ಸಾಕು ಪ್ರಾಣಿಗಳ ಸಾವು ತರುವುದು ಮಕ್ಕಳ ಮನಸ್ಸಿಗೆ ಆಘಾತ: ಪೋಷಕರೇ ಎಚ್ಚರ

ಅಧ್ಯಯನ ವರದಿ

ಸಾಕು ಪ್ರಾಣಿಗಳನ್ನು ಇಷ್ಟಪಡುವವರು ಅದರೊಂದಿಗೆ ಭಾವನಾತ್ಮಕವಾಗಿ ತುಂಬಾನೇ ಬೆಸೆದಿರುತ್ತಾರೆ. ಅಂಥ ಸಾಕುಪ್ರಾಣಿ ಒಂದು ದಿನ ಸಾವನ್ನಪ್ಪಿದಾಗ ಮನಸ್ಸಿಗೆ ತುಂಬಾ ನೋವು ಉಂಟಾಗುವುದು. ಅದರಲ್ಲೂ ಮಕ್ಕಳ ಮನಸ್ಸಿಗೆ ತುಂಬಾನೇ ನೋವುಂಟು ಮಾಡುವುದು. ಯುರೋಪಿಯನ್‌ನ ಎಂ ಜಿ ಹೆಚ್ (Massachusetts General Hospital)ನಲ್ಲಿ ಅಧ್ಯನ ನಡೆಸಿದ ಮಾನಸಿಕ ತಜ್ಞರು ಈ ಕುರಿತು ಹೇಳಿದ್ದಾರೆ.

ಸಾಕು ಪ್ರಾಣಿಗಳು ಸಾವನ್ನಪ್ಪಿದ್ದರೆ ಅದರ ದುಃಖ ಅವರ ಮನಸ್ಸಿನಲ್ಲಿ ಎರಡರಿಂದ ಮೂರು ವರ್ಷ ಇರುತ್ತದೆ, ಇನ್ನು ಕೆಲ ಮಕ್ಕಳಲ್ಲಿ ಆ ಪ್ರಾಣಿಯ ನೆನಪು ಅವರನ್ನು ಕಾಡುತ್ತಿರುತ್ತದೆ ಎಂದು ಅಧ್ಯಯನ ಹೇಳಿದೆ.

ಮಕ್ಕಳ ಬಗ್ಗೆ ಪೋಷಕರು ಗಮನಹರಿಸಬೇಕು

ಮನೆಯ ಸದಸ್ಯನಂತೆ ಸಾಕು ಪ್ರಾಣಿ ಸಾವನ್ನಪ್ಪಿದರೆ ಮನೆಯವರಿಗೆಲ್ಲಾ ತುಂಬಾನೇ ಬೇಸರವಾಗುವುದು. ಆದರೆ ಮಕ್ಕಳ ಮನಸ್ಸಿನಲ್ಲಿ ಆ ನೋವು ತುಂಬಾ ಗಾಢವಾಗಿರುತ್ತದೆ. ಇದರಿಂದ ಮಾನಸಿಕ ಸಮಸ್ಯೆಯ ಲಕ್ಷಣಗಳು ಕಂಡು ಬರುವುದು. ಇದನ್ನು ಪೋಷಕರು ನಿರ್ಲಕ್ಷ್ಯ ಮಾಡಬಾರದು. ಮಕ್ಕಳಲ್ಲಿ ಮಾನಸಿಕ ಆರೋಗ್ಯದ ಲಕ್ಷಣಗಳನ್ನು ಪೋಷಕರು ಗುರುತಿಸುವುದರಿಂದ ಮುಂದೆ ಉಂಟಾಗುವ ಅಪಾಯ ತಪ್ಪಿಸಬಹುದು.

ಹೆಣ್ಣು ಮಕ್ಕಳಿಗಿಂತ ಗಂಡು ಮಕ್ಕಳ ಮನಸ್ಸಿನ ಮೇಲೆ ಹೆಚ್ಚು ಪರಿಣಾಮ ಬೀರುವುದು

ಸಾಕು ಪ್ರಾಣಿಗಳು ಹಾಗೂ ಮನುಷ್ಯರ ನಡುವೆ ಪ್ರೀತಿ ಒಂದು ರೀತಿಯ ಭಾವನಾತ್ಮಕವಾದ ಬಂಧ ಏರ್ಪಟ್ಟಿರುತ್ತದೆ. ಅದರಲ್ಲೂ ಸಾಕು ಪ್ರಾಣಿಗಳ ಸಾವು ಮೊದಲ ಏಳು ವರ್ಷದ ಒಳಗೆ ತುಂಬಾ ಗಾಢವಾದ ಪರಿಣಾಮ ಬೀರುತ್ತದೆ. ಈ ಅಧ್ಯಯನದಲ್ಲಿ 6, 260 ಮಕ್ಕಳು ಅವರ ಪೋಷಕರ ಬಳಿ ಪ್ರಶ್ನೆಗಳನ್ನು ಕೇಳಿ ಮಾಹಿತಿ ಕಲೆ ಹಾಕಲಾಯಿತು. ಇದರಲ್ಲಿ ಶೇ. 63ರಷ್ಟು ಮಕ್ಕಳಲ್ಲಿ ಸಾಕು ಪ್ರಾಣಿಗಳ ಸಾವು ಮಕ್ಕಳ ಮನಸ್ಸಿನ ಮೇಲೆ ತುಂಬಾ ಕೆಟ್ಟ ಪರಿಣಾಮ ಬೀರಿರುವುದು ತಿಳಿದು ಬಂತು. ಅದರಲ್ಲೂ ಹೆಣ್ಣು ಮಕ್ಕಳಿಗಿಂತ ಗಂಡು ಮಕ್ಕಳ ಮನಸ್ಸಿನ ತುಂಬಾ ಪರಿಣಾಮ ಬೀರುವುದು ಎಂದು ಈ ಅಧ್ಯಯನ ಹೇಳಿದೆ.

ಪೋಷಕರು ಏನು ಮಾಡಬೇಕು?

ಮಕ್ಕಳು ತುಂಬಾ ನೆಚ್ಚಿಕೊಂಡಿದ್ದ ಸಾಕು ಪ್ರಾಣಿಗಳು ಸಾವನ್ನಪ್ಪಿದರೆ ಅದರ ನೋವು ಕೆಲವು ದಿನ ಇರುವುದು ಸಹಜ. ಆದರೆ ತುಂಬಾ ದಿನಗಳಾದರು ಅವರಲ್ಲಿ ಆ ನೋವು ಕಾಡುತ್ತಿದ್ದರೆ ಅವರಿಗೆ ಸಮಧಾನ ಪಡಿಸುವಂತೆ ಮಾತನಾಡಿ. ಅಲ್ಲದೆ ಅವರು ಅದನ್ನು ಮರೆಯುವಂತೆ ಮಾಡಿ. ಅಂದರೆ ಬೇರೆ ಸಾಕು ಪ್ರಾಣಿ ತಂದು ಅದರ ಜೊತೆ ಆಡುವಂತೆ ಮಾಡುವುದು ಅಥವಾ ಯಾವುದಾದರೂ ಆಟದಲ್ಲಿ ಅವರನ್ನು ಮಗ್ನರಾಗಿರುವಂತೆ ನೋಡಿಕೊಳ್ಳಿ.