ಒಂದು ಹನಿ ನೀರೂ ಬೇಡ.. ಮಡಿಕೆಯಲ್ಲಿ ಮಾಡಿ ಬಿಹಾರಿ ಸ್ಟೈಲ್ ಚಂಪಾರಣ್ ಮಟನ್! ಬೆಣ್ಣೆಯಂತೆ ಕರಗುವ ರುಚಿ

ಒಂದು ಹನಿ ನೀರೂ ಬೇಡ! ಮಣ್ಣಿನ ಮಡಿಕೆಯಲ್ಲಿ ಬೆಣ್ಣೆಯಂತೆ ಕರಗುವ ಚಂಪಾರಣ್ ಮಟನ್ ಮಾಡಿ. ಹೌದು, ಬಿಹಾರದ ಚಂಪಾರಣ್ ಜಿಲ್ಲೆಯಿಂದ ಉದ್ಭವಿಸಿದ ಚಂಪಾರಣ್ ಮಟನ್, ಅತ್ಯಂತ ಜನಪ್ರಿಯ ಹಾಗೂ ಬಾಯಿಗೂಡುವ ಖಾದ್ಯ. ಇದು ಅಹೂನಾ ಮಟನ್ (Ahuna Mutton) ಅಥವಾ ಹಂಡಿ ಮಟನ್ (Handi Mutton) ಎಂದೂ ಪ್ರಸಿದ್ಧ.

ಅಡುಗೆಯ ವೇಳೆ ಸೌಟು ಬಳಸಿ ಕಲಸದೆ, ಮಡಿಕೆಯನ್ನೇ ಅಲ್ಲಾಡಿಸಿ ಮಾಂಸವನ್ನು ಬೇಯಿಸುವುದು ಇದರ ವಿಶೇಷತೆ. 'ಅಹೂನಾ' ಎಂದರೆ 'ಅಲ್ಲಾಡಿಸುವುದು'. ಈ ಖಾದ್ಯ ತಯಾರಿಕೆಯಲ್ಲಿ ಒಂದು ಹನಿ ನೀರನ್ನೂ ಉಪಯೋಗಿಸುವುದಿಲ್ಲ. ಮನೆಯಲ್ಲೇ ಸುಲಭವಾಗಿ ಈ ಚಂಪಾರಣ್ ಮಟನ್ ಮಾಡಲು ಬೇಕಾಗುವ ಸಾಮಗ್ರಿಗಳು ಮತ್ತು ತಯಾರಿಸುವ ಸುಲಭ ವಿಧಾನ (Champaran Mutton Recipe) ಇಲ್ಲಿದೆ.

Photo Credit: ಸಂಗ್ರಹ ಚಿತ್ರ

ಚಂಪಾರಣ್ ಮಟನ್‌ಗೆ ಬೇಕಾಗುವ ಸಾಮಗ್ರಿಗಳು

• ಮಟನ್ (ಕುರಿ ಮಾಂಸ) - 1 ಕಿಲೋ
• ಈರುಳ್ಳಿ - 750 ಗ್ರಾಂ
• ಸಾಸಿವೆ ಎಣ್ಣೆ - 200 ರಿಂದ 250 ಮಿ.ಲೀ
• ಬೆಳ್ಳುಳ್ಳಿ (ಗಡ್ಡೆಗಳು) - 3
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ - 3 ಚಮಚ
• ಮೊಸರು - 3 ಚಮಚ
• ಗೋಧಿ ಹಿಟ್ಟು - ಮಡಕೆಯ ಅಂಚುಗಳನ್ನು ಸೀಲ್ ಮಾಡಲು ಬೇಕಾದಷ್ಟು
• ಬಿರಿಯಾನಿ ಎಲೆ - 2
• ಒಣ ಮೆಣಸಿನಕಾಯಿ - 5
• ಚಕ್ಕೆ - 2 ತುಂಡು
• ಲವಂಗ - 5
• ಏಲಕ್ಕಿ - 4
• ಕಪ್ಪು ಏಲಕ್ಕಿ - 2
• ಮೆಣಸು - 1 ಚಮಚ
• ಶಾಜೀರಾ - ಅರ್ಧ ಚಮಚ
• ಜೀರಿಗೆ ಪುಡಿ - 1 ಚಮಚ
• ಕೊತ್ತಂಬರಿ ಪುಡಿ - 2 ಚಮಚ
• ಕಾಶ್ಮೀರಿ ಕೆಂಪು ಮೆಣಸಿನ ಪುಡಿ - 2 ಚಮಚ
• ಸಾಮಾನ್ಯ ಕೆಂಪು ಮೆಣಸಿನ ಪುಡಿ - 1 ಚಮಚ
• ಅರಿಶಿನ - ಅರ್ಧ ಚಮಚ
• ಗరం ಮಸಾಲಾ - 1 ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ಮಣ್ಣಿನ ಮಡಿಕೆ - 1

ಚಂಪಾರಣ್ ಮಟನ್‌ ತಯಾರಿಸುವ ವಿಧಾನ

- ಮೊದಲಿಗೆ, ಪಾತ್ರೆಯಲ್ಲಿ ಸಾಸಿವೆ ಎಣ್ಣೆ ಹಾಕಿ ಹೊಗೆ ಬರುವವರೆಗೆ ಕಾಯಿಸಿ. ಇದರ ತೀಕ್ಷ್ಣ ವಾಸನೆ ಹೋಗುವುದು ಮುಖ್ಯ. ಬಿಸಿಯಾದ ನಂತರ ಒಲೆ ಆರಿಸಿ, ತಣ್ಣಗಾಗಲು ಬಿಡಿ.

