Dussehra 2025: ದಸರಾ ಯಾವಾಗ? ಅಕ್ಟೋಬರ್ 1 ಅಥವಾ 2? ಶುಭ ಸಮಯ ಮತ್ತು ಯೋಗ ಇಲ್ಲಿದೆ!

ಅಕ್ಟೋಬರ್ 1 ಅಥವಾ ಅಕ್ಟೋಬರ್ 2, ದಸರಾ ಯಾವಾಗ? ವಿಜಯದಶಮಿಯ ಶುಭ ಮುಹೂರ್ತ, ತಿಥಿ ಮತ್ತು ಯೋಗದ ವಿವರಗಳು ಇಲ್ಲಿವೆ. ವಿಜಯದಶಮಿ (Vijayadashami 2025) ಭಾರತದ ಪ್ರಮುಖ ಹಿಂದೂ ಹಬ್ಬಗಳಲ್ಲಿ ಒಂದಾಗಿದೆ. ಇದನ್ನು ದಸರಾ (Dussehra 2025) ಎಂತಲೂ ಕರೆಯಲಾಗುವುದು. ಈ ದಿನದಂದು ಶ್ರೀರಾಮನು ರಾವಣನನ್ನು ಸಂಹರಿಸಿದನು. ದೇವಿ ದುರ್ಗೆಯು ಮಹಿಷಾಸುರನನ್ನು ವಧಿಸಿದಳು ಎಂಬುದು ನಂಬಿಕೆ. ಹೀಗಾಗಿ, ದಸರಾವನ್ನು ಕೆಡುಕಿನ ಮೇಲೆ ಒಳ್ಳೆಯದರ ವಿಜಯದ ಸಂಕೇತವಾಗಿ ಆಚರಿಸಲಾಗುತ್ತದೆ.

ದಸರಾ ಹಬ್ಬವನ್ನು ದೇಶದಾದ್ಯಂತ ಬಹಳ ವಿಜೃಂಭಣೆಯಿಂದ ಆಚರಿಸಲಾಗುತ್ತದೆ. ಅದರಲ್ಲೂ ಕರ್ನಾಟಕದಲ್ಲಿ ಇದರ ಆಚರಣೆ ವೈಭವದಿಂದ ಕೂಡಿರುತ್ತದೆ. ಈ ವರ್ಷ ಅಕ್ಟೋಬರ್ 2, ಗುರುವಾರದಂದು ದಸರಾ 2025 ಅನ್ನು ಆಚರಿಸಲಾಗುತ್ತದೆ. ಇದೇ ದಿನ ಶಾರದ ನವರಾತ್ರಿ 2025 ಮತ್ತು ದುರ್ಗಾ ಪೂಜೆ 2025 ಕೂಡ ಮುಕ್ತಾಯಗೊಳ್ಳುತ್ತದೆ. ವಿಶೇಷವಾಗಿ, ಈ ದಿನ ಗಾಂಧಿ ಜಯಂತಿ ಕೂಡ ಇರುವುದು ಗಮನಾರ್ಹ. ಈ ಹಬ್ಬದ ಆಚರಣೆ ಹಾಗೂ ಪೂಜಾ ವಿಧಾನಗಳ (Dussehra 2025 Muhurat) ಬಗ್ಗೆ ಮಾಹಿತಿ ಇಲ್ಲಿದೆ.

2025ರ ದಸರಾ ಹಬ್ಬದ ಪ್ರಮುಖ ದಿನಾಂಕಗಳು

ಈ ವರ್ಷದ ಶರನ್ನವರಾತ್ರಿಗಳು ಶುಭದಿನಗಳಲ್ಲಿ ಆರಂಭವಾಗಲಿವೆ. ಪ್ರಮುಖ ದಿನಾಂಕಗಳು ಹೀಗಿವೆ.

• ಶರನ್ನವರಾತ್ರಿ ಆರಂಭ: ಸೆಪ್ಟೆಂಬರ್ 22, 2025, ಸೋಮವಾರ.
• ನವರಾತ್ರಿಯ ಕೊನೆಯ ದಿನ (ಮಹಾನವಮಿ / ದುರ್ಗಾಷ್ಟಮಿ): ಸೆಪ್ಟೆಂಬರ್ 30, 2025, ಮಂಗಳವಾರ.
• ವಿಜಯದಶಮಿ (ದಸರಾ): ಅಕ್ಟೋಬರ್ 2, 2025, ಗುರುವಾರ.

ರಾವಣ ದಹನದ ಸಮಯ ಹೀಗಿದೆ

ದಸರಾ 2025ರ ದಶಮಿ ತಿಥಿಯು 2025ರ ಅಕ್ಟೋಬರ್ 1 ರಂದು ಸಂಜೆ 7:01 ಕ್ಕೆ ಪ್ರಾರಂಭವಾಗಿ, 2025ರ ಅಕ್ಟೋಬರ್ 2 ರಂದು ಸಂಜೆ 7:10 ರವರೆಗೆ ಇರುತ್ತದೆ. ಈ ವರ್ಷ ಸೂರ್ಯಾಸ್ತದ ಸಮಯ ಸಂಜೆ 6:06 ಆಗಿದ್ದು, ರಾವಣ ದಹನವು ಸೂರ್ಯಾಸ್ತದ ನಂತರ ಪ್ರಾರಂಭವಾಗುವ ಪ್ರದೋಷ ಕಾಲದಲ್ಲಿ ನಡೆಯಲಿದೆ.

ಈ ವರ್ಷ ದಸರಾ ದಿನದಂದು ರವಿ ಯೋಗ, ಸುಕರ್ಮಾ ಯೋಗ ಮತ್ತು ಧೃತಿ ಯೋಗ ರೂಪುಗೊಳ್ಳುತ್ತಿದೆ. ಇದು ಹಬ್ಬವನ್ನು ಅತ್ಯಂತ ಶುಭಕರವಾಗಿಸಿದೆ. ರವಿ ಯೋಗವನ್ನು ಪೂಜೆ, ಶಸ್ತ್ರಪೂಜೆ, ವಾಹನ ಖರೀದಿ ಮತ್ತು ಹೊಸ ಕಾರ್ಯಗಳ ಪ್ರಾರಂಭಕ್ಕೆ ಉತ್ತಮವೆಂದು ಪರಿಗಣಿಸಲಾಗಿದೆ. ಸುಕರ್ಮಾ ಯೋಗವು ಬೆಳಗ್ಗೆ ಪ್ರಾರಂಭವಾಗಿ, ನಂತರ ಧೃತಿ ಯೋಗವಿರುತ್ತದೆ. ಶಸ್ತ್ರಪೂಜೆಯ ಶುಭ ಮುಹೂರ್ತ ಮಧ್ಯಾಹ್ನ 2:09 ರಿಂದ ಮಧ್ಯಾಹ್ನ 2:56 ರವರೆಗೆ ಇರುತ್ತದೆ.

ದಸರಾ ದಿನದ ಪ್ರಮುಖ ಆಚರಣೆಗಳು

• ಆಯುಧ ಪೂಜೆ: ರೈತರು ತಮ್ಮ ಕೃಷಿ ಉಪಕರಣಗಳಿಗೆ, ಕಾರ್ಮಿಕರು ತಮ್ಮ ಯಂತ್ರಗಳಿಗೆ, ವಿದ್ಯಾರ್ಥಿಗಳು ತಮ್ಮ ಪುಸ್ತಕಗಳಿಗೆ ಪೂಜೆ ಸಲ್ಲಿಸಿ, ತಮ್ಮ ವೃತ್ತಿಗಳಲ್ಲಿ ಯಶಸ್ಸನ್ನು ಕೋರುತ್ತಾರೆ.

• ಶಮೀ ಪೂಜೆ (ಬನ್ನಿ ಮರದ ಪೂಜೆ): ಸಂಜೆ ಬನ್ನಿ ಮರಕ್ಕೆ ಪೂಜೆ ಮಾಡಿ, ಅದರ ಎಲೆಗಳನ್ನು ಬಂಗಾರ (ಬಂಗಾರದ ಪತ್ರಿ) ಎಂದು ಭಾವಿಸಿ ಹಿರಿಯರಿಗೆ ನೀಡಿ ಆಶೀರ್ವಾದ ಪಡೆಯಲಾಗುತ್ತದೆ. ಇದು ಐಕ್ಯತೆ ಮತ್ತು ಗೌರವದ ಸಂಕೇತ. ತೆಲಂಗಾಣದಲ್ಲಿ ಈ ಆಚರಣೆ ಅತ್ಯಂತ ಸಂಭ್ರಮದಿಂದ ಕೂಡಿರುತ್ತದೆ.

• ಹೊಸ ಕಾರ್ಯಗಳ ಆರಂಭ: ವಿಜಯದಶಮಿಯಂದು ಯಾವುದೇ ಹೊಸ ಕಾರ್ಯವನ್ನು ಪ್ರಾರಂಭಿಸಿದರೆ ಯಶಸ್ಸು ಖಚಿತ ಎಂಬುದು ಜನರ ಬಲವಾದ ನಂಬಿಕೆ.

ಮೈಸೂರು ದಸರಾ ಪ್ರಸಿದ್ಧ

ದಸರಾವು ಅಧರ್ಮದ ಮೇಲೆ ಧರ್ಮದ, ಕೆಡುಕಿನ ಮೇಲೆ ಒಳ್ಳೆಯದರ ಮತ್ತು ಅಸತ್ಯದ ಮೇಲೆ ಸತ್ಯದ ವಿಜಯದ ಸಂಕೇತವಾಗಿದೆ. ಈ ಹಬ್ಬವನ್ನು ಭಾರತದಾದ್ಯಂತ ವಿವಿಧ ರೂಪಗಳಲ್ಲಿ ಆಚರಿಸಲಾಗುತ್ತದೆ. ಉತ್ತರ ಭಾರತದಲ್ಲಿ ರಾಮಲೀಲಾ ಮತ್ತು ರಾವಣ ದಹನ, ಪೂರ್ವ ಭಾರತದಲ್ಲಿ ದುರ್ಗಾ ಪೂಜೆ ಮತ್ತು ವಿಸರ್ಜನೆ, ಹಾಗೂ ದಕ್ಷಿಣ ಭಾರತದಲ್ಲಿ ಆಯುಧ ಪೂಜೆ ಮತ್ತು ವಿದ್ಯಾಭ್ಯಾಸ ಪ್ರಾರಂಭದ ರೂಪದಲ್ಲಿ ದಸರಾ ಉತ್ಸವವನ್ನು ಆಯೋಜಿಸಲಾಗುತ್ತದೆ. ಮೈಸೂರು ಮತ್ತು ಕುಲು ದಸರಾವು ದೇಶಾದ್ಯಂತ ಪ್ರಸಿದ್ಧವಾಗಿದ್ದು, ಇದನ್ನು ನೋಡಲು ವಿದೇಶಿ ಪ್ರವಾಸಿಗರು ಕೂಡ ಆಗಮಿಸುತ್ತಾರೆ.

ರಾಮನ ವಿಜಯದ ಸಂಕೇತ

ದಸರಾವು ಕೆಡುಕಿನ ಮೇಲೆ ಒಳ್ಳೆಯದರ ವಿಜಯ ಮತ್ತು ನೈತಿಕ ಸಂದೇಶವನ್ನು ನೀಡುತ್ತದೆ. ಇದು ಒಳ್ಳೆಯದು ಯಾವಾಗಲೂ ಕೆಡುಕನ್ನು ಮೀರಿಸುತ್ತದೆ ಎಂಬ ಸಂದೇಶವನ್ನು ನಮಗೆ ನೀಡುತ್ತದೆ. ಈ ಹಬ್ಬವು ನೈತಿಕ ಮೌಲ್ಯಗಳನ್ನು ಕಲಿಸುತ್ತದೆ ಮತ್ತು ಕಾಮ, ಕ್ರೋಧ, ಮೋಹ, ಲೋಭ, ಅಹಂಕಾರದಂತಹ ಪಾಪಗಳನ್ನು ತ್ಯಜಿಸಲು ಜನರನ್ನು ಪ್ರೇರೇಪಿಸುತ್ತದೆ. ದೇವಿ ದುರ್ಗಾ ಮತ್ತು ರಾಮನ ವಿಜಯದ ಸಂಕೇತವಾಗಿ, ಈ ಹಬ್ಬವು ಶಕ್ತಿ, ಧೈರ್ಯ ಮತ್ತು ಧರ್ಮದ ಮಹತ್ವವನ್ನು ಸಹ ಎತ್ತಿ ತೋರಿಸುತ್ತದೆ.