ಸಕ್ಕರೆ ಬೇಡ, ಬೆಲ್ಲವೂ ಬೇಡ! ಹೋಳಿಗೆ ಖರ್ಜೂರ ಬಳಸಿ ಶುಗರ್‌ ಫ್ರೀ ಮಲ್ಪುವಾ ಮಾಡಿ.. ಸಿಂಪಲ್ ರೆಸಿಪಿ

ಸಕ್ಕರೆ ಬೇಡ, ಬೆಲ್ಲವೂ ಬೇಡ! ಸಕ್ಕರೆ ಕಾಯಿಲೆ ಇರುವವರಿಗೂ ಈ ಮಲ್ಪುವಾ ಬೆಸ್ಟ್. ಹೆಲ್ದಿ ಮತ್ತು ಶುಗರ್ ಫ್ರೀ ಮಲ್ಪುವಾ ಮಾಡುವುದು ಹೇಗೆ ನೋಡಿ. ಹೌದು, ಹೋಳಿ (Holi 2026) ಹಬ್ಬ ಎಂದರೆ ಕೇವಲ ಬಣ್ಣಗಳ ಓಕುಳಿ ಮಾತ್ರವಲ್ಲ, ಹತ್ತು ಹಲವು ಬಗೆಯ ಸಿಹಿ ತಿಂಡಿಗಳ ಸಡಗರವೂ ಹೌದು. ಈ ಸಂಭ್ರಮದಲ್ಲಿ ಸಾಂಪ್ರದಾಯಿಕ ಅಡುಗೆಯಾದ ಮಲ್ಪುವಾ (Malpua) ಅತಿ ಜನಪ್ರಿಯ ತಿನಿಸು.

ಸಾಮಾನ್ಯವಾಗಿ ಇದನ್ನು ಸಕ್ಕರೆ ಪಾಕದಲ್ಲಿ ಅದ್ದಿ ತಯಾರಿಸಲಾಗುತ್ತದೆ. ಆದರೆ, ಆರೋಗ್ಯದ ಬಗ್ಗೆ ಕಾಳಜಿ ವಹಿಸುವವರು ಮತ್ತು ಮಧುಮೇಹದಿಂದ ಬಳಲುತ್ತಿರುವವರು ಸಕ್ಕರೆ ಬೆರೆಸಿದ ಸಿಹಿ ತಿಂಡಿಗಳಿಂದ ದೂರವಿರಲು ಇಷ್ಟಪಡುತ್ತಾರೆ. ಅಂತಹವರಿಗಾಗಿ, ಈ ಬಾರಿ ಹೋಳಿಗೆ ವಿಶೇಷವಾಗಿ ಶುಗರ್‌ ಫ್ರೀ ಮಲ್ಪುವಾ (Sugar Free Malpua Recipe) ರೆಸಿಪಿ ಬಗ್ಗೆ ಇಲ್ಲಿ ತಿಳಿಸಲಾಗಿದೆ.

Photo Credit: ಸಂಗ್ರಹ ಚಿತ್ರ: ಇಂಟರ್ನೆಟ್

ಈ ರೆಸಿಪಿ ಸಕ್ಕರೆಗೆ ಬದಲಾಗಿ ಬೆಲ್ಲ ಅಥವಾ ಖರ್ಜೂರದಂತಹ ನೈಸರ್ಗಿಕ ಸಿಹಿಯನ್ನು ಬಳಸುತ್ತದೆ. ಇದು ರುಚಿಯಲ್ಲಿ ಅದ್ಭುತವಾಗಿದ್ದು, ನಿಮ್ಮ ಆರೋಗ್ಯಕ್ಕೂ ಪೂರಕವಾಗಿದೆ. ಈ ಆರೋಗ್ಯಕರ ಮತ್ತು ರುಚಿಕರ ಮಲ್ಪುವಾವನ್ನು ಹೇಗೆ ತಯಾರಿಸಬಹುದು (How to make Malpua without sugar) ಮತ್ತು ಶುಗರ್‌ ಫ್ರೀ ಮಲ್ಪುವಾಗೆ ಬೇಕಾಗುವ ಸಾಮಗ್ರಿಗಳು ಯಾವುವು ಎಂದು ತಿಳಿಯೋಣ ಬನ್ನಿ.

