ಹೆರಿಗೆಯ ಬಳಿಕ ಕೂದಲು ಉದುರುವ ಸಮಸ್ಯೆ ತಡೆಗಟ್ಟುವುದು ಹೇಗೆ?

ಕೂದಲಿಗೆ ಅವಶ್ಯಕವಾದ ಪೋಷಕಾಂಶಗಳಿಂದ ಆರೈಕೆ ಮಾಡಬೇಕು

ಕೂದಲಿನ ಆರೋಗ್ಯಕ್ಕೆ ಪೋಷಕಾಂಶಗಳು ಅವಶ್ಯಕ. ಪೋಷಕಾಂಶಗಳ ಕೊರತೆ ಉಂಟಾದಾಗ ಕೂದಲು ಉದುರಲಾರಂಭಿಸುವುದು. ಹೆರಿಗೆಯ ಬಳಿಕ ಮಗುವಿಗೆ ಹಾಲುಣಿಸುವುದರಿಂದ ತಾಯಿ ದೇಹದಲ್ಲಿ ಪೋಷಕಾಂಶಗಳು ಕಡಿಮೆಯಾಗಬಹುದು. ಇದರ ಜೊತೆಗೆ ಮಗುವಿನ ಆರೈಕೆ, ಕೆಲಸ ಹೀಗೆ ಮಾನಸಿಕ ಒತ್ತಡವೂ ಇರುತ್ತದೆ. ಕೂದಲಿಗೆ ಅವಶ್ಯಕವಾದ ಪೋಷಕಾಂಶಗಳು ದೊರೆಯಲು ಪೌಷ್ಠಿಕ ಆಹಾರಗಳನ್ನು ಸೇವಿಸಬೇಕು. ನಿಮ್ಮ ಆಹಾರಕ್ರಮದಲ್ಲಿ ಮೊಳಕೆ ಬರಿಸಿದ ಕಾಳುಗಳು, ಸೊಪ್ಪುಗಳು, ಮೊಟ್ಟೆ ಮುಂತಾದ ಪೌಷ್ಠಿಕ ಆಹಾರಗಳನ್ನು ಸೇರಿಸಿ.

ದಿನಾ ತಲೆ ತೊಳೆಯುವುದರಿಂದ ಕೂದಲು ಉದುರುವುದೇ?

ಇದು ಸಾಮಾನ್ಯ ಪ್ರಶ್ನೆಯಾಗಿದೆ. ಹೆರಿಗೆಯ ಬಳಿಕ ಪ್ರತಿದಿನ ತಲೆ ಸ್ನಾನ ಮಾಡುವುದರಿಂದ ಕೂದಲು ಉದುರುವುದೇ ಎಂಬ ಪ್ರಶ್ನೆಯನ್ನು ಅನೇಕರು ಕೇಳುತ್ತಾರೆ. ಆದರೆ ಕೂದಲು ದಿನಾ ತೊಳೆಯುವುದರಿಂದ ಹೋಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ , ಕೆಲವೊಂದು ಸಂದರ್ಭದಲ್ಲಿ ತಲೆಯನ್ನು ದಿನಾ ತೊಳೆದು ಕೂದಲಿನ ಆರೈಕೆ ಮಾಡಬೇಕಾಗುತ್ತದೆ.

* ತುಂಬಾ ಸೆಕೆಯಿದ್ದಾಗ ಕೂದಲು ಬೆವರುವುದು, ಜಿಡ್ಡಿನಂಶ ತಲೆಯಲ್ಲಿರುತ್ತದೆ, ಆಗ ಪ್ರತಿದಿನ ತಲೆ ಸ್ವಚ್ಛ ಮಾಡಬೇಕಾಗುತ್ತದೆ.

* ಕೂದಲು ಎಣ್ಣೆ-ಎಣ್ಣೆಯಾಗುವುದಾದರೆ ಕೂದಲನ್ನು ವಾರದಲ್ಲಿ 4-5 ಬಾರಿ ತೊಳೆಯಬೇಕು.

