ಪೋಷಕರೇ, ಮಕ್ಕಳನ್ನು ಸಿಹಿ ತಿನಿಸಿನಿಂದ ದೂರವಿರಿಸಿ

ನಿಗದಿತ ಸಮಯದಲ್ಲಿ ಕಡಿಮೆ ಪ್ರಮಾಣದಲ್ಲಿ ಮಾತ್ರ ಸಿಹಿ ನೀಡಿ

ನಿಮ್ಮ ಮಕ್ಕಳನ್ನು ಬಲವಂತವಾಗಿ ಸಕ್ಕರೆಯಿಂದ ಬಿಡಿಸಲು ಯತ್ನಿಸಿದಷ್ಟೂ ಮಕ್ಕಳು ಬೇರೆ ಮೂಲಗಳಿಂದ ಇನ್ನಷ್ಟು ಹೆಚ್ಚು ಸಕ್ಕರೆಯನ್ನು ತಿನ್ನತೊಡಗುತ್ತಾರೆ. ಆದ್ದರಿಂದ ಮಕ್ಕಳಿಗೆ ನಯವಾಗಿ ತಿಳಿಸಿ ನಿಯಮಿತ ಸಮಯದಲ್ಲಿಯೇ ನಿಗದಿತ ಪ್ರಮಾಣ (ಚಿಕ್ಕ ಪ್ರಮಾಣ)ದಲ್ಲಿ ಮಾತ್ರ ಸಿಹಿಯನ್ನು ನೀಡಿ ಅಷ್ಟಕ್ಕೇ ತೃಪ್ತಿಪಟ್ಟುಕೊಳ್ಳುವಂತೆ ಮನವೊಲಿಸಿ.

ಕತ್ತರಿಸುವ ಗಾತ್ರ ಚಿಕ್ಕದಾಗಿರಲಿ

ಮನೆಗೆ ಕೇಕ್ ಅಥವಾ ಇತರ ಸಿಹಿತಿಂಡಿಗಳನ್ನು ತಂದರೆ ಅದನ್ನು ಸಾಧ್ಯವಾದಷ್ಟು ಚಿಕ್ಕದಾಗಿ ಕತ್ತರಿಸಿ ಮಕ್ಕಳಿಗೆ ಒಂದು ಪಾಲು ಮಾತ್ರ ನೀಡಿ. ಇದು ತೀರಾ ಚಿಕ್ಕದಾಗಿಯೂ ಇರಬಾರದು! ಆಗ ಮಕ್ಕಳು ಎರಡು ತುಂಡು ಬೇಕು ಎಂದು ಹಠ ಹಿಡಿಯುತ್ತವೆ. ಮಕ್ಕಳಿಗೆ ಇಷ್ಟೇ, ಇನ್ನುಳಿದವು ಹಿರಿಯರಿಗೆ ಎಂದು ನಯವಾಗಿ ತಿಳಿಸಿ.

ಸಂಭ್ರಮಿಸುವ ನೆವಕ್ಕೆ ಸಿಹಿ ಬೇಡ

ಸಾಮಾನ್ಯವಾಗಿ ಯಾವುದೇ ಶುಭಸುದ್ದಿ ಅಥವಾ ಸಂಭ್ರಮವನ್ನು ಸಿಹಿತಿನ್ನುವ ಮೂಲಕ ಆಚರಿಸುತ್ತೇವೆ. ಅಂತೆಯೇ ಮಕ್ಕಳೂ ಯಾವುದೇ ಶುಭಸುದ್ದಿ ತಿಳಿದರೂ ಸಿಹಿಯನ್ನೇ ನಿರೀಕ್ಷಿಸುತ್ತಾರೆ. ಬದಲಿಗೆ ಆರೋಗ್ಯಕರವಾದ ಬೇರಾವುದಾದರೂ ತಿಂಡಿಯನ್ನು ತಯಾರಿಸಿ. ಹೆಚ್ಚಿನ ಸಂದರ್ಭದಲ್ಲಿ ಮಕ್ಕಳನ್ನು ಸುಮ್ಮನಾಗಿಸಲು ಸಹಾ ಸಿಹಿಯ ಲಂಚವನ್ನು ನೀಡುತ್ತೇವೆ. ಇದು ಅತ್ಯಂತ ದೊಡ್ಡ ತಪ್ಪು. ಇದರ ರುಚಿ ಹತ್ತಿದ ಮಕ್ಕಳು ಸಿಹಿ ಪಡೆಯಲೆಂದೇ ಸುಳ್ಳು ನೆಪ ತೆಗೆದು ವರಾತ ತೆಗೆಯುತ್ತವೆ. ಇದರ ಬದಲಿಗೆ ಹೊರಗೆ ಕರೆದುಕೊಂಡು ಹೋಗುವುದು, ಮುಂದಿನ ವಾರ ಪಾರ್ಕಿಗೆ ಹೋಗುವುದು, ಜೋಕಾಲಿ ಆಟದಲ್ಲಿ ನಾಲ್ಕು ಸುತ್ತು ಹೆಚ್ಚು ಜೀಕುವುದು ಮೊದಲಾದ ಪ್ರಲೋಭನೆಗಳನ್ನು ಒಡ್ಡಿ.

