ನಿಮ್ಮ ಕಂದನ ಕೋಮಲ ತ್ವಚೆಗೆ ಸೂಕ್ತವಾದ ಎಣ್ಣೆಗಳು

ಸೂರ್ಯಕಾಂತಿ ಎಣ್ಣೆ

ಬಹುತೇಕ ಅಡುಗೆಗಾಗಿ ಬಳಸುವ ಸೂರ್ಯಕಾಂತಿ ಎಣ್ಣೆ ಮಗುವಿನ ತ್ವಚೆಗೂ ಸೂಕ್ತವಾಗಿದೆ. ಈ ಎಣ್ಣೆಯಲ್ಲಿಯೂ ಉತ್ತಮ ಪ್ರಮಾಣದ ವಿಟಮಿನ್ ಇ ಇದ್ದು ಚರ್ಮದ ಕಾಂತಿ ಹೆಚ್ಚಿಸಲು ನೆರವಾಗುತ್ತದೆ. ಒಂದು ವೇಳೆ ಮಗುವಿನ ಚರ್ಮ ಅತಿ ಸಂವೇದಿಯಾಗಿದ್ದರೆ ಈ ಎಣ್ಣೆಯನ್ನು ಬಳಸಬೇಡಿ. ಉಳಿದಂತೆ ವರ್ಷದ ಎಲ್ಲಾ ದಿನಗಳಲ್ಲೂ ಈ ಎಣ್ಣೆಯನ್ನು ಬಳಸಬಹುದು.

ಕ್ಯಾಮೋಮೈಲ್ ಹೂವಿನ ಎಣ್ಣೆ

ಒಂದು ವೇಳೆ ಮಗುವಿನ ಚರ್ಮ ಅತಿಸಂವೇದಿಯಾಗಿದ್ದರೆ ಕ್ಯಾಮೋಮೈಲ್ ಹೂವಿನ ಎಣ್ಣೆಯನ್ನು ಬಳಸಬಹುದು. ಇದು ಈಗತಾನೇ ಹುಟ್ಟಿದ ಮಗುವಿನಿಂದ ಹಿಡಿದು ನಾಲ್ಕೈದು ವರ್ಷದ ಮಕ್ಕಳಿಗೂ ಸೂಕ್ತವಾಗಿದೆ. ಮಗುವಿನ ಚರ್ಮದಲ್ಲಿ ಸೂಕ್ಷ್ಮ ಗೀರುಗಳು ಮತ್ತು ಇತರ ತೊಂದರೆಗಳಿದ್ದರೂ ಈ ಎಣ್ಣೆಯ ಮಸಾಜ್ ನಿಂದ ಶೀಘ್ರವಾಗಿ ಗುಣವಾಗುತ್ತದೆ. ಮಸಾಜ್ ನ ಬಳಿಕ ಶೀಘ್ರವಾಗಿ ಮಗು ನಿದ್ದೆಗೆ ಜಾರುತ್ತದೆ. ಕೊಂಚ ದುಬಾರಿಯಾಗಿರುವ ಈ ಎಣ್ಣೆಯನ್ನು ಸ್ನಾನದ ಬಳಿಕ ಅಲ್ಪ ಪ್ರಮಾಣದಲ್ಲಿ ಮಸಾಜ್ ಮಾಡಿ. ಉದರಶೂಲೆ (colic) ಯಿಂದ ಬಳಲುತ್ತಿರುವ ಮಗುವಿಗೂ ಈ ಎಣ್ಣೆಯ ಮಜ್ಜನ ಪರಿಣಾಮಕಾರಿಯಾಗಿದೆ.

