ಇಡ್ಲಿಗೆ ಹೊಸ ಟ್ವಿಸ್ಟ್.. ಕೇವಲ ಕ್ಯಾರೆಟ್‌ ಬಳಸಿ ಮಾಡಿ ಸಾಫ್ಟ್ & ಹೆಲ್ತಿ ಇಡ್ಲಿ! ತೂಕವೂ ಇಳಿಯುತ್ತೆ

ಬ್ರೇಕ್‌ಫಾಸ್ಟ್‌ಗೆ ಹೊಸ ಟ್ವಿಸ್ಟ್.. ಕ್ಯಾರೆಟ್‌ ಬಳಸಿ ಮಾಡಿ ಸಾಫ್ಟ್ & ಹೆಲ್ತಿ ಇಡ್ಲಿ! ಒಮ್ಮೆ ಟ್ರೈ ಮಾಡಿದ್ರೆ ಮಕ್ಕಳು ಮತ್ತೆ ಮತ್ತೆ ಕೇಳ್ತಾರೆ. ಹೌದು, ಇಡ್ಲಿ (Idli) ಅಚ್ಚುಮೆಚ್ಚಿನ ಬೆಳಗಿನ ಉಪಹಾರಗಳಲ್ಲಿ ಒಂದು. ಇದು ಮೃದುತ್ವ ಮತ್ತು ಪೌಷ್ಟಿಕಾಂಶಕ್ಕೆ ಹೆಸರುವಾಸಿ. ನೀವು ಪ್ರತಿದಿನದ ಬಿಳಿ ಇಡ್ಲಿಗೆ ಹೊಸ ಆಯಾಮ ನೀಡಿ, ಆರೋಗ್ಯಕರ ಪೋಷಕಾಂಶಗಳನ್ನು ಸೇರಿಸಲು ಬಯಸುವಿರಾ? ಹಾಗಾದ್ರೆ, ರುಚಿ ಮತ್ತು ಬಣ್ಣದಲ್ಲಿ ಕಚಗುಳಿ ಇಡುವ 'ಕ್ಯಾರೆಟ್ ಇಡ್ಲಿ' (Carrot Idli) ಉತ್ತಮ ಆಯ್ಕೆಯಾಗಲಿದೆ.

ಇದು ಕೇವಲ ಕಣ್ಣಿಗೆ ಸುಂದರವಾಗಿ ಕಾಣುವುದಷ್ಟೇ ಅಲ್ಲದೆ, ನಿಮ್ಮ ದಿನವನ್ನು ಚೈತನ್ಯದಿಂದ ಪ್ರಾರಂಭಿಸಲು ಅಗತ್ಯವಿರುವ ಪೋಷಕಾಂಶಗಳನ್ನು ಒದಗಿಸುತ್ತದೆ. ಕ್ಯಾರೆಟ್‌ಗಳನ್ನು ಸಾಮಾನ್ಯವಾಗಿ ಹಲ್ವಾ ಅಥವಾ ಸಲಾಡ್‌ಗಳಿಗೆ ಬಳಸಿದರೂ, ಇಡ್ಲಿಯನ್ನು ತಯಾರಿಸುವ ಮೂಲಕ ಇದರ ಪ್ರಯೋಜನಗಳನ್ನು ಹೊಸ ರೀತಿಯಲ್ಲಿ ಸವಿಯಬಹುದು. ಕ್ಯಾರೆಟ್ ಇಡ್ಲಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಮತ್ತು ತಯಾರಿಸುವ ವಿಧಾನ (Carrot Idli Recipe) ಇಲ್ಲಿದೆ.

ಕ್ಯಾರೆಟ್ ಇಡ್ಲಿಯ ವಿಶೇಷತೆಗಳು

* ಮಕ್ಕಳ ನೆಚ್ಚಿನ ಆಯ್ಕೆ ಮತ್ತು ಲಂಚ್ ಬಾಕ್ಸ್‌ಗೆ ಅತ್ಯುತ್ತಮ ಪೌಷ್ಟಿಕ ಆಹಾರ

* ಕಣ್ಣಿನ ಆರೋಗ್ಯಕ್ಕೆ ಪೂರಕ. ಮಕ್ಕಳು ಮತ್ತು ವಯಸ್ಕರ ಕಣ್ಣಿನ ಆರೋಗ್ಯಕ್ಕೆ ಇದು ಉತ್ತಮ ಉಪಹಾರ

* ದೇಹದ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ.

