ಬಿರಿಯಾನಿ ರುಚಿಯನ್ನೂ ಸೋಲಿಸುತ್ತೆ ಈ ರೈಸ್! ಸಿಂಪಲ್ ರೆಸಿಪಿ, ರಾಯಲ್ ರುಚಿ.. ಮಾಡೋದು ಹೇಗೆ?

ಬಿರಿಯಾನಿ ರುಚಿಯನ್ನೂ ಸೋಲಿಸುತ್ತೆ ಈ ರೈಸ್! ಸಿಂಪಲ್ ರೆಸಿಪಿ, ರಾಯಲ್ ರುಚಿ. ಹೌದು, ಮನೆಯಲ್ಲಿ ಏನೂ ತರಕಾರಿ ಇಲ್ವಾ? ಚಿಂತೆ ಬಿಡಿ, ಈ ರೀತಿ ಘೀ ರೈಸ್ ಮಾಡಿ ನೋಡಿ. ಅಡುಗೆಮನೆಯಲ್ಲಿ ಹೆಚ್ಚು ಸಮಯ ಕಳೆಯಲು ಇಷ್ಟವಿಲ್ಲದಿದ್ದರೂ, ನಾಲಿಗೆಗೆ ರುಚಿಸುವ, ತೃಪ್ತಿ ನೀಡುವ ಆಹಾರದ ಹಂಬಲವಿದ್ದಾಗ, 'ಘೀ ರೈಸ್' (Ghee Rice) ನೆನಪಾಗುತ್ತದೆ.

ಕನಿಷ್ಠ ಪದಾರ್ಥಗಳಿಂದಲೂ, ಅಲ್ಪ ಸಮಯದಲ್ಲಿ ತಯಾರಾಗುವ ಈ ಖಾದ್ಯ, ಶ್ರೀಮಂತ ಪರಿಮಳದಿಂದ ಎಲ್ಲರನ್ನೂ ಸೆಳೆಯುತ್ತದೆ. ದಕ್ಷಿಣ ಭಾರತದಲ್ಲಿ ಅತ್ಯಂತ ಜನಪ್ರಿಯವಾಗಿರುವ ಇದು, ಹಬ್ಬದ ದಿನಗಳಿಗೆ ಅಥವಾ ಅತಿಥಿಗಳು ಬಂದಾಗಲೂ ಉತ್ತಮ ಆಯ್ಕೆ. ಘೀ ರೈಸ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಮತ್ತು ಸುಲಭ ವಿಧಾನ (Ghee Rice Recipe) ಇಲ್ಲಿದೆ.

Photo Credit: ಸಂಗ್ರಹ ಚಿತ್ರ

ಕಮ್ಮಿ ಟೈಮ್‌ನಲ್ಲಿ 'ರಾಯಲ್' ಊಟ

ಘೀ ರೈಸ್ ಕೇವಲ ಅನ್ನವಲ್ಲ, ಇದು ತುಪ್ಪದ ಘಮ ಹಾಗೂ ಮಸಾಲೆಗಳ ಅದ್ಭುತ ಸಮ್ಮಿಶ್ರಣ. ಮಸಾಲೆಯ ಅಬ್ಬರವಿಲ್ಲದಿದ್ದರೂ, ಇದರ ರುಚಿ ಅದ್ಭುತ. ದೇಸಿ ತುಪ್ಪದ ಪರಿಮಳ ಬೆರೆತ ಆ ಸ್ವಾದ ಹೋಟೆಲ್ ನ ಪಲಾವ್ ಅಥವಾ ಬಿರಿಯಾನಿಗೂ ಸೆಡ್ಡು ಹೊಡೆಯುತ್ತದೆ. ಮಕ್ಕಳಿಗೆ ಪ್ರಿಯವಾದ ಈ ಆಹಾರ, ಪೋಷಕಾಂಶಗಳ ದೃಷ್ಟಿಯಿಂದಲೂ ಉತ್ತಮ. ಇದು ಕಡಿಮೆ ಶ್ರಮದಲ್ಲಿ ಸಿದ್ಧವಾಗುವ 'ರಾಯಲ್' ಊಟ.

ಘೀ ರೈಸ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಬಾಸ್ಮತಿ ಅಕ್ಕಿ - ಒಂದು ಕಪ್ (ಉದ್ದನೆಯದು ಸೂಕ್ತ)
• ದೇಸಿ ತುಪ್ಪ - ಎರಡು ಚಮಚ
• ಪಲಾವ್ ಎಲೆ - ಒಂದು
• ದಾಲ್ಚಿನ್ನಿ - ಸ್ವಲ್ಪ
• ಏಲಕ್ಕಿ - ಮೂರು ಅಥವಾ ನಾಲ್ಕು
• ಲವಂಗ - ನಾಲ್ಕು ಅಥವಾ ಐದು
• ಜೀರಿಗೆ - ಒಂದು ಚಮಚ
• ಗೋಡಂಬಿ - ಎಂಟು / ಹತ್ತು
• ಉಪ್ಪು - ರುಚಿಗೆ ತಕ್ಕಷ್ಟು
• ನೀರು - ಎರಡು ಕಪ್

ಘೀ ರೈಸ್‌ ಮಾಡುವ ಸಿಂಪಲ್ ವಿಧಾನ

- ಮೊದಲು ಅಕ್ಕಿಯನ್ನು ಎರಡು ಅಥವಾ ಮೂರು ಬಾರಿ ಶುದ್ಧ ನೀರಿನಲ್ಲಿ ತೊಳೆಯಿರಿ. ಬಳಿಕ ಇಪ್ಪತ್ತು ನಿಮಿಷ ನೆನೆಯಲು ಬಿಡಿ. ಇದು ಅನ್ನ ಉದುರುದುರಾಗಿ, ಉದ್ದವಾಗಿ ಬರಲು ಸಹಾಯ ಮಾಡುತ್ತದೆ.

- ನಂತರ ಕುಕ್ಕರ್ ಅಥವಾ ತಳವಿರುವ ಪಾತ್ರೆಯಲ್ಲಿ ತುಪ್ಪ ಬಿಸಿಮಾಡಿ, ಜೀರಿಗೆ ಹಾಕಿ. ಅದು ಸಿಡಿದಾಗ ಪಲಾವ್ ಎಲೆ, ದಾಲ್ಚಿನ್ನಿ, ಏಲಕ್ಕಿ, ಲವಂಗ ಸೇರಿಸಿ, ಸುವಾಸನೆ ಹೊರಬರುವವರೆಗೆ ಹುರಿಯಿರಿ.

- ಈಗ ಮಸಾಲೆಯೊಂದಿಗೆ ಗೋಡಂಬಿ ಸೇರಿಸಿ, ತಿಳಿ ಹಳದಿ ಬಣ್ಣಕ್ಕೆ ಬರುವವರೆಗೆ ಹುರಿಯಿರಿ. ಇದು ಅನ್ನಕ್ಕೆ ಕುರುಕುಲಾದ ರುಚಿ ನೀಡುತ್ತದೆ.

- ನಂತರ ನೆನೆಸಿದ ಅಕ್ಕಿಯಿಂದ ನೀರು ಬಸಿದು ಪಾತ್ರೆಗೆ ಹಾಕಿ, ಒಂದು ನಿಮಿಷ ನಿಧಾನವಾಗಿ ಕೈಯಾಡಿಸಿ. ಅಕ್ಕಿಯು ಮುರಿಯದಂತೆ ಜಾಗ್ರತೆ ವಹಿಸಿ. ತುಪ್ಪದ ಲೇಪನ ಅನ್ನವನ್ನು ಅಂಟಿಕೊಳ್ಳದಂತೆ ಮಾಡುತ್ತದೆ.

- ಇದೀಗ ಎರಡು ಕಪ್ ನೀರು ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ.

- ಕುಕ್ಕರ್‌ನಲ್ಲಿ ಒಂದು ಸೀಟಿ ಅಥವಾ ವಿಸಲ್ ಬರುವವರೆಗೆ, ಅಥವಾ ಪಾತ್ರೆಯಲ್ಲಿ ಮುಚ್ಚಳ ಮುಚ್ಚಿ ಹತ್ತು ಅಥವಾ ಹನ್ನೆರಡು ನಿಮಿಷ ಸಣ್ಣ ಉರಿಯಲ್ಲಿ ಬೇಯಿಸಿ.

- ಅಡುಗೆ ಮುಗಿದ ನಂತರ ತಕ್ಷಣ ಮುಚ್ಚಳ ತೆಗೆಯದೆ, ಐದು ನಿಮಿಷ ಹಾಗೆಯೇ ಬಿಡಿ (ದಮ್ ಕಟ್ಟಿ).

- ಅಂತಿಮವಾಗಿ, ಒಂದು ಫೋರ್ಕ್ ಅಥವಾ ಚಮಚದಿಂದ ಅನ್ನವನ್ನು ಲಘುವಾಗಿ ಮಿಕ್ಸ್ ಮಾಡಿ. ಇದು ಪರಿಮಳವನ್ನು ಹಿಡಿದಿಟ್ಟುಕೊಂಡು, ಅನ್ನವನ್ನು ಹೆಚ್ಚು ಉದುರುದುರಾಗಿಡುತ್ತದೆ.

- ಇಷ್ಟು ಮಾಡಿದರೆ ಸಾಕು, ಈಗ ಘಮಘಮಿಸುವ ಘೀ ರೈಸ್ ಸವಿಯಲು ಸಿದ್ಧ.

- ಈ ರಾಯಲ್ ಘೀ ರೈಸ್‌ ಅನ್ನು ದಾಲ್ ತಡ್ಕಾ, ಕಧಿ, ಅಥವಾ ವೆಜ್ ಕುರ್ಮಾ ಜೊತೆ ಸವಿಯಬಹುದು.

- ಈರುಳ್ಳಿ-ಸೌತೆಕಾಯಿ ರಾಯ್ತ ಇದರ ರುಚಿಯನ್ನು ಮತ್ತಷ್ಟು ಹೆಚ್ಚು ಮಾಡುತ್ತದೆ.

- ಮಾಂಸಾಹಾರಿಗಳಿಗೆ ಚಿಕನ್ ಅಥವಾ ಪನೀರ್ ಗ್ರೇವಿ ಜೊತೆ ಇದನ್ನು ಸೇವಿಸುವುದು ರಾಜಭೋಜನದಂತಹ ಅನುಭವ ನೀಡುತ್ತದೆ.

ಒಟ್ಟಾರೆ, ಆರೋಗ್ಯ ಮತ್ತು ರುಚಿಯ ಪರಿಪೂರ್ಣ ಸಮತೋಲನ ಹೊಂದಿರುವ ಈ ಘೀ ರೈಸ್ ಅನ್ನು ಒಮ್ಮೆ ಮನೆಯಲ್ಲಿ ತಯಾರಿಸಿ ನೋಡಿ. ಕಡಿಮೆ ಶ್ರಮದಲ್ಲಿ ತಯಾರಾಗುವ 'ರಾಯಲ್' ಊಟ ಎಂಬುವುದರಲ್ಲಿ ಸಂದೇಹವಿಲ್ಲ. ಇದು ನಿಮ್ಮ ಅಡುಗೆಮನೆಯ ನೆಚ್ಚಿನ ತಿನಿಸಾಗುವುದು ಖಚಿತ.