ಮುಳ್ಳುಹಂದಿ-ಚಿರತೆಯ ರೋಚಕ ಫೈಟ್‌-ವೀಡಿಯೋ ವೈರಲ್

ಚಿರತೆ ಹಾಗೂ ಮುಳ್ಳುಹಂದಿ ಎದುರುಬದರಾದಾಗ ಕಿತ್ತಾಡಿಕೊಂಡ ವೀಡಿಯೊಂದು ಸಾಮಾಜಿಕ ತಾಣದಲ್ಲಿ ವೈರಲ್‌ ಆಗಿದೆ. ಈ ವೀಡಿಯೋ ನೋಡುತ್ತಿದ್ದರೆ ರೋಮ ನಿಮಿರೇಳುವುದು, ಅಷ್ಟೊಂದು ರೋಚಕವಾಗಿದೆ. ಇದನ್ನು ಅರಣ್ಯ ಇಲಾಖೆಯಲ್ಲಿ ಕೆಲಸ ಮಾಡುತ್ತಿರುವ ಪರ್ವೀನ್ ಕಶ್ವಾನ್‌ ಟ್ವಿಟರ್‌ ಹಂಚಿಕೊಂಡಿದ್ದಾರೆ.

ಚಿರತೆಗೆ ಭೇಟೆಯ ಚಿಂತೆಯಾದರೆ ಮುಳ್ಳುಹಂದಿಗೆ ತನ್ನ ಪ್ರಾಣವನ್ನು ಉಳಿಸಿಕೊಳ್ಳಲೇಬೇಕಾದ ಪರಿಸ್ಥಿತಿ. ಚಿರತೆ ತನ್ನ ಮೇಲೆ ಆಕ್ರಮಣಕ್ಕೆ ಮುಂದಾದಾಗ ತನ್ನ ಮುಳ್ಳುಗಳನ್ನು ನಿಮರಿಸಿ ಚಿರತೆಗೆ ಸರಿಯಾದ ಪಾಠವನ್ನೇ ಕಲಿಸಿದೆ.

ಹೌದು, ಮುಳ್ಳುಹಂದಿಯನ್ನು ಕಚ್ಚಲು ಬಂದ ಚಿರತೆಯ ಬಾಯಿಗೆ ಅದರ ಮುಳ್ಳು ಸಿಕ್ಕಿಕೊಂಡು ತೆಗೆಯಲು ಸಾಧ್ಯವಾಗದೆ ಒದ್ದಾಡಲು ಪ್ರಾರಂಭಿಸುತ್ತದೆ. ಮುಳ್ಳುಹಂದಿ ಅಲ್ಲಿಂದ ಓಡಿ ಹೋಗದೆ ಬಾ... ನಿನಗೆ ಪಾಠ ಕಲಿಸುತ್ತೇನೆ ಎಂಬಂತೆ ನಿಂತಿರುತ್ತದೆ. ಮುಳ್ಳು ಚುಚ್ಚಿಕೊಂಡು ನೋವು ಅನುಭವಿಸಿದ ಚಿರತೆ ಮಾತ್ರ ಅಯ್ಯೋ... ನಿನ್ನ ಸಹವಾಸವೇ ಬೇಡ ಎಂಬಂತೆ ಕಾಡಿಗೆ ಮರುಳಿದರೆ, ಗೆದ್ದ ಸಂತೋಷದಲ್ಲಿ ಹೋಗುತ್ತಿರುವ ಮುಳ್ಳುಹಂದಿಯನ್ನು ಇಲ್ಲಿ ನೋಡಬಹುದು.

ತನ್ನ ಎದುರಾಳಿ ಎಷ್ಟೇ ಬಲಿಷ್ಠವಾಗಿದ್ದರೂ ತನ್ನನ್ನು ತಾನು ರಕ್ಷಿಸಿಕೊಳ್ಳುವ ತಂತ್ರ ಪ್ರತಿಯೊಂದು ಪ್ರಾಣಿಯಲ್ಲಿ ಇರುತ್ತದೆ ಎಂದು ಈ ವೀಡಿಯೋ ನೋಡಿದಾಗ ತಿಳಿಯುತ್ತದೆ. ಇದೊಂದು ಹಳೆಯ ವೀಡಿಯೋ ಆಗಿದ್ದರೂ ಈಗ ಇಂಟರ್‌ನೆಟ್‌ನಲ್ಲಿ ವೈರಲ್ ಆಗುತ್ತಿದೆ.