ತಮಿಳುನಾಡು ಸ್ಪೆಷಲ್ ಫ್ರೈ ಇಡ್ಲಿ ಮಾಡಿ.. ವೆದರ್ ಕೂಲ್ ಇದ್ದಾಗ ತಿಂದ್ರೆ ಸ್ವರ್ಗವೇ! ಮಾಡೋದು ಹೇಗೆ?

10 ನಿಮಿಷದಲ್ಲಿ ತಮಿಳುನಾಡು ಸ್ಟ್ರೀಟ್ ಸ್ಟೈಲ್ ಫ್ರೈ ಇಡ್ಲಿ! ವೆದರ್ ಕೂಲ್ ಇದ್ದಾಗ ತಿಂದ್ರೆ ಸ್ವರ್ಗವೇ ಸರಿ. ಮಳೆಗಾಲದಲ್ಲಿ ಇದನ್ನ ಮಿಸ್ ಮಾಡ್ಕೋಬೇಡಿ. ದೇಶದ ಪ್ರತಿಯೊಂದು ನಗರವೂ ತನ್ನದೇ ಆದ ವಿಶಿಷ್ಟ ಸ್ಟ್ರೀಟ್ ಫುಡ್‌ಗೆ ಹೆಸರುವಾಸಿ. ದಕ್ಷಿಣ ಭಾರತದ ಆಹಾರ ಎಂದಾಕ್ಷಣ ಮೊದಲು ನೆನಪಿಗೆ ಬರುವುದು ಇಡ್ಲಿ (Idli), ದೋಸೆ. ಆದರೆ, ತಮಿಳುನಾಡಿನಲ್ಲಿ ಸಾಮಾನ್ಯ ಇಡ್ಲಿಗೂ ಒಂದು ವಿಶೇಷ ಟ್ವಿಸ್ಟ್ ಕೊಟ್ಟು, ಎಲ್ಲರ ಮನ ಗೆಲ್ಲುವ ಒಂದು ಅದ್ಭುತ ಖಾದ್ಯವನ್ನು ತಯಾರಿಸುತ್ತಾರೆ. ಅದೇ ಸ್ಟ್ರೀಟ್ ಸ್ಟೈಲ್ ಫ್ರೈ ಇಡ್ಲಿ (Street Style Fry Idli). ಇದನ್ನು ಮನೆಯಲ್ಲೇ ಸುಲಭವಾಗಿ ಹೇಗೆ ಮಾಡಬಹುದು ಎಂದು ತಿಳಿಯೋಣ ಬನ್ನಿ.

ಇದು ಚೆನ್ನೈನಲ್ಲಿ ತುಂಬಾನೇ ಫೇಮಸ್. ಇದು ಕೇವಲ ಬ್ರೇಕ್‌ಫಾಸ್ಟ್ ಅಲ್ಲ, ಸಂಜೆಯ ಸ್ನ್ಯಾಕ್ಸ್‌ಗೂ ಸೂಕ್ತವಾದ ಒಂದು ಸ್ವಾದಿಷ್ಟ ತಿಂಡಿ. ಇದನ್ನು ಪುದೀನಾ ಚಟ್ನಿ ಅಥವಾ ಟೊಮೆಟೊ ಸಾಸ್‌ನೊಂದಿಗೆ ಸವಿಯಬಹುದು. ಉಳಿದ ಇಡ್ಲಿಗಳನ್ನು ಬಳಸಿ ಇಷ್ಟು ರುಚಿಯಾದ ತಿಂಡಿಯನ್ನು ತಯಾರಿಸಬಹುದು ಎಂದು ನೀವೇ ಆಶ್ಚರ್ಯಪಡುತ್ತೀರಿ. ಇದನ್ನು ಒಮ್ಮೆ ಮನೆಯಲ್ಲಿ ಟ್ರೈ ಮಾಡಿ, ಖಂಡಿತ ನಿಮ್ಮ ಕುಟುಂಬದವರು ಮೆಚ್ಚುತ್ತಾರೆ.

