ಹೊಸ ರುಚಿಯ ಬತುವಾ-ಆಲೂ ಪೂರಿ! ರುಚಿ ಎಂದಿಗೂ ಮರೆಯಲ್ಲ.. ಮಾಡೋದು ಹೇಗೆ?

ಬೆಳಗಿನ ತಿಂಡಿಗೆ ಒಮ್ಮೆ ಈ ಮಸಾಲ ಪೂರಿ ಟ್ರೈ ಮಾಡಿ, ರುಚಿ ಎಂದಿಗೂ ಮರೆಯಲ್ಲ! ಹೌದು, ಚಳಿಗಾಲ ಆರಂಭವಾಗುತ್ತಿದ್ದಂತೆ, ಮಾರುಕಟ್ಟೆಗಳಲ್ಲಿ ತಾಜಾ ಸೊಪ್ಪುಗಳ ಆಗಮನವಾಗುತ್ತದೆ. ಇವುಗಳಲ್ಲಿ ಸೈಲೆಂಟಾಗಿ ಆರೋಗ್ಯದ ಕಣಜವಾಗಿರುವ 'ಬತುವಾ' (ಚಕ್ರವರ್ತಿ ಸೊಪ್ಪು) ತನ್ನ ಮಹತ್ವವನ್ನು ಸಾರುತ್ತದೆ. ಚುಮುಚುಮು ಚಳಿಯಲ್ಲಿ ಬಿಸಿಬಿಸಿ ಪೂರಿ ಮತ್ತು ಅದಕ್ಕೆ ತಕ್ಕ ಘಮಘಮಿಸುವ ಚಟ್ನಿ ಅಥವಾ ಉಪ್ಪಿನಕಾಯಿ ಸಿಕ್ಕರೆ ದಿನದ ಶುಭಾರಂಭವೇ ಅದ್ಭುತ.

ನೀವು ಸದಾ ಒಂದೇ ರೀತಿಯ ಪೂರಿಯ ರುಚಿ ಸವಿದು ಬೇಸರವಾಗಿದ್ದರೆ, ಈ ಬಾರಿ ಪೌಷ್ಟಿಕಾಂಶಭರಿತ 'ಬತುವಾ-ಆಲೂ ಪೂರಿ'ಯನ್ನು (Bathua Aloo Poori) ಖಂಡಿತಾ ಪ್ರಯತ್ನಿಸಿ. ಇದು ಕೇವಲ ರುಚಿಕರವಲ್ಲದೆ, ಚಳಿಗಾಲದಲ್ಲಿ ದೇಹಕ್ಕೆ ಅಗತ್ಯವಾದ ಪೋಷಕಾಂಶಗಳನ್ನು ಒದಗಿಸುತ್ತದೆ. ಮನೆಯಲ್ಲೇ ಸುಲಭವಾಗಿ, ಕ್ರಿಸ್ಪಿಯಾಗಿ ತಯಾರಿಸಬಹುದಾದ ಈ ಪೂರಿ ನಿಮ್ಮ ಉಪಹಾರದ ಮೆನುವನ್ನು ವಿಶೇಷವಾಗಿಸುತ್ತದೆ.

ಬತುವಾ ಕೇವಲ ರುಚಿಗಾಗಿ ಮಾತ್ರವಲ್ಲದೆ, ಆರೋಗ್ಯಕ್ಕೂ ಉತ್ತಮ. ವಿಟಮಿನ್ ಎ, ಕ್ಯಾಲ್ಸಿಯಂ, ರಂಜಕ ಮತ್ತು ಪೊಟ್ಯಾಸಿಯಮ್‌ನಂತಹ ಅಗತ್ಯ ಪೋಷಕಾಂಶಗಳು ಇದರಲ್ಲಿ ಹೇರಳವಾಗಿವೆ. ಇದು ಜೀರ್ಣಕ್ರಿಯೆಗೆ ಸಹಕಾರಿ. ಚಳಿಗಾಲದಲ್ಲಿ ದೇಹವನ್ನು ಬೆಚ್ಚಗಿಡಲು ನೆರವಾಗುತ್ತದೆ. ಆಲೂಗಡ್ಡೆಯ ಸೇರ್ಪಡೆಯು ಪೂರಿಗೆ ಮೃದುತ್ವ ಮತ್ತು ಅದ್ಭುತ ರುಚಿಯನ್ನು ನೀಡುತ್ತದೆ. ಬತುವಾ-ಆಲೂ ಪೂರಿಗೆ ಬೇಕಾಗುವ ಸಾಮಗ್ರಿಗಳು ಮತ್ತು ತಯಾರಿಸುವ ವಿಧಾನ (Bathua Aloo Poori Recipe) ಇಲ್ಲಿದೆ.