- ಮಟನ್ ತುಂಡುಗಳನ್ನು ಚೆನ್ನಾಗಿ ತೊಳೆದು, ನೀರು ಬಸಿದುಹೋಗುವಂತೆ ಜರಡಿಯಲ್ಲಿ ಇರಿಸಿ.

- ದೊಡ್ಡ ಪಾತ್ರೆಯಲ್ಲಿ ಸ್ವಚ್ಛಗೊಳಿಸಿದ ಮಟನ್, ಕತ್ತರಿಸಿದ ಈರುಳ್ಳಿ, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಮೊಸರು, ಕೆಂಪು ಮೆಣಸಿನ ಪುಡಿ, ಅರಿಶಿನ, ಕೊತ್ತಂಬರಿ ಪುಡಿ, ಜೀರಿಗೆ ಪುಡಿ, ಉಪ್ಪು, ಗರಂ ಮಸಾಲಾ, ಬಿರಿಯಾನಿ ಎಲೆ, ಒಣ ಮೆಣಸಿನಕಾಯಿ, ಚಕ್ಕೆ, ಮೂರು ಪೂರ್ಣ ಬೆಳ್ಳುಳ್ಳಿ ಗಡ್ಡೆಗಳು ಹಾಗೂ ಬಿಸಿ ಮಾಡಿ ತಣ್ಣಗಾಗಿಸಿದ ಸಾಸಿವೆ ಎಣ್ಣೆಯನ್ನು ಸೇರಿಸಿ.

- ಮಸಾಲೆಯನ್ನು ಮಾಂಸಕ್ಕೆ ಚೆನ್ನಾಗಿ ಹಿಡಿಯುವಂತೆ ಕೈಗಳಿಂದ 5 ರಿಂದ 10 ನಿಮಿಷ ಮಸಾಜ್ ಮಾಡಿ. ಇದನ್ನು 15 ನಿಮಿಷ ಪಕ್ಕಕ್ಕೆ ಇರಿಸಿ. ನಂತರ, ಮಣ್ಣಿನ ಮಡಿಕೆಯ ಒಳಭಾಗಕ್ಕೆ ತುಸು ಎಣ್ಣೆ ಸವರಿ.

- ಮ್ಯಾರಿನೇಟ್ ಮಾಡಿದ ಮಟನ್ ಮಿಶ್ರಣವನ್ನು ಮಡಿಕೆಗೆ ಹಾಕಿ, ಮೇಲ್ಭಾಗದಲ್ಲಿ ಸ್ವಲ್ಪ ಜಾಗ ಬಿಡಿ. ಚಪಾತಿ ಹಿಟ್ಟಿನಂತೆ ಗೋಧಿ ಹಿಟ್ಟನ್ನು ಕಲಸಿ, ಉದ್ದ ಮಾಡಿ ಮಡಿಕೆಯ ಅಂಚುಗಳಿಗೆ ಅಂಟಿಸಿ.

- ಮಡಿಕೆ ಮೇಲೆ ಮಣ್ಣಿನ ಮುಚ್ಚಳ ಗಟ್ಟಿಯಾಗಿ ಇರಿಸಿ, ಆವಿ ಹೊರಗೆ ಹೋಗದಂತೆ ಹಿಟ್ಟಿನಿಂದ ಸೀಲ್ ಮಾಡಿ. ಸಾಂಪ್ರದಾಯಿಕವಾಗಿ ಇದನ್ನು ಇದ್ದಿಲಿನ ಒಲೆಯ ಮೇಲೆ ಬೇಯಿಸುತ್ತಾರೆ. ಮನೆಯಲ್ಲಿ ಗ್ಯಾಸ್ ಸ್ಟವ್ ಬಳಸುವಾಗ, ಉರಿಯನ್ನು ಸಂಪೂರ್ಣವಾಗಿ ಸಣ್ಣಗೆ ಇರಿಸಿ.

- ಮಡಿಕೆಯನ್ನು ಒಲೆಯ ಮೇಲಿಟ್ಟು ಸುಮಾರು ಒಂದು ಗಂಟೆ ಬೇಯಿಸಿ. ಪ್ರತಿ 10-15 ನಿಮಿಷಕ್ಕೊಮ್ಮೆ ಬಟ್ಟೆಯಿಂದ ಮಡಿಕೆಯನ್ನು ಹಿಡಿದು ನಿಧಾನವಾಗಿ ಅಲುಗಾಡಿಸಿ. ಇದು ಮಟನ್ ಮತ್ತು ಮಸಾಲೆಗಳು ತಳ ಹತ್ತದೆ ಚೆನ್ನಾಗಿ ಮಿಶ್ರಣವಾಗಲು ಸಹಾಯ ಮಾಡುತ್ತದೆ.

- ಒಂದು ಗಂಟೆಯ ನಂತರ ಒಲೆ ಆರಿಸಿ. ತಕ್ಷಣ ಮುಚ್ಚಳ ತೆಗೆಯದೆ, ಇನ್ನೊಂದು 10-15 ನಿಮಿಷ ಹಾಗೆಯೇ ಬಿಡಿ.

- ನಂತರ ನಿಧಾನವಾಗಿ ಸೀಲ್ ತೆಗೆದು, ಬಿಸಿಬಿಸಿಯಾದ ಅನ್ನ, ರೊಟ್ಟಿ ಅಥವಾ ಪುಲ್ಕಾದೊಂದಿಗೆ ಸವಿಯಿರಿ. ಆವಿಯಲ್ಲಿ ಬೆಂದ ಈ ಮಟನ್ ಅತ್ಯಂತ ಮೃದು ಮತ್ತು ರಸಭರಿತವಾಗಿರುತ್ತದೆ.