ಹೂವಿನಂಥ ಮಗುವಿನ ಮನಸ್ಸನ್ನು, ನೋಯಿಸಬೇಡಿ ಪ್ಲೀಸ್

ಮಕ್ಕಳು ತಪ್ಪು ಮಾಡುವುದು ಸಹಜ. ಆದರೆ ಪೋಷಕರು ಸಹ ತಪ್ಪು ಮಾಡುತ್ತಾರೆ ಎಂಬುದನ್ನು ನಾವು ಒಪ್ಪಲೇ ಬೇಕು. ಹಿರಿಯರು, ಓದಿದವರು ಆದ ನಾವು ಹಲವಾರು ತಪ್ಪುಗಳನ್ನು ಮಾಡುತ್ತೇವೆ. ಅದರಲ್ಲಿ ತಿಳಿಯದೆ ಮಾಡುವ ತಪ್ಪುಗಳನ್ನು ಬೇಕಾದರು ಕ್ಷಮಿಸಬಹುದು. ಆದರೆ ತಿಳಿದು ತಿಳಿದು ಮಾಡುವ ತಪ್ಪುಗಳನ್ನು ಕ್ಷಮಿಸುವುದು ಸಾಧ್ಯವಿಲ್ಲ.

ಪೋಷಕರು ಮಾಡುವ ತಪ್ಪುಗಳಲ್ಲಿ ಅತ್ಯಂತ ಗುರುತರವಾದುದು, ಮಕ್ಕಳನ್ನು ಇತರರ ಜೊತೆಗೆ ಹೋಲಿಸುವುದು. ಹೌದು ಮಕ್ಕಳು ತಾವು ಅಂದುಕೊಂಡದ್ದಕ್ಕಿಂತ ಕಡಿಮೆ ಸಾಧನೆ ಮಾಡಿದಾಗ ಅವರನ್ನು ಇತರರ ಜೊತೆಗೆ ಹೋಲಿಸಿ ಹೀಗಳೆಯುವ ಕೆಲಸವನ್ನು ಹಲವಾರು ಪೋಷಕರು ಮಾಡುತ್ತಿರುತ್ತಾರೆ. ಇದು ಆರೋಗ್ಯಕರ ಬೆಳವಣಿಗೆಯಲ್ಲ ಎಂದು ಮಕ್ಕಳ ತಜ್ಞರು ಹೇಳುತ್ತಿರುತ್ತಾರೆ.

ನಿಮ್ಮ ಮಗುವನ್ನು ಶಾಲೆಯಲ್ಲಿನ ಅಥವಾ ನೆರೆಹೊರೆಯ ಮಗುವಿನ ಜೊತೆಗೆ ಹೋಲಿಕೆ ಮಾಡುವುದರಿಂದ, ಆ ಮಗುವಿಗೆ ನಿಮ್ಮ ನಿರೀಕ್ಷೆಯ ಮಟ್ಟಕ್ಕೆ ಸಾಧನೆ ಮಾಡಲಾಗಲಿಲ್ಲವಲ್ಲ ಎಂಬ ಜಿಗುಪ್ಸೆಯನ್ನು ನೀವು ಉಂಟು ಮಾಡಿಬಿಡುತ್ತೀರಿ. ತನ್ನ ಆರಂಭಿಕ ಜೀವನದಲ್ಲಿ ಮಗುವು ತನ್ನ ಪೋಷಕರು ಇಷ್ಟಪಟ್ಟಂತೆ ಜೀವಿಸಬೇಕು ಎಂದು ಬಯಸುತ್ತದೆ. ಮತ್ತು ಅದು ಮಗುವಿನ ಕಲಿಕೆಯ ಆರಂಭಿಕ ಕಾಲವಾದ್ದರಿಂದ, ಮಗುವು ನಿಧಾನವಾಗಿ ಹಲವಾರು ವಿಚಾರಗಳನ್ನು ಕಲಿಯುತ್ತ ಸಾಗುತ್ತದೆ.