ಟೀ ಟ್ರೀ ಎಣ್ಣೆ (Tea tree Oil)

ಈ ಎಣ್ಣೆಯಲ್ಲಿ ನಂಜುನಿರೋಧಕ (antiseptic) ಗುಣಗಳಿರುವುದರಿಂದ ಮಗುವಿನ ಚರ್ಮಕ್ಕೆ ಸೂಕ್ತವಾಗಿದೆ. ಆದರೆ ಈ ಎಣ್ಣೆಯನ್ನು ವೈದ್ಯರ ಸಲಹೆಯ ಬಳಿಕವೇ ಉಪಯೋಗಿಸುವುದು ಅಗತ್ಯ. ಮಗುವಿನ ಚರ್ಮದ ಹಲವು ವ್ಯಾಧಿಗಳಿಗೆ ಈ ಎಣ್ಣೆಯ ಮಸಾಜ್ ಫಲ ನೀಡುತ್ತದೆ. ಸ್ನಾನದ ಬಳಿಕ ಈ ಎಣ್ಣೆಯ ನಯವಾದ ಮಸಾಜ್ ಮಾಡಿದರೆ ಮಗು ಶೀಘ್ರವಾಗಿ ನಿದ್ದೆಗೆ ಜಾರುತ್ತದೆ. ಈ ಎಣ್ಣೆಯನ್ನು ವರ್ಷದ ಎಲ್ಲಾ ಕಾಲದಲ್ಲಿ ಉಪಯೋಗಿಸಬಹುದು.

ಕ್ಯಾಲೆಂಡುಲಾ ಎಣ್ಣೆ (Calendula Oil)

ಈ ಎಣ್ಣೆ ಸಹಾ ಮಗುವಿನ ಕೋಮಲ ತ್ವಚೆಗೆ ಉತ್ತಮವಾಗಿದೆ. ಸ್ನಾನದ ಬಳಿಕ ಅಲ್ಪಪ್ರಮಾಣದಲ್ಲಿ ಹಚ್ಚಿ ಮಸಾಜ್ ಮಾಡಿದರೆ ಚರ್ಮ ಕಾಂತಿಯುಕ್ತವಾಗುತ್ತದೆ ಹಾಗೂ ಮಗು ಸುಖನಿದ್ದೆಗೆ ಜಾರುತ್ತದೆ. ಈ ಎಣ್ಣೆಯಲ್ಲಿ ನಸುವಾದ ಸುವಾಸನೆ ಇರುವುದರಿಂದ ಮಗುವಿನ ಮೂಗಿನ ಬಳಿ ಹಚ್ಚುವುದು ಸೂಕ್ತವಲ್ಲ. ಈ ಎಣ್ಣೆಯನ್ನು ವರ್ಷದ ಎಲ್ಲಾ ಕಾಲದಲ್ಲಿ ಉಪಯೋಗಿಸಬಹುದು.

ಹರಳೆಣ್ಣೆ (Castor Oil)

ಅತ್ಯಂತ ದಪ್ಪನೆಯ ಎಣ್ಣೆಯಾದ ಹರಳೆಣ್ಣೆ ಸಹಾ ಮಗುವಿನ ಚರ್ಮಕ್ಕೆ ಸೂಕ್ತವಾಗಿದೆ. ಹರಳೆಣ್ಣೆ ಮಗುವಿನ ಚರ್ಮ, ಉಗುರು ಮತ್ತು ಕೂದಲ ಬೆಳವಣಿಗೆಗೆ ಪೂರಕವಾಗಿದೆ. ಆದರೆ ಈ ಎಣ್ಣೆಯನ್ನು ತುಟಿ, ಕಣ್ಣು ಮತ್ತು ಮೂಗಿನ ಬಳಿ ಹಚ್ಚದಿರಿ. ಪ್ರತಿದಿನದ ಸ್ನಾನದ ಬಳಿಕ ನಿಮಗೆ ಸೂಕ್ತವಾದ ಎಣ್ಣೆಯನ್ನು ಆಯ್ದುಕೊಂಡು ಮಗುವಿಗೆ ಮಸಾಜ್ ಮಾಡುವ ಮೂಲಕ ನಿಮ್ಮ ಮತ್ತು ನಿಮ್ಮ ಮಗುವಿನ ನಡುವಣ ಬಾಂಧವ್ಯ ಇನ್ನಷ್ಟು ಹೆಚ್ಚುವುದು.