ಇದು ಪೂರಿ ಅಲ್ಲ.. ಬಂಗಾಳದ ಫೇಮಸ್ ಲುಚಿ ರೆಸಿಪಿ! ಮೃದುವಾಗಿ ಮತ್ತು ಉಬ್ಬಿ ಬರಲು ಇಲ್ಲಿದೆ ಟಿಪ್ಸ್

ಬಂಗಾಳದ ಫೇಮಸ್ ಲುಚಿ ರೆಸಿಪಿ! ಹೋಟೆಲ್ ಶೈಲಿಯ ಮೃದುವಾದ ಪೂರಿ ಮನೆಯಲ್ಲೇ ಮಾಡುವ ಸುಲಭ ವಿಧಾನ ಇಲ್ಲಿದೆ. ಹೌದು, ಪಶ್ಚಿಮ ಬಂಗಾಳದ ರೆಸಿಪಿ ಎಂದರೆ ವಿಭಿನ್ನ ಹಾಗೂ ಸ್ವಾದಿಷ್ಟ ತಿಂಡಿತಿನಿಸುಗಳ ನೆನಪಾಗುತ್ತದೆ. ಈ ಪಟ್ಟಿಯಲ್ಲಿ ಲುಚಿ (Luchi) ಎಂಬ ಜನಪ್ರಿಯ ಉಪಾಹಾರಕ್ಕೆ ವಿಶೇಷ ಸ್ಥಾನವಿದೆ. ಮೇಲ್ನೋಟಕ್ಕೆ ಇದು ನಾವು ತಯಾರಿಸುವ ಸಾಮಾನ್ಯ ಪೂರಿಯಂತೆ ಕಂಡರೂ, ಲುಚಿಯ ಮೃದುತ್ವ ಮತ್ತು ವಿಶಿಷ್ಟ ರುಚಿ ಸಂಪೂರ್ಣವಾಗಿ ಭಿನ್ನವಾಗಿರುತ್ತದೆ.

ಬಂಗಾಳದಲ್ಲಿ ಹಬ್ಬ ಹರಿದಿನಗಳು ಅಥವಾ ಯಾವುದೇ ವಿಶೇಷ ಸಮಾರಂಭಗಳ ಸಂದರ್ಭದಲ್ಲಿ ಲುಚಿಗೆ ಪ್ರಮುಖ ಸ್ಥಾನವಿದೆ. ಇದನ್ನು ಹೆಚ್ಚಾಗಿ ಆಲೂ ದಮ್ (Alur Dom) ಅಥವಾ ಛೋಲಾರ್ ದಾಲ್ (ಕಡಲೆ ಬೇಳೆ ಸಾರು) ಜೊತೆಗೆ ಸವಿಯಲಾಗುತ್ತದೆ. ಸಾಮಾನ್ಯ ಪೂರಿಯನ್ನು ಗೋಧಿ ಹಿಟ್ಟಿನಿಂದ ಮಾಡಿದರೆ, ಲುಚಿಯನ್ನು ಕೇವಲ ಮೈದಾ ಹಿಟ್ಟಿನಿಂದ ತಯಾರಿಸುತ್ತಾರೆ. ಅದಕ್ಕಾಗಿಯೇ ಲುಚಿ ಬಿಳಿ ಬಣ್ಣದಲ್ಲಿರುತ್ತದೆ ಹಾಗೂ ಬಾಯಲ್ಲಿಟ್ಟರೆ ಕರಗುವಷ್ಟು ಮೃದುವಾಗಿರುತ್ತದೆ.

Photo Credit: ಸಂಗ್ರಹ ಚಿತ್ರ: ಇಂಟರ್ನೆಟ್

ಬಂಗಾಳಿ ಮನೆಯಲ್ಲೇ ಸಿದ್ಧಪಡಿಸುವ ಈ ವಿಶೇಷ ಲುಚಿ ರೆಸಿಪಿಯನ್ನು ಮಾಡುವ ವಿಧಾನ (Bengali Style Luchi Recipe) ಮತ್ತು ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಇಲ್ಲಿವೆ.

ಲುಚಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಮೈದಾ ಹಿಟ್ಟು
• ಉಪ್ಪು
• ತುಪ್ಪ ಅಥವಾ ಎಣ್ಣೆ
• ನೀರು
• ಎಣ್ಣೆ

ಲುಚಿ ಮಾಡುವ ವಿಧಾನ

- ಮೊದಲು ಒಂದು ಅಗಲವಾದ ಬಾಣಲೆಗೆ 2 ಕಪ್ ಮೈದಾ ಹಿಟ್ಟನ್ನು ಜರಡಿ ಹಿಡಿದು ಹಾಕಿ. ಅದಕ್ಕೆ ಉಪ್ಪು ಮತ್ತು ಒಂದು ದೊಡ್ಡ ಚಮಚ ತುಪ್ಪ ಅಥವ ಎಣ್ಣೆಯನ್ನು ಸೇರಿಸಿ.

- ಈ ತುಪ್ಪವನ್ನು ಹಿಟ್ಟಿನೊಂದಿಗೆ ಚೆನ್ನಾಗಿ ಮಿಶ್ರಣ ಮಾಡಿ, ಕೈಯಿಂದ ಉಜ್ಜಿದಾಗ ಹಿಟ್ಟು ಉಂಡೆ ಕಟ್ಟುವಂತಿರಬೇಕು. ಇದನ್ನು 'ಮೊಯಿನ್' ಎಂದು ಕರೆಯುತ್ತಾರೆ, ಇದು ಲುಚಿಗೆ ಅತ್ಯುತ್ತಮ ಮೃದುತ್ವವನ್ನು ನೀಡುತ್ತದೆ.

- ಈಗ ಹಿಟ್ಟಿಗೆ ಸ್ವಲ್ಪ ಸ್ವಲ್ಪವೇ ಉಗುರು ಬೆಚ್ಚಗಿನ ನೀರನ್ನು ಸೇರಿಸುತ್ತಾ ಚೆನ್ನಾಗಿ ಕಲಸಿ. ಹಿಟ್ಟು ಹೆಚ್ಚು ಮೃದುವಾಗಿಯೂ ಇರಬಾರದು ಮತ್ತು ಅತಿಯಾಗಿ ಗಟ್ಟಿಯಾಗಿಯೂ ಇರಬಾರದು. ನಯವಾದ ಮತ್ತು ಹದವಾದ ಹಿಟ್ಟನ್ನು ತಯಾರಿಸಿಕೊಳ್ಳಿ, ಇದು ಲುಚಿಯ ಗುಣಮಟ್ಟಕ್ಕೆ ಮುಖ್ಯ.

- ಕಲಸಿದ ಹಿಟ್ಟಿನ ಮೇಲೆ ಸ್ವಲ್ಪ ಎಣ್ಣೆಯನ್ನು ಸವರಿ, ಒದ್ದೆ ಬಟ್ಟೆ ಅಥವಾ ತಟ್ಟೆಯಿಂದ ಮುಚ್ಚಿ. ಇದನ್ನು ಸುಮಾರು 15 ರಿಂದ 20 ನಿಮಿಷಗಳ ಕಾಲ ಹಾಗೆಯೇ ಬಿಡಿ. ಹೀಗೆ ಮಾಡುವುದರಿಂದ ಮೈದಾ ಹಿಟ್ಟು ಚೆನ್ನಾಗಿ ಹೊಂದಿಕೊಂಡು, ಲುಚಿ ಲಟ್ಟಿಸಲು ಸುಲಭವಾಗುತ್ತದೆ ಮತ್ತು ಇನ್ನಷ್ಟು ಮೃದುವಾಗುತ್ತದೆ.

- ಹಿಟ್ಟು ನೆನೆದ ನಂತರ, ಅದರಿಂದ ಸಣ್ಣ ಸಣ್ಣ ಗಾತ್ರದ ಉಂಡೆಗಳನ್ನು (ಲೋಯಿ) ಮಾಡಿಕೊಳ್ಳಿ. ಪ್ರತಿ ಉಂಡೆಗೆ ಸ್ವಲ್ಪ ಎಣ್ಣೆಯನ್ನು ಹಚ್ಚಿ ಉದ್ದವಾಗಿ ಅಥವ ವೃತ್ತಾಕಾರವಾಗಿ ಲಟ್ಟಿಸಿ.

