ಮಕ್ಕಳಲ್ಲಿ ತುಂಬಾ ಸಂಕೋಚ ಸ್ವಭಾವ ಒಳ್ಳೆಯದಲ್ಲ!

Updated: Monday, September 3, 2012, 18:06 [IST]

ಕೆಲವೊಂದು ಮಕ್ಕಳು ತುಂಬಾ ನಾಚಿಕೆ ಸ್ವಭಾವದವರಾಗಿರುತ್ತಾರೆ. ಪೋಷಕರು ನಮ್ಮ ಮಗು ತುಂಬಾ ಸೈಲೆಂಟ್ ಯಾರ ಜೊತೆಯೂ ಮಾತನಾಡುವುದಿಲ್ಲ ಎಂದು ಹೆಮ್ಮಯಿಂದ ಹೇಳಿಕೊಳ್ಳುತ್ತಾರೆ. ಸ್ವಲ್ಪ ನಾಚಿಕೆ ಮತ್ತು ಸೈಲೆಂಟ್ ಆಗಿರುವುದು ಒಳ್ಳೆಯ ಗುಣವೇ, ಅದೇ ಮಿತಿಯಾದರೆ ಆ ಮಗುವಿನ ಗುಣವೇ ಮುಂದೆ ಅದರ ಭವಿಷ್ಯಕ್ಕೆ ಮುಳುವಾಗುತ್ತದೆ!

ಅದು ಹೇಗೆ ಸಾಧ್ಯ ಎಂದು ಪ್ರಶ್ನೆ ಬಂದಿರಬಹುದಲ್ಲವೇ? ಹೌದು ಮಗು ತುಂಬಾ ಸಂಕೋಚ ಸ್ವಭಾವ ಹೊಂದಿದ್ದರೆ ಬೆಳೆದ ಮೇಲೆ ಕೂಡ ಅದೇ ಗುಣ ಇದ್ದರೆ ಬೇರೆಯವರ ಜೊತೆ ಏನಾದರೂ ಕೇಳಿ ತಿಳಿದುಕೊಳ್ಳುವುದು, ಮಕ್ಕಳ ಜೊತೆ ಬೆರೆಯುವುದು ಕಷ್ಟವಾಗುತ್ತದೆ. ಆಗ ಅಂತಹ ಮಕ್ಕಳ ಜೊತೆ ಇತರ ಮಕ್ಕಳು ಬೆರೆಯುವುದಿಲ್ಲ, ನಿಮ್ಮ ಮಗು ಒಂಟಿಯಾಗುತ್ತದೆ, ಇದರಿಂದ ಖಿನ್ನತೆ ಕೂಡ ಕಾಡುವಂತಾಗುವುದು.

ಆದ್ದರಿಂದ ನಿಮ್ಮ ಮಗು ತುಂಬಾ ಸಂಕೋಚ ಸ್ವಭಾವ ಹೊಂದಿದ್ದರೆ ಈ ಕೆಳಗಿನ ಸಲಹೆ ಬಳಸಿ ಅದನ್ನು ಹೋಗಲಾಡಿಸಿ ಮಗುವಿನಲ್ಲಿ ಆತ್ಮವಿಶ್ವಾಸ ತುಂಬಿರಿ:

ಮಗುವಿನ ಮನಸ್ಸನ್ನು ಬದಲಾಯಿಸಿ: ಮಗುವನ್ನು ಮಕ್ಕಳ ಜೊತೆ ಆಡುವಂತೆ ಪ್ರೋತ್ಸಾಹಿಸಿ, ನೆಂಟರ ಮನೆಗೆ ಕರೆದುಕೊಂಡು ಹೋಗಿ, ಬೇರೆ ಮಕ್ಕಳನ್ನು ಮನೆಗೆ ಕರೆದು ಸ್ವಲ್ಪ ಹೊತ್ತು ನಿಮ್ಮ ಮಗುವಿನ ಜೊತೆ ಆಡಲು ಹೇಳಿ. ಈ ರೀತಿ ಮಾಡಿದರೆ ಆ ಮಗು ಸ್ವಲ್ಪ ನಾಚಿಕೆ ಸ್ವಭಾವದಿಂದ ಹೊರಬರುತ್ತದೆ.

ಮಗುವಿನ ಜೊತೆ ಮಾತನಾಡಿ: ಆ ಮಗುವನ್ನು ಅದರ ಪಾಡಿಗೆ ಇರಲು ಬಿಡದೆ ಕರೆದು-ಕರೆದು ಮಾತನಾಡಿಸಿ. ಮಗುವನ್ನು ಹುರಿದುಂಬಿಸಿ, ಕ್ಲಾಸ್ ನಲ್ಲಿ ಆಟ -ಪಾಠಗಳಲ್ಲಿ ಸಕ್ರೀಯವಾಗಿ ಭಾಗವಹಿಸುವಂತೆ ಪ್ರೋತ್ಸಾಹಿಸಿ.

ಪಠ್ಯೇತರ ವಿಷಯಗಳತ್ತಲೂ ಗಮನ ಹರಿಸಲು ಹೇಳಿ: ಡಾನ್ಸ್, ಸಂಗೀತ, ಕರಾಟೆ, ಯೋಗ ಹೀಗೆ ಯಾವುದಾದರೂ ಒಂದು ಕ್ಲಾಸ್ ಗೆ ಸೇರಿಸಿ. ಸ್ನೇಹಿತರ ಜೊತೆ ಬೆರೆಯಲು ಹೇಳಿ. ಈ ರೀತಿ ಮಾಡಿದರೆ ಮಗು ತನ್ನ ಸಂಕೋಚ ಸ್ವಭಾವದಿಂದ ಹೊರಬಂದು ಆತ್ಮವಿಶ್ವಾಸವನ್ನು ಬೆಳೆಸಿಕೊಳ್ಳುತ್ತಾ ಹೋಗುತ್ತದೆ.

ಯಾವತ್ತಿಗೂ ಒಂಟೆಯಾಗಿರಲು ಬಿಡಬೇಡಿ: ಸಂಕೋಚದ ಸ್ವಭಾವದ ಮಗುವನ್ನು ಒಂಟಿಯಾಗಿರಲು ಬಿಡಬೇಡಿ. ಅದು ಮತ್ತಷ್ಟು ಮೂಡಿಯಾಗುತ್ತದೆ. ಆ ಮಗು ಶಾಲೆಯಿಂದ ಬಂದ ನಂತರ ಶಾಲೆಯ ವಿಶೇಷ ಕೇಳಿ. ಆಗಾಗ ಹೊರಗಡೆ ಸುತ್ತಾಡಲು ಕರೆದುಕೊಂಡು ಹೋಗಬೇಕು. ಈ ಮಾಡುತ್ತಿದ್ದರೆ ಮಗು ಸಂಕೋಚ ಸ್ವಭಾವ ಬಿಟ್ಟು ಇತರರೊಡನೆ ಬೆರೆಯಲು ಪ್ರಾರಂಭಿಸುತ್ತದೆ. ಇಷ್ಟೆಲ್ಲಾ ಮಾಡಿ ಮಗು ಸಂಕೋಚ ಸ್ವಭಾವ ಬಿಡದಿದ್ದರೆ ಕೌನ್ಸಿಂಗ್ ಕೊಡಿಸಬೇಕು.

ಮಗುವಿನಲ್ಲಿ ಚಿಕ್ಕದಿರುವಾಗಲೇ ಆತ್ಮವಿಶ್ವಾಸ ತುಂಬಿದರೆ ಮಾತ್ರ ಮುಂದೆ ಜೀವನದಲ್ಲಿ ಸವಾಲನ್ನು ಕಂಡರೆ ಹೆದರಿ ಓಡದೆ ಧೈರ್ಯವಾಗಿ ಎದುರಿಸುತ್ತದೆ.