ಹೆರಿಗೆಯ ಬಳಿಕ ಮಲಬದ್ಧತೆ ಸಮಸ್ಯೆಯೇ? ಇಲ್ಲಿದೆ ಪರಿಹಾರ

ಕಂದುಬಣ್ಣದ ಆಹಾರವಸ್ತುಗಳ ಕುರಿತು ಯೋಚಿಸಿರಿ

ಅಧಿಕ ಪ್ರಮಾಣದಲ್ಲಿ ನಾರಿನಂಶವುಳ್ಳ ಕಂದುಅಕ್ಕಿ, ತೌಡಿನಿಂದ ತಯಾರಿಸಲ್ಪಟ್ಟ ಯಾವುದೇ ವಸ್ತು, ಓಟ್ಸ್‌ ನ ತೌಡು, ಅಗಸೆ ಬೀಜ, ಅಥವಾ ಸಂಸ್ಕರಿತಗೊಳ್ಳದೇ ಇರುವ ಧಾನ್ಯಗಳು.

ಕೆಲವು ಶುಷ್ಕ ಆಹಾರವಸ್ತುಗಳೂ ಮಲಬದ್ಧತೆಯ ನಿವಾರಣೆಗೆ ಹೇಳಿಮಾಡಿಸಿದಂತಹವು

ಒಣದ್ರಾಕ್ಷಿಗಳು, ಅಂಜೂರಗಳು, ಏಪ್ರಿಕಾಟ್ ಗಳು, ಹಾಗೂ ಕಪ್ಪುಬಣ್ಣದ ಒಣದ್ರಾಕ್ಷಿಗಳು. ಒಮೇಗಾ - 3 ಯ ಲಾಭವನ್ನೂ ನಿಮ್ಮದಾಗಿಸಿಕೊಳ್ಳಲು ಒಣದ್ರಾಕ್ಷಿಗಳೊಂದಿಗೆ ಕಾಳುಗಳನ್ನೂ ಸೇರಿಸಿಕೊಳ್ಳಿರಿ. ಕಾಳುಗಳು ಮಲವಿಸರ್ಜನೆಗೆ ನೆರವಾಗುವ ಮಾಂಸಖಂಡಗಳ ಬಲವನ್ನೂ ಹೆಚ್ಚಿಸುತ್ತದೆ.

ತಾಜಾ ಹಣ್ಣು, ತರಕಾರಿಗಳ ಸೇವನೆಯನ್ನು ರೂಢಿಸಿಕೊಳ್ಳಿರಿ

ಕುರುಕುಲಾಗಿರುವ ತಾಜಾ ಹಣ್ಣುಗಳು ಹಾಗೂ ತರಕಾರಿಗಳ ಸೇವನೆಯು ನಿಮ್ಮ ಪ್ರಸ್ತುತ ಆರೋಗ್ಯ ಸ್ಥಿತಿಗೆ ಹೇಳಿಮಾಡಿಸಿದಂತಹವು. ಹಸಿ ತರಕಾರಿಗಳನ್ನು ಸಿಪ್ಪೆಸಮೇತವಾಗಿ ಸೇವಿಸಿದರೆ ಇನ್ನೂ ಉತ್ತಮ. ಬೇಯಿಸಿ ತಿನ್ನುವುದೇ ಆದರೂ, ಕಚ್ಚಿದಾಗ ಅವು "ಕುರುಕುಲ"ನ್ನು ಕಳೆದುಕೊಳ್ಳುವಷ್ಟು ಬೇಯಿಸುವುದು ಬೇಡ!

ದ್ವಿದಳ ಧಾನ್ಯಗಳ ಬಳಕೆ ಯಥೇಚ್ಛವಾಗಿರಲಿ

ಹೆರಿಗೆಯ ಬಳಿಕ, ಇದೀಗ ನೀವು ನಿಮ್ಮ ಹೊಟ್ಟೆಯಲ್ಲಿ ಚಲಿಸಿದಂತಾಗುವ ಅನುಭವವನ್ನು ಹೊಂದುತ್ತಿರಬಹುದು ಹಾಗೂ ಕಡಿಮೆ ಪ್ರಮಾಣದ ವಾಯುಪ್ರಕೋಪವನ್ನೂ ಅನುಭವಿಸುತ್ತಿರಬಹುದು. ಲೆಂಟಿಲ್ ಗಳು ಅಥವಾ ಕಪ್ಪು ಹುರುಳಿಯಂತಹ ದ್ವಿದಳ ಧಾನ್ಯಗಳನ್ನು ಒಂದು ಪಾತ್ರೆಯಷ್ಟು ಬೇಯಿಸಿರಿ ಹಾಗೂ ಅವುಗಳನ್ನು ಸೂಪ್ ಗಳಿಗೆ, ಸಾಲ್ಸಾಗಳಿಗೆ, ಅಥವಾ ಸಲಾಡ್ ಗಳಿಗೆ ಬೆರೆಸಿರಿ.

