Lakshmi Mantra: ಈ ಮಂತ್ರ ಪಠಿಸಿದರೆ ಸಾಲದಿಂದ ಮುಕ್ತಿ ಸಿಗುತ್ತೆ! ಶ್ರೀಮಂತಿಕೆ ಖಚಿತ

ವರಮಹಾಲಕ್ಷ್ಮೀ ಹಬ್ಬದ ದಿನ (Varamahalakshmi 2025) ಈ ಮಂತ್ರಗಳನ್ನು ಪಠಿಸುವುದರಿಂದ ಜೀವನದಲ್ಲಿ ಯಶಸ್ಸು ಖಚಿತ. ಸಾಲದಿಂದ ಮುಕ್ತಿ ಸಿಗುತ್ತದೆ. ಹೌದು, ಶ್ರಾವಣ ಮಾಸದ ಶುಕ್ರವಾರದಂದು ಆಚರಿಸಲಾಗುವ ವರಮಹಾಲಕ್ಷ್ಮೀ ವ್ರತವು ಈ ವರ್ಷ ಆಗಸ್ಟ್ 8 ರಂದು ಬಂದಿದೆ. ಸಂಪತ್ತು ಮತ್ತು ಸಮೃದ್ಧಿಯ ಅಧಿದೇವತೆಯಾದ ಲಕ್ಷ್ಮೀ ದೇವಿಯನ್ನು ಈ ಶುಭ ದಿನದಂದು ಪೂಜಿಸಲಾಗುತ್ತದೆ. ಭಕ್ತಿಪೂರ್ವಕವಾಗಿ ಈ ವ್ರತವನ್ನು ಆಚರಿಸುವ ಭಕ್ತರಿಗೆ ಅಷ್ಟಲಕ್ಷ್ಮಿಯರ ಆಶೀರ್ವಾದ ದೊರೆಯುತ್ತದೆ ಎಂಬ ನಂಬಿಕೆಯಿದೆ. ಇದರಿಂದ ಧನ-ಧಾನ್ಯ, ಸಂತೋಷ, ಸಮೃದ್ಧಿ ಮತ್ತು ಸೌಭಾಗ್ಯಗಳು ಪ್ರಾಪ್ತಿಯಾಗುತ್ತವೆ.

ವರಮಹಾಲಕ್ಷ್ಮೀ ವ್ರತದ (Varamahalakshmi Vrata Puja) ಸಂದರ್ಭದಲ್ಲಿ ಸಂಪತ್ತು, ಶಾಂತಿ ಮತ್ತು ಸಮೃದ್ಧಿಗಾಗಿ ಕೆಲವು ಪ್ರಬಲ ಮಂತ್ರಗಳನ್ನು ಜಪಿಸುವುದು ಸಾಮಾನ್ಯ. ಆಧ್ಯಾತ್ಮಿಕ ತಜ್ಞರ ಪ್ರಕಾರ, ಈ ಮಂತ್ರಗಳ ಪಠಣವು ಲಕ್ಷ್ಮಿ ದೇವಿಯ ಕೃಪೆಗೆ ಪಾತ್ರರಾಗಲು ಸಹಾಯಕವಾಗಲಿದೆ. ಈ ಮಂತ್ರಗಳು ಭಕ್ತರಿಗೆ ಲಕ್ಷ್ಮಿ ದೇವಿಯ ಅನುಗ್ರಹವನ್ನು ಪಡೆಯಲು ನೆರವಾಗುತ್ತವೆ. ಈ ಪ್ರಮುಖ ಮಂತ್ರಗಳನ್ನು ಭಕ್ತಿಯಿಂದ ಪಠಿಸುವುದರಿಂದ ಸಕಲ ಇಷ್ಟಾರ್ಥಗಳು ಸಿದ್ಧಿಸುತ್ತವೆ. ಹಾಗಿದ್ರೆ, ವರಮಹಾಲಕ್ಷ್ಮಿ ವ್ರತದಲ್ಲಿ ಯಾವ ಮಂತ್ರಗಳನ್ನು (Lakshmi Mantra) ಪಠಿಸಬೇಕು ಮತ್ತು ಅವುಗಳ ವಿಶೇಷತೆಗಳೇನು ಎಂಬ ಬಗ್ಗೆ ತಿಳಿಯೋಣ ಬನ್ನಿ.

