ಗರ್ಭಿಣಿಯರ ಬಳಿ ಇಂಥಾ ವಿಷಯಗಳನ್ನು ಚರ್ಚಿಸದಿರಿ

ತೂಕದ ಬಗ್ಗೆ ಅಸಮಂಜಸ ಪ್ರಶ್ನೆ

ನೀನು ಗರ್ಭಿಣಿಯಂತೆಯೇ ಕಾಣುವುದಿಲ್ಲ, ಬಹಳ ಸಣ್ಣ ಇದ್ದೀಯಾ ಅಥವಾ ಬಹಳ ದಪ್ಪ ಇದ್ದೀಯಾ ಪ್ರಸವದ ವೇಳೆ ಸಮಸ್ಯೆಯಾಗಬಹುದು. ಮಗು ಜನಿಸಲು ಇನ್ನು ಇಷ್ಟು ವಾರಗಳಿವೆ, ಈಗಲೇ ಬೇಬಿ ಬಂಪ್ ಇಷ್ಟು ಬೆಳೆದಿದೆ? ಎಂಬಂಥ ಚರ್ಚೆಗಳನ್ನು ಎಂದಿಗೂ ಮಾಡಬೇಡಿ. ಅವರ ಆರೋಗ್ಯದ ಬಗ್ಗೆ ವೈದ್ಯರು, ಕುಟುಂಬದವರು ಕಾಳಜಿ ವಹಿಸಿರುತ್ತಾರೆ. ಇಂಥಹ ಪ್ರಶ್ನೆಗಳು ಆರಭಿಕ ಹಂತದಲ್ಲೇ ಮಗುವಿನ ಬೆಳವಣಿಗೆ ಅಥವಾ ಪ್ರಸವ ವೇದನೆ ಬಗ್ಗೆ ಅವರನ್ನು ಚಿಂತೆಗೆ ದೂಡಬಹುದು, ಅವರ ಮಾನಸಿಕ ಸ್ಥಿತಿಯ ಮೇಲೆ ಪರಿಣಾಮ ಬೀರಬಹದು.

ಹೊಟ್ಟೆ ಭಾಗವನ್ನು ಸ್ಪರ್ಶಿಸುವುದು

ಗರ್ಭಿಣಿಯರ ಹೊಟ್ಟೆ (ಬೇಬಿ ಬಂಪ್) ಮ್ಯಾಗ್ನೆಟ್ ನಂತೆ ಎಲ್ಲರನ್ನು ಆಕರ್ಷಿಸುತ್ತದೆ. ಕೆಲವರಿಗೆ ನೋಡಿದಾಗ ಮುಟ್ಟಬೇಕು ಎನಿಸುವುದೂ ಉಂಟು, ಆದರೆ ಸಿಕ್ಕವರೆಲ್ಲಾ ಬೇಬಿ ಬಂಪ್ ಮುಟ್ಟಿದಾಗ ಗರ್ಭಣಿಯರಿಗೆ ತೀವ್ರ ಮುಜುಗರ, ಕಿರಿಕಿರಿ ಎನಿಸಬಹುದು. ಇಂಥವರಿಗೆ ನೇರವಾಗಿ ಮುಟ್ಟಬೇಡಿ, ಅಹಿತಕರ ಎನಿಸುತ್ತದೆ ಎಂದು ತಿಳಿಸಿಬಿಡಿ. ಪದೇ ಪದೇ ಇಂತಹ ಘಟನೆ ಮುಂದುವರೆದಲ್ಲಿ ಮತ್ತೆ ನಿಮ್ಮ ಮಾನಸಿಕ ಆರೋಗ್ಯದ ಮೇಲೆ ಪ್ರಭಾವ ಬೀರುತ್ತದೆ.