ಜಿಡ್ಡಿನ ಅಂಶವೂ ನಿಮ್ಮ ಆಹಾರದಲ್ಲಿರಲಿ

ನೀವು ಸೇವಿಸುವ ಮೀನು, ಚಿಕನ್, ಮತ್ತು ಪಾಸ್ತಾಗಳಿಗೆ ಸ್ವಲ್ಪ ಆಲೀವ್ ಎಣ್ಣೆ ಅಥವಾ ತುಪ್ಪ ಸೇರಿಸಿ.

ಸಂಸ್ಕರಿತ ಆಹಾರವಸ್ತುಗಳು ಬೇಡವೇ ಬೇಡ

ಸಂಸ್ಕರಿತ ಆಹಾರವಸ್ತುಗಳಾದ ಬಿಳಿ ಅಕ್ಕಿ ಹಾಗೂ ಬಿಳಿ ಬ್ರೆಡ್ ಗಳನ್ನು ವರ್ಜಿಸಿರಿ ಹಾಗೂ ಅದರ ಬದಲಿಗೆ ಸಂಸ್ಕರಿಸದೇ ಇರುವ ತೌಡುಸಹಿತವಾದ ಧಾನ್ಯಗಳನ್ನು ಹೆಚ್ಚು ಹೆಚ್ಚಾಗಿ ಸೇವಿಸಿರಿ. ಚಾಕೊಲೆಟ್ ಕೂಡ ಮಲಬದ್ಧತೆಗೆ ಕಾರಣವಾದೀತು (ತಿನ್ನಲೇ ಬೇಕೆಂದಿದ್ದಲ್ಲಿ, ಸ್ನೈಕರ್ಸ್ ನಂತಹ ಒಣಹಣ್ಣು ಹಾಗೂ ಕಾಳುಗಳ ಮಿಶ್ರಣವನ್ನೊಳಗೊಂಡ ಚಾಕೊಲೆಟ್ ಅನ್ನು ಪ್ರಯತ್ನಿಸಬಹುದು). ಅಂತೆಯೇ ಸರಿಯಾಗಿ ಪಕ್ವವಾಗದೇ ಇರುವ ಬಾಳೆಹಣ್ಣೂ ಕೂಡ. ಇದರ ಬದಲಿಗೆ ಕುರುಕುಲಾದ ಸೇಬನ್ನು ತಿನ್ನಬಹುದು.

ಮಲಬದ್ಧತೆಯನ್ನು ನಿವಾರಿಸುವಲ್ಲಿ ದ್ರವಾಹಾರಗಳ ಪಾತ್ರ ಹಿರಿದು

ಮಲಬದ್ಧತೆಯ ನಿವಾರಣೆಗೆ ದ್ರವಾಹಾರಗಳ ಸೇವನೆಗಿಂತ ದಿವ್ಯೌಷಧಿ ಬೇರೊಂದಿರಲಾರದು! ಹಾಗಾಗಿ ದಿನಕ್ಕೆ ಏನಿಲ್ಲವೆಂದರೂ ಕನಿಷ್ಟ 8 ಲೋಟಗಳಷ್ಟಾದರೂ ನೀರು ಕುಡಿಯಿರಿ. ಕೆಲ ಮಹಿಳೆಯರು ಲಿಂಬೆ ರಸವನ್ನು ಬೆರೆಸಿದ ಬಿಸಿನೀರನ್ನು ಈ ದಿಶೆಯಲ್ಲಿ ಹೆಚ್ಚು ಲಾಭದಾಯಕವೆಂದು ಭಾವಿಸುತ್ತಾರೆ (ಹೀಗೆ ಕುಡಿಯುವುದಾದರೆ ಬೆಳಗ್ಗೆ ಎದ್ದೊಡನೆಯೇ ಕುಡಿಯುವುದೊಳಿತು). ತರಕಾರಿ ಹಾಗೂ ಹಣ್ಣಿನ ರಸಗಳೂ ಈ ನಿಟ್ಟಿನಲ್ಲಿ ಸಹಕಾರಿ.