- ಲುಚಿ ಲಟ್ಟಿಸುವಾಗ ಹಿಟ್ಟನ್ನು ಬಳಸದೆ ಕೇವಲ ಎಣ್ಣೆಯನ್ನೇ ಬಳಸಿ. ಲುಚಿ ಅತಿಯಾಗಿ ತೆಳುವೂ ಇರಬಾರದು ಮತ್ತು ಹೆಚ್ಚು ದಪ್ಪವೂ ಇರಬಾರದು, ಮಧ್ಯಮ ಗಾತ್ರದಲ್ಲಿ ಲಟ್ಟಿಸಿ.

- ಈಗ ಕಡಾಯಿಯಲ್ಲಿ ಎಣ್ಣೆಯನ್ನು ಚೆನ್ನಾಗಿ ಬಿಸಿ ಮಾಡಿ. ಎಣ್ಣೆ ಸೂಕ್ತವಾಗಿ ಬಿಸಿಯಾದ ನಂತರ ಲಟ್ಟಿಸಿದ ಲುಚಿಯನ್ನು ನಿಧಾನವಾಗಿ ಎಣ್ಣೆಗೆ ಹಾಕಿ.

- ಸೌಟಿನಿಂದ ಸ್ವಲ್ಪ ಮೆಲ್ಲಗೆ ಒತ್ತಿದರೆ ಲುಚಿ ಚೆನ್ನಾಗಿ ಉಬ್ಬಿ ಬರುತ್ತದೆ. ಇದು ಸಾಮಾನ್ಯ ಪೂರಿಯಂತೆ ಕಂದು ಬಣ್ಣಕ್ಕೆ ತಿರುಗಬಾರದು, ಬದಲಾಗಿ ಬಿಳಿ ಬಣ್ಣದಲ್ಲಿರುವಾಗಲೇ ಮಗುಚಿ ಹಾಕಿ ಎರಡೂ ಬದಿಯಲ್ಲಿ ಬೇಯಿಸಿ ತೆಗೆಯಿರಿ.

Photo Credit: ಸಂಗ್ರಹ ಚಿತ್ರ: ಇಂಟರ್ನೆಟ್

ಉಬ್ಬಿ ಬರಲು ಸೀಕ್ರೆಟ್ ಟ್ರಿಕ್ಸ್

- ಲುಚಿಯ ಅಸಲಿ ಸೌಂದರ್ಯ ಅದರ ಬಿಳಿ ಬಣ್ಣದಲ್ಲಿ ಅಡಗಿದೆ. ಆದ್ದರಿಂದ ಎಣ್ಣೆಯಲ್ಲಿ ಅತಿಯಾಗಿ ಕಂದು ಬಣ್ಣ ಬರುವ ತನಕ ಕರಿಯಬೇಡಿ.

- ಎಣ್ಣೆ ಸರಿಯಾದ ತಾಪಮಾನದಲ್ಲಿ ಬಿಸಿಯಾಗಿದ್ದರೆ ಮಾತ್ರ ಲುಚಿ ಚೆನ್ನಾಗಿ ಉಬ್ಬುತ್ತದೆ. ಎಣ್ಣೆ ಕಡಿಮೆ ಬಿಸಿಯಿದ್ದರೆ ಲುಚಿ ಎಣ್ಣೆ ಕುಡಿಯುತ್ತದೆ ಮತ್ತು ಉಬ್ಬುವುದಿಲ್ಲ.

- ಹಿಟ್ಟು ಕಲಸುವಾಗ ತುಪ್ಪ ಅಥವಾ ಎಣ್ಣೆಯನ್ನು ಸರಿಯಾದ ಪ್ರಮಾಣದಲ್ಲಿ ಸೇರಿಸಿದರೆ ಲುಚಿ ದೀರ್ಘಕಾಲದವರೆಗೆ ಮೃದುತ್ವವನ್ನು ಉಳಿಸಿಕೊಳ್ಳುತ್ತದೆ.

ಪಶ್ಚಿಮ ಬಂಗಾಳದ ಈ ರುಚಿಕರವಾದ ಲುಚಿಯನ್ನು (Luchi Recipe)ನಿಮ್ಮ ಮನೆಯಲ್ಲಿಯೂ ಪ್ರಯತ್ನಿಸಿ. ಇದನ್ನು ಆಲೂಗಡ್ಡೆ ಪಲ್ಯದೊಂದಿಗೆ ಸವಿಯಲು ಅತ್ಯಂತ ರುಚಿಕರವಾಗಿರುತ್ತದೆ.