ಇದಕ್ಕೆ ಮಗುವಿಗೆ ಸಮಯಾವಕಾಶ ಸಹ ಬೇಕಾಗುತ್ತದೆ. ಹಾಗು ಮಗುವಿಗೆ ಈ ಕುರಿತು ಆಸಕ್ತಿ ಸಹ ಇರಬೇಕಾಗುತ್ತದೆ, ಕಲಿಕೆಯಲ್ಲಿ ಆಸಕ್ತಿಯು ಪ್ರಧಾನ ಪಾತ್ರ ನಿರ್ವಹಿಸುತ್ತದೆ. ಆದರೆ ಪೋಷಕರು ಇದಕ್ಕೆಲ್ಲಾ ಸಮಯವನ್ನು ನೀಡದೆ ಮಗುವಿನ ಮೇಲೆ ಒತ್ತಡವನ್ನು ತರುತ್ತಾರೆ. ಮಕ್ಕಳಿಗೂ ಆತ್ಮಾಭಿಮಾನವಿದೆ, ನಿರ್ಲಕ್ಷ ಮಾಡಬೇಡಿ

ಮಗುವನ್ನು ಏಕೆ ಇತರರ ಜೊತೆಗೆ ಹೋಲಿಕೆ ಮಾಡುತ್ತೀರಾ
ಇದು ಪೋಷಕರು ಮಾಡುವ ಅತ್ಯಂತ ದೊಡ್ಡ ಅಪರಾಧ. ಇದರಿಂದ ಮಗುವಿಗೆ ತನ್ನ ಮೇಲೆ ತನಗೆ ಕೀಳರಿಮೆ ಬರುತ್ತದೆ ಮತ್ತು ಆ ಮಗುವಿನ ಮನಸ್ಸಿಗೆ ಇದರಿಂದ ಮಾಸಲಾಗದ ಗಾಯವಾಗುತ್ತದೆ. ಇದು ನಿಮ್ಮ ಮಗುವಿನ ಮೇಲೆ ಅಧಿಕ ಒತ್ತಡವನ್ನು ಉಂಟು ಮಾಡುತ್ತದೆ ಎಂಬುದನ್ನು ಮರೆಯಬೇಡಿ. ಹೋಲಿಕೆ ಮಾಡುವ ಬದಲಿಗೆ ನಿಮ್ಮ ಮಗುವಿಗೆ ಮತ್ತಷ್ಟು ಚೆನ್ನಾಗಿ ಕೆಲಸ ಮಾಡುವಂತೆ ಹೇಳಿ.

ಒಂದು ಅಧ್ಯಯನದ ಪ್ರಕಾರ ಮಕ್ಕಳು ಸಾಮಾನ್ಯವಾಗಿ ಕಡಿಮೆ ಆತ್ಮವಿಶ್ವಾಸವನ್ನು ಹೊಂದಿರುತ್ತಾರಂತೆ. ಕೀಳರಿಮೆಯು ಮಕ್ಕಳಲ್ಲಿ ಬೆಳೆಯುತ್ತದೆ. ಇದರಿಂದ ನಿಮ್ಮ ಮಗು ಪ್ರಾಪ್ತ ವಯಸ್ಸಿಗೆ ಬಂದಾಗ ಸಹ ಇದರಿಂದ ಅವರಿಗೆ ತೊಂದರೆಯುಂಟಾಗುತ್ತದೆ.

ಇದಲ್ಲದೆ ನಿಮ್ಮ ಮಗು ಇತರರನ್ನು ನೋಡಿ ಅಸೂಯೆಪಡುವ ಗುಣವನ್ನು ಸಹ ಬೆಳೆಸಿಕೊಳ್ಳುತ್ತದೆ. ಯಾರೊಂದಿಗೆ ನಿಮ್ಮ ಮಗುವನ್ನು ನೀವು ಹೋಲಿಸುತ್ತೀರೋ, ಅವರ ಮೇಲೆ ಇನ್ನೂ ಹೆಚ್ಚಿನ ಅಸೂಯೆ ಇವರಿಗೆ ಇರುತ್ತದೆ. ಎಲ್ಲರ ಮೇಲೆ ಅಸಹನೆ ಸಹ ಇವರಿಗೆ ಬೆಳೆಯುತ್ತದೆ.