ವರಮಹಾಲಕ್ಷ್ಮೀ ವ್ರತದಲ್ಲಿ ಜಪಿಸಬೇಕಾದ ಮಂತ್ರಗಳು

ಓಂ ಲಕ್ಷ್ಮಿ ನಮಃ

'ಓಂ ಲಕ್ಷ್ಮಿ ನಮಃ' ಎಂದರೆ ಲಕ್ಷ್ಮಿದೇವಿಗೆ ನಮಸ್ಕಾರ ಅಥವಾ ಲಕ್ಷ್ಮಿದೇವಿಗೆ ವಂದನೆಗಳು ಎಂದರ್ಥ. ಈ ಮಂತ್ರವು ಮನೆಯಲ್ಲಿ ಸಂಪತ್ತು ಮತ್ತು ಸಕಾರಾತ್ಮಕ ಶಕ್ತಿಯನ್ನು ಹೆಚ್ಚಿಸುತ್ತದೆ. ಇದು ಹಣದ ಕೊರತೆಯನ್ನು ನಿವಾರಿಸಿ, ಲಕ್ಷ್ಮಿ ದೇವಿಯ ಅನುಗ್ರಹವನ್ನು ಸದಾ ಇರುವಂತೆ ಮಾಡುತ್ತದೆ.

ಲಕ್ಷ್ಮಿ ನಾರಾಯಣ ನಮಃ

ಲಕ್ಷ್ಮಿ ನಾರಾಯಣ ನಮಃ ಎಂದರೆ ಲಕ್ಷ್ಮಿ ಮತ್ತು ನಾರಾಯಣನಿಗೆ ನಮಸ್ಕಾರಗಳು ಎಂದರ್ಥ. ಈ ಮಂತ್ರವು ಕುಟುಂಬದಲ್ಲಿ ಪ್ರೀತಿ, ಸಂತೋಷ ಮತ್ತು ಒಗ್ಗಟ್ಟನ್ನು ವೃದ್ಧಿಸುತ್ತದೆ. ಇದು ದಂಪತಿಗಳ ನಡುವಿನ ಬಾಂಧವ್ಯವನ್ನು ಬಲಪಡಿಸುತ್ತದೆ.

ಓಂ ಧನಾಯ ನಮಃ

ಓಂ ಧನಾಯ ನಮಃ ಎಂಬುದು ಸಂಪತ್ತು ಮತ್ತು ಸಮೃದ್ಧಿಯನ್ನು ಆಹ್ವಾನಿಸಲು ಬಳಸುವ ಒಂದು ಮಂತ್ರ. ಶುಕ್ರವಾರದಂದು ಕಮಲದ ಹೂವಿನೊಂದಿಗೆ ಈ ಮಂತ್ರವನ್ನು ಜಪಿಸುವುದರಿಂದ ಆರ್ಥಿಕ ಪ್ರಗತಿ ಸಾಧಿಸಬಹುದು.

ಧನಾಯ ನಮೋ ನಮಃ

'ಧನಾಯ ನಮೋ ನಮಃ' ಎನ್ನುವುದು ಲಕ್ಷ್ಮಿ ದೇವಿಗೆ ಹೇಳುವ ಒಂದು ಮಂತ್ರವಾಗಿದೆ. ಪ್ರತಿದಿನ 11 ಬಾರಿ ಈ ಮಂತ್ರವನ್ನು ಜಪಿಸುವುದರಿಂದ ಆರ್ಥಿಕ ತೊಂದರೆಗಳು ದೂರವಾಗುತ್ತವೆ. ಅನಗತ್ಯ ಖರ್ಚುಗಳು ಕಡಿಮೆಯಾಗುತ್ತವೆ.

ಓಂ ಹ್ರೀಂ ಹ್ರೀಂ ಶ್ರೀಂ ಲಕ್ಷ್ಮೀವಾಸುದೇವಾಯ ನಮಃ

'ಓಂ ಹ್ರೀಂ ಹ್ರೀಂ ಶ್ರೀಂ ಲಕ್ಷ್ಮೀವಾಸುದೇವಾಯ ನಮಃ' ಎನ್ನುವುದು ಲಕ್ಷ್ಮೀ ದೇವಿಯ ಒಂದು ಮಂತ್ರ. ಯಾವುದೇ ಶುಭ ಕಾರ್ಯಗಳನ್ನು ಪ್ರಾರಂಭಿಸುವ ಮೊದಲು ಈ ಮಂತ್ರವನ್ನು ಜಪಿಸುವುದರಿಂದ ಆ ಕಾರ್ಯಗಳು ಯಶಸ್ವಿಯಾಗಿ ಪೂರ್ಣಗೊಳ್ಳುತ್ತವೆ.

ಓಂ ಶ್ರೀಂ ಹ್ರೀಂ ಕ್ರೀಂ ಶ್ರೀಸಿದ್ಧಲಕ್ಷ್ಮ್ಯೈ ನಮಃ

'ಓಂ ಶ್ರೀಂ ಹ್ರೀಂ ಕ್ಲೀಂ ಶ್ರೀ ಸಿದ್ಧ ಲಕ್ಷ್ಮ್ಯೈ ನಮಃ' ಎಂಬ ಮಂತ್ರವನ್ನು ಸಾಮಾನ್ಯವಾಗಿ ಸಂಪತ್ತು ಮತ್ತು ಸಮೃದ್ಧಿಯನ್ನು ಪಡೆಯಲು ಪಠಿಸಲಾಗುತ್ತದೆ. ಇದು ಅತ್ಯಂತ ಶಕ್ತಿಶಾಲಿ ಮಂತ್ರ. ಇದನ್ನು ಜಪಿಸುವುದರಿಂದ ಆರೋಗ್ಯ, ಸಂಪತ್ತು ಮತ್ತು ದೀರ್ಘಾಯುಷ್ಯ ಹೆಚ್ಚಾಗುತ್ತದೆ ಎಂದು ಹೇಳಲಾಗುತ್ತದೆ.