* ತೂಕ ಇಳಿಸಲು ಪ್ರಯತ್ನಿಸುವವರಿಗೆ ಇದು ಅತ್ಯಂತ ಸೂಕ್ತ ಮತ್ತು ಆರೋಗ್ಯಕರ ಉಪಹಾರ.

ಕ್ಯಾರೆಟ್ ಇಡ್ಲಿಗೆ ಬೇಕಾಗುವ ಸಾಮಗ್ರಿಗಳು

• ಇಡ್ಲಿ ಹಿಟ್ಟು - 2 ಕಪ್ (ಅಕ್ಕಿ ಮತ್ತು ಉದ್ದಿನ ಬೇಳೆಯ ಸಾಮಾನ್ಯ ಅನುಪಾತದಲ್ಲಿ ತಯಾರಿಸಿದ ಹಿಟ್ಟು)
• ತಾಜಾ ಕ್ಯಾರೆಟ್ - 2 ರಿಂದ 3
• ರುಚಿಗೆ ತಕ್ಕಷ್ಟು ಉಪ್ಪು
• ಇಡ್ಲಿ ಸಾಂಚೆಗೆ ಸವರಲು ಸ್ವಲ್ಪ ಎಣ್ಣೆ
• ಅಗತ್ಯಕ್ಕೆ ತಕ್ಕಷ್ಟು ನೀರು

ಕ್ಯಾರೆಟ್ ಇಡ್ಲಿ ತಯಾರಿಸುವ ಸರಳ ವಿಧಾನ

- ಮೊದಲಿಗೆ, ಎರಡರಿಂದ ಮೂರು ತಾಜಾ ಕ್ಯಾರೆಟ್‌ಗಳನ್ನು ತೆಗೆದುಕೊಂಡು ಶುದ್ಧ ನೀರಿನಲ್ಲಿ ಚೆನ್ನಾಗಿ ತೊಳೆಯಿರಿ. ನಂತರ ಅವುಗಳ ಸಿಪ್ಪೆ ತೆಗೆದು, ಸಣ್ಣ ತುಂಡುಗಳಾಗಿ ಕತ್ತರಿಸಿ ಪಕ್ಕಕ್ಕಿಟ್ಟುಕೊಳ್ಳಿ.

- ಕತ್ತರಿಸಿದ ಕ್ಯಾರೆಟ್ ತುಂಡುಗಳನ್ನು ಮಿಕ್ಸರ್ ಜಾರ್‌ಗೆ ಹಾಕಿ. ಇದಕ್ಕೆ ಅಗತ್ಯವಿದ್ದಷ್ಟು ಮಾತ್ರ ನೀರು ಸೇರಿಸಿ ನುಣ್ಣಗೆ ಪೇಸ್ಟ್ ಮಾಡಿಕೊಳ್ಳಿ. ಪೇಸ್ಟ್ ಅತಿ ತೆಳುವಾಗದಂತೆ ನೋಡಿಕೊಳ್ಳಿ, ಏಕೆಂದರೆ ಇದು ಇಡ್ಲಿ ಹಿಟ್ಟಿನ ಹದವನ್ನು ಹಾಳುಮಾಡಬಹುದು.

- ಒಂದು ದೊಡ್ಡ ಪಾತ್ರೆಯಲ್ಲಿ ಇಡ್ಲಿ ಹಿಟ್ಟನ್ನು ತೆಗೆದುಕೊಂಡು, ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ತಯಾರಿಸಿಟ್ಟುಕೊಂಡ ಕ್ಯಾರೆಟ್ ಪೇಸ್ಟ್ ಅನ್ನು ಸೇರಿಸಿ.

- ಕ್ಯಾರೆಟ್‌ನ ಕಿತ್ತಳೆ ಬಣ್ಣವು ಹಿಟ್ಟಿನೊಂದಿಗೆ ಸಂಪೂರ್ಣವಾಗಿ ಬೆರೆಯುವವರೆಗೆ ಚೆನ್ನಾಗಿ ಕಲಸಿ. ಈಗ ಇಡ್ಲಿ ಹಿಟ್ಟು ಆಕರ್ಷಕ ಬಣ್ಣವನ್ನು ಪಡೆದುಕೊಂಡಿರುತ್ತದೆ.