ನೀವೂ ಸಿಹಿಯಿಂದ ದೂರವಿರಿ

ನೆನಪಿಡಿ, ನಿಮ್ಮ ಮಕ್ಕಳು ನಿಮ್ಮ ಅಭ್ಯಾಸಗಳನ್ನೇ ಅನುಸರಿಸುತ್ತಾರೆ. ಒಂದು ವೇಳೆ ಅರಿವಿಲ್ಲದೇ ನೀವೂ ಸಿಹಿತಿನಿಸಿನ ವ್ಯಸನಿಯಾಗಿದ್ದರೆ ಸ್ವಾಭಾವಿಕವಾಗಿ ನಿಮ್ಮ ಮಗುವೂ ಸಿಹಿಗೆ ವ್ಯಸನಿಯಾಗಿಯೇ ಇರುತ್ತದೆ. ಆದ್ದರಿಂದ ಮಕ್ಕಳಿಗೆ ಬುದ್ದಿ ಹೇಳುವ ಮುನ್ನ ನಿಮ್ಮ ವ್ಯಸನವನ್ನು ಬಲವಂತವಾಗಿಯಾದರೂ ಹತ್ತಿಕ್ಕಿಕೊಳ್ಳಿ. ಇದು ನಿಮ್ಮ ಆರೋಗ್ಯಕ್ಕೇ ಒಳ್ಳೆಯದು.

ಸಕ್ಕರೆಯ ಪ್ರಭಾವದ ಬಗ್ಗೆ ತಿಳಿಸಿ ಹೇಳಿ

ಅತಿ ಹೆಚ್ಚು ಸಕ್ಕರೆ ತಿನ್ನುವುದರಿಂದ ಏನು ತೊಂದರೆಯಾಗುತ್ತದೆ ಎಂಬ ಬಗ್ಗೆ ನಿಮ್ಮ ಮಕ್ಕಳಿಗೆ ನಯವಾಗಿ ತಿಳಿಸಿಹೇಳಿ. ಮಕ್ಕಳಿಗೆ ಇದರ ಪರಿಣಾಮ ಒಮ್ಮೆಲೇ ಆಗದೇ ಇದ್ದರೂ ಪಾಠವನ್ನು ಹಲವಾರು ಬಾರಿ ಮನನ ಮಾಡುವುದರಿಂದ ನಿಧಾನವಾಗಿಯಾದರೂ ಮಕ್ಕಳು ಈ ಬಗ್ಗೆ ಅರಿವು ಮೂಡಿಸಿಕೊಳ್ಳುತ್ತಾರೆ. ನೀತಿ ಪಾಠಗಳು ಇದಕ್ಕೆ ಅತ್ಯುತ್ತಮವಾಗಿವೆ. ಈಸೋಪನ ಕಥೆಗಳಲ್ಲಿ ಬರುವ ನೀತಿಗಳಲ್ಲಿ ಅತಿಯಾಸೆಯಿರುವ ಕಥೆಗಳನ್ನು ಆರಿಸಿ ಕಥೆಯಲ್ಲಿ ಬರುವ ಆಸೆಯನ್ನು ಸಕ್ಕರೆಗೆ ಬದಲಿಸಿ ಹೆಣೆಯುವ ಕಥೆ ನಿಜವಾಗಿಯೂ ಮಕ್ಕಳಿಗೆ ನಾಟುತ್ತದೆ.

