ಎಚ್ಚರ, ಮಕ್ಕಳು ನೆಟ್ ನಲ್ಲಿ ಬ್ಲೂಫಿಲ್ಮ್ ನೋಡುತ್ತಿರಬಹುದು!

ಅದು ಕುತೂಹಲದ ಪ್ರಾಯ, ಗೊತ್ತಿಲ್ಲದ ವಿಚಾರಗಳನ್ನು ತಿಳಿಯಬೇಕೆಂಬ ತುಡಿತ. ಆದರೆ ಅದು ಒಳ್ಳೆಯ ವಿಷಯಕ್ಕಾದರೆ ಸರಿ, ಅದರ ಬದಲಾಗಿ ಬೇಡದ ವಿಷಯಗಳನ್ನು ತಿಳಿಯಬೇಕೆಂಬ ಮಕ್ಕಳ ಕುತೂಹಲವೆ ಹೆತ್ತವರ ನಿದ್ರೆ ಕೆಡಿಸುತ್ತದೆ.

ಅದರಲ್ಲೂ ಈಗ ಪರ್ಸನಲ್ ಕಂಪ್ಯೂಟರ್, ಲ್ಯಾಪ್ ಟಾಪ್ ಜೊತೆ ಇಂಟರ್ ನೆಟ್ ಸೌಲಭ್ಯವನ್ನೂ ಮಕ್ಕಳಿಗೆ ಕೊಡಿಸುವುದರಿಂದ ಅವರು ತಮ್ಮ ವಯಸ್ಸಿಗೆ ಹೊಂದದ ಫಿಲಂಗಳನ್ನು ಸುಲಭವಾಗಿ ಡೌನ್ ಲೋಡ್ ಮಾಡಿ ನೋಡುತ್ತಾರೆ. ಇವುಗಳು ಮಕ್ಕಳನ್ನು ಕೆಟ್ಟ ಹಾದಿಯಲ್ಲಿ ನಡೆಯುವಂತೆ ಪ್ರಚೋದಿಸುತ್ತವೆ. ಇಂತಹ ನಡವಳಿಕೆಗೆ ಕಡಿವಾಣ ಹಾಕುವುದು ಹೇಗೆ ಎಂಬುದೇ ಸಾಕಷ್ಟು ಪೋಷಕರ ತಲೆನೋವು.

ಆದರೆ ಈ ಕೆಳಗಿನ ಸಲಹೆಗಳನ್ನು ಪಾಲಿಸಿ ಮಕ್ಕಳನ್ನು ಸರಿಯಾದ ಹಾದಿಯಲ್ಲಿ ನಡೆಯುವಂತೆ ಮಾಡಬಹುದು.

* ಇಂಟರ್ ನೆಟ್ ಉಪಯೋಗಿಸುವುದನ್ನು ನಿರಾಕರಿಸಲು ಸಾಧ್ಯವಿಲ್ಲ ಏಕೆಂದರೆ ಮಕ್ಕಳ ಕಲಿಕೆಗೆ ಸಂಬಂಧಪಟ್ಟ ವಿಷಯಗಳಿಗೆ ಇಂಟರ್ ನೆಟ್ ಬಳಸಲೇ ಬೇಕಾಗುತ್ತದೆ. ಒಂದು ವೇಳೆ ಇಂಟರ್ ನೆಟ್ ನೋಡಬೇಡಿ ಎಂದು ಒತ್ತಾಯ ಹಾಕಿದರೆ ಸೈಬರ್ ಗಳಿಗೆ ಹೋಗುತ್ತಾರೆ. ಆದ್ದರಿಂದ ಇಂಟರ್ ನೆಟ್ ಸೌಲಭ್ಯವನ್ನು ಮಕ್ಕಳು ಪ್ರಯೋಜನಕಾರಿಯಾಗಿ ಹೇಗೆ ಉಪಯೋಗಿಸಬೇಕು ಎಂಬುದರ ಬಗ್ಗೆ ಹೆತ್ತವರು ತೀರ್ಮಾನಿಸಬೇಕು.

* ನೀವು ಮನೆಯಲ್ಲಿ ಇಲ್ಲದಿದ್ದಾಗ ಮಕ್ಕಳು ಇಂಟರ್ ನೆಟ್ ಉಪಯೋಗಿಸದ ಹಾಗೆ ನೋಡಿಕೊಳ್ಳಿ. ಆದರೆ ಗಂಡ-ಹೆಂಡತಿ ಇಬ್ಬರೂ ದುಡಿಯುವರಾದರೆ ಮಕ್ಕಳಿಗೆ ಇಂಟರ್ ನೆಟ್ ನೋಡಲು ಇಂತಿಷ್ಟು ಸಮಯ ಅಂತ ನಿಗದಿ ಪಡಿಸಬೇಕು. ನಂತರ ಅವರು ಏನು ಮಾಡುತ್ತಿದ್ದಾರೆ ಎಂಬುದರ ಮೇಲೆ ನಿಗಾ ಇಡಬೇಕು

* ಮಕ್ಕಳಿಗೆ ಪಠ್ಯ ವಿಷಯ ಮಾತ್ರ ನೋಡಿ ಎಂದು ಒತ್ತಡ ಹಾಕದೆ ಗೇಮ್, ಸಂಗೀತ ಹೀಗೆ ಮನರಂಜನೆಗೆ ಬಳಸಲು ಸಹ ಅವಕಾಶ ನೀಡಬೇಕು. ಅಲ್ಲದೆ ಡೌನ್ ಲೋಡ್ ಲಿಮಿಟ್ ನಲ್ಲಿ ಇಂಟರ್ ನೆಟ್ ಉಪಯೋಗಿಸುವಂತೆ ಮಾಡುವುದರಿಂದ ಮಕ್ಕಳು ವಯಸ್ಕರ ಫಿಲಂ ನೋಡದಂತೆ ಕಡಿವಾಣ ಹಾಕಬಹುದು.

* ವಯಸ್ಕರ ಸಿನಿಮಾಗಳು ಇಂಟರ್ ನೆಟ್ ನ್ಲಲಿ ಮಾತ್ರವಲ್ಲ, ಸಿ.ಡಿ ಅಂಗಡಿಗಳಲ್ಲಿಯೂ ದೊರೆಯುವುದರಿಂದ ಮಕ್ಕಳು ಆಗಾಗ ಯಾವುದಾದರೂ ಹತ್ತಿರದಲ್ಲಿರುವ ಸಿ.ಡಿ ಅಂಗಡಿಗಳಿಗೆ ಹೋಗುತ್ತಿದ್ದಾರೆಯೆ ಎಂದು ಗಮನಿಸಬೇಕು. ನಂತರ ಮಕ್ಕಳ ಡ್ರಾಯರ್ ಮತ್ತು ಬುಕ್ ಕಬೋರ್ಡ್ ಗಳನ್ನು ಆಗಾಗ್ಗೆ ಪರೀಕ್ಷಿಸಿ.

* ಪೋಷಕರು ಮಕ್ಕಳ ಹದಿಹರೆಯದ ಸಮಸ್ಯೆಯನ್ನು ತುಂಬಾ ಚಾಲಾಕಿತನದಿಂದ ನಿಭಾಯಿಸಬೇಕು. ಮಕ್ಕಳ ಮೇಲೆ ಒತ್ತಡ ಹಾಕದೆ ಅವರೊಂದಿಗೆ ಗೆಳಯರಂತೆ ವರ್ತಿಸಬೇಕು, ಇಂತಹ ವಿಷಯಗಳ ಒಳಿತು-ಕೆಡುಕುಗಳ ಬಗ್ಗೆ ಬಿಚ್ಚು ಮನಸ್ಸಿನಿಂದ ಚರ್ಚಿಸಿ ತಿಳಿ ಹೇಳಬೇಕು. ಈ ರೀತಿ ಮಾಡಿದರೆ ಮಕ್ಕಳನ್ನು ವಯಸ್ಕರ ಸಿನಿಮಾ ನೋಡದಂತೆ ತಡೆಯಬಹುದು.