ವೀಕೆಂಡ್ ಸ್ಪೆಷಲ್.. ಢಾಬಾ & ರೆಸ್ಟೋರೆಂಟ್ ರುಚಿ ಈಗ ಮನೆಯಲ್ಲೇ! ಬರೀ 2 ಸ್ಟೆಪ್ಸ್‌ನಲ್ಲಿ ರಾಜ್ಮಾ ಮಲೈ ಕರಿ ಮಾಡಿ

ವೀಕೆಂಡ್ ಸ್ಪೆಷಲ್.. ರೆಸ್ಟೋರೆಂಟ್ ರುಚಿ ಈಗ ಮನೆಯಲ್ಲಿ.. ಈ ರೀತಿ ರಾಜ್ಮಾ ಮಲೈ ಕರಿ ಮಾಡಿ ನೋಡಿ. ಬಟರ್ ನಾನ್ ಜೊತೆ ಸಖತ್ ಕಾಂಬಿನೇಷನ್. ಹೌದು, ರಾಜ್ಮಾ (Rajma Recipe) ಎಂದ ಕೂಡಲೇ ಬಹುತೇಕರಿಗೆ ಉತ್ತರ ಭಾರತದ ಜನಪ್ರಿಯ 'ರಾಜ್ಮಾ ಚಾವಲ್' ನೆನಪಾಗುತ್ತದೆ. ಆದರೆ, ಅದೇ ಸಾಂಪ್ರದಾಯಿಕ ಶೈಲಿಯ ಅಡುಗೆಯನ್ನು ಪದೇ ಪದೇ ಸವಿದು ಬೇಸತ್ತಿದ್ದರೆ, ನಿಮಗಾಗಿ ಇಲ್ಲಿದೆ ನಾಲಿಗೆಗೆ ನೀರೂರಿಸುವ ಹೊಸ ರೆಸಿಪಿ.

ಅದುವೇ 'ರಾಜ್ಮಾ ಮಲೈ ಕರಿ' (Rajma Malai Curry). ಇದು ನಿಮ್ಮ ಅಡುಗೆಮನೆಗೆ ಹೊಸ ರುಚಿಯ ಆಯಾಮ ನೀಡಲಿದೆ. ಹಾಲಿನ ಕೆನೆ ಬಳಕೆಯಿಂದ ಈ ಕರಿಗೆ ವಿಶಿಷ್ಟವಾದ ಕ್ರೀಮಿ ಮತ್ತು ಶ್ರೀಮಂತ ವಿನ್ಯಾಸ ಲಭಿಸುತ್ತದೆ. ಮನೆಯಲ್ಲಿ ವಿಶೇಷ ಸಮಾರಂಭಗಳು ಅಥವಾ ವೀಕೆಂಡ್ ಪಾರ್ಟಿಗಳು ಇದ್ದಾಗ, ಹೋಟೆಲ್ ಶೈಲಿಯ ರುಚಿಯನ್ನು ಮನೆಯಲ್ಲೇ ಸವಿಯಲು ಇದು ಅತ್ಯುತ್ತಮ ಆಯ್ಕೆಯಾಗಿದೆ. ಪ್ರತಿಯೊಬ್ಬರೂ ಇಷ್ಟಪಡುವ ಈ ಖಾದ್ಯವನ್ನು ಸುಲಭವಾಗಿ ತಯಾರಿಸಬಹುದು.

