ಸತ್ತಂತೆ ನಟಿಸಿ ಹುಲಿ ಬಾಯಿಂದ ಬಚಾವ್ ಆದ!: ವೀಡಿಯೋ ವೈರಲ್

ಹುಲಿಯೊಂದು ತಕ್ಷಣ ಎದುರಾದರೆ ಭಯದಿಂದ ಪ್ರಾಣವೇ ಹೋಗುತ್ತದೆ, ಆ ಕ್ಷಣ ಏನು ಮಾಡಬೇಕೆಂದು ತಿಳಿಯದೆ ಕಕ್ಕಾಬಿಕ್ಕಿಯಾಗಿ ಓಡುವುದಂತು ಗ್ಯಾರಂಟಿ. ಆದರೆ ಇಲ್ಲೊಬ್ಬ ಸತ್ತಂತೆ ನಟಿಸಿ ಹುಲಿ ದಾಳಿಯಿಂದ ಜಸ್ಟ್ ಮಿಸ್‌ ಆಗಿದ್ದಾನೆ. ಮೈನವಿರೇಳಿಸುವ ಈ ವೀಡಿಯೋ ಇದೀಗ ಇಂಟರ್‌ನೆಟ್‌ನಲ್ಲಿ ವೈರಲ್‌ ಆಗಿದೆ.

ಹುಲಿ ದಾಳಿಯಿಂದ ರಕ್ಷಿಸಲು ಅಂತಹ ಸಂದರ್ಭದಲ್ಲಿ ಆತ ಆ ರೀತಿ ಬುದ್ಧಿ ಉಪಯೋಗಿಸಿದ್ದಕ್ಕೆ ಮೆಚ್ಚಲೇಬೇಕು. ಹುಲಿಯೊಂದು ಬಾಯಿ ತೆರೆದು ತನ್ನ ಮುಂದೆ ಕೂತಿದ್ದಾಗ ಉಸಿರನ್ನು ಬಿಗಿ ಹಿಡಿದು ಜೀವ ಇಲ್ಲದಂತೆ ನಟಿಸಿದ. ಹುಲಿ ಆತನ ಮುಂದೆ ಸ್ವಲ್ಪ ಕೂತು ನಂತರ ಜನರು ತನ್ನತ್ತ ಬರುವುದನ್ನು ನೋಡಿ ಅಲ್ಲಿಂದ ಓಟಕಿತ್ತಿದೆ, ಹಾಗಾಗಿ ಈ ಅದೃಷ್ಟವಂತ ಹುಲಿ ಬಾಯಿಂದ ಪಾರಾಗಿದ್ದಾನೆ.

ಜನರ ಗುಂಪನ್ನು ನೋಡಿ ಭಯಗೊಂಡ ಹುಲಿ ಗದ್ದೆ ಕಡೆ ಓಡಿ ಬಂತು, ಆ ಹುಲಿಗೆ ಎದುರಾಗಿದ್ದೇ ಈ ವ್ಯಕ್ತಿ. ಹುಲಿಯನ್ನು ನೋಡಿದ ತಕ್ಷಣ ಆತನ ತಕ್ಷಣವೇ ನೆಲದಲ್ಲಿ ಸತ್ತಂತೆ ಮಲಗಿದ, ಆತನ ಬಳಿ ಕೂತು ಇನ್ನೇನು ಆತನ ಮೇಲೆ ದಾಳಿಮಾಡಬೇಕೆಂದಿದ್ದ ಹುಲಿ ಆತ ಸತ್ತನೆಂದು ತಿಳಿದು ಏನು ಮಾಡದೆ ಅಲ್ಲಿಂದ ಓಡಿ ಹೋಗಿದೆ. ಒಂದು ವೇಳೆ ಆತ ಮಿಸುಕಾಡಿದರೂ ಹುಲಿ ಆತನನ್ನು ಪರಚಿ ಚಿಂದಿ ಮಾಡುವ ಸಾಧ್ಯತೆ ಇತ್ತು.

ಮೈ ನವಿರೇಳಿಸುವ ಈ ಘಟನೆ ಮಹಾರಾಷ್ಟ್ರದ ಭಾಂದ್ರಾ ಜಿಲ್ಲೆಯಲ್ಲಿ ನಡೆದಿದೆ. ಈ ದೃಶ್ಯವನ್ನು ಮೊಬೈಲ್‌ನಲ್ಲಿ ಸೆರೆ ಹಿಡಿಯಲಾಗಿದ್ದು ಇದೀಗ ಸಾಮಾಜಿಕ ತಾಣದಲ್ಲಿ ವೈರಲ್ ಆಗಿದೆ.