ಈ ಗಂಜಿ ಕುಡಿದರೆ ದೇಹ ತಂಪಾಗುತ್ತೆ, ರಾತ್ರಿ ಸೂಪರ್ ನಿದ್ದೆ ಬರುತ್ತೆ! ಮಾಡೋದು ಹೇಗೆ?

ಈ ಗಂಜಿ ಕುಡಿದರೆ ದೇಹ ತಂಪಾಗುತ್ತೆ, ರಾತ್ರಿ ನಿದ್ದೆ ಬರುತ್ತೆ! ಬೇಸಿಗೆ ಆರಂಭವಾಗುವುದಕ್ಕೂ ಮೊದಲೇ ಬಿಸಿಲಿನ ತಾಪಮಾನ ಏರಿಕೆ ಆಗುತ್ತಿದೆ. ಪ್ರಸ್ತುತ, ಹೊರಗೆ ಹೋಗುವುದೇ ಸವಾಲಾಗಿದೆ. ಮನೆಯೊಳಗೂ ಸಹ ವಿಪರೀತ ಸೆಕೆಯಿಂದಾಗಿ ದೇಹ ಸುಸ್ತಾಗುವ ಅನುಭವವಾಗುತ್ತದೆ. ಬೇಸಿಗೆ ಪೂರ್ವದಲ್ಲಿ ಕಾಣಿಸಿಕೊಳ್ಳುವ ಇಂತಹ ಹೀಟ್‌ ವೇವ್ ವಾತಾವರಣವು ದೇಹದಲ್ಲಿ ಹಲವಾರು ಬದಲಾವಣೆಗಳಿಗೆ ಕಾರಣವಾಗಬಹುದು. ಈ ಸಮಯದಲ್ಲಿ ದೇಹವನ್ನು ಆದಷ್ಟು ತಂಪಾಗಿರಿಸಿಕೊಳ್ಳುವುದು ಅತಿ ಮುಖ್ಯ.

ದೇಹದ ಉಷ್ಣತೆ ಹೆಚ್ಚಾದಲ್ಲಿ ಅನೇಕ ಅನಾರೋಗ್ಯ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ. ಆದ್ದರಿಂದ ದೇಹವನ್ನು ತಂಪಾಗಿರಿಸಿಕೊಳ್ಳುವುದು ಬಹಳ ಮುಖ್ಯ. ಇದಕ್ಕಾಗಿ ದಿನವಿಡೀ ಸಾಕಷ್ಟು ನೀರು ಕುಡಿಯುವುದು, ಎಳನೀರು ಸೇವಿಸುವುದು ಮತ್ತು ನಮ್ಮ ಆಹಾರ ಪದ್ಧತಿಯಲ್ಲಿ ಕೆಲ ಬದಲಾವಣೆಗಳನ್ನು ಮಾಡಿಕೊಳ್ಳುವುದು ಅತ್ಯಗತ್ಯ. ದೇಹವನ್ನು ತಂಪಾಗಿಸಲು ಸಹಾಯ ಮಾಡುವ ಆಹಾರಗಳನ್ನು ನಿಯಮಿತವಾಗಿ ಸೇವಿಸಬೇಕು.

ದೇಹವನ್ನು ತಂಪು ಮಾಡಲು ನೀರು, ಹಣ್ಣುಗಳು, ಜ್ಯೂಸ್‌ಗಳು, ಮಜ್ಜಿಗೆ, ಸೌತೆಕಾಯಿ, ಸೋರೆಕಾಯಿ ಸೇರಿದಂತೆ ಹಲವು ಬಗೆಯ ಆಹಾರಗಳನ್ನು ಸೇವಿಸಬಹುದು. ಇವುಗಳ ಜೊತೆಗೆ, ದೇಹವನ್ನು ತಂಪಾಗಿಸುವ ಬಾರ್ಲಿ ಗಂಜಿಯ (Barley ganji) ಕುರಿತು ಇಂದು ನಾವು ಮಾಹಿತಿ ನೀಡಲಿದ್ದೇವೆ. ಬಾರ್ಲಿ ನೀರು ದೇಹಕ್ಕೆ ತಂಪು ನೀಡುತ್ತದೆ. ಹೀಗಾಗಿ, ಪ್ರತಿದಿನ ಬಾರ್ಲಿ ನೀರನ್ನು ಸೇವಿಸುವುದು ಆರೋಗ್ಯಕ್ಕೆ ಉತ್ತಮ ಎಂದು ಹೇಳಲಾಗುತ್ತದೆ.