Photo Credit: ಸಂಗ್ರಹ ಚಿತ್ರ

ನೀವು ಸಾಂಪ್ರದಾಯಿಕ ರಾಜ್ಮಾ ಭಕ್ಷ್ಯದಿಂದ ಹೊರಬಂದು ಹೊಸದನ್ನು ಪ್ರಯತ್ನಿಸಲು ಆಸಕ್ತಿ ಹೊಂದಿದ್ದರೆ, ಈ ರೆಸ್ಟೋರೆಂಟ್ ಶೈಲಿಯ 'ರಾಜ್ಮಾ ಮಲೈ ಕರಿ'ಯನ್ನು ತಪ್ಪದೇ ಸಿದ್ಧಪಡಿಸಿ. ಹಾಲಿನ ಕೆನೆಯೊಂದಿಗೆ ಸಿದ್ಧಪಡಿಸಿದ ಈ ಮಸಾಲೆಯುಕ್ತ ಕರಿ, ಜೀರಾ ರೈಸ್ ಅಥವಾ ಬಿಸಿಬಿಸಿಯಾದ ರೊಟ್ಟಿಯೊಂದಿಗೆ ಅತ್ಯದ್ಭುತವಾಗಿ ಹೊಂದುತ್ತದೆ. ಇದರ ಸರಳವಾದ ವಿಧಾನ (Rajma Malai Curry Recipe) ಇಲ್ಲಿದೆ.

ರಾಜ್ಮಾ ಮಲೈ ಕರಿಗೆ ಬೇಕಾಗುವ ಸಾಮಗ್ರಿಗಳು

• ರಾಜ್ಮಾ (ಕೆಂಪು ಅವರೆಕಾಳು)
• ಈರುಳ್ಳಿ
• ಟೊಮೆಟೊ ಪ್ಯೂರಿ
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್
• ಫ್ರೆಶ್ ಕ್ರೀಮ್ ಅಥವಾ ಹಾಲಿನ ಕೆನೆ
• ಹಸಿ ಮೆಣಸಿನಕಾಯಿ
• ಜೀರಿಗೆ
• ಅರಿಶಿನ ಪುಡಿ
• ಅಚ್ಚಖಾರದ ಪುಡಿ
• ಧನಿಯಾ ಪುಡಿ
• ಗರಂ ಮಸಾಲ
• ರುಚಿಗೆ ತಕ್ಕಷ್ಟು ಉಪ್ಪು
• ಎಣ್ಣೆ ಅಥವಾ ತುಪ್ಪ
• ಕೊತ್ತಂಬರಿ ಸೊಪ್ಪು

ರಾಜ್ಮಾ ಮಲೈ ಕರಿ ತಯಾರಿಸುವ ವಿಧಾನ

- ಮೊದಲು ರಾತ್ರಿಯಿಡೀ ನೆನೆಸಿದ ರಾಜ್ಮಾವನ್ನು ಚೆನ್ನಾಗಿ ತೊಳೆದು ಪ್ರೆಶರ್ ಕುಕ್ಕರ್‌ಗೆ ಹಾಕಿ. ಇದಕ್ಕೆ ಸ್ವಲ್ಪ ಉಪ್ಪು ಹಾಗೂ ಬೇಕಾಗುವಷ್ಟು ನೀರು ಸೇರಿಸಿ.

- ಕಾಳುಗಳು ಮೃದುವಾಗಿ ಬೇಯುವವರೆಗೆ, ಅಂದರೆ ಐದು ಸೀಟಿ ಬರುವವರೆಗೆ ಬೇಯಿಸಿ. ರಾಜ್ಮಾ ಸ್ಮ್ಯಾಶ್ ಆಗದಂತೆ ಎಚ್ಚರವಹಿಸಿ, ಆದರೆ ಸಂಪೂರ್ಣವಾಗಿ ಬೆಂದಿರಬೇಕು.

- ಒಂದು ಬಾಣಲೆಯನ್ನು ಬಿಸಿ ಮಾಡಿ, ಅದಕ್ಕೆ ಎಣ್ಣೆ ಅಥವಾ ತುಪ್ಪ ಹಾಕಿ. ಎಣ್ಣೆ ಬಿಸಿಯಾದ ನಂತರ ಜೀರಿಗೆ ಸೇರಿಸಿ, ಅದು ಸಿಡಿದಾಗ ಹೆಚ್ಚಿದ ಈರುಳ್ಳಿಯನ್ನು ಹಾಕಿ.

- ಈರುಳ್ಳಿ ಹೊಂಬಣ್ಣಕ್ಕೆ ತಿರುಗುವವರೆಗೆ ಹುರಿಯಿರಿ. ನಂತರ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಮತ್ತು ಹೆಚ್ಚಿದ ಹಸಿಮೆಣಸಿನಕಾಯಿ ಸೇರಿಸಿ ಒಂದು ನಿಮಿಷ ಹಸಿ ವಾಸನೆ ಹೋಗುವವರೆಗೆ ಬಾಡಿಸಿ.

- ಈಗ ತಯಾರಿಸಿಟ್ಟುಕೊಂಡ ಟೊಮೆಟೊ ಪ್ಯೂರಿಯನ್ನು ಬಾಣಲೆಗೆ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಮಸಾಲೆಯಿಂದ ಎಣ್ಣೆ ಬಿಡಲು ಆರಂಭವಾದಾಗ, ಅದಕ್ಕೆ ಅರಿಶಿನ, ಖಾರದ ಪುಡಿ, ಧನಿಯಾ ಪುಡಿ ಮತ್ತು ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ. ಎಲ್ಲವನ್ನೂ ಚೆನ್ನಾಗಿ ಬೆರೆಸಿ, ಕಡಿಮೆ ಉರಿಯಲ್ಲಿ ನಾಲ್ಕು ನಿಮಿಷಗಳ ಕಾಲ ಮಸಾಲೆ ಬೇಯಲು ಬಿಡಿ.

- ಮಸಾಲಾ ಚೆನ್ನಾಗಿ ಬೆಂದ ನಂತರ, ಬೇಯಿಸಿದ ರಾಜ್ಮಾವನ್ನು ಅದರ ನೀರು ಸಹಿತ ಬಾಣಲೆಗೆ ಸೇರಿಸಿ. ಗ್ರೇವಿ ತುಂಬಾ ದಪ್ಪವೆನಿಸಿದರೆ, ಸ್ವಲ್ಪ ಬಿಸಿ ನೀರನ್ನು ಬಳಕೆ ಮಾಡಬಹುದು.

- ಈಗ ಮಿಶ್ರಣವನ್ನು ಹತ್ತು ನಿಮಿಷಗಳ ಕಾಲ ಸಣ್ಣ ಉರಿಯಲ್ಲಿ ಕುದಿಸಿ. ಕೊನೆಯಲ್ಲಿ, ಫ್ರೆಶ್ ಕ್ರೀಮ್ ಅಥವಾ ಚೆನ್ನಾಗಿ ಅಲೆದ ಹಾಲಿನ ಕೆನೆಯನ್ನು ಸೇರಿಸಿ ನಿಧಾನವಾಗಿ ಕೈಯಾಡಿಸಿ.

- ನಂತರ ಗರಂ ಮಸಾಲಾ ಮತ್ತು ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನು ಹಾಕಿ, ಎರಡು ನಿಮಿಷಗಳ ಕಾಲ ಬೇಯಿಸಿ ಗ್ಯಾಸ್ ಆಫ್ ಮಾಡಿ. ನಿಮ್ಮ ರುಚಿಕರ 'ರಾಜ್ಮಾ ಮಲೈ ಕರಿ' (Restaurant Style Rajma Curry) ಸಿದ್ಧ.

ಯಾವುದರೊಂದಿಗೆ ಸವಿಯಬೇಕು?

ಈ ರುಚಿಕರವಾದ ರಾಜ್ಮಾ ಮಲೈ ಕರಿಯನ್ನು ಜೀರಾ ರೈಸ್, ಬಟರ್ ನಾನ್, ಕುಲ್ಚಾ, ಅಥವಾ ಬಿಸಿಬಿಸಿಯಾದ ತಂದೂರಿ ರೊಟ್ಟಿಯೊಂದಿಗೆ ಸವಿಯಲು ಅತ್ಯುತ್ತಮ. ಬೇಕಿದ್ದರೆ, ಮೇಲೆ ಒಂದು ಚಮಚ ತುಪ್ಪದ ಒಗ್ಗರಣೆ ಕೊಟ್ಟರೆ ಇದರ ರುಚಿ ಇನ್ನಷ್ಟು ಡಬಲ್ ಆಗುತ್ತೆ.