ಬಲು ಸುಲಭದಲ್ಲಿ ಮಾಡಬಹುದು ಬೆಳ್ಳುಳ್ಳಿ ಅನ್ನ, ರುಚಿಯಂತೂ ಬೊಂಬಾಟ್

ಚಿತ್ರಾನ್ನದಂತೆಯೇ ಸುಲಭದ ರೆಸಿಸಿ ಈ ಬೆಳ್ಳುಳ್ಳಿ ಅನ್ನ, ಚಿತ್ರಾನ್ನಕ್ಕಿಂತ ರುಚಿಯಲ್ಲಿ ಒಂದು ಕೈ ಮೇಲೆ ಅಂತ ಹೇಳಬಹುದು, ಈ ಬೆಳ್ಳುಳ್ಳಿ ಅನ್ನ ಬೆಳಗ್ಗೆ ಬ್ರೇಕ್‌ಫಾಸ್ಟ್‌ಗೆ ಮಾಡುವುದು ಸುಲಭ ಅಲ್ಲದೆ ಬೆಳ್ಳುಳ್ಳಿ ಬಳಸುವುದರಿಂದ ಜೀರ್ಣಕ್ರಿಯೆಗೂ ತುಂಬಾನೇ ಒಳ್ಳೆಯದು, ಬನ್ನಿ ಸುಲಭದಲ್ಲಿ ಮಾಡಬಹುದಾದ ಈ ಬೆಳ್ಳುಳ್ಳಿ ಅನ್ನ ಮಾಡುವುದು ಹೇಗೆ ಎಂದು ನೋಡೋಣ:

ಬೇಕಾಗುವ ಸಾಮಗ್ರಿ
2 ಚಮಚ ತೆಂಗಿನೆಣ್ಣೆ (ತೆಂಗಿನೆಣ್ಣೆ ಬಳಸಲ್ಲ ಎಂದಾದರೆ ಇತರ ಅಡುಗೆಯೆಣ್ಣೆ ಬಳಸಬಹುದು, ತುಪ್ಪ ಆದರೆ ಇನ್ನೂ ಟೇಸ್ಟ್ ಕೊಡುತ್ತೆ)
ಬೆಳ್ಳುಳ್ಳಿ 3(15-20 ಎಸಳು)
ಖಾರದ ಪುಡಿ 1 ಚಮಚ
ಖಾರದ ಪುಡಿ ಬಳಸದಿದ್ದರೆ ಹಸಿ ಮೆಣಸು 2-3(ನಿಮ್ಮ ಖಾರಕ್ಕೆ ತಕ್ಕಂತೆ ಬಳಸಬಹುದು)
ಸಾಸಿವೆ 1/4 ಚಮಚ
ಉದ್ದು 1 ಚಮಚ
ಕಡ್ಲೆಬೇಳೆ 1 ಚಮಚ
ಈರುಳ್ಳಿ 1
ತೆಂಗಿನ ತುರಿ 1/2 ಕಪ್
ಅನ್ನ ಒಂದೂವರೆ ಕಪ್
ಸ್ವಲ್ಪ ಕೊತ್ತಂಬರಿ ಸೊಪ್ಪು

ಮಾಡುವ ವಿಧಾನ

• ರಾತ್ರಿ ಮಾಡಿದ ಅನ್ನ ಉಳಿದಿದ್ದರೆ ಅದನ್ನು ಬಳಸಬಹುದು ಅಥವಾ ಅನ್ನ ಮಾಡಿ ಬಳಸಬಹುದು
• ತುಪ್ಪ ಅಥವಾ ತೆಂಗಿನೆಣ್ಣೆ ಹಾಕಿ ಬಿಸಿ ಮಾಡಿ ಬಳಿಕ ಸಾಸಿವೆ ಹಾಕಿ, ಸಾಸಿವೆ ಚಟ್‌ಪಟ್‌ ಶಬ್ದ ಮಾಡಿ ಉದ್ದು ಹಾಗೂ ಕಡ್ಲೆ ಬೇಳೆ ಹಾಕಿ ಬಳಿ ಬೆಳ್ಳುಳ್ಳು ಎಸಳು ಹಾಕಿ ಫ್ರೈ ಮಾಡಿ, ಬೆಳ್ಳುಳ್ಳಿ ಕಂದು ಬಣ್ಣಕ್ಕೆ ಬಂದಾಗ ಈರುಳ್ಳಿ ಹಾಕಿ
• ನಂತರ ಉಪ್ಪು ಸೇರಿಸಿ
• ತೆಂಗಿನ ತುರಿ ಹಾಕಿ ಮಿಕ್ಸ್ ಮಾಡಿ
• ನಂತರ ಉಡಿ ಆಫ್‌ ಮಾಡಿ ಅನ್ನ ಹಾಕಿ ಮಿಕ್ಸ್ ಮಾಡಿ
• ಬಳಿಕ ಸ್ವಲ್ಪ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ರುಚಿ ರುಚಿಯಾದ ಬೆಳ್ಳುಳ್ಳಿಅನ್ನ ರೆಡಿ.

