Valentine Day 2025: ರೋಸ್‌ ಡೇ ಬಗ್ಗೆ ನಿಮಗೆಷ್ಟು ಗೊತ್ತು.? ಯಾವ ಬಣ್ಣದ ಗುಲಾಬಿ ಏನು ಅರ್ಥ ನೀಡುತ್ತೆ?

ಫೆಬ್ರವರಿ ತಿಂಗಳು ಎಂದಕೂಡಲೆ ಪ್ರೇಮಿಗಳ ದಿನ ನೆನಪಾಗುತ್ತೆ. ಹಾಗೆ ಈ ದಿನ ಎಲ್ಲರಿಗೂ ವಿಶೇಷ ಎನಿಸದೆ ಇರಬಹುದು ಆದ್ರೆ ಪ್ರೇಮಿಗಳಿಗಂತು ಈ ದಿನ ವಿಶೇಷವೇ. ಹಾಗೆ ಪ್ರೇಮಿಗಳ ದಿನವನ್ನು ಫೆಬ್ರವರಿ 14ರಂದು ಆಚರಿಸೋದು ನಮಗೆ ಗೊತ್ತು. ಆದ್ರೆ ಇಂದಿನಿಂದಲೇ ಪ್ರೇಮಿಗಳ ದಿನ ಆರಂಭವಾಗುತ್ತೆ. ಅಂದರೆ 7 ದಿನದ ಮುನ್ನ ಪ್ರೇಮಿಗಳ ವಾರ ಆರಂಭಗೊಳ್ಳುತ್ತೆ. 7 ದಿನವೂ ಒಂದಲ್ಲಾ ಒಂದು ಆಚರಣೆ ಇದ್ದೇ ಇರುತ್ತೆ. ಕೊನೆಯ ದಿನ ಮಾತ್ರ ಪ್ರೇಮಿಗಳ ದಿನವಾಗಿ ಆಚರಿಸಲಾಗುತ್ತೆ.

ಈ ಪ್ರೇಮಿಗಳ ವಾರದಲ್ಲಿ ಇಂದು ರೋಸ್ ಡೇ ಆಗಿ ಆಚರಿಸಲಾಗುತ್ತಿದೆ. ಈ ದಿನದಂದು ತಮ್ಮ ಪ್ರೇಮಿಗೆ ಗುಲಾಬಿ ಹೂವು ನೀಡು ಕಾರ್ಯ. ಅವರ ಬಳಿ ಪ್ರೇಮ ನಿವೇದನೆ ಮಾಡಿಕೊಳ್ಳುವ ಮುನ್ನ ಅವರನ್ನು ಸಂತೋಷ ಪಡಿಸುವ ಕೆಲಸ. ಹಾಗೆ ಗುಲಾಬಿ ಹೂವು ಪ್ರೇತಿಯ ಸಂಕೇತ ಆಗಿರುವುದರಿಂದ ಪ್ರೇಮಿಗಳ ವಾರ ಕೂಡ ಈ ಹೂವಿನಿಂದಲೇ ಆರಂಭವಾಗುತ್ತಿದೆ.

ಆದ್ರೆ ಈ ದಿನ ಯಾವ ಬಣ್ಣದ ರೋಸ್ ನೀಡಬೇಕು ಎಂಬುದು ನಿಮಗೆ ಗೊತ್ತಾ? ಇದರಲ್ಲಿ ವಿಶೇಷ ಏನಿದೆ ಎಂದು ನೀವು ಭಾವಿಸಬಹುದು. ಆದ್ರೆ ಈ ಹೂವಿನ ಬಣ್ಣಕ್ಕೂ ಒಂದೊಂದು ಅರ್ಥವಿದೆ. ಒಂದೊಂದು ಗುಲಾಬಿ ಬಣ್ಣದ ಹಿಂದೆಯೂ ಅದಕ್ಕೊಂದು ಕಾರಣವಿದೆ. ಇನ್ನು ಈ ರೋಸ್ ಡೇ ಹುಟ್ಟಿಕೊಂಡಿದ್ದು ಹೇಗೆ ಅನ್ನೋದು ನಿಮಗೆ ಗೊತ್ತಾ?

