ವರ್ಷ ಕಳಿದರೂ ಮಗು ಮಾತನಾಡುತ್ತಿಲ್ಲವೇ?

ಮಕ್ಕಳು ಒಂದು ವರ್ಷದೊಳಗೆ ತೊದಲು ಮಾತನಾಡಲಾರಂಭಿಸುತ್ತಾರೆ. ಅಮ್ಮ, ಅಪ್ಪ, ಮನೆಯವರ ಹತ್ತಿರ ತೊದಲು ನುಡಿಯಲ್ಲಿ ಮಾತನಾಡುತ್ತದೆ. ತುಂಬಾ ಮಾತನಾಡದಿದ್ದರೂ ಅಲ್ಪ ಸ್ವಲ್ಪವಾಗಿ ಮಾತನಾಡುತ್ತದೆ. ಆದರೆ ಕೆಲ ಮಕ್ಕಳು ಮಾತನಾಡಲು ಸ್ವಲ್ಪ ಲೇಟಾಗುತ್ತದೆ.

ಒಂದೂವರೆ 2 ವರ್ಷ ಕಳೆದ ಮೇಲೆ ನಿಧಾನಕ್ಕೆ ಮಾತನಾಡುತ್ತದೆ. ಮಗು ಒಂದು ವರ್ಷ ತುಂಬುವಾಗಲೇ ಮಾತನಾಡುವುದಿಲ್ಲವೆಂದು ಭಯ ಬೀಳಬೇಕಾಗಿಲ್ಲ. ಮಗು ಬೇಗನೆ ಮಾತನಾಡುವಂತಾಗಲು ನಿಮ್ಮ ಪ್ರಯತ್ನವು ಬೇಕು. ಇಲ್ಲಿ ನಾವು ನಿಮ್ಮ ಮಗು ಬೇಗನೆ ಮಾತನಾಡಲು ನೀವು ಏನು ಮಾಡಬೇಕೆಂದು ಹೇಳಿದ್ದೇವೆ:

ಮಗುವಿನ ಜೊತೆ ಮಾತನಾಡಿ:ಮಗುವಿನ ಜೊತೆ ತುಂಬಾ ಹೊತ್ತು ಮಾತನಾಡಿ. ಆಗ ಮಗು ಕೂಡ ತಾನು ಮಾತನಾಡಲು ಪ್ರಯತ್ನಿಸುತ್ತದೆ. ಹೀಗೆ ಮಾತನಾಡುವಾಗ ತೊದಲು ಮಾತನಾಡಬೇಡಿ, ಮಗುವಿನೊಂದಿಗೆ ಸ್ಪಷ್ಟವಾಗಿ ಮಾತನಾಡಿ. ಮಗು ಸುಮ್ಮೆನಿದ್ದರೂ ಅದನ್ನು ಕರೆದು ಕರೆದು ಮಾತನಾಡಿಸಿ.

ಸವಿಸ್ತಾರವಾಗಿ ಹೇಳಿ: ಮಕ್ಕಳು ನಾವು ಹೇಳುವುದನ್ನು ಸುಲಭವಾಗಿ ಗ್ರಹಿಸುತ್ತದೆ. ಆದ್ದರಿಂದ ಮಗುವಿಗೆ ಪ್ರತಿಯೊಂದು ವಸ್ತುವಿನ ಬಗ್ಗೆ ಸ್ಪಷ್ಟವಾಗಿ, ವಿಸ್ತಾರವಾಗಿ ಹೇಳಿ. ಮಗು ಯಾವುದಾದರೂ ವಸ್ತು ನೋಡುತ್ತಿದ್ದರೆ ಅದನ್ನು ಹೇಳಿ. ಉದಾಹರಣೆಗೆ ಟಿವಿ ನೋಡುತ್ತಿದ್ದರೆ, ಇದು ಟಿವಿ ಅಂತ ಹೇಳಿ.

ಓದಿಸಿ: ಮಾತನಾಡಲಿಕ್ಕೆ ಬರದಿದ್ದರೂ ನೀವು ಮಕ್ಕಳ ಪುಸ್ತಕ ಹಿಡಿದು ಅದರಲ್ಲಿರುವ ಚಿತ್ರಗಳನ್ನು ತೋರಿಸುತ್ತಾ, ಇದು ಆನೆ, ಇದು ಕುರಿ ಅಂತ ಹೇಳಿ, ಆಗ ಮಗುವು ನಿಧಾನಕ್ಕೆ ಆ ಶಬ್ದಗಳನ್ನು ಉಚ್ಛಾರಣೆ ಮಾಡಲು ಪ್ರಯತ್ನಿಸುತ್ತದೆ.

ಹಾಡುಹೇಳಿ: ಮಗುವಿಗೆ ಪದ ಹೇಳುವುದು, ಹಾಡು ಹೇಳುವುದು ಮಾಡಿ , ಇದರಿಂದ ಮಗು ನಿಮ್ಮ ಶಬ್ದವನ್ನು ಗ್ರಹಿಸಿ ತಾನು ಕೂಡ ನಿಧಾನಕ್ಕೆ ಮಾತನಾಡಲು ಪ್ರಯತ್ನಿಸುತ್ತದೆ.

ಮನೆಯಿಂದ ಹೊರಗಡೆ ಕರೆದುಕೊಂಡು ಹೋಗಿ: ನಿಮ್ಮ ಮಗುವನ್ನು ಇತರ ಮಕ್ಕಳ ಜೊತೆ ಬೆರೆಯಲು ಬಿಡಿ. ಮಗು ಭಾಷೆ ಕಲಿಯಲು ಅನುಕೂಲವಾಗುವ ಚಟುವಟಿಕೆಗಳನ್ನು ಮಾಡಿಸಿ.

ಈ ರೀತಿ ಮಾಡಿದರೆ ಮಗು ಬೇಗನೆ ಮಾತನಾಡಲಾರಂಭಿಸುತ್ತದೆ.