ಆದರೆ, ಬಾರ್ಲಿಯಿಂದ ತಯಾರಿಸುವ ಅದ್ಭುತವಾದ ಮತ್ತು ರುಚಿಕರವಾದ ಗಂಜಿಯ ಬಗ್ಗೆ ಇಂದು ನಾವು ತಿಳಿದುಕೊಳ್ಳೋಣ. ಬಾರ್ಲಿ ಗಂಜಿ ನಿಮ್ಮ ದೇಹದ ಉಷ್ಣಾಂಶವನ್ನು ಸಮತೋಲನದಲ್ಲಿಡಲು ಸಹಾಯ ಮಾಡುತ್ತದೆ. ಬಾರ್ಲಿ ನೀರಿನಲ್ಲಿ ಕ್ಯಾಲ್ಸಿಯಂ, ಫೈಬರ್, ಕಬ್ಬಿಣ, ಮೆಗ್ನೀಸಿಯಮ್, ಮ್ಯಾಂಗನೀಸ್ ಸೇರಿದಂತೆ ಹಲವಾರು ಜೀವಸತ್ವಗಳು ಹೇರಳವಾಗಿವೆ. ಹಾಗಾದರೆ, ಈ ರುಚಿಕರವಾದ ಬಾರ್ಲಿ ಗಂಜಿಯನ್ನು ಹೇಗೆ ಮಾಡುವುದು (Barley ganji recipe) ಎಂದು ನೋಡೋಣ.

ಬಾರ್ಲಿ ಗಂಜಿ (barley kanji) ಮಾಡಲು ಬೇಕಾಗುವ ಪದಾರ್ಥಗಳು ಮತ್ತು ತಯಾರಿಸುವ ವಿಧಾನವನ್ನು ಈಗ ತಿಳಿಯೋಣ. ಬಾರ್ಲಿ ಗಂಜಿ ತಯಾರಿಸಲು ಬೇಕಾಗುವ ಸಮಯ ಮತ್ತು ಅಗತ್ಯ ಸಾಮಾಗ್ರಿಗಳ ಬಗ್ಗೆ ವಿವರ ಇಲ್ಲಿದೆ.

ಬಾರ್ಲಿ ಗಂಜಿ ಮಾಡಲು ಬೇಕಾಗುವ ಪದಾರ್ಥಗಳು ಹೀಗಿವೆ

• ಬಾರ್ಲಿ
• ಕೊತ್ತಂಬರಿ ಸೊಪ್ಪು
• ಉಪ್ಪು
• ಸಾಸಿವೆ
• ಜೀರಿಗೆ
• ಹಸಿ ಮೆಣಸು
• ಕರಿಬೇವು
• ಇಂಗು
• ಶುಂಠಿ
• ಮೊಸರು
• ಎಣ್ಣೆ

ಬಾರ್ಲಿ ಗಂಜಿ ಮಾಡುವ ವಿಧಾನ ಹೀಗಿದೆ

ಮೊದಲು ಒಂದು ಬೌಲ್‌ನಲ್ಲಿ ಬಾರ್ಲಿಯನ್ನು ತೆಗೆದುಕೊಂಡು ಎರಡರಿಂದ ಮೂರು ಬಾರಿ ಚೆನ್ನಾಗಿ ತೊಳೆಯಿರಿ. ನಂತರ, ಅದನ್ನು ಕುಕ್ಕರ್‌ಗೆ ಹಾಕಿ, ಎರಡು ಪಟ್ಟು ನೀರು ಮತ್ತು ಸ್ವಲ್ಪ ಉಪ್ಪು ಸೇರಿಸಿ. ಮುಚ್ಚಳ ಮುಚ್ಚಿ ಮೂರು ಸೀಟಿ ಬರುವವರೆಗೆ ಬೇಯಿಸಿ. ಬಾರ್ಲಿ ಸಂಪೂರ್ಣವಾಗಿ ಬೆಂದು ಮೆತ್ತಗಾಗಬೇಕು.

ಈಗ ಕುಕ್ಕರ್‌ನಲ್ಲಿರುವ ಬಾರ್ಲಿಯನ್ನು ಜರಡಿ ಹಿಡಿದು ಒಂದು ಬೌಲ್‌ಗೆ ಹಾಕಿಟ್ಟುಕೊಳ್ಳಿ. ಬಾರ್ಲಿ ನೀರನ್ನು ಕೂಡ ಪ್ರತ್ಯೇಕವಾಗಿ ಇಟ್ಟುಕೊಳ್ಳಿ. ನಂತರ, ಬಾರ್ಲಿಯನ್ನು ಮಿಕ್ಸಿ ಜಾರ್‌ಗೆ ಹಾಕಿ ಎರಡು ಸುತ್ತು ರುಬ್ಬಿ. ಅದು ತರಿತರಿಯಾಗಿ ಎರಡು ಭಾಗವಾಗುವಂತೆ ಮಾಡಿಕೊಳ್ಳಿ. ಈ ರುಬ್ಬಿದ ಬಾರ್ಲಿ ಪುಡಿಯನ್ನು ಮೊದಲೇ ತೆಗೆದಿಟ್ಟಿದ್ದ ಬಾರ್ಲಿ ನೀರಿನೊಂದಿಗೆ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ.

ನಂತರ, ಇದಕ್ಕೆ ಅರ್ಧ ಕಪ್ ಹುಳಿ ಇಲ್ಲದ ಮೊಸರನ್ನು ಸೇರಿಸಿ. ಮೊಸರು ಸೇರಿಸಿ ಮತ್ತೊಮ್ಮೆ ಚೆನ್ನಾಗಿ ಮಿಶ್ರಣ ಮಾಡಿ. ಈಗ ಒಲೆ ಮೇಲೆ ಒಂದು ಪಾತ್ರೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿ. ಎಣ್ಣೆ ಬಿಸಿಯಾದ ನಂತರ ಸಾಸಿವೆ, ಜೀರಿಗೆ, ಹಸಿ ಮೆಣಸು, ತುರಿದ ಶುಂಠಿ, ಕರಿಬೇವು, ಇಂಗು ಸೇರಿಸಿ ಒಗ್ಗರಣೆ ತಯಾರಿಸಿಕೊಳ್ಳಿ. ಈ ಒಗ್ಗರಣೆಯನ್ನು ಬಾರ್ಲಿ ಗಂಜಿಗೆ ಸೇರಿಸಿ ಮಿಶ್ರಣ ಮಾಡಿ.

ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ, ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪನ್ನು ಹಾಕಿ ಮತ್ತೊಮ್ಮೆ ಮಿಶ್ರಣ ಮಾಡಿ. ಇಷ್ಟು ಮಾಡಿದರೆ, ರುಚಿ ರುಚಿಯಾದ ಬಾರ್ಲಿ ಗಂಜಿ ಸಿದ್ಧ. ಬೇಸಿಗೆಯಲ್ಲಿ ದೇಹವನ್ನು ತಂಪು ಮಾಡಲು ಈ ಗಂಜಿ ಅತ್ಯುತ್ತಮ ಆಯ್ಕೆಯಾಗಿದೆ.