ಬೆಳಗ್ಗೆ 1 ಕಪ್ ಕುಡಿಯಿರಿ.. ಬ್ಯೂಟಿ ಹೆಚ್ಚುತ್ತೆ, ರೋಗಗಳು ಮಾಯ! ರಕ್ತವೂ ಶುದ್ಧಿಯಾಗುತ್ತೆ

ಒಂದು ಗ್ಲಾಸ್ ಕುಡಿದರೆ ಸಾಕು! ಚಳಿಗಾಲದಲ್ಲಿ ರೋಗಗಳು ದೂರ, ಚರ್ಮ ಹೊಳೆಯುತ್ತೆ. ಚಳಿಗಾಲ ಶುರುವಾಗುತ್ತಿದ್ದಂತೆ ಹಲವರಿಗೆ ಶೀತ, ಕೆಮ್ಮು ಮತ್ತು ದೇಹದ ಆಯಾಸದಂತಹ ಸಮಸ್ಯೆಗಳು ಸಾಮಾನ್ಯ. ಈ ಸಮಯದಲ್ಲಿ ತಂಪಾದ ವಾತಾವರಣವು ನಮ್ಮ ಜೀರ್ಣಾಂಗ ವ್ಯವಸ್ಥೆ ಮತ್ತು ರೋಗನಿರೋಧಕ ಶಕ್ತಿಯನ್ನು ದುರ್ಬಲಗೊಳಿಸಬಹುದು. ಇಂತಹ ಸವಾಲಿನ ದಿನಗಳಲ್ಲಿ ದೇಹವನ್ನು ಒಳಗಿನಿಂದ ಬೆಚ್ಚಗಿಡಲು ಹಾಗೂ ಆರೋಗ್ಯವನ್ನು ಕಾಪಾಡಲು ಗಂಜಿ (Ganji) ಅಥವಾ ಕಂಜಿ (Kanji) ಎಂಬ ಸಾಂಪ್ರದಾಯಿಕ ಪಾನೀಯ ಹೆಚ್ಚು ಸಹಕಾರಿ.

ಗಂಜಿ ಉತ್ತರ ಭಾರತದಲ್ಲಿ ಜನಪ್ರಿಯವಾಗಿರುವ, ಹುದುಗಿಸಿದ ಪ್ರೋಬಯಾಟಿಕ್ ಪಾನೀಯ. ಇದನ್ನು ಹೆಚ್ಚಾಗಿ ಕ್ಯಾರೆಟ್ ಮತ್ತು ಬೀಟ್ರೂಟ್ ಬಳಸಿ ತಯಾರಿಸಲಾಗುತ್ತದೆ. ಪೋಷಕಾಂಶಗಳ ಆಗರವಾಗಿರುವ ಬೀಟ್‌ರೂಟ್‌ನೊಂದಿಗೆ ಈ ಗಂಜಿಯನ್ನು ತಯಾರಿಸಿದರೆ, ಅದರ ಆರೋಗ್ಯ ಪ್ರಯೋಜನಗಳು ಮತ್ತಷ್ಟು ಹೆಚ್ಚುತ್ತವೆ. ಚಳಿಗಾಲದಲ್ಲಿ ನಿಮ್ಮ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಬೀಟ್‌ರೂಟ್ ಗಂಜಿಯನ್ನು (Beetroot Ganji) ಮನೆಯಲ್ಲೇ ಸುಲಭವಾಗಿ ಹೇಗೆ ತಯಾರಿಸಬೇಕೆಂದು ಈ ಲೇಖನದಲ್ಲಿ ತಿಳಿಸಲಾಗಿದೆ.

ಆರೋಗ್ಯ ಮತ್ತು ಸೌಂದರ್ಯದ ರಹಸ್ಯ

ಕಂಜಿ ಒಂದು ಪೌಷ್ಟಿಕ ಮತ್ತು ಆರೋಗ್ಯಕರ ಪಾನೀಯ. ಇದು ಕೇವಲ ರುಚಿಯನ್ನು ನೀಡುವುದಲ್ಲದೆ, ಅನೇಕ ಆರೋಗ್ಯ ಪ್ರಯೋಜನಗಳನ್ನೂ ಹೊಂದಿದೆ.

