ಮಗು ಆರೋಗ್ಯವಾಗಿದೆ ಎಂದು ತಿಳಿಯುವುದು ಹೇಗೆ?

Baby

oi-Reena

By Hema S

Updated: Thursday, August 16, 2012, 17:22 [IST]

ಮಗು ಜನಿಸಿದ ದಿನದಿಂದ ನಡೆಯುವವರೆಗೆ ದಿನಕ್ಕೆ ಒಂದು ಹೊಸ ವಿದ್ಯೆಗಳನ್ನು ಕಲಿಯುತ್ತಾ ಹೋಗುತ್ತದೆ. ಅದನ್ನು ಕಲಿಸಲು ಯಾರ ಸಹಾಯವೂ ಬೇಕಾಗಿಲ್ಲ, ನೈಸರ್ಗಿಕವಾಗಿಯೇ ಕಲಿಯುತ್ತದೆ. ಅಂಗಾತ ಮಲಗುವುದು, ಅಂಬೆಕಾಲಿನಿಂದ ನಡೆಯುವುದು, ಮೆಲ್ಲನೆ ನಿಲ್ಲುವುದು ನಂತರ ನಡೆಯುವುದು ಈ ಚಟುವಟಿಕೆಗಳು ನಿಧಾನಕ್ಕೆ ಕಲಿಯುತ್ತಾ ಬರುತ್ತದೆ. ಈ ಚಟುವಟಿಕೆಗಳು ಎಲ್ಲಾ ಮಕ್ಕಳಲ್ಲಿ ಒಂದೇ ರೀತಿ ಕಂಡು ಬರುವುದಿಲ್ಲ. ಕೆಲವು ತಿಂಗಳಿನ ವ್ಯತ್ಯಾಸ ಕಂಡುಬರಬಹುದು.

ಕೆಲ ತಿಂಗಳು ಕಳೆದರೂ, ಸೂಚಿಸಲಾದ ನಿರ್ದಿಷ್ಟ ಚಟುವಟಿಕೆಯಲ್ಲಿ ಮಗುವು ತೊಡಗದಿದ್ದರೆ ಮಾತ್ರ ಮಕ್ಕಳ ತಜ್ಞರನ್ನು ಸಂಪರ್ಕಿಸಬೇಕು. ಮಗುವಿಗೆ ಯಾವುದಾದರೂ ಕಾಯಿಲೆ ಇದ್ದರೆ ಇತರ ಮಕ್ಕಳಗಿಂತ ಭಿನ್ನವಾಗಿ ವರ್ತಿಸುತ್ತದೆ. ಆರೋಗ್ಯಕರ ಮಕ್ಕಳಲ್ಲಿ ಈ ಕೆಳಗಿನ ಲಕ್ಷಣಗಳು ಕಂಡುಬರುತ್ತದೆ.

ಜನನದಿಂದ 6 ವಾರಗಳ ವರೆಗೆ
ಅಂಗಾತ ಮಲಗಿರುವ ಮಗು ಒಂದು ಬದಿಗೆ ತನ್ನ ಕತ್ತನ್ನು ಹೊರಳಿಸುತ್ತದೆ, ಜೋರಾದ ಸದ್ದಿಗೆ ಮಗು ಚಕಿತಗೊಂಡು ದೇಹವನ್ನು ಬಿಗಿಗೊಳಿಸುತ್ತದೆ ಮುಷ್ಠಿಯನ್ನು ಗಟ್ಟಿಯಾಗಿ ಹಿಡಿಯುತ್ತದೆ ಯಾವುದೇ ವಸ್ತುವನ್ನು ಸ್ಪರ್ಶಿಸಿದಾಗ ಅದನ್ನು ಬಿಗಿಯಾಗಿ ಅಂಗೈಯಿಂದ ಹಿಡಿಯುತ್ತದೆ.

6 ರಿಂದ 12 ವಾರಗಳು

ತಲೆಯನ್ನು ಸ್ಥಿರವಾಗಿರಲು ಕಲಿಯುತ್ತದೆ ವಸ್ತುಗಳನ್ನು ಗುರುತಿಸಲು ಕಲಿಯುತ್ತದೆ. ಅಂಗಾತ ಮಲಗಿದಾಗ ತನ್ನೆರಡೂ ಕೈ ಹಾಗೂ ಕಾಲುಗಳನ್ನು ಅಲ್ಲಾಡಿಸುತ್ತದೆ. ಅಳುವಾಗಲೂ, ಸಂತೋಷ ವ್ಯಕ್ತ ಪಡಿಸಲು ಈ ರೀತಿ ಮಾಡುತ್ತದೆ. ತಾಯಿಯನ್ನು ಗುರುತಿಸುತ್ತದೆ. ಮಗು ತನ್ನ ಕೈಗಳೊಂದಿಗೇ ಆಟವಾಡುತ್ತದೆ.ತನ್ನ ಸುತ್ತಮುತ್ತಲಿಂದ ಕೇಳಿ ಬರುವ ಶಬ್ದಕ್ಕೆ ಪ್ರತಿಕ್ರಿಯಿಸುತ್ತದೆ. ಸದ್ದು ಬಂದ ಕಡೆ ತನ್ನ ತಲೆ ಹೊರಳಿಸುತ್ತದೆ ಮಗುವು ಬೋರಲು ಬೀಳಲಾರಂಭಿಸುತ್ತದೆ. ನಂತರ ನಿಧಾನಕ್ಕೆ ಎದ್ದು ಕೂರಲು ನೋಡುತ್ತದೆ. ಮೊದ ಮೊದಲು ಮಗುವಿಗೆ ನೇರವಾಗಿ ಕೂರಲು ಕಷ್ಟವಾಗುತ್ತದೆ. ನಂತರ ಯಾವುದೇ ಆಧಾರವಿಲ್ಲದೆ ಕೂರಲು ಕಲಿಯುತ್ತದೆ. ನಂತರ ನಿಧಾನಕ್ಕೆ ಎದ್ದು ನಿಲ್ಲಲು ಕಲಿಯುತ್ತದೆ.

8 -12ತಿಂಗಳು
ಕೆಲ ಮಕ್ಕಳು 8 ತಿಂಗಳಿಗೆ ಅಮ್ಮ ಅಂತ ಕರೆಯಲಾರಂಭಿಸುತ್ತದೆ. ತೊದಲು ಮಾತನಾಡಲು ಪ್ರಾರಂಭಿಸುತ್ತದೆ. ನಂತರ ಬೀಳದಂತೆ ನಡೆಯಲು ಪ್ರಾರಂಭಿಸುತ್ತದೆ. ತನ್ನ ಸುತ್ತ ಮುತ್ತ ಪ್ರತಿದಿನ ನೋಡುವವರನ್ನು ಗುರುತಿಸುತ್ತದೆ. ನಿಮ್ಮ ಮಾತಿಗೆ ಪ್ರತಿಕ್ರಿಯೆಸುತ್ತದೆ. ಈ ರೀತಿಯ ಲಕ್ಷಣಗಳು ಇದ್ದರೆ ಮಗು ನಾರ್ಮಲ್ ಆಗಿದೆ ಎಂದು ಅರ್ಥ. ಕೆಲವೊಂದು ಮಕ್ಕಳು ಮಾತನಾಡಲು ಒಂದೂವರೆ ವರ್ಷ ಅಗಬಹುದು. ಒಂದೂವರೆ ನಂತರ ಮಾತನಾಡುತ್ತಿಲ್ಲ ಅಥವಾ ನಡೆಯುತ್ತಿಲ್ಲ ಅಂದರೆ ವೈದ್ಯರನ್ನು ಸಂಪರ್ಕಿಸಬೇಕು.