ಪುದೀನ ಚಟ್ನಿಪುಡಿ ತಿನ್ನಲು ಇಂದೇ ಸುದಿನ!

ಪುದೀನ ಚಟ್ನಿ ಪುಡಿಯನ್ನು ಎಲ್ಲ ತರಹದ ತಿಂಡಿಗಳ ಜೊತೆ ನೆಂಜಿಕೊಂಡು ತಿನ್ನಬಹುದು. ಮಾಡಿಕೊಳ್ಳುವುದೂ ಬಲು ಸುಲಭ. ಆಹಾರ ಪಚನವಾಗಲು ಪುದೀನ ಸಹಕರಿಸುತ್ತದೆ. ಬಿಸಿ ಅನ್ನದೊಂದಿಗೆ ತುಪ್ಪ ಸೇರಿಸಿ ಪುದೀನ ಚಟ್ಣಿ ಪುಡಿಯನ್ನು ಕಲಸಿ ತಿನ್ನಲು ರುಚಿಯಾಗಿರುತ್ತದೆ.

ತಾಜಾ ಪುದೀನ ಸೊಪ್ಪು : 2ಕಟ್ಟು
ಕಡಲೆ ಬೇಳೆ : 100ಗ್ರಾಂ
ಉದ್ದಿನ ಬೇಳೆ : 75ಗ್ರಾಂ
ಒಣ ಮೆಣಸಿನ ಕಾಯಿ : 75ಗ್ರಾಂ
ತುರಿದ ಒಣ ಕೊತ್ತಂಬರಿ : 2ಹಿಡಿ
ಬೆಲ್ಲ : ಅರ್ಧ ಅಚ್ಚು
ಹುಣಸೆಹಣ್ಣು : ರುಚಿಗೆ ತಕ್ಕಷ್ಟು
ಉಪ್ಪು : ರುಚಿಗೆ ತಕ್ಕಷ್ಟು
ಎಣ್ಣೆ : 1 ಟೀ ಚಮಚ

ತಯಾರಿಸುವ ವಿಧಾನ :

ಪುದೀನ ಸೊಪ್ಪಿನ ಎಲೆಗಳನ್ನು ಬಿಡಿಸಿ, ಚೆನ್ನಾಗಿ ತೊಳೆದಿಡಿ. ತೇವ ಹೋಗುವಂತೆ ಒಣಗಿಸಿ. ಏಕೆಂದರೆ ಕಾದ ಎಣ್ಣೆಗೆ ಹಾಕಿದಾಗ ಎಣ್ಣೆ ಸಿಡಿಯುವುದಿಲ್ಲ. ಒಣಗಿಸಿದ ಪುದೀನ ಎಲೆಗಳನ್ನು ಕಾದ ಬಾಣಲೆಗೆ ಹಾಕಿ ಸ್ವಲ್ಪ ತುಪ್ಪದೊಂದಿಗೆ ಹುರಿಯಿರಿ. ಹಾಗೆಯೇ ಕಡಲೆ ಬೇಳೆ, ಉದ್ದಿನ ಬೇಳೆ, ಒಣ ಮೆಣಸಿನ ಕಾಯಿಯನ್ನು ಹದವಾಗಿ ಹುರಿಯಿರಿ. ತುರಿದ ಒಣ ಕೊತ್ತಂಬರಿ, ಹುಣಸೆಹಣ್ಣನ್ನು ಸ್ವಲ್ಪ ಬೆಚ್ಚಗೆ ಮಾಡಿಕೊಳ್ಳಿ. ಈಗ ಎಲ್ಲವನ್ನೂ ಮಿಕ್ಸಿಗೆ ಹಾಕಿ ಚೆನ್ನಾಗಿ ಪುಡಿ ಮಾಡಿಕೊಳ್ಳಿ. ನಿಮ್ಮ ನೆಚ್ಚಿನ ಪುದೀನ ಚಟ್ನಿ ಪುಡಿ ರೆಡಿ.