- ಬೀಟ್ರೂಟ್ ಗಂಜಿ ನೈಸರ್ಗಿಕ ಪ್ರೋಬಯಾಟಿಕ್ ಆಗಿ ಕಾರ್ಯನಿರ್ವಹಿಸುತ್ತದೆ ಮತ್ತು ಪೋಷಕಾಂಶಗಳ ಆಗರವಾಗಿದೆ.

- ಬೀಟ್ರೂಟ್ ಕಂಜಿಯ ಹುದುಗುವಿಕೆಯ ಪ್ರಕ್ರಿಯೆಯು ದೇಹಕ್ಕೆ ಪ್ರಯೋಜನಕಾರಿ ಬ್ಯಾಕ್ಟೀರಿಯಾಗಳನ್ನು ಉತ್ಪಾದಿಸುತ್ತದೆ. ಈ ಪ್ರೋಬಯಾಟಿಕ್‌ಗಳು ಜೀರ್ಣಾಂಗ ವ್ಯವಸ್ಥೆಯನ್ನು ಸುಧಾರಿಸಿ, ಕರುಳಿನ ಆರೋಗ್ಯವನ್ನು ಕಾಪಾಡುತ್ತವೆ. ಇದರ ಜೊತೆಗೆ, ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವಲ್ಲಿಯೂ ಇವು ಪ್ರಮುಖ ಪಾತ್ರ ವಹಿಸುತ್ತವೆ.

- ಹುದುಗುವಿಕೆ ಕ್ರಿಯೆಯಿಂದಾಗಿ, ಬೀಟ್‌ರೂಟ್‌ನಲ್ಲಿರುವ ಎಲ್ಲಾ ಪೋಷಕಾಂಶಗಳು ದೇಹಕ್ಕೆ ಸುಲಭವಾಗಿ ಲಭ್ಯವಾಗುತ್ತವೆ. ಇದು ಪೋಷಕಾಂಶಗಳ ಹೀರಿಕೊಳ್ಳುವಿಕೆಯನ್ನು ಸುಗಮಗೊಳಿಸುತ್ತದೆ.

- ಬೀಟ್ರೂಟ್ ರಕ್ತ ಶುದ್ಧೀಕರಣಕ್ಕೆ ಹೆಸರುವಾಸಿ. ನಿಯಮಿತವಾಗಿ ಕಂಜಿ ಸೇವಿಸುವುದರಿಂದ ರಕ್ತ ಶುದ್ಧಿಯಾಗಿ, ತ್ವಚೆಯ ಆರೋಗ್ಯ ಸುಧಾರಿಸುತ್ತದೆ. ಚಳಿಗಾಲದಲ್ಲಿ ತ್ವಚೆಯು ಕಾಂತಿಯುತವಾಗಿರಲು ಇದು ಸಹಕಾರಿಯಾಗಿದೆ.

ಬೀಟ್ರೂಟ್ ಗಂಜಿ ತಯಾರಿಸಲು ಬೇಕಾದ ಪದಾರ್ಥಗಳು

• ಬೀಟ್ರೂಟ್
• ಕೆಂಪು ಮೆಣಸಿನ ಪುಡಿ
• ಸಾಸಿವೆ ಪುಡಿ
• ಉಪ್ಪು
• ಕಪ್ಪು ಉಪ್ಪು
• ಬಿಸಿ ನೀರು
• ಕಾಳುಮೆಣಸಿನ ಪುಡಿ.

