ಹೊಟ್ಟೆ ಹಸಿವು ಎಂದು ಯಾವುದೋ ಮದುವೆಗೆ ಊಟಕ್ಕೆ ಹೋದ ಹಾಸ್ಟೆಲ್ ಬಾಯ್‌: ವೀಡಿಯೋ ಆಯ್ತು ವೈರಲ್

ನೀವು ಅಮೀರ್‌ಖಾನ್, ಮಾಧವನ್‌, ಶರ್ಮನಾನ್ ಜೋಷಿ ಅಭಿನಯದ ತ್ರಿ ಈಡಿಯಟ್‌ ಪಿಕ್ಚರ್ ನೋಡಿದ್ದರೆ ಅದರಲ್ಲಿ ರಾಂಚೊ, ರಾಜು, ಫರ್ಹಾನ್‌ ಪಿಯಾಳ(ಕರೀನಾಳ) ಸಹೋದರಿ ಯಮದುವೆಗೆ ಆಮಂತ್ರಣ ಇಲ್ಲದಿದ್ದರೂ ಒಂದು ಒಳ್ಳೆಯ ಊಟಕ್ಕೆ ಆಸೆಪಟ್ಟು ಮದುವೆಗೆ ಹೋಗುವ ದೃಶ್ಯ ನೆನಪಿರಬಹುದು. ಆ ದೃಶ್ಯ ಬಂದಾಗ ಹೊಟ್ಟೆ ಹುಣ್ಣಾಗುವಷ್ಟು ನಗುತ್ತೇವೆ.

ಆ ಸಿನಿಮಾ ನೆನಪಿಸುವ ನೈಜ ಘಟನೆಯೊಂದು ಬಿಹಾರದಲ್ಲಿ ನಡೆದಿದ್ದು ಆ ವೀಡಿಯೋ ತುಂಬಾನೇ ವೈರಲ್ ಆಗಿದೆ. ಆ ವೀಡಿಯೋ ನೋಡುವಾಗ ಫನ್ನಿ ಅನಿಸುವುದರ ಜೊತೆಗೆ ನಿಮಗೆ ಅಯ್ಯೋ ಪಾಪನೂ ಅನಿಸುತ್ತೆ.... ಒಂದೊಳ್ಳೆಯ ಊಟದ ಮಹತ್ವ ಹಾಸ್ಟೆಲ್‌ ಜೀವನ ಅನುಭವಿಸಿದವರಿಗೆ ಖಂಡಿತ ಗೊತ್ತಿರುತ್ತದೆ.

ಈ ವೀಡಿಯೋದಲ್ಲಿ ಒಬ್ಬ ಯುವಕ ಮದುವೆ ಹುಡುಗನ ಬಳಿ ಬಂದು ಅವನ ಬಳಿ ಹೇಳುತ್ತಾನೆ 'ನನಗೆ ನೀವು ಯಾರು, ನಿಮ್ಮನ್ನು ಮದುವೆಯಾಗುತ್ತಿರುವ ಹುಡುಗಿ ಯಾರು ಏನೂ ಗೊತ್ತಿಲ್ಲ, ಇಲ್ಲಿ ಯಾರ ಪರಿಚಯವೂ ನನಗಿಲ್ಲ, ಹಾಸ್ಟೆಲ್‌ನಲ್ಲಿದ್ದೆ ತುಂಬಾ ಹಸಿವಾಗುತ್ತಿತ್ತು, ಒಂದೊಳ್ಳೆ ಊಟ ಸಿಗುತ್ತೆ ಅಂತ ಬಂದೆ. ಹಾಗೇ ಬಂದು ತಿಂದು ಹೋಗಬಹುದಿತ್ತು, ಆದರೆ ನಿಮಗೆ ಹೇಳಬೇಕೆನಿಸಿತ್ತು, ಹಾಗಾಗಿ ಹೇಳ್ತಾ ಇದ್ದೀನಿ, ನಾನು ಊಟ ಮಾಡುವುದರಿಂದ ನಿಮಗೇನು ಸಮಸ್ಯೆಯಿಲ್ಲ ತಾನೆ?' ಎಂದು ಕೇಳಿದ್ದೇನೆ.

ಅದಕ್ಕೆ ವರ 'ಇಲ್ಲ, ನನಗೇನೂ ಅಭ್ಯಂತರವಿಲ್ಲ' ಎಂದು ಹೇಳುತ್ತಾನೆ. ಅಷ್ಟು ಮಾತ್ರವಲ್ಲ ನಿನ್ನ ಹಾಸ್ಟೆಲ್‌ ಫ್ರೆಂಡ್ಸ್‌ಗೂ ಆಹಾರ ತೆಗೆದುಕೊಂಡು ಹೋಗು ಎಂದು ಹೇಳುತ್ತಾನೆ. ಆ ಹಾಸ್ಟೆಲ್‌ ಹುಡುಗ ಆ ನವಜೋಡಿಗೆ ಶುಭಕೋರುತ್ತಾನೆ.

ಹಾಸ್ಟೆಲ್‌ ಹುಡುಗ ಮದುಮಗನ ಜೊತೆ ತಾನು ಬಂದಿರುವ ಉದ್ದೇಶ ಹೇಳುವಾಗ ವೀಡಿಯೋ ಕೂಡ ಮಾಡಿದ್ದಾನೆ. ಇದೀಗ ಈ ವೀಡಿಯೋ ಸಿಕ್ಕಾಪಟ್ಟೆ ವೈರಲ್‌ ಆಗಿದೆ.

ಹಾಸ್ಟೆಲ್‌ ಲೈಫ್‌ ಒಂಥರಾ ಸ್ಪೆಷಲ್‌, ಜೀವನದ ಹಲವು ಪಾಠಗಳನ್ನು ಕಲಿಸುತ್ತದೆ. ಮನೆಯಲ್ಲಿದ್ದು ಶಾಲಾ-ಕಾಲೇಜಿಗೆ ಹೋಗುವುದಕ್ಕೂ, ಹಾಸ್ಟೆಲ್‌ನಲ್ಲಿ ಓದುವುದಕ್ಕೂ ತುಂಬಾನೇ ವ್ಯತ್ಯಾಸವಿರುತ್ತದೆ. ಮನೆಯಲ್ಲಿ ಅಮ್ಮ ನಮಗೆ ಇಷ್ಟವಾದ ಊಟ ಮಾಡಿ ಬಡಿಸುತ್ತಾಳೆ, ಅವಳು ಮಾಡಿದ ಊಟ ಇಷ್ಟವಾಗದಿದ್ದರೆ ನಂಗೆ ಊಟ ಬೇಡ ಅಂತ ಕೊಬ್ಬು ತೋರಿಸುತ್ತೇವೆ.

ಆದರೆ ಹಾಸ್ಟೆಲ್‌ನಲ್ಲಿದ್ದರೆ ಅವರು ಕೊಟ್ಟದ್ದು ತಿನ್ನಬೇಕು. ಇಷ್ಟ ಇಲ್ಲ ಅಂತ ಕೂತ್ರೆ ನೀರು ಕುಡಿದು ಬದುಕಬೇಕು. ಇನ್ನು ಅವರು ಕೂಡುವ ಆಹಾರ ಅವರಿಗೇ ಇಷ್ಟವಾಗಬೇಕು, ಆ ಒಂದೇ ರುಚಿ ಅಥವಾ ಉಪ್ಪು, ಉಳಿ, ಖಾರ ಅಂತ ಏನೂ ಇಲ್ಲದ ಊಟ, ಹಾಸ್ಟೆಲ್ ಪಾಡು ಹಾಸ್ಟೆಲ್‌ನಲ್ಲಿದ್ದವರಿಗಷ್ಟೇ ಗೊತ್ತು...

ಆದ್ದರಿಂದಲೇ ಈ ಹುಡುಗನ ವೀಡಿಯೋ ಅಷ್ಟು ವೈರಲ್ ಆಗಿರಬಹುದು.

ನೀವು ಹಾಸ್ಟೆಲ್‌ನಲ್ಲಿದ್ದಾಗ ಈ ರೀತಿಯ ಏನಾದರೂ ಕೀಟಲೆ ಮಾಡಿದ್ದರೆ ಕಮೆಂಟ್‌ ಮಾಡುವ ಮೂಲಕ ನಿಮ್ಮ ಅನುಭವ ಹಂಚಿಕೊಳ್ಳಿ...