ಸ್ ಸುಲಭವಾಗಿ ಜೀರ್ಣವಾಗುತ್ತದೆ. ಕೊಬ್ಬನ್ನು ಕರಗಿಸುತ್ತದೆ ಮತ್ತು ತೂಕವನ್ನು ಕಡಿಮೆ ಮಾಡುತ್ತದೆ. ಆದ್ದರಿಂದ, ಓಟ್ಸ್ ಭಾರತೀಯರು ತಿನ್ನುವ ಆಹಾರ ಪದಾರ್ಥಗಳಲ್ಲಿ ಒಂದಾಗಿದೆ. ಓಟ್ಸ್ ಇಡ್ಲಿಯನ್ನು ಸಾಂಬಾರ್, ಚಟ್ನಿ ಅಥವಾ ಮೊಸರಿನೊಂದಿಗೆ ಸವಿಯಬಹುದು. ಬನ್ನಿ, ಇನ್‌ಸ್ಟಂಟ್ ಓಟ್ಸ್ ಇಡ್ಲಿ ತಯಾರಿಸಲು ಬೇಕಾಗುವ ಪದಾರ್ಥಗಳು ಮತ್ತು ಸುಲಭ (Oats Idli Recipe) ವಿಧಾನವನ್ನು ತಿಳಿಯೋಣ.

ಓಟ್ಸ್ ಇಡ್ಲಿ ಬೇಕಾಗುವ ಪದಾರ್ಥಗಳು

• ರೋಲ್ಡ್ ಓಟ್ಸ್ ಅಥವಾ ಇನ್‌ಸ್ಟಂಟ್ ಓಟ್ಸ್ - 1 ಕಪ್
• ಚಿಲಿ ಕಿಣ್ವ ಹುಳಿ ಮೊಸರು
• ಎಣ್ಣೆ - 1 ಸ್ಪೂನ್
• ಕಡಲೆ ಬೇಳೆ - 1 ಸ್ಪೂನ್
• ಉದ್ದಿನ ಬೇಳೆ - 1 ಸ್ಪೂನ್
• ಜೀರಿಗೆ - 1 ಸ್ಪೂನ್
• ಸಾಸಿವೆ - 1/2 ಸ್ಪೂನ್
• ಸಣ್ಣಗೆ ಹೆಚ್ಚಿದ ಈರುಳ್ಳಿ - 1
• ಹಸಿ ಮೆಣಸಿನಕಾಯಿ - 2
• ಹೆಚ್ಚಿದ ಶುಂಠಿ - 1
• ತುರಿದ ಕ್ಯಾರೆಟ್ - 1
• ಕರಿಬೇವು
• ಕೊತ್ತಂಬರಿ ಸೊಪ್ಪು
• ರುಚಿಗೆ ತಕ್ಕಷ್ಟು ಉಪ್ಪು
• ನೀರು