* ಒಣ ಕೂದಲು ಆಗಿದ್ದರೆ ವಾರದಲ್ಲಿ ಎರಡು ದಿನ ತೊಳೆದರೆ ಸಾಕು.

* ತುಂಬಾ ಪ್ರಯಾಣ ಮಾಡಿದರೆ ಮೈಲ್ಡ್ ಶ್ಯಾಂಪೂ ಹಾಕಿ ಕೂದಲನ್ನು ತೊಳೆಯಬೇಕು.

* ಇನ್ನು ಕುದಲು ತುಂಬಾ ಎಣ್ಣೆ-ಎಣ್ಣೆಯಾಗುತ್ತಿದ್ದರೆ ಹೇರ್‌ ರಿನ್ಸ್ ಬಳಸಬೇಕು.

ಕೂದಲು ಉದುರುವುದನ್ನು ತಡೆಗಟ್ಟಲು ಯಾವೆಲ್ಲಾ ವಸ್ತುಗಳು ಸಹಾಯ ಮಾಡುತ್ತೆ?

* ತುಂಬಾ ಜಿಡ್ಡು ಕೂದಲಿನ ಸಮಸ್ಯೆ ಇರುವವರು ಹೇರ್ ರಿನ್ಸ್ ಬಳಸಿ.

* ಡ್ರೈ ಹೇರ್‌ ಇರುವವರು ಕ್ರೀಮಿ ಕಂಡೀಷನರ್‌ ಬಳಸಬಹುದು.

* ಹರ್ಬಲ್ ಹೇರ್‌ ಟಾನಿಕ್ ಬಳಸಿ. ಇದು ಕೂದಲಿನ ಬುಡವನ್ನು ಆರೈಕೆ ಮಾಡುತ್ತೆ.

* ವಾರಕೊಮ್ಮೆ ಕೂದಲಿಗೆ ಎಣ್ಣೆ ಹಚ್ಚಿ.

* ಕೂದಲು ಉದುರುವಾಗ ಹೆಡ್‌ ಮಸಾಜ್‌ ಮಾಡಿಸಬೇಡಿ, ಕೂದಲಿನ ಬುಡ ಸಡಿಲವಾಗಿರುತ್ತೆ, ಮತ್ತಷ್ಟು ಕೂದಲು ಉದುರಬಹುದು.

* ಕೂದಲು ಉದುರುವುದನ್ನು ತಡೆಗಟ್ಟಲು ಹೇರ್ ಟ್ರೀಟ್ಮೆಂಟ್ ಪಡೆಯಬಹುದು.

ಏನೆಲ್ಲಾ ತಿನ್ನಬೇಕು?

ಕೂದಲಿಗೆ ಬಾಹ್ಯ ಆರೈಕೆ ಅಷ್ಟೇ ಆಂತರಿಕ ಆರೈಕೆ ಕೂಡ ಮುಖ್ಯ. ಆದ್ದರಿಂದ ನೀವು ಆಹಾರಕ್ರಮದ ಕಡೆ ಗಮನ ನೀಡಬೇಕು.

* ಪ್ರತಿದಿನ ಒಂದು ಬೌಲ್‌ನಷ್ಟು ಮೊಳಕೆ ಕಾಳುಗಳನ್ನು ತಿನ್ನಿ.

* ತಲೆ ಹೊಟ್ಟು ತಡೆಗಟ್ಟಲು ಸಾಕಷ್ಟು ನೀರು ಕುಡಿಯಿರಿ.

* ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಬಿಸಿ ನೀರಿಗೆ ಸ್ವಲ್ಪ ನಿಂಬೆರಸ ಹಾಕಿ ಕುಡಿಯಿರಿ.

* ವೈದ್ಯರನ್ನು ಕೇಳಿ ವಿಟಮಿನ್‌ ಹಾಗೂ ಖನಿಜಾಂಶಗಳ ಸಪ್ಲಿಮೆಂಟ್ ಸೇವಿಸಿ.

* ಸೊಪ್ಪುಗಳನ್ನು ಸೇವಿಸಿ.