ಶುಗರ್‌ ಫ್ರೀ ಮಲ್ಪುವಾಗೆ ಬೇಕಾಗುವ ಸಾಮಗ್ರಿಗಳು

• ಮೈದಾ ಹಿಟ್ಟು
• ರವೆ (ಚಿರೋಟಿ ರವೆ)
• ಹಾಲು
• ಖರ್ಜೂರದ ಪೇಸ್ಟ್ (ಅಥವಾ ತುರಿದ ಬೆಲ್ಲ)
• ಸೋಂಪು
• ಒಣ ಕೊಬ್ಬರಿ ತುರಿ
• ಏಲಕ್ಕಿ ಪುಡಿ
• ತುಪ್ಪ
• ನೀರು

ಶುಗರ್‌ ಫ್ರೀ ಮಲ್ಪುವಾ ತಯಾರಿಸುವ ವಿಧಾನ

- ಮೊದಲಿಗೆ, ಒಂದು ದೊಡ್ಡ ಪಾತ್ರೆಯಲ್ಲಿ ಮೈದಾ ಮತ್ತು ರವೆಯನ್ನು ಒಟ್ಟಿಗೆ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ.

- ನಂತರ, ಇದಕ್ಕೆ ಸ್ವಲ್ಪ ಸ್ವಲ್ಪವಾಗಿ ಹಾಲನ್ನು ಸೇರಿಸುತ್ತಾ ಗಂಟುಗಳಿಲ್ಲದಂತೆ ನಯವಾದ ಹಿಟ್ಟಿನ ಮಿಶ್ರಣವನ್ನು ತಯಾರಿಸಿಕೊಳ್ಳಿ. ಈ ಮಿಶ್ರಣವು ದೋಸೆ ಹಿಟ್ಟಿಗಿಂತ ಸ್ವಲ್ಪ ದಪ್ಪವಾಗಿರಬೇಕು.

- ಒಂದು ಸಣ್ಣ ಪಾತ್ರೆಯಲ್ಲಿ ತುರಿದ ಬೆಲ್ಲಕ್ಕೆ ಸ್ವಲ್ಪ ನೀರು ಸೇರಿಸಿ ಬಿಸಿ ಮಾಡಿ. ಬೆಲ್ಲ ಸಂಪೂರ್ಣವಾಗಿ ಕರಗಿದ ನಂತರ, ಅದರಲ್ಲಿರುವ ಕಸ ಅಥವಾ ಕಶ್ಮಲ ತೆಗೆಯಲು ಸೋಸಿಕೊಳ್ಳಿ.

- ಸೋಸಿದ ಬೆಲ್ಲದ ಪಾಕವನ್ನು ಮೊದಲೇ ಸಿದ್ಧಪಡಿಸಿದ ಹಿಟ್ಟಿನ ಮಿಶ್ರಣಕ್ಕೆ ಸೇರಿಸಿ. ಒಂದು ವೇಳೆ ಖರ್ಜೂರ ಬಳಸುತ್ತಿದ್ದರೆ, ಖರ್ಜೂರದ ಪೇಸ್ಟ್ ಅನ್ನು ನೇರವಾಗಿ ಹಿಟ್ಟಿಗೆ ಸೇರಿಸಿ ಚೆನ್ನಾಗಿ ಬೆರೆಸಿ.

- ಈ ಮಿಶ್ರಣಕ್ಕೆ ಸೋಂಪು, ಏಲಕ್ಕಿ ಪುಡಿ ಮತ್ತು ಕೊಬ್ಬರಿ ತುರಿಯನ್ನು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಈ ಪದಾರ್ಥಗಳು ಮಲ್ಪುವಾಕ್ಕೆ ಸೂಕ್ತವಾದ ಸಾಂಪ್ರದಾಯಿಕ ರುಚಿ ಮತ್ತು ಪರಿಮಳವನ್ನು ನೀಡುತ್ತವೆ.

- ನಂತರ, ಈ ಹಿಟ್ಟಿನ ಮಿಶ್ರಣವನ್ನು ಕನಿಷ್ಠ15 ರಿಂದ 20 ನಿಮಿಷಗಳ ಕಾಲ ನೆನೆಯಲು ಬಿಡಿ. ರವೆ ಚೆನ್ನಾಗಿ ನೆನೆದಷ್ಟೂ ಮಲ್ಪುವಾ ಮೃದುವಾಗಿ ಬರುತ್ತದೆ.

- ಒಂದು ಅಗಲವಾದ ಬಾಣಲೆಯಲ್ಲಿ ತುಪ್ಪವನ್ನು ಬಿಸಿ ಮಾಡಿ. ಆರೋಗ್ಯದ ದೃಷ್ಟಿಯಿಂದ ಎಣ್ಣೆಗಿಂತ ತುಪ್ಪ ಶ್ರೇಷ್ಠ. ತುಪ್ಪ ಚೆನ್ನಾಗಿ ಕಾದ ನಂತರ, ಒಂದು ಸೌಟು ಹಿಟ್ಟನ್ನು ತೆಗೆದುಕೊಂಡು ನಿಧಾನವಾಗಿ ಬಾಣಲೆಯ ಮಧ್ಯಭಾಗಕ್ಕೆ ಹಾಕಿ.