ಅನವಶ್ಯಕ ಸಲಹೆಗಳು, ಪ್ರಶ್ನೆಗಳು

ಗರ್ಭಿಣಿ ಎಂದರೆ ಕಂಡವರೆಲ್ಲಾ ಒಂದಿಲ್ಲೊಂದು ಉಚಿತ ಸಲಹೆ ಕೊಡುವವರೇ. ಇಂತಹ ಲಕ್ಷಣ ಇದ್ದರೆ ಗಂಡು ಮಗು, ಹೀಗಿದ್ದರೆ ಹೆಣ್ಣು ಮಗು, ಈ ಆಹಾರ ಸೇವಿಸಬೇಕು, ಮಗುವಿನ ನಂತರವೂ ಕೆಲಸಕ್ಕೆ ಹೋಗುತ್ತೀಯಾ?, ಮಗುವಿಗೆ ಎಷ್ಟು ತಿಂಗಳು ಎದೆಹಾಲು ನೀಡುತ್ತೀಯಾ? ಇಂತಹ ಪ್ರಶ್ನೆಗಳು ನಿಜವಾಗಿಯೂ ಗರ್ಭಿಣಿ ಬಯಸುವುದಿಲ್ಲ. ಕೆಲವು ಸಂದರ್ಭದಲ್ಲಿ ಏನು ಉತ್ತರ ನೀಡಬೇಕು ಎಂಬ ಗೊಂದಲ ಸಹ ಉಂಟಾಗಬಹುದು. ಇಂಥವರಿಂದ ಸಾಧ್ಯವಾದಷ್ಟು ದೂರವಿರಿ, ಇಲ್ಲವಾದಲ್ಲಿ ವಿಷಯ ಬದಲಾಯಿಸಿ ಸಕಾರಾತ್ಮಕ ಉತ್ತರಗಳಿಂದ ಚರ್ಚೆ ಪೂರ್ಣಗೊಳಿಸಿ.

ಇತರರ ಕಹಿ ಘಟನೆಗಳು

ಪ್ರಸವ ವೇದನೆಯಂಥ ಭೀಕರ ಅನುಭವಗಳು, ನೋವಿನ ಸಂಗತಿಗಳು, ಶಸ್ತ್ರಚಿಕಿತ್ಸೆಯಂಥ ವಿಷಯಗಳು, ಸಾಧ್ಯವಾದಷ್ಟು ನಿದ್ರಿಸು, ಮುಂದೆ ಹೆಚ್ಚು ನಿದ್ರಿಸಲು ಆಗುವುದಿಲ್ಲ ಎಂಬಂಥ ಎಚ್ಚರಿಕೆಗಳನ್ನು ಗರ್ಭಿಣಿಯರಿಗೆ ನೀಡದಿರಿ. ಹಾಗಿದ್ದೂ ಇಂತಹ ವಿಷಯಗಳು ನಿಮ್ಮ ಗಮನಕ್ಕೆ ಬಂದರೆ ನಿರ್ಲಕ್ಷಿಸಿ, ತಪ್ಪದೆ ವೈದ್ಯರ ಸಲಹೆ ಪಾಲಿಸಿ. ಸಕಾರಾತ್ಮಕ ವಿಷಯಗಳ ಕಡೆ ಗಮನ ನೀಡಿ, ಮಗುವಿಗೆ ಜನ್ಮ ನೀಡುವ ಭಾವನೆಯಲ್ಲಿ ಎಂಥಾ ನೋವು ಮರೆಯಾಗುತ್ತದೆ ಎಂಬಂಥ ಮಾತುಗಳು ಹಿತವೆನಿಸುತ್ತದೆ.

ನಿಮ್ಮದೇ ಹಿತಕರ ವಾತಾವರಣ ಸೃಷ್ಟಿಸಿಕೊಳ್ಳಿ

ನೀವೀಗ ತಾಯ್ತನದ ಅದ್ಭುತ ಭಾವನೆಯನ್ನು ಅನುಭವಿಸುತ್ತಿದ್ದೀರಾ, ನಿಮ್ಮದೇ ಒಂದು ಸಕಾರಾತ್ಮಕ ಲೋಕ ಸೃಷ್ಟಿಸಿಕೊಳ್ಳಿ. ನಿಮ್ಮ ಸುತ್ತಮುತ್ತ ಇಷ್ಟದ, ಮನಸಿಗೆ ಹಿತವೆನಿಸುವ, ಮಗುವಿಗೆ ಪ್ರೇರಣೆ ನೀಡುವಂಥ ವಸ್ತುಗಳನ್ನು ಇಟ್ಟುಕೊಳ್ಳಿ. ನಕಾರಾತ್ಮಕ ಸಂದೇಶ, ಆಲೋಚನೆಗಳಿಗೆ ಅವಕಾಶ ನೀಡಿದೇ, ನಿರ್ಲಕ್ಷಿಸಿ. ಉತ್ತಮ ಸಂಗೀತ, ಪುಸ್ತಕಗಳು, ಸ್ಥಳಗಳಿಗೆ ಭೇಟಿ ನೀಡಿ ಆರೋಗ್ಯದ ಬಗ್ಗೆ ಕಾಳಜಿವಹಿಸಿ.