ಸಲಹೆ: ನೀವು ಮೆಣಸು ಪುಡಿ ಬಳಸಿದರೆ ಅನ್ನ ಕೆಂಪು ಬಣ್ಣದಲ್ಲಿರಬಹುದು, ಹಸಿ ಮೆಣಸು ಬಳಸಿದರೆ ಬಿಳಿ ಬಣ್ಣದಲ್ಲಿರುತ್ತದೆ
ಬೇಕಿದ್ದರೆ ಶೇಂಗಾ ಬೀಜ ಕೂಡ ಸೇರಿಸಬಹುದು.

ಅದಕ್ಕೆ ಕಾಂಬಿನೇಷನ್ ಆಗಿ ಈ ಚಟ್ನಿ ಬಳಸಿ

ತೆಂಗಿನ ತುರಿ ಅರ್ಧ ಕಪ್‌
ಈರುಳ್ಳಿ 1
ಹಸಿ ಮೆಣಸು 2-3 (ಖಾರಕ್ಕೆ ತಕ್ಕ ಹಾಗೆ)
ಸ್ವಲ್ಪ ಕೊತ್ತಂಬರಿ ಸೊಪ್ಪ
ಸ್ವಲ್ಪ ಹುಣಸೆಹಣ್ಣು
ರುಚಿಗೆ ತಕ್ಕ ಉಪ್ಪು

ಈ ಎಲ್ಲಾ ಸಾಮಗ್ರಿ ಹಾಕಿ ಚಟ್ನಿ ಮಾಡಿ, ತುಂಬಾ ಗಟ್ಟಿ ಚಟ್ನಿಯಲ್ಲ, ತುಂಬಾ ನೀರು-ನೀರಾಗಿಯೂ ಇರಬಹುದು, ಅಂಥ ಚಟ್ನಿ ಈ ಬೆಳ್ಳುಳ್ಳಿ ಅನ್ನದ ಜೊತೆ ಸವಿಯಲು ಚೆನ್ನಾಗಿರುತ್ತದೆ.

ಬೆಳ್ಳುಳ್ಳಿಯಲ್ಲಿರುವ ಪೋಷಕಾಂಶ
ಮ್ಯಾಂಗನೀಸ್
ವಿಟಮಿನ್‌ ಬಿ6
ವಿಟಮಿನ್ ಸಿ
ಸೆಲೆನಿಯಮ್‌
ನಾರಿನಂಶ

ಬೆಳ್ಳುಳ್ಳಿಯಿಂದ ದೊರೆಯುವ ಪ್ರಯೋಜನಗಳು

ರೋಗ ನಿರೋಶಕ ಶಕ್ತಿ ಹೆಚ್ಚಿಸುತ್ತದೆ

ಬೆಳ್ಳುಳ್ಳಿಯಲ್ಲಿ ರೋಗ ನಿರೋಧಕ ಶಕ್ತಿ ಹೆಚ್ಚಿಸುತ್ತದೆ. ಶೀತ, ಕೆಮ್ಮು ಈ ಬಗೆಯ ಸಮಸ್ಯೆ ತಡೆಗಟ್ಟಲು ಸಹಕಾರಿ.

ರಕ್ತದೊತ್ತಡ ನಿಯಂತ್ರಣದಲ್ಲಿಡಲು ಸಹಕಾರಿ
ರಕ್ತದೊತ್ತಡ ನಿಯಂತ್ರಣದಲ್ಲಿಡಲು ಬೆಳ್ಳುಳ್ಳಿ ಸಹಕಾರಿಯಾಗಿದೆ. ಹೃದಯದ ಆರೋಗ್ಯಕ್ಕೆ ಒಳ್ಳೆಯದು, ಪಾರ್ಶ್ವವಾಯು ಈ ಬಗೆಯ ಸಮಸ್ಯೆ ತಡೆಗಟ್ಟಲು ಸಹಕಾರಿ.

ಕೊಲೆಸ್ಟ್ರಾಲ್‌ ಪ್ರಮಾಣ ನಿಯಂತ್ರಣದಲ್ಲಿಡಲು ಸಹಕಾರಿ. ಇದು ಕೆಟ್ಟ ಕೊಲೆಸ್ಟ್ರಾಲ್ ಕಡಿಮೆ ಮಾಡಿ ಒಳ್ಳೆಯ ಕೊಲೆಸ್ಟ್ರಾಲ್‌ ಹೆಚ್ಚಿಸುತ್ತದೆ.

ಬೆಳ್ಳುಳ್ಳಿ ಅನ್ನ ಮಾಡುವುದರಿಂದ ದೊರೆಯುವ ಪ್ರಯೋಜನಗಳು:

ಸುಲಭವಾಗಿ ಮಾಡಬಹುದಾಗಿರುವುದರಿಂದ ಬೆಳಗ್ಗೆ ಅರ್ಜೆಂಟಾಗಿ ಅಡುಗೆ ಮಾಡಬೇಕು ಎಂದಾಗ ಇದನ್ನು ಮಾಡಬಹುದು, ಉಪ್ಪಿಟ್ಟು ಆದರೆ ಕೆಲವರು ಇಷ್ಟಪಡಲ್ಲ, ಆದರೆ ಈ ಬೆಳ್ಳುಳ್ಳಿ ಅನ್ನ ಎಲ್ಲರಿಗೂ ಇಷ್ಟವಾಗುವುದು.