ನ. 7ಕ್ಕೆ ಶಿಶು ರಕ್ಷಣೆ ದಿನ: ಶಿಶುಗಳ ಮರಣ ತಡೆಗಟ್ಟಲು ಏನು ಮಾಡಬೇಕು?

ಮಗು ಹುಟ್ಟಿದ ತಕ್ಷಣ ಎದೆಹಾಲುಣಿಸಬೇಕು

ಮಗು ಹುಟ್ಟಿದ ತಕ್ಷಣ ಎದೆ ಹಾಲುಣಿಸಬೇಕು. ಇದು ಮಗು ಬದುಕುವ ಸಾಧ್ಯತೆ ಹೆಚ್ಚಿಸುತ್ತೆ. ಅಲ್ಲದೆ ಮಗುವಿನ ಆರೋಗ್ಯಕರ ಬೆಳವಣಿಗೆಗೆ ಇದು ಅವಶ್ಯಕ. ಅದರಲ್ಲೂ ಮೊದಲ 2 ವರ್ಷ ತುಂಬಾನೇ ಮುಖ್ಯ. ಮಕ್ಕಳಿಗೆ ಪೋಷಕಾಂಶದ ಕೊರತೆ ಉಂಟಾಗಬಾರದು, ಲಕ್ಷಗಟ್ಟಲೆ ಮಕ್ಕಳಿಗೆ ಸರಿಯಾದ ಪೋಷಕಾಂಶ ದೊರೆಯುತ್ತಿಲ್ಲ. ಇದರಿಂದಾಗಿ ಮಕ್ಕಳಿಗೆ ಅನೇಕ ಆರೋಗ್ಯ ಸಮಸ್ಯೆ ಕಾಣಿಸಿಕೊಳ್ಳುತ್ತಿದೆ.

ವಿಶ್ವ ಆರೋಗ್ಯ ಸಂಸ್ಥೆ ಏನು ಹೇಳಿದೆ?

* ಮಗು ಹುಟ್ಟಿ ಒಂದು ಗಂಟೆಯ ಒಳಗೆ ಎದೆ ಹಾಲು ಕುಡಿಸಬೇಕು.

* ಮೊದಲ 6 ತಿಂಗಳವರೆಗೆ ಎದೆ ಹಾಲನ್ನು ಮಾತ್ರ ಕೊಡಬೇಕು.

* ಮಗುವಿಗೆ 6 ತಿಂಗಳಿಂದ 2 ವರ್ಷದವರೆಗೆ ಎದೆಹಾಲುಣಿಸಿದರೆ ಅದರ ಆರೋಗ್ಯದ ದೃಷ್ಟಿಯಿಂದ ತುಂಬಾನೇ ಒಳ್ಳೆಯದು.

ಲಸಿಕೆಗಳನ್ನು ಕೊಡಿಸಿ

* ಮಗುವಿಗೆ ಯಾವ ತಿಂಗಳು ಯಾವ ಲಸಿಕೆ ನೀಡಬೇಕೆಂಬ ಲಸಿಕೆ ಚಾರ್ಟ್‌ ಇರುತ್ತೆ, ಅದನ್ನು ತಪ್ಪದೆ ಕೊಡಿಸಿ.

*ಲಸಿಕೆಗಳು ಮಗುವಿಗೆ ಅನೇಕ ಕಾಯಿಲೆಗಳಿಂದ ರಕ್ಷಣೆ ನೀಡುತ್ತದೆ.

ಮಗುವನ್ನು ಮಲಗಿಸುವ ಸ್ಥಳ ಸುರಕ್ಷಿತವಾಗಿರಲಿ

ಮಗು ಎರಡು ವರ್ಷದವರೆಗೆ ಅದನ್ನು ಎಲ್ಲಿ ಮಲಗಿಸುತ್ತೇವೆ ಆ ಜಾಗದ ಬಗ್ಗೆ ತುಂಬಾನೇ ಎಚ್ಚರಿಕೆವಹಿಸಬೇಕು. ಬೆಡ್‌ ಮೇಲೆ ಮಲಗಿಸುವುದಾದರೆ ಎದ್ದ ತಕ್ಷಣ ಬೀಳುವ ಅಪಾಯ ಹೆಚ್ಚು. ಇನ್ನು 8 ತಿಂಗಳು ಕಳೆದ ಮೇಲೆ ತೊಟ್ಟಿಲಿನಲ್ಲಿ ಮಲಗಿಸಿದಾಗ ಮಗು ಬೀಳದಂತೆ ವ್ಯವಸ್ಥೆ ಮಾಡಿ. ನೆಲದಲ್ಲಿ ಹಾಸಿಗೆ ಹಾಕಿ ಮಲಗಿಸಿದರೆ ಹಾವು ಮುಂತಾದ ವಿಷ ಜಂತು ಬಾರದಂತೆ ಎಚ್ಚರವಹಿಸಿ.

ಮಗುವಿಗೆ ನೀಡುವ ಆಟಿಕೆಗಳು ಜೋಪಾನ

ಆಟಿಕೆ ನುಂಗಿ ಮಕ್ಕಳನ್ನು ಸಾವನ್ನಪ್ಪಿರುವ ಅನೇಕ ಪ್ರಕರಣಗಳಿವೆ. ಆದ್ದರಿಂದ ತುಂಬಾ ಚಿಕ್ಕ ಆಟಿಕೆಗಳನ್ನು ನೀಡಬೇಡಿ. ಮಣಿ, ನಾಣ್ಯ ಇವೆಲ್ಲಾ ಮಗುವಿಗೆ ಸಿಗದಂತೆ ಎಚ್ಚರವಹಿಸಿ. ಇನ್ನು ಚೂಪಾದ ವಸ್ತುಗಳು, ಆಟಿಕೆಗಳನ್ನು ನೀಡಬೇಡಿ. ಇನ್ನು ಮಗು ಓಡಾಡುವಾಗ ಮಗುವಿಗೆ ಅನುಕೂಲವಾಗುವಂತೆ ಮನೆಯ ವಸ್ತುಗಳನ್ನು ಜೋಡಿಸಿ ಇಡಿ. ಮನೆಯಲ್ಲಿ ಬಕೆಟ್‌ಗಳಲ್ಲಿ ನೀರು ತುಂಬಿಡಬೇಡಿ.

ಹೀಗೆ ಮಗು ಸ್ವಲ್ಪ ದೊಡ್ಡದಾಗಿ ಅದಕ್ಕೆ ಬುದ್ಧಿ ಬರುವವರೆಗೆ ಪೋಷಕರು ತುಂಬಾನೇ ಎಚ್ಚರಿಕೆವಹಿಸಬೇಕಾಗಿದೆ. ಅಲ್ಲದೆ ಅಪರಿಚಿತರ ಬಳಿ ಮಗುವನ್ನು ನೀಡಬೇಡಿ. ಮಗು ಜೊತೆ ಮನೆಯಲ್ಲಿರುವಾಗ ಯಾರಾದರೂ ಏನಾದರೂ ಮಾರಿಕೊಂಡು ಬರುವವರ ಬಗ್ಗೆ ಎಚ್ಚರ. ಮಗುವಿಗೆ ಮನೆ ಹಾಗೂ ಪರಿಸರ ಸುರಕ್ಷಿತವಾಗಿಸಿ.