ಈ ಮೇಲೆ ತಿಳಿಸಿದ ಯಾವೊಂದು ಪರಿಹಾರೋಪಾಯವೂ ಕೆಲಸ ಮಾಡುತ್ತಿಲ್ಲವೆಂದಾದರೆ (ಅಥವಾ ಅಗತ್ಯವಿದ್ದಷ್ಟು ಕೆಲಸ ಮಾಡುತ್ತಿದ್ದರೂ ಅಥವಾ ಚೆನ್ನಾಗಿಯೇ ಕೆಲಸ ಮಾಡುತ್ತಿದ್ದರೂ ಕೂಡ), ನಾರಿನಂಶವುಳ್ಳ ಹೆಚ್ಚುವರಿ ಆಹಾರವಸ್ತುಗಳ ಬಗ್ಗೆ ಗಂಭೀರವಾಗಿ ಯೋಚಿಸಿ. ಗೋಧಿ ತೌಡನ್ನೇ ಮತ್ತು/ಅಥವಾ ಸೈಲಂ ನಂತಹ ನಾರಿನಂಶವಿರುವ ಆಹಾರವಸ್ತುವು ತ್ಯಾಜ್ಯ ವಿಸರ್ಜನೆಗೆ ಅಗತ್ಯವಿರುವ ಎಲ್ಲವನ್ನೂ ಒದಗಿಸುತ್ತದೆ (ಆದರೆ ಇದರ ಅತಿಯಾದ ಬಳಕೆಯೂ ಬೇಡ. ಜೊತೆಗೆ ಕ್ಯಾಲ್ಸಿಯಂಯುಕ್ತ ಆಹಾರವಸ್ತುಗಳನ್ನು ಇವುಗಳೊಡನೆ ಸೇವಿಸಬೇಡಿ. ಏಕೆಂದರೆ, ಮೂಳೆಗಳ ಆರೋಗ್ಯಕ್ಕೆ ಸಂಜೀವಿನಿಯಂತಿರುವ ಕ್ಯಾಲ್ಸಿಯಂ, ದೇಹದಿಂದ ಹೀರಿಕೊಳ್ಳಲ್ಪಡುವುದನ್ನು ಇವು ತಡೆಗಟ್ಟುತ್ತವೆ).

ಅಂತೂ ನಿಮ್ಮ ಆಹಾರಪದ್ಧತಿಯು ಅದ್ಯಾವ ಪ್ರಕಾರದ್ದೇ ಆಗಿರಲೀ, ಅದಕ್ಕೆ ಪೂರಕವಾಗಿ ಎಂಬಂತೆ ಒಂದಿಷ್ಟು ವ್ಯಾಯಾಮದಲ್ಲಿ ತೊಡಗಿಕೊಳ್ಳುವುದನ್ನು ಮರೆಯಬೇಡಿ (ಹೊಟ್ಟೆಗೆ ಸಂಬಂಧಿಸಿದ ಕೆಲವು ವ್ಯಾಯಾಮಗಳು ಮಲವಿಸರ್ಜನೆಗೆ ಬಲು ಸಹಕಾರಿ).

ಇಷ್ಟೆಲ್ಲ ಮಾಡಿದ ಬಳಿಕವೂ ಇನ್ನೂ ಮಲವಿಸರ್ಜನೆಯು ನಿಮ್ಮ ಪಾಲಿಗೆ ಬಲು ಕಷ್ಟದಾಯಕವಾಗಿದೆಯೇ ? ಹಾಗಿದ್ದಲ್ಲಿ ನಿಮ್ಮ ವೈದ್ಯರನ್ನು ಸಂಪರ್ಕಿಸಿರಿ. ನಿಮಗಾಗಿ ಒಂದು ಸುರಕ್ಷಿತವಾದ, ಹಾಗೂ ಪರಿಣಾಮಕಾರಿಯಾದ ವಿರೇಚಕವನ್ನು (ಸ್ಟೂಲ್ ಸಾಪ್ನರ್ ಅಥವಾ ಲ್ಯಾಗ್ಸಟಿವ್) ಅವರು ಖಂಡಿತವಾಗಿಯೂ ಸಲಹೆ ಮಾಡುತ್ತಾರೆ.