ಬೀಟ್ರೂಟ್ ಗಂಜಿ ತಯಾರಿಸುವ ವಿಧಾನ

- ಮೊದಲಿಗೆ, ಒಂದು ಬೀಟ್ರೂಟ್ ತೆಗೆದುಕೊಂಡು ಅದರ ಸಿಪ್ಪೆ ತೆಗೆಯಿರಿ. ನಂತರ ಅದನ್ನು ದಪ್ಪವಾದ ಹೋಳುಗಳಾಗಿ ಕತ್ತರಿಸಿಕೊಳ್ಳಿ.

- ಈಗ ಒಂದು ಜಗ್ ಅಥವಾ ಪಾತ್ರೆಯನ್ನು ತೆಗೆದುಕೊಂಡು ಕತ್ತರಿಸಿದ ಬೀಟ್ರೂಟ್ ಹೋಳುಗಳನ್ನು ಹಾಕಿ.

- ಅದಕ್ಕೆ ಅರ್ಧ ಚಮಚ ಕಾಳುಮೆಣಸಿನ ಪುಡಿ, 1 ಚಮಚ ಉಪ್ಪು, 3 ಚಮಚ ಸಾಸಿವೆ ಪುಡಿ, 1 ಚಮಚ ಕಪ್ಪು ಉಪ್ಪು, ಸ್ವಲ್ಪ ಕೆಂಪು ಮೆಣಸಿನ ಪುಡಿ ಮತ್ತು ಒಂದೂವರೆ ಲೀಟರ್ ಬಿಸಿ ನೀರನ್ನು ಹಾಕಿ.

- ಈಗ ಇದನ್ನು ಸೌಟಿನಿಂದ ಚೆನ್ನಾಗಿ ಮಿಕ್ಸ್ ಮಾಡಿ. ಮುಚ್ಚಳ ಮುಚ್ಚಿ. ಈ ಜಗ್ ಅನ್ನು 2-3 ದಿನಗಳ ಕಾಲ ಸೂರ್ಯನ ಬೆಳಕಿನಲ್ಲಿ ಇಡಬೇಕು.

- ಪ್ರತಿದಿನ ಬೆಳಗ್ಗೆ ಮತ್ತು ಸಂಜೆ ಒಮ್ಮೆ ಶುಚಿಯಾದ ಸೌಟಿನಿಂದ ಕಲಕುತ್ತಾ ಇರಿ. ಪಾತ್ರೆಯಅನ್ನು ಸೂರ್ಯನ ಬೆಳಕಿನಲ್ಲಿ ಇಡುವುದರಿಂದ ಎಲ್ಲಾ ಫ್ಲೇವರ್‌ಗಳು ಚೆನ್ನಾಗಿ ಮಿಶ್ರಣವಾಗುತ್ತವೆ.

- 2-3 ದಿನಗಳ ನಂತರ ಕಾಂಜಿಯಿಂದ ಸ್ವಲ್ಪ ಹುಳಿಯಾದ ವಾಸನೆ ಬರಲು ಪ್ರಾರಂಭವಾಗುತ್ತದೆ. ಅದರ ಬಣ್ಣವು ಗಾಢ ಗುಲಾಬಿ ಬಣ್ಣಕ್ಕೆ ತಿರುಗುತ್ತದೆ.

- ನೀವು ರುಚಿ ನೋಡಿದಾಗ ಸ್ವಲ್ಪ ಹುಳಿ ಮತ್ತು ಖಾರವಾಗಿರುತ್ತದೆ. ಆಗ ಗಂಜಿ ಸಿದ್ಧವಾಗಿದೆ ಎಂದು ಅರ್ಥ. ಗಂಜಿ ಸಿದ್ಧವಾದ ನಂತರ, ಅದನ್ನು ಫ್ರಿಜ್‌ನಲ್ಲಿಟ್ಟು ವಾರದಿಂದ ಹತ್ತು ದಿನಗಳವರೆಗೆ ಬಳಸಬಹುದು. ತಣ್ಣಗಿರುವಾಗ ಕುಡಿದರೆ ಇದರ ರುಚಿ ಇನ್ನಷ್ಟು ಅದ್ಭುತವಾಗಿರುತ್ತದೆ.