- ಹಿಟ್ಟು ತಾನಾಗಿಯೇ ವೃತ್ತಾಕಾರ ಪಡೆಯುತ್ತದೆ. ಉರಿಯನ್ನು ಮಧ್ಯಮದಿಂದ ಕಡಿಮೆ ಇಟ್ಟುಕೊಂಡು ಎರಡೂ ಬದಿಗಳಲ್ಲಿ ಹೊಂಬಣ್ಣ ಬರುವವರೆಗೆ ಕರಿಯಿರಿ.

- ಕರಿದ ಮಲ್ಪುವಾವನ್ನು ತುಪ್ಪದಿಂದ ಹೊರತೆಗೆದು, ಬಿಸಿ ಇರುವಾಗಲೇ ಅದರ ಮೇಲೆ ಕತ್ತರಿಸಿದ ಬಾದಾಮಿ, ಪಿಸ್ತಾ ಅಥವಾ ಗೋಡಂಬಿ ತುರಿಗಳಿಂದ ಅಲಂಕರಿಸಿ.

- ಇಷ್ಟು ಮಾಡಿದರೆ ಸಾಕು, ಹೋಳಿ ಹಬ್ಬದಂದು ಆರೋಗ್ಯಕರ ಮತ್ತು ರುಚಿಕರ ಮಲ್ಪುವಾ ಸವಿಯಲು ಸಿದ್ಧ.

ಶುಗರ್‌ ಫ್ರೀ ಮಲ್ಪುವಾದ ವಿಶೇಷತೆಗಳು

- ಬೆಲ್ಲವು ಕಬ್ಬಿಣದಂಶವನ್ನು ಹೇರಳವಾಗಿ ಹೊಂದಿರುವುದರಿಂದ ದೇಹಕ್ಕೆ ಉತ್ತಮ. ಇದು ಸಕ್ಕರೆಯಂತೆ ಹಾನಿಕಾರಕವಲ್ಲ. ಖರ್ಜೂರ ತ್ವರಿತ ಶಕ್ತಿ ನೀಡಲು ಸಹಕಾರಿ. ಹೀಗಾಗಿ, ಈ ಮಲ್ಪುವಾ ಆರೋಗ್ಯಕ್ಕೆ ಉತ್ತಮ ಆಯ್ಕೆ.

- ಮಲ್ಪುವಾದಲ್ಲಿ ಬಳಸುವ ಸೋಂಪು ಕೇವಲ ರುಚಿಗೆ ಮಾತ್ರವಲ್ಲದೆ, ಹಬ್ಬದ ಭರ್ಜರಿ ಊಟದ ನಂತರ ಜೀರ್ಣಕ್ರಿಯೆಯನ್ನು ಸುಧಾರಿಸಲು ಸಹಕರಿಸುತ್ತದೆ. ಇದು ಹೊಟ್ಟೆಯ ಉಬ್ಬರವನ್ನು ಕಡಿಮೆ ಮಾಡಲೂ ನೆರವಾಗುತ್ತದೆ.

- ತೂಕ ಇಳಿಸಿಕೊಳ್ಳಲು ಪ್ರಯತ್ನಿಸುತ್ತಿರುವವರು ಅಥವಾ ಮಧುಮೇಹದ ಕಾರಣದಿಂದ ಸಿಹಿ ತಿಂಡಿಗಳಿಂದ ದೂರವಿರಬೇಕಾದವರಿಗೆ ಈ 'ಶುಗರ್‌ ಫ್ರೀ ಮಲ್ಪುವಾ' ಒಂದು ಉತ್ತಮ ಆಯ್ಕೆಯಾಗಿದೆ. ಇದು ಆರೋಗ್ಯಕರವಾಗಿದ್ದರೂ ರುಚಿಯಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳುವುದಿಲ್ಲ.

ಈ ಹೋಳಿ ಹಬ್ಬಕ್ಕೆ ನಿಮ್ಮ ಅತಿಥಿಗಳಿಗೆ ಈ ರುಚಿಕರ ಮತ್ತು ಆರೋಗ್ಯಕರವಾದ 'ಶುಗರ್‌ ಫ್ರೀ ಮಲ್ಪುವಾ'ವನ್ನು ನೀಡಿ ಆಶ್ಚರ್ಯಗೊಳಿಸಿ. ಈ ಸಿಹಿಯನ್ನು ಸವಿದ ನಂತರ ಪ್ರತಿಯೊಬ್ಬರೂ ಖಂಡಿತವಾಗಿಯೂ ನಿಮ್ಮ ಕೈ ರುಚಿ ಮೆಚ್ಚುವುದು ಗ್ಯಾರಂಟಿ.