ಈ ರೋಸ್ ಡೇ ಯಾವಾಗ ಆರಂಭವಾಯಿತು ಎಂಬ ಕುರಿತ ನಿಖರ ಮಾಹಿತಿ ಹಾಗೂ ನಿಖರ ದಿನಾಂಕಗಳು ಲಭ್ಯವಿಲ್ಲ. ಆದರೆ ರೋಮನ್ ಪುರಾಣಗಳಲ್ಲಿ ಗುಲಾಬಿ ಹೂವುಗಳು ಪ್ರೀತಿ ಮತ್ತು ಉತ್ಸಾಹದ ಸಂಕೇತವಾಗಿದೆ. ಅತ್ಯಂತ ಸಾಂಪ್ರದಾಯಿಕವಾವಗಿ ನಾವು ಡಿಸ್ನಿಯ ಬ್ಯೂಟಿ ಅಂಡ್ ದಿ ಬೀಸ್ಟ್ ಸಿನಿಮಾ ಕಥೆಯಲ್ಲಿ ಹೆಚ್ಚಾಗಿ ಈ ಗುಲಾಬಿ ಹೂವಿನ ಬಳಕೆ ಹೆಚ್ಚಾಗಿ ಪ್ರೀತಿಯ ಸಂಕೇತವಾಗಿ ಬಳಸಿರುವುದು ನೋಡಬಹುದಾಗಿದೆ.

ರೋಮನ್ ಪುರಾಣಗಳಲ್ಲಿ ಗುಲಾಬಿಗಳು ಸೌಂದರ್ಯ ಮತ್ತು ಪ್ರೀತಿಯ ಸಂಕೇತವಾಗಿದ್ದವು. ಪ್ರಾಚೀನ ಗ್ರೀಸ್‌ನಲ್ಲಿ ಅಫ್ರೋಡೈಟ್ ಅನ್ನು ಗುಲಾಬಿಯ ದೇವತೆ ಎಂದೂ ಕರೆಯಲಾಗುತ್ತಿತ್ತು. ನಂತರ ಶುಭ ಕಾರ್ಯಗಳಲ್ಲಿ ಈ ಗುಲಾಬಿಗಳ ಬಳಕೆ ಹೆಚ್ಚಾಗಿತ್ತು, ಅನಂತರ ನಿಧಾನವಾಗಿ ಕೆಂಪು ಗುಲಾಬಿ ಪ್ರೀತಿಯ ಸಂಕೇತವಾಯಿತು. ಯುವ ಪ್ರೇಮಿಗಳಿಗೆ ಇದು ತಮ್ಮ ಮನದ ಮಾತು ಹೇಳುವ ಸಂಪರ್ಕ ಸಾಧನವಾಯಿತು.

ವಿವಿಧ ಬಣ್ಣದ ಗುಲಾಬಿಗಳ ಹಿಂದಿನ ಅರ್ಥವೇನು?

ನೇರಳೆ ಗುಲಾಬಿ: ಮೊದಲ ನೋಟದಲ್ಲಿ ಪ್ರೀತಿಯ ಆಕರ್ಷಣೆ
ಪಿಂಕ್ : ಪ್ರೀತಿ, ಮೆಚ್ಚುಗೆ
ಹಳದಿ ಗುಲಾಬಿ : ಸ್ನೇಹ
ಕೆಂಪು ಗುಲಾಬಿ: ಗಾಢವಾದ ಪ್ರೀತಿ, ವಾತ್ಸಲ್ಯ
ಕಿತ್ತಳೆ ಬಣ್ಣದ ಗುಲಾಬಿ: ಉತ್ಸಾಹ, ಶಕ್ತಿಶಾಲಿ
ಬಿಳಿ ಗುಲಾಬಿ: ಮುಗ್ಧತೆ ಮತ್ತು ಶುದ್ಧತೆ

ಪ್ರೇಮಿಗಳ ದಿನ ಆರಂಭವಾಗಿದ್ದು ಯಾವಾಗ?

ಪ್ರೇಮಿಗಳ ದಿನ ಯಾವಾಗ ಆರಂಭವಾಗಿತ್ತು ಎಂಬುದನ್ನು ನಾವು ಹುಡುಕಲು ಮುಂದಾದ್ರೆ ಶತಮಾನಗಳ ಹಿಂದಿನ ಕಾಲಕ್ಕೆ ಕರೆದೊಯ್ಯಲಿದೆ. ಕ್ರಿ.ಶ 269ರಲ್ಲಿ ಮೊದಲ ಬಾರಿಗೆ ಈ ಪ್ರೇಮಿಗಳ ದಿನ ಎಂಬ ಉಲ್ಲೇಖ ನೋಡಬಹುದು. ಇಟಾಲಿಯನ್ ಇತಿಹಾಸಕಾರ ಜಾಕೋಬಸ್ ಡಿ ವೊರಜೀನ್ ಬರೆದ 'ಗೋಲ್ಡನ್ ಲೆಜೆಂಡ್: ಲೈವ್ಸ್ ಆಫ್ ದಿ ಸೇಂಟ್ಸ್' ಎಂಬ ಪುಸ್ತಕದಲ್ಲಿ ಪ್ರೇಮಿಗಳ ದಿನ ರೊಮನ್ ರಾಜ ಕ್ಲಾಡಿಯೆಸ್ ಕಾಲದಲ್ಲಿ ಆರಂಭಗೊಂಡಿತ್ತು ಎಂದು ಉಲ್ಲೇಖಿಸಿದ್ದಾರೆ.