ಓಟ್ಸ್ ಇಡ್ಲಿ ತಯಾರಿಸುವ ವಿಧಾನ

ಮೊದಲಿಗೆ ಓಟ್ಸ್ ಅನ್ನು ಮಿಕ್ಸಿಯಲ್ಲಿ ತರಿತರಿಯಾಗಿ ಪುಡಿ ಮಾಡಿಕೊಳ್ಳಿ. ಬಳಿಕ ಅದನ್ನು ಒಂದು ದೊಡ್ಡ ಬಟ್ಟಲಿಗೆ ಹಾಕಿಕೊಳ್ಳಿ. ಇದಕ್ಕೆ ಸ್ವಲ್ಪ ರೋಲ್ಡ್ ಓಟ್ಸ್ ಅನ್ನು ಸೇರಿಸಿ. ಇದರಿಂದ ಇಡ್ಲಿಗಳು ಚೆನ್ನಾಗಿ ಬರುತ್ತವೆ ಮತ್ತು ರುಚಿಕರವಾಗಿರುತ್ತದೆ. ಈಗ ಗ್ಯಾಸ್ ಸ್ಟೌವ್ ಮೇಲೆ ಬಾಣಲಿ ಇಟ್ಟು ಎಣ್ಣೆ ಹಾಕಿ. ಅದರಲ್ಲಿ ಸಾಸಿವೆ, ಜೀರಿಗೆ, ಉದ್ದಿನಬೇಳೆ, ಕಡಲೆಬೇಳೆ ಹಾಕಿ ಹುರಿಯಿರಿ. ಬಳಿಕ ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿ ಮೆಣಸಿನಕಾಯಿ, ಕರಿಬೇವು, ಶುಂಠಿ ಸೇರಿಸಿ. ಸ್ವಲ್ಪ ಹೊತ್ತು ಹುರಿದ ಬಳಿಕ, ಸ್ಟೌವ್‌ನಿಂದ ಕೆಳಗಿಳಿಸಿ ತಣ್ಣಗಾಗಲು ಬಿಡಿ.

ತಣ್ಣಗಾದ ನಂತರ ಓಟ್ಸ್ ಪುಡಿಯಲ್ಲಿ ಇವುಗಳನ್ನು ಹಾಕಿ. ಅದಕ್ಕೆ ಕ್ಯಾರೆಟ್ ತುರಿ, ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು, ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಬಳಿಕ ಮೊಸರನ್ನು ಹಾಕಿ ಇಡ್ಲಿ ಹಿಟ್ಟನ್ನು ತಯಾರಿಸಿ. ಉಪ್ಪು ನೋಡಿ ಐದು ನಿಮಿಷ ಪಕ್ಕಕ್ಕೆ ಇಡಿ. ಈಗ ಇಡ್ಲಿ ಸ್ಟ್ಯಾಂಡ್‌ನಲ್ಲಿ ಆ ಹಿಟ್ಟನ್ನು ಹಾಕಿ. ಬಳಿಕ ಗ್ಯಾಸ್ ಸ್ಟೌವ್ ಮೇಲೆ ಇಟ್ಟು ಬೇಯಿಸಿ. ಈ ಇಡ್ಲಿಯನ್ನು ವಿಷಲ್ ಹಾಕದೆ ಹದಿನೈದು ನಿಮಿಷಗಳ ಕಾಲ ಹಬೆಯಲ್ಲಿ ಬೇಯಿಸಿಕೊಳ್ಳಿ. ಇಷ್ಟು ಮಾಡಿದರೆ ಸಾಕು, ಬಿಸಿ ಬಿಸಿಯಾದ ಇನ್‌ಸ್ಟಂಟ್ ಓಟ್ಸ್ ಇಡ್ಲಿ ಸಿದ್ಧ.

ಓಟ್ಸ್ ಇಡ್ಲಿಯನ್ನು ನಿಮ್ಮ ನೆಚ್ಚಿನ ಚಟ್ನಿಯೊಂದಿಗೆ ಸವಿಯಬಹುದು. ಈ ಓಟ್ಸ್ ಇಡ್ಲಿಯು ರುಚಿಗೆ ರುಚಿ ಮತ್ತು ಆರೋಗ್ಯಕ್ಕೂ ಹಿತಕರವಾಗಿರುತ್ತದೆ. ಓಟ್ಸ್ ಇಡ್ಲಿಯು ಮಧುಮೇಹ ಹೊಂದಿರುವವರಿಗೆ ಮತ್ತು ತೂಕ ಇಳಿಸಿಕೊಳ್ಳಲು ಬಯಸುವವರಿಗೆ ಉತ್ತಮ ಆಯ್ಕೆಯಾಗಿದೆ. ಇದನ್ನು ಬೆಳಗಿನ ಉಪಾಹಾರಕ್ಕೆ ಅಥವಾ ರಾತ್ರಿಯ ಊಟಕ್ಕೆ ಸೇವಿಸಬಹುದು.