- ಇಡ್ಲಿ ಸ್ಟೀಮರ್‌ನಲ್ಲಿ ನೀರು ಹಾಕಿ ಬಿಸಿ ಮಾಡಲು ಇಡಿ. ಇಡ್ಲಿ ಸಾಂಚೆಗಳಿಗೆ ಸ್ವಲ್ಪ ಎಣ್ಣೆ ಸವರಿ, ಸಿದ್ಧಪಡಿಸಿದ ಕ್ಯಾರೆಟ್ ಹಿಟ್ಟನ್ನು ತುಂಬಿಸಿ.

- ನಂತರ ಅವುಗಳನ್ನು ಸ್ಟೀಮರ್‌ನಲ್ಲಿ ಇಟ್ಟು 12 ರಿಂದ 15 ನಿಮಿಷಗಳ ಕಾಲ ಹಬೆಯಲ್ಲಿ ಬೇಯಿಸಿ.

- ಇಡ್ಲಿಗಳು ಬೆಂದ ನಂತರ, ಸ್ಟೀಮರ್‌ನಿಂದ ಸಾಂಚೆಗಳನ್ನು ಹೊರತೆಗೆದು ಕೊಂಚ ತಣ್ಣಗಾಗಲು ಬಿಡಿ.

- ಬಳಿಕ ಚಮಚದ ಸಹಾಯದಿಂದ ಇಡ್ಲಿಗಳನ್ನು ನಿಧಾನವಾಗಿ ಹೊರತೆಗೆಯಿರಿ. ಈಗ ಬಿಸಿಬಿಸಿಯಾದ, ಮೃದುವಾದ ಕ್ಯಾರೆಟ್ ಇಡ್ಲಿ ಸವಿಯಲು ಸಿದ್ಧ.

ಯಾವುದರೊಂದಿಗೆ ಸವಿಯಬೇಕು?

ಈ ರುಚಿಕರ ಕ್ಯಾರೆಟ್ ಇಡ್ಲಿಯನ್ನು ತೆಂಗಿನಕಾಯಿ ಚಟ್ನಿ, ಶೇಂಗಾ ಚಟ್ನಿ, ಇಲ್ಲವೇ ಬಿಸಿಬಿಸಿಯಾದ ಸಾಂಬಾರ್‌ನೊಂದಿಗೆ ಸವಿಯಬಹುದು. ಇದರೊಂದಿಗೆ ಶುಂಠಿ ಹಾಕಿದ ಚಹಾ ಅಥವಾ ಕಾಫಿ ಸೇವಿಸಿದರೆ ಬೆಳಗಿನ ಉಪಹಾರ ಇನ್ನಷ್ಟು ಸ್ವಾದಿಷ್ಟಕರವಾಗುತ್ತದೆ.

ಆರೋಗ್ಯವೇ ಭಾಗ್ಯ ಎಂಬ ನಾಣ್ಣುಡಿಯಂತೆ, ನಮ್ಮ ನಿತ್ಯದ ಆಹಾರದಲ್ಲಿ ತರಕಾರಿಗಳನ್ನು ಅಳವಡಿಸಿಕೊಳ್ಳುವುದು ಅತ್ಯಗತ್ಯ. ಕ್ಯಾರೆಟ್ ಇಡ್ಲಿ ಕೇವಲ ಒಂದು ತಿಂಡಿಯಲ್ಲ, ಅದು ಪೌಷ್ಟಿಕಾಂಶಗಳಿಂದ ಸಮೃದ್ಧವಾದ ಪ್ಯಾಕೇಜ್ ಆಗಿದೆ. ಇಂದೇ ಈ ಸುಲಭ ರೆಸಿಪಿಯನ್ನು ನಿಮ್ಮ ಮನೆಯಲ್ಲಿ ಪ್ರಯತ್ನಿಸಿ, ಎಲ್ಲರ ಮೆಚ್ಚುಗೆಗೆ ಪಾತ್ರರಾಗಿ.