ಬತುವಾ-ಆಲೂ ಪೂರಿಗೆ ಬೇಕಾಗುವ ಸಾಮಗ್ರಿಗಳು

• ಗೋಧಿ ಹಿಟ್ಟು
• ಬತುವಾ ಸೊಪ್ಪು
• ಆಲೂಗಡ್ಡೆ
• ಓಮದ ಕಾಳು (ಅಜ್ವೈನ್)
• ಶುಂಠಿ
• ಹಸಿ ಮೆಣಸಿನಕಾಯಿ
• ಧನಿಯಾ ಪುಡಿ
• ಅಚ್ಚಖಾರ ಪುಡಿ
• ಅರಿಶಿನ
• ಉಪ್ಪು
• ಎಣ್ಣೆ

ಬತುವಾ-ಆಲೂ ಪೂರಿ ತಯಾರಿಸುವ ವಿಧಾನ

- ಮೊದಲಿಗೆ, ಬತುವಾ ಸೊಪ್ಪನ್ನು ಸ್ವಚ್ಛವಾಗಿ ತೊಳೆದು, ಕಡಿಮೆ ನೀರಿನಲ್ಲಿ ಬೇಯಿಸಿಕೊಳ್ಳಿ. ತಣ್ಣಗಾದ ನಂತರ ನೀರನ್ನು ಸೋಸಿ.

- ಈಗ ಬೇಯಿಸಿದ ಸೊಪ್ಪು, ಹಸಿ ಮೆಣಸಿನಕಾಯಿ ಹಾಗೂ ಶುಂಠಿಯನ್ನು ಮಿಕ್ಸಿ ಜಾರ್‌ಗೆ ಹಾಕಿ ನುಣ್ಣಗೆ ರುಬ್ಬಿ ಪೇಸ್ಟ್ ತಯಾರಿಸಿ.

- ನಂತರ ಒಂದು ದೊಡ್ಡ ಪಾತ್ರೆಯಲ್ಲಿ 2 ಕಪ್ ಗೋಧಿ ಹಿಟ್ಟು ತೆಗೆದುಕೊಂಡು, ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಓಮದ ಕಾಳು ಮತ್ತು 2 ಚಮಚ ಎಣ್ಣೆಯನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ನಂತರ, ಮ್ಯಾಶ್ ಮಾಡಿದ ಬೇಯಿಸಿದ ಆಲೂಗಡ್ಡೆಯನ್ನು ಸೇರಿಸಿ.

- ಈಗ ತಯಾರಿಸಿದ ಬತುವಾ ಪೇಸ್ಟ್, ಧನಿಯಾ ಪುಡಿ, ಅಚ್ಚಖಾರ ಪುಡಿ ಮತ್ತು ಅರಿಶಿನವನ್ನು ಹಿಟ್ಟಿಗೆ ಬೆರೆಸಿ. ಎಲ್ಲವನ್ನು ಒಂದುಗೂಡಿಸಿ, ಅಗತ್ಯವಿದ್ದರೆ ಮಾತ್ರ ಅಲ್ಪ ಪ್ರಮಾಣದ ನೀರನ್ನು ಬಳಸಿ ಗಟ್ಟಿಯಾದ ಹಿಟ್ಟನ್ನು ನಾದಿ. ನೀರು ಕಡಿಮೆ ಸಾಕು.

- ನಾದಿದ ಹಿಟ್ಟನ್ನು ಸುಮಾರು 15 ರಿಂದ 20 ನಿಮಿಷಗಳ ಕಾಲ ಮುಚ್ಚಿಡಿ. ಹಿಟ್ಟಿಗೆ ವಿಶ್ರಾಂತಿ ನೀಡುವುದರಿಂದ ಪೂರಿಗಳು ಮೃದುವಾಗಿ ಮತ್ತು ಚೆನ್ನಾಗಿ ಉಬ್ಬಿ ಬರುತ್ತವೆ.

- ಈಗ ಹಿಟ್ಟಿನಿಂದ ಸಣ್ಣ ಉಂಡೆಗಳನ್ನು ಮಾಡಿ, ಪೂರಿ ಆಕಾರದಲ್ಲಿ ಲಟ್ಟಿಸಿಕೊಳ್ಳಿ.

- ಕಡಾಯಿಯಲ್ಲಿ ಎಣ್ಣೆ ಬಿಸಿ ಮಾಡಿ, ಎಣ್ಣೆ ಸರಿಯಾಗಿ ಕಾದ ನಂತರ ಪೂರಿಗಳನ್ನು ಹಾಕಿ ಎರಡೂ ಕಡೆ ಹೊಂಬಣ್ಣ ಬರುವವರೆಗೆ ಕರಿಯಿರಿ.

- ಗೋಲ್ಡನ್ ಬ್ರೌನ್ ಬಣ್ಣ ಬಂದ ತಕ್ಷಣ ಪೂರಿಗಳನ್ನು ಹೊರತೆಗೆದು ಎಣ್ಣೆ ಬಸಿದುಕೊಳ್ಳಿ.

ಈ ಪೂರಿ ಹೇಗೆ ಸವಿಯಬೇಕು?

ಬಿಸಿಬಿಸಿಯಾದ ಬತುವಾ ಆಲೂ ಪೂರಿ (Bathua-Aloo Puri) ಎಲ್ಲ ವಯಸ್ಸಿನವರಿಗೂ ಇಷ್ಟವಾಗುವ ತಿಂಡಿ. ತಂಪಾದ ಮೊಸರು ಅಥವಾ ರಾಯ್ತ ಜೊತೆ ಈ ಪೂರಿ ಸಖತ್ ಕಾಂಬಿನೇಷನ್. ಹುಳಿ-ಸಿಹಿಯಾದ ಟೊಮೆಟೊ ಚಟ್ನಿ ಪೂರಿಯ ರುಚಿಯನ್ನು ಇನ್ನಷ್ಟು ಹೆಚ್ಚಿಸುತ್ತದೆ. ಮನೆಯಲ್ಲೇ ತಯಾರಿಸಿದ ಮಾವಿನಕಾಯಿ ಅಥವಾ ನಿಂಬೆಹಣ್ಣಿನ ಉಪ್ಪಿನಕಾಯಿ ಇದರ ಜೊತೆ ಉತ್ತಮವಾಗಿ ಹೊಂದುತ್ತದೆ. ಪೂರಿ ಮತ್ತು ಆಲೂಗಡ್ಡೆ ಪಲ್ಯ ಎವರ್‌ಗ್ರೀನ್ ಮತ್ತು ಪರಿಪೂರ್ಣ ಜೋಡಿ.

ಪ್ರವಾಸಕ್ಕೆ ಹೋಗುವವರಿಗೆ ಅಥವಾ ಮಕ್ಕಳ ಲಂಚ್ ಬಾಕ್ಸ್‌ಗೆ ಪ್ಯಾಕ್ ಮಾಡಲು ಈ ಪೂರಿ ಉತ್ತಮ ಆಯ್ಕೆ. ನೀವು ಒಮ್ಮೆ ಮನೆಯಲ್ಲಿ ಆರೋಗ್ಯಕರ ಮತ್ತು ರುಚಿಕರವಾದ ಈ ಪೂರಿಯನ್ನು ಸವಿದು ಆನಂದಿಸಿ.