16 ವರ್ಷದೊಳಗಿನ ಮಕ್ಕಳಿಗೆ ಭಾರತದಲ್ಲಿ ಸೋಷಿಯಲ್‌ ಮೀಡಿಯಾ ಬ್ಯಾನ್‌ ಆಗುತ್ತಾ?: ಸಚಿವರಿಂದಲೇ ಸುಳಿವು!

ಮಕ್ಕಳ ಮೊಬೈಲ್ ಬಳಕೆಯು ಪೋಷಕರಲ್ಲಿ ಈಗ ತಲೆನೋವು ತರುವ ವಿಷಯವಾಗಿದೆ. ಮಕ್ಕಳ ಮೊಬೈಲ್ ಗೀಳು ಈಗ ಪ್ರಾಣಕ್ಕೂ ಸಂಚಕಾರ ತರುವಷ್ಟು ಮಿತಿ ಮೀರಿದೆ. ಹೀಗಾಗಿ ವಿಶ್ವದ ಹಲವು ಭಾಗದಲ್ಲಿ ಮಕ್ಕಳಿಗೆ ಮೊಬೈಲ್ ನಿಷೇಧದಂತಹ ಕಾನೂನುಗಳು ಜಾರಿಯಾಗುತ್ತಿದೆ. ಇದೀಗ ಭಾರತದಲ್ಲೂ ಈ ಕೂಗು ಕೇಳಿಬರುತ್ತಿದೆ. ಕೇಂದ್ರ ಸರ್ಕಾರದ ಮಟ್ಟದಲ್ಲಿ ಈ ರೀತಿಯ ಮಾತುಗಳು ದಟ್ಟವಾಗಿದೆ.

ಮಕ್ಕಳಲ್ಲಿ ಮೊಬೈಲ್ ಹಾಗೂ ಸಾಮಾಜಿಕ ಜಾಲತಾಣಗಳ ಬಳಕೆಯಲ್ಲಿ ಏರಿಕೆ ಕಂಡುಬಂದಿದೆ. ಅದ್ರಲ್ಲೂ 16 ವರ್ಷದೊಳಗಿನ ಮಕ್ಕಳಲ್ಲಿನ ಮೊಬೈಲ್ ಗೀಳು ಈಗ ಅನಾರೋಗ್ಯ ಸಮಸ್ಯೆಯಾಗಿಯೂ ಬದಲಾಗಿದೆ. ಖಿನ್ನತೆ, ಆತಂಕ, ನಿದ್ರಾಹೀನತೆ ಸೇರಿದಂತೆ ವಿವಿಧ ರೀತಿಯ ಸಮಸ್ಯೆಗಳು ಅವರನ್ನು ಕಾಡುತ್ತಿದೆ. ಓದಿನಲ್ಲಿ ಹಿಂದುಳಿಯಲು ಮೊಬೈಲ್ ಬಳಕೆಯ ಕಾರಣ ನೀಡುತ್ತಿರುವುದು ಹೊಸ ರೀತಿಯ ಆತಂಕಕ್ಕೆ ಕಾರಣವಾಗುತ್ತಿದೆ.

16 ವರ್ಷದೊಳಗಿನ ಮಕ್ಕಳಿಗೆ ಸಾಮಾಜಿಕ ಮಾಧ್ಯಮವನ್ನು ನಿಷೇಧಿಸುವ ಬಗ್ಗೆ ಚರ್ಚೆ ಭಾರತದಲ್ಲಿ ಜೋರಾಗುತ್ತಿದೆ. ಈ ಕುರಿತಾಗಿ ಕೇಂದ್ರ ತಂತ್ರಜ್ಞಾನ ಸಚಿವ ಅಶ್ವಿನಿ ವೈಷ್ಣವ್ ನವದೆಹಲಿಯಲ್ಲಿ ನಡೆಯುತ್ತಿರುವ ಭಾರತ AI ಇಂಪ್ಯಾಕ್ಟ್ ಶೃಂಗಸಭೆಯ ಪತ್ರಿಕಾಗೋಷ್ಟಿಯಲ್ಲಿ ಹೇಳಿದ್ದಾರೆ.

ಹದಿಹರೆಯದವರಲ್ಲಿ ಸಾಮಾಜಿಕ ಜಾಲತಾಣ ಬಳಕೆ ಕಡಿಮೆ ಮಾಡುವ ಉದ್ದೇಶದಿಂದ ಭಾರತೀಯ ಅಧಿಕಾರಿಗಳು ಮತ್ತು ಸ್ಥಳೀಯ ನಾಯಕರಿಂದ ತಿಂಗಳುಗಳ ಕಾಲ ಚರ್ಚೆಯ ನಂತರ ಸಚಿವ ವೈಷ್ಣವ್ ಈ ಕುರಿತಾಗಿ ಮೊದಲ ಪ್ರತಿಕ್ರಿಯೆ ನೀಡಿದ್ದಾರೆ. ಇದಕ್ಕು ಮೊದಲು ಆಂಧ್ರ ಪ್ರದೇಶದ ಸಚಿವರು 16 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ಸಾಮಾಜಿಕ ಮಾಧ್ಯಮವನ್ನು ನಿಷೇಧಿಸುವ ಮಾರ್ಗಗಳನ್ನು ಸರ್ಕಾರ ಅಧ್ಯಯನ ಮಾಡುತ್ತಿದೆ ಎಂದಿದ್ದರು.

ಜಾಗತಿಕ ಡಿಜಿಟಲ್ ನಡವಳಿಕೆಯ ವರದಿಗಳ ಗ್ರಂಥಾಲಯವಾದ ಡೇಟಾ ರಿಪೋರ್ಟಲ್ ಪ್ರಕಾರ, ಇನ್‌ಸ್ಟಾಗ್ರಾಮ್ ಮತ್ತು ಫೇಸ್‌ಬುಕ್ ಭಾರತದಲ್ಲಿ 400 ಮಿಲಿಯನ್‌ಗಿಂತಲೂ ಹೆಚ್ಚು ಬಳಕೆದಾರರನ್ನು ಹೊಂದಿವೆ, ಇದು ಯಾವುದೇ ಇತರ ದೇಶಕ್ಕಿಂತ ಹೆಚ್ಚು. ಆದ್ರೆ ಈ ಯಾವುದೇ ಜಾಲತಾಣಗಳ ಬಳಸಲು ವಯಸ್ಸಿನ ಮಿತಿಯನ್ನು ಯಾವುದೇ ಕಂಪನಿಗಳು ಕೂಡ ನಿಗದಿಪಡಿಸಿಲ್ಲ. ಹೀಗಾಗಿ ಮುಕ್ತ ಬಳಕೆಗೆ ಸಿಗುತ್ತಿದೆ.

ಭಾರತದ ಮುಖ್ಯ ಆರ್ಥಿಕ ಸಲಹೆಗಾರರ ನೇತೃತ್ವದ ತಂಡವು ವಾರ್ಷಿಕ ದಾಖಲೆಯಾದ ಆರ್ಥಿಕ ಸಮೀಕ್ಷೆಯು, 'ಮಕ್ಕಳ ಸಾಮಾಜಿಕ ಮಾಧ್ಯಮ ಬಳಕೆಗೆ ವಯಸ್ಸಿನ ಆಧಾರಿತ ಮಿತಿಗಳನ್ನು ಸರ್ಕಾರ ಪರಿಗಣಿಸಬೇಕೆಂದು ಶಿಫಾರಸು ಮಾಡಿದೆ. ಹಾಗೆ ಇತ್ತೀಚಿಗೆ ರಾಜ್ಯವಾರು ಚರ್ಚೆಗಳು ಸಹ ಹುಟ್ಟಿಕೊಂಡಿದೆ. ಕೆಲವು ರಾಜ್ಯಗಳು 16 ವರ್ಷದೊಳಗಿನ ಮಕ್ಕಳಿಗೆ ಸಾಮಾಜಿಕ ಜಾಲತಾಣಗಳ ಬಳಕೆಯನ್ನು ನಿಷೇಧಿಸುವ ಪ್ರಸ್ತಾಪ ಮುಂದಿರಿಸಿವೆ.

ಈ ಮೊದಲು 16 ವರ್ಷದೊಳಗಿನ ಮಕ್ಕಳಿಗೆ ಸಾಮಾಜಿಕ ಮಾಧ್ಯಮ ನಿಷೇಧಿಸಿದ ವಿಶ್ವದ ಮೊದಲ ದೇಶವಾಗಿ ಆಸ್ಟ್ರೇಲಿಯಾ ಕಾನೂನು ಜಾರಿ ಮಾಡಿದೆ. ಅಲ್ಲಿ ಯಾವುದೇ ಸಾಮಾಜಿಕ ಖಾತೆಯನ್ನು ತೆರೆಲು ಅವರು ವಯಸ್ಸನ್ನು ಕಡ್ಡಾಯವಾಗಿ ಪರಿಶೀಲಿಸಲಾಗುತ್ತದೆ. 16 ವರ್ಷದೊಳಗಿನ ಮಕ್ಕಳು ತೆರೆದಿದ್ದ ಎಲ್ಲಾ ಖಾತೆಗಳನ್ನು ಅಲ್ಲಿ ನಿಷೇಧಿಸಲಾಗಿದೆ. ಹಾಗೆ ಕಳೆದ ಕೆಲ ದಿನಗಳ ಹಿಂದಷ್ಟೇ ಫ್ರಾನ್ಸ್‌ನಲ್ಲಿ ಸಂಸದರು 15 ವರ್ಷದೊಳಗಿನವರಿಗೆ ಸಾಮಾಜಿಕ ಮಾಧ್ಯಮ ಬಳಕೆಯನ್ನು ನಿಷೇಧಿಸುವ ಮಸೂದೆಯನ್ನು ಅನುಮೋದಿಸಿದ್ದಾರೆ. ಸದ್ಯ ಭಾರತದಲ್ಲೂ ಈ ಕೂಗು ಕೇಳಿಬರುತ್ತಿದೆ.

ಇಂಟರ್‌ನೆಟ್ ಹಾಗೂ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲಿ ಭಾರತ ದೊಡ್ಡ ಪಾಲುದಾರಿಕೆ ಹೊಂದಿದೆ. ಅದ್ರಲ್ಲೂ ಅತೀ ಹೆಚ್ಚು ಯುವ ಸಮುದಾಯವನ್ನು ಹೊಂದಿರುವ ಭಾರತವು ಈ ಎಲ್ಲಾ ವಲಯದ ಪ್ರಮುಖ ಮಾರುಕಟ್ಟೆಯಾಗಿ ಬೆಳೆದು ನಿಂತಿದೆ. ಹಾಗೆ ಇದರಿಂದ ಉಂಟಾಗುತ್ತಿರುವ ಪ್ರತಿಕೂಲ ಪರಿಣಾಮಗಳು ಸಹ ಎಲ್ಲರ ಚಿಂತೆ ಕಾರಣವಾಗಿದೆ. ಮುಂಬರುವ ಅಧಿವೇಶನದಲ್ಲಿ ಈ ಕುರಿತಾಗಿ ಚರ್ಚೆಯಾಗುವ ಹಾಗೆ ಹೊಸ ಕಾನೂನು ಜಾರಿಯಾಗುವ ಸಾಧ್ಯತೆಯೂ ಇದೆ ಎನ್ನಲಾಗಿದೆ.