ವೈರಲ್‌ ವೀಡಿಯೋ: ಆನೆಯೊಂದು ಬಿಡಿಸಿದ ಆನೆಯ ಚಿತ್ರ ನೋಡಣ್ಣಾ...

ಹಳೆಯದಾದರೂ ಕೆಲವೊಂದು ವೀಡಿಯೋಗಳನ್ನು ನೋಡಿದಷ್ಟೂ ಏನೋ ಖುಷಿಯಾಗುವುದು, ಅಲ್ಲದೆ ಅಂಥ ಮನಸ್ಸಿಗೆ ಖುಷಿ ಕೊಡುವ ವೀಡಿಯೋ ಬೇಗನೆ ಸಾಮಾಜಿಕ ತಾಣದಲ್ಲಿ ಟ್ರೆಂಡ್‌ ಕೂಡ ಆಗುವುದು.

ಈಗ ಅಂಥದ್ದೇ ಹಳೆಯ ವೀಡಿಯೋವೊಂದು ಸಾಮಾಜಿಕ ತಾಣದಲ್ಲಿ ಸಕತ್‌ ಸದ್ದು ಮಾಡುತ್ತಿದೆ. ಆನೆಯೊಂದು ಆನೆಯ ಚಿತ್ರ ಬರೆಯುತ್ತಿರುವ ಕ್ಯೂಟ್‌ ವೀಡಿಯೋಗೆ ನೆಟ್ಟಿಗರು ಫುಲ್‌ ಫಿದಾ ಆಗಿದ್ದಾರೆ.

ಆನೆಯನ್ನು ನೋಡುವುದೇ ಚೆಂದ. ಅದು ಸಾಕಾನ ಆಗಿರಲಿ, ಕಾಡಾನೆ ಆಗಿರಲಿ ಆನೆಯ ವೀಡಿಯೋ ಅಂದ್ರೆನೇ ನೆಟ್ಟಿಗರ ಮನ ಸೆಳೆಯುತ್ತದೆ, ಅಂಥದ್ದರಲ್ಲಿ ಆನೆಯೊಂದು ತನ್ನದೇ ಚಿತ್ರ ಬರೆಯುತ್ತಿರುವುದು ನೋಡಲು ಎಷ್ಟೊಂದು ಖುಷಿ ಅಲ್ಲವೇ?

ಆನೆ ತನ್ನ ಆನೆಯ ಚಿತ್ರ ಬರೆದಿದ್ದು ಮಾತ್ರವಲ್ಲ ಅದರ ಮುಂದುಗಡೆ ಹೂ ಬಿಟ್ಟಿರುವ ಮರ ಬಿಡಿಸಿ, ಸುದಾ ಅಂತ ತನ್ನ ಹೆಸರು ಕೂಡ ಬರೆಯುತ್ತೆ.

ಈ ವೀಡಿಯೋವನ್ನು ನೋಡಿ ಕೆಲವರು ತುಂಬಾ ಖುಷಿ ಪಟ್ಟರೆ ಇನ್ನು ಕೆಲವರು ಇದು ಕ್ರೂರತನ ಪ್ರಾಣಿಗಳನ್ನು ಅದರ ಪಾಡಿಗೆ ಬಿಡಬೇಕು. ಇಷ್ಟು ತರಬೇತಿ ಆನೆಗೆ ಕೊಡುವಾಗ ಅದು ಅನುಭಿಸಿರುವ ಹಿಂಸೆ ಎಂಥದ್ದು ಊಹಿಸಿ ಎಂದು ಕಮೆಂಟ್‌ ಮಾಡುತ್ತಿದ್ದಾರೆ. ಇದು ಥೈಲ್ಯಾಂಡ್‌ನ ಸುದಾ ಎಂಬ ಆನೆಯಾಗಿದೆ.