ಫ್ರೈ ಇಡ್ಲಿ ಮಾಡಲು ಬೇಕಾಗುವ ಸಾಮಗ್ರಿಗಳು

• ಇಡ್ಲಿ
• ಎಣ್ಣೆ
• ಈರುಳ್ಳಿ
• ಕ್ಯಾಪ್ಸಿಕಂ
• ಹಸಿ ಮೆಣಸಿನಕಾಯಿ
• ಶುಂಠಿ ಬೆಳ್ಳುಳ್ಳಿ ಪೇಸ್ಟ್
• ಕರಿಬೇವಿನ ಎಲೆಗಳು
• ಸಾಸಿವೆ
• ಉದ್ದಿನ ಬೇಳೆ
• ಕಡಲೆ ಬೇಳೆ
• ಅರಿಶಿನ ಪುಡಿ
• ಖಾರದ ಪುಡಿ
• ಗರಂ ಮಸಾಲಾ
• ಟೊಮೆಟೊ ಸಾಸ್
• ಸೋಯಾ ಸಾಸ್
• ನಿಂಬೆ ರಸ
• ಕೊತ್ತಂಬರಿ ಸೊಪ್ಪು
• ಉಪ್ಪು

ಫ್ರೈ ಇಡ್ಲಿ ಮಾಡುವ ವಿಧಾನ

ಮೊದಲಿಗೆ, ಉಳಿದಿರುವ ಇಡ್ಲಿಗಳನ್ನು ತೆಗೆದುಕೊಂಡು ಸಣ್ಣ ತುಂಡುಗಳಾಗಿ ಕತ್ತರಿಸಿಕೊಳ್ಳಿ. ಇಡ್ಲಿಗಳು ತುಂಬಾ ಮೃದುವಾಗಿದ್ದರೆ, ಗಟ್ಟಿಯಾಗಲು 10 ರಿಂದ 15 ನಿಮಿಷ ಫ್ರಿಡ್ಜ್‌ನಲ್ಲಿ ಇಡಬಹುದು. ಈಗ ಒಂದು ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆಯನ್ನು ಬಿಸಿ ಮಾಡಿ. ಎಣ್ಣೆ ಸಾಕಷ್ಟು ಬಿಸಿಯಾದಾಗ, ಕತ್ತರಿಸಿದ ಇಡ್ಲಿ ತುಂಡುಗಳನ್ನು ಮಧ್ಯಮ ಉರಿಯಲ್ಲಿ ಚಿನ್ನದ ಕಂದು ಬಣ್ಣ ಬರುವವರೆಗೆ ಮತ್ತು ಗರಿಗರಿಯಾಗುವವರೆಗೆ ಡೀಪ್ ಫ್ರೈ ಮಾಡಿ. ಎಣ್ಣೆಯನ್ನು ಹೀರಿಕೊಳ್ಳಲು ಟಿಶ್ಯೂ ಪೇಪರ್ ಇರುವ ತಟ್ಟೆಗೆ ತೆಗೆದಿಡಿ.

ಈಗ ಮಸಾಲಾ ತಯಾರಿಸಿ. ಫ್ರೈ ಮಾಡಿದ ಇಡ್ಲಿಗಳನ್ನು ತೆಗೆದ ನಂತರ, ಅದೇ ಬಾಣಲೆಯಲ್ಲಿ ಹೆಚ್ಚುವರಿ ಎಣ್ಣೆಯನ್ನು ತೆಗೆದು, 2 ರಿಂದ 3 ಚಮಚ ಎಣ್ಣೆಯನ್ನು ಉಳಿಸಿಕೊಳ್ಳಿ. ಎಣ್ಣೆ ಬಿಸಿಯಾದಾಗ, ಸಾಸಿವೆ, ಉದ್ದಿನ ಬೇಳೆ ಮತ್ತು ಕಡಲೆ ಬೇಳೆ ಹಾಕಿ ಸಿಡಿಸಿ. ನಂತರ ಕರಿಬೇವಿನ ಎಲೆಗಳು ಮತ್ತು ಸೀಳಿದ ಹಸಿ ಮೆಣಸಿನಕಾಯಿಗಳನ್ನು ಸೇರಿಸಿ ಹುರಿಯಿರಿ. ಸಣ್ಣಗೆ ಹೆಚ್ಚಿದ ಈರುಳ್ಳಿಯನ್ನು ಸೇರಿಸಿ, ಗೋಲ್ಡನ್ ಬ್ರೌನ್ ಆಗುವವರೆಗೆ ಹುರಿಯಿರಿ. ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ, ಹಸಿ ವಾಸನೆ ಹೋಗುವವರೆಗೆ ಹುರಿಯಿರಿ.

ಈಗ ತರಕಾರಿಗಳು ಮತ್ತು ಮಸಾಲೆಗಳು ಸೇರಿಸಿ. ಈಗ ಹೆಚ್ಚಿದ ಕ್ಯಾಪ್ಸಿಕಂ ಸೇರಿಸಿ, ಅದು ಸ್ವಲ್ಪ ಮೆತ್ತಗಾಗುವವರೆಗೆ ಹುರಿಯಿರಿ. ಅರಿಶಿನ ಪುಡಿ, ಖಾರದ ಪುಡಿ, ಮತ್ತು ಗರಂ ಮಸಾಲಾ ಸೇರಿಸಿ, ಹಸಿ ವಾಸನೆ ಹೋಗುವವರೆಗೆ ಹುರಿಯಿರಿ. ಟೊಮೆಟೊ ಸಾಸ್ ಮತ್ತು ಸೋಯಾ ಸಾಸ್ (ಐಚ್ಛಿಕ) ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಈ ಸಾಸ್‌ಗಳು ವಿಶಿಷ್ಟವಾದ ಸ್ಟ್ರೀಟ್ ಫುಡ್ ರುಚಿಯನ್ನು ನೀಡುತ್ತವೆ.

ಈಗ ಫ್ರೈ ಮಾಡಿದ ಇಡ್ಲಿ ಸೇರಿಸಿ. ಈ ಮಸಾಲಾ ಮಿಶ್ರಣಕ್ಕೆ ಕರಿದಿಟ್ಟ ಇಡ್ಲಿ ತುಂಡುಗಳನ್ನು ಸೇರಿಸಿ. ಎಲ್ಲಾ ಇಡ್ಲಿ ತುಂಡುಗಳಿಗೆ ಮಸಾಲಾ ಚೆನ್ನಾಗಿ ಅಂಟಿಕೊಳ್ಳುವಂತೆ ನಿಧಾನವಾಗಿ ಮಿಕ್ಸ್ ಮಾಡಿ. ಉಪ್ಪು ರುಚಿಗೆ ತಕ್ಕಷ್ಟು ಸೇರಿಸಿ. ಕೊನೆಯದಾಗಿ, ನಿಂಬೆ ರಸ ಹಿಂಡಿ ಚೆನ್ನಾಗಿ ಮಿಕ್ಸ್ ಮಾಡಿ. ಇದು ಹುಳಿ ಮತ್ತು ಖಾರದ ರುಚಿಯನ್ನು ಸಮತೋಲನಗೊಳಿಸುತ್ತದೆ. ಬಳಿಕ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ. ಇಷ್ಟು ಮಾಡಿದರೆ, ಬಿಸಿ ಬಿಸಿಯಾದ ಮತ್ತು ರುಚಿಕರವಾದ ಸ್ಟ್ರೀಟ್ ಸ್ಟೈಲ್ ಫ್ರೈ ಇಡ್ಲಿ ಸಿದ್ಧ.