The American Heart Association ಪ್ರಕಾರ

ಪ್ರತಿದಿನ ಸೇವಿಸಲು The American Heart Association (AHA) ಸಲಹೆ ಮಾಡಿರುವ ಸಕ್ಕರೆಯ ಪ್ರಮಾಣ ಈ ಕೆಳಗಿನಂತಿದೆ

ಮೂರರಿಂದ ನಾಲ್ಕು ವಯಸ್ಸಿನ ಮಕ್ಕಳು: 1,200 ರಿಂದ 1,400 ಕ್ಯಾಲೋರಿ. ಸಕ್ಕರೆಯ ಪ್ರಮಾಣ ಗರಿಷ್ಟ 16 ಗ್ರಾಂ ಪ್ರತಿದಿನಕ್ಕೆ(ಸುಮಾರು ನಾಲ್ಕು ಚಿಕ್ಕ ಚಮಚದಷ್ಟು)

ನಾಲ್ಕರಿಂದ ಎಂಟು ವಯಸ್ಸಿನ ಮಕ್ಕಳು: 1,600 ಕ್ಯಾಲೋರಿ ಬೇಕು. ಆದರೆ ಸಕ್ಕರೆಯ ಪ್ರಮಾಣ ಗರಿಷ್ಟ 12 ಗ್ರಾಂ (ಸುಮಾರು ಮೂರು ಚಿಕ್ಕ ಚಮಚದಷ್ಟು)

ಹೆಚ್ಚಿನ ಕ್ಯಾಲೋರಿಗಳು ಇತರ ಆಹಾರದಿಂದ ಲಭ್ಯವಾಗುತ್ತದೆ.

ಎಂಟರಿಂದ ಸುಮಾರು ಹದಿನಾಲ್ಕು ವರ್ಷದ ಮಕ್ಕಳಿಗೆ: 1,800 ರಿಂದ 2,000 ಕ್ಯಾಲೋರಿ. ಸಕ್ಕರೆಯ ಪ್ರಮಾಣ 20 ರಿಂದ 32 ಗ್ರಾಂ (ಐದರಿಂದ ಎಂಟು ಚಿಕ್ಕ ಚಮಚದಷ್ಟು)

ಹದಿನೈದು ವರ್ಷದ ಮೇಲ್ಪಟ್ಟ ಮಕ್ಕಳ ದೈಹಿಕ ಅಳತೆಯ ಮೇಲೆ ಅಗತ್ಯವೂ ಹೆಚ್ಚುಕಡಿಮೆಯಾಗುತ್ತದೆ.

ವಯಸ್ಕ ಪುರುಷರಿಗೆ: ಪ್ರತಿದಿನ ನೂರೈವತ್ತು ಕ್ಯಾಲೋರಿ (37.5 ಗ್ರಾಂ ಅಥವಾ 9 ಚಿಕ್ಕ ಚಮಚದಷ್ಟು)

ವಯಸ್ಕ ಮಹಿಳೆಯರಿಗೆ:ಪ್ರತಿದಿನ ನೂರು ಕ್ಯಾಲೋರಿ(25 ಗ್ರಾಂ 6 ಚಿಕ್ಕ ಚಮಚದಷ್ಟು).

ಆಘಾತಕಾರಿ ಮಾಹಿತಿ

1) ಒಂದು ಸಾಮಾನ್ಯ ಬಾರ್ ಚಾಕಲೇಟಿನಲ್ಲಿ 78 ಗ್ರಾಂ ಸಕ್ಕರೆ ಇರುತ್ತದೆ.

2) ತೀರಾ ಚಪ್ಪೆ ಎನ್ನುವ ಒಂದು ಸಾಮಾನ್ಯ ಬನ್ ನಲ್ಲಿ ಎರಡೂವರೆ ಗ್ರಾಂ ಸಕ್ಕರೆ ಇರುತ್ತದೆ. ಸಿಹಿ ಬನ್ ನಲ್ಲಿ ಏಳು ಗ್ರಾಂ ಸಕ್ಕರೆ ಇರುತ್ತದೆ

3) ಒಂದು ಚಮಚ ಟೊಮೇಟೊ ಸಾಸ್, ಕೆಚಪ್ ಅಥವಾ ಬೇರೆ ಯಾವುದೇ ಸಿದ್ಧರೂಪದ ದ್ರವಗಳಲ್ಲಿ: ಹದಿನೈದು ಗ್ರಾಂ.