ಢಾಬಾದಲ್ಲಿ ನೀಡುವ ಬೆಣ್ಣೆಯಂತಾ ಆಲೂ ಪಾಲಕ್ ಗ್ರೇವಿ ಮಾಡೋದು ಹೇಗೆ? ಇಲ್ಲಿದೆ ಟ್ರಿಕ್ಸ್

ಢಾಬಾ ಸ್ಟೈಲ್ ಆಲೂ ಪಾಲಕ್ ಗ್ರೇವಿ ನಿಮಗೆ ಇಷ್ಟನಾ? ಇದನ್ನು ಮಾಡೋದು ತುಂಬಾ ಸುಲಭ ಕಣ್ರಿ, ಮನೆಯಲ್ಲೇ ಮಾಡಿ ಪಂಜಾಬಿ ರುಚಿ. ಬೆಣ್ಣೆಯಂತೆ ಮೃದು, ಘಮ ಘಮ ಸುವಾಸನೆ. ರೆಸಿಪಿ ಇಲ್ಲಿದೆ ನೋಡಿ, ಖಂಡಿತ ಒಮ್ಮೆ ಟ್ರೈ ಮಾಡಿ. ಹೌದು, ಢಾಬಾ ಶೈಲಿಯ ಆಲೂ ಪಾಲಕ್ ಗ್ರೇವಿಯು (Aloo Palak Gravy) ಚಪಾತಿ ಅಥವಾ ಜೀರಾ ರೈಸ್‌ನೊಂದಿಗೆ ಸವಿಯಲು ಸೂಕ್ತವಾದ ಆಯ್ಕೆಯಾಗಿದೆ. ಇದು ಮನೆಯಲ್ಲೇ ಢಾಬಾ ಸುವಾಸನೆಯನ್ನು ನೀಡುತ್ತದೆ. ಇದನ್ನು ಸುಲಭವಾಗಿ ತಯಾರಿಸಬಹುದು.

ಚಳಿಗಾಲದಲ್ಲಿ ಅದರಲ್ಲೂ ಸಂಜೆ ಟೈಮ್‌ನಲ್ಲಿ ಬಿಸಿಬಿಸಿಯಾದ ಮತ್ತು ಮಸಾಲೆಯುಕ್ತ ಆಹಾರವನ್ನು ಬಯಸಿದರೆ, ಢಾಬಾ ಶೈಲಿಯ ಆಲೂ ಪಾಲಕ್ ಗ್ರೇವಿ (Aloo Palak Gravy Recipe) ಅತ್ಯುತ್ತಮ ಆಯ್ಕೆಯಾಗಿದೆ. ಇದರ ರುಚಿ ಒಮ್ಮೆ ಸವಿದ ನಂತರ ಎಲ್ಲರ ಮನಸ್ಸಿನಲ್ಲಿ ಅಚ್ಚಳಿಯದೆ ಉಳಿಯುತ್ತದೆ. ಮೃದುವಾದ ಆಲೂಗಡ್ಡೆ ಮತ್ತು ಪಾಲಕ್‌ನ ಪೌಷ್ಟಿಕಾಂಶದ ಸಂಯೋಜನೆಯು ರುಚಿಕರ ಮಾತ್ರವಲ್ಲದೆ ಆರೋಗ್ಯಕರವೂ ಆಗಿದೆ. ಈ ಖಾದ್ಯವನ್ನು ಚಪಾತಿ, ಪರಾಠ ಅಥವಾ ಜೀರಾ ರೈಸ್‌ನೊಂದಿಗೆ ಬಡಿಸಬಹುದು. ಈ ರುಚಿಕರ ಢಾಬಾ ಶೈಲಿಯ (Dhaba Style) ರೆಸಿಪಿಯನ್ನು ತಯಾರಿಸುವ ಸುಲಭ ವಿಧಾನವನ್ನು ಇಲ್ಲಿ ತಿಳಿಸಲಾಗಿದೆ.

Photo Credit: ಸಾಂದರ್ಭಿಕ ಚಿತ್ರ

ಆಲೂ ಪಾಲಕ್ ಗ್ರೇವಿಗೆ ಅಗತ್ಯವಿರುವ ಸಾಮಗ್ರಿಗಳು

• ಬೇಯಿಸಿದ ಆಲೂಗಡ್ಡೆ - 3
• ಪಾಲಕ್ - 2 ಕಟ್ಟು
• ಈರುಳ್ಳಿ - 2
• ಟೊಮೆಟೊ - 2
• ಶುಂಠಿ ಬೆಳ್ಳುಳ್ಳಿ ಪೇಸ್ಟ್ - 1 ಚಮಚ
• ಹಸಿ ಮೆಣಸಿನಕಾಯಿ - 2
• ಜೀರಿಗೆ - 1 ಚಮಚ
• ಅರಿಶಿನ - ½ ಚಮಚ
• ಕೆಂಪು ಮೆಣಸಿನ ಪುಡಿ - 1 ಚಮಚ
• ಧನಿಯಾ ಪುಡಿ - 1 ಚಮಚ
• ಗರಂ ಮಸಾಲಾ - ½ ಚಮಚ
• ಕ್ರೀಮ್ ಅಥವಾ ಬೆಣ್ಣೆ - 1 ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ಎಣ್ಣೆ - ಬೇಕಾದಷ್ಟು

Photo Credit: ಸಾಂದರ್ಭಿಕ ಚಿತ್ರ

ಆಲೂ ಪಾಲಕ್ ಗ್ರೇವಿ ತಯಾರಿಸುವ ವಿಧಾನ

- ಮೊದಲು ಪಾಲಕ್‌ ಅನ್ನು 2 ನಿಮಿಷ ಕುದಿಸಿ. ನಂತರ ತಣ್ಣೀರಿಗೆ ಹಾಕಿ. ಇದರಿಂದ ಅದರ ಹಸಿರು ಬಣ್ಣ ಹಾಗೆಯೇ ಉಳಿಯುತ್ತದೆ. ನಂತರ ಅದನ್ನು ಮಿಕ್ಸರ್‌ನಲ್ಲಿ ನುಣ್ಣಗೆ ರುಬ್ಬಿ ಪೇಸ್ಟ್ ಮಾಡಿಕೊಳ್ಳಿ.

- ಈಗ ಒಂದು ಕಡಾಯಿಯಲ್ಲಿ ಎಣ್ಣೆ ಬಿಸಿ ಮಾಡಿ, ಜೀರಿಗೆ ಹಾಕಿ. ನಂತರ ಈರುಳ್ಳಿ, ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಮತ್ತು ಹಸಿ ಮೆಣಸಿನಕಾಯಿ ಹಾಕಿ ಗೋಲ್ಡನ್ ಬ್ರೌನ್ ಆಗುವವರೆಗೆ ಹುರಿಯಿರಿ.

- ಇದಾದ ನಂತರ ಟೊಮೆಟೊ ಪ್ಯೂರಿ ಸೇರಿಸಿ, ಎಣ್ಣೆ ಬೇರ್ಪಡುವವರೆಗೆ ಬೇಯಿಸಿ. ಅರಿಶಿನ, ಕೆಂಪು ಮೆಣಸಿನ ಪುಡಿ, ಧನಿಯಾ ಪುಡಿ ಮತ್ತು ಉಪ್ಪು ಸೇರಿಸಿ ಚೆನ್ನಾಗಿ ಮಿಕ್ಸ್‌ ಮಾಡಿ.

- ಈಗ ಪಾಲಕ್ ಪೇಸ್ಟ್ ಸೇರಿಸಿ, ಚೆನ್ನಾಗಿ ಬೆರೆಸಿ. ಸ್ವಲ್ಪ ಸಮಯ ಬೇಯಿಸಿದ ನಂತರ ಬೇಯಿಸಿದ ಆಲೂಗಡ್ಡೆ ಹಾಕಿ, ಸುಮಾರು 5 ರಿಂದ 7 ನಿಮಿಷಗಳ ಕಾಲ ಸಣ್ಣ ಉರಿಯಲ್ಲಿ ಬೇಯಿಸಿ.

- ಗ್ರೇವಿ ಗಟ್ಟಿಯಾದ ನಂತರ ಮೇಲೆ ಕ್ರೀಮ್ ಅಥವಾ ಬೆಣ್ಣೆ ಹಾಕಿ ನಿಧಾನವಾಗಿ ಮಿಕ್ಸ್ ಮಾಡಿ. ಇಷ್ಟು ಮಾಡಿದರೆ, ಬಿಸಿ ಬಿಸಿಯಾದ ಆಲೂ ಪಾಲಕ್ ಗ್ರೇವಿ (Palak Aloo Curry) ರೆಡಿ.

ಇದನ್ನು ತಂದೂರಿ ರೋಟಿ ಅಥವಾ ಜೀರಾ ರೈಸ್‌ನೊಂದಿಗೆ ಸವಿಯಿರಿ. ಈ ಖಾದ್ಯವು ಧಾಬಾದಂತಹ ರುಚಿಯನ್ನು ನೀಡುತ್ತದೆ ಮತ್ತು ನಿಮ್ಮ ಕುಟುಂಬದ ಸದಸ್ಯರು ಇದರ ರುಚಿಗೆ ಬೆರಗಾಗುತ್ತಾರೆ. ಈ ರೆಸಿಪಿ ಕಬ್ಬಿಣ, ವಿಟಮಿನ್‌ಗಳು ಮತ್ತು ಖನಿಜಗಳಿಂದ ಸಮೃದ್ಧವಾಗಿದೆ. ಇದನ್ನು ಚಳಿಗಾಲದಲ್ಲಿ ಒಮ್ಮೆ ಪ್ರಯತ್ನಿಸಿ ಮತ್ತು ನಿಮ್ಮ ಅಡುಗೆಮನೆಯಲ್ಲಿ ಢಾಬಾದ ರುಚಿ ಆನಂದಿಸಿ.