ಪದ್ಮನೇ ಪದ್ಮ ಪದ್ಮಾಕ್ಷಿ ಪದ್ಮ ಸಂಭವ್ಯೇ

'ಪದ್ಮನೇ ಪದ್ಮ ಪದ್ಮಾಕ್ಷಿ ಪದ್ಮ ಸಂಭವ್ಯೇ, ತನ್ಮೇ ಭಜಸಿ ಪದ್ಮಾಕ್ಷಿ ಯೇನ ಸೌಖ್ಯಂ ಲಾಭಾಮ್ಯಹಂ'. ಈ ಮಂತ್ರವು ಮನೆಯಲ್ಲಿ ಹಣ ಮತ್ತು ಆಹಾರದ ಕೊರತೆ ಇಲ್ಲದಂತೆ ನೋಡಿಕೊಳ್ಳುತ್ತದೆ. ಇದರಿಂದ ಲಕ್ಷ್ಮಿ ದೇವಿಯ ಕೃಪಾಕಟಾಕ್ಷ ಸದಾ ಇರುತ್ತದೆ.

ಎಷ್ಟು ಬಾರಿ ಮಂತ್ರ ಜಪಿಸಬೇಕು?

ವರಮಹಾಲಕ್ಷ್ಮಿ ವ್ರತದ ದಿನದಂದು ಕೆಲವು ಮಂತ್ರಗಳನ್ನು 108 ಬಾರಿ ಜಪಿಸುವುದರಿಂದ ಇನ್ನಷ್ಟು ಉತ್ತಮ ಫಲಿತಾಂಶಗಳು ದೊರೆಯುತ್ತವೆ.

• 'ಓಂ ಹ್ರೀಂ ಶ್ರೀಂ ಲಕ್ಷ್ಮೀಭ್ಯೋ ನಮಃ' ಎಂಬ ಮಂತ್ರವನ್ನು ವ್ರತದ ಸಮಯದಲ್ಲಿ 108 ಬಾರಿ ಜಪಿಸಬೇಕು. ಇದರಿಂದ ಆಸೆಗಳು ಈಡೇರುತ್ತವೆ.

• 'ಓಂ ನಮೋ ವರಲಕ್ಷ್ಮೀ ಮಮ ದರಿದ್ರಂ ನಾಶಯ' ಎಂಬ ಮಂತ್ರವನ್ನು 11 ಬಾರಿ ಜಪಿಸುವುದರಿಂದ ಬಡತನ ಮತ್ತು ಆರ್ಥಿಕ ಸಂಕಷ್ಟಗಳು ಕಡಿಮೆಯಾಗುತ್ತವೆ.

• 'ಓಂ ಹ್ರೀಂ ಶ್ರೀಂ ಕ್ರೀಂ ಶ್ರೀಂ ಕುಬೇರಾಯ' ಎಂಬ ಮಂತ್ರವನ್ನು 108 ಬಾರಿ ಪಠಿಸುವುದರಿಂದ ಸಾಲದ ಬಾಧೆಗಳು ಮತ್ತು ಆರ್ಥಿಕ ಸಮಸ್ಯೆಗಳು ದೂರವಾಗುತ್ತವೆ.

ಒಟ್ಟಾರೆಯಾಗಿ, ವರಮಹಾಲಕ್ಷ್ಮಿ ವ್ರತದ ದಿನದಂದು ಮಹಿಳೆಯರು ಉಪವಾಸ ಆಚರಿಸಿ, ಲಕ್ಷ್ಮಿ ದೇವಿಯನ್ನು ಪೂಜಿಸುತ್ತಾರೆ. ಬಂಗಾರದಿಂದ ದೇವಿಯನ್ನು ಅಲಂಕರಿಸಿ ಪೂಜೆ ಸಲ್ಲಿಸುತ್ತಾರೆ. ಹೀಗೆ, ಮಾಡುವುದರಿಂದ ಕುಟುಂಬದಲ್ಲಿ ಸಂತೋಷ ಮತ್ತು ಐಶ್ವರ್ಯ ಹೆಚ್ಚಾಗುತ್ತದೆ. ನೀವು ಸಹ ಈ ಮಂತ್ರಗಳನ್ನು ಭಕ್ತಿಯಿಂದ ಪಠಿಸಿ, ವರಮಹಾಲಕ್ಷ್ಮಿ ದೇವಿಯ ಅನುಗ್ರಹವನ್ನು